Maʻi Suka—“O se Maʻi e Oti ai e Iloagatā”

I LE 21 o ona tausaga, na oo ai iā Ken le lagona o le fia inu soo. Sa oo foʻi iā te ia le tulaga o le tulaʻi soo, pe ā ma le taʻi 20 minute ma tulaʻi. E leʻi umi ae amata ona lagona e Ken le pei e mamafa ona vae ma ona lima. E na te lagonaina le vaivai i taimi uma, ma ua amata foʻi ona puaoa lana vaai.

Na iai se suiga tele ina ua maua o ia i le fulū. Ina ua oo atu e vaai le fomaʻi, na mautinoa ai le gasegase o Ken, e lē na o le fulū ae ua maua o ia i le maʻi suka (diabetes mellitus) o le Ituaiga 1 (Type 1). O lenei gasegase, ua faalavelave ai i gaoioiga a le tino i le faaaogāina o mea o loo manaʻomia e le tino, aemaise lava le suka i le toto e taʻu o le glucose. E ono vaiaso sa taofia ai Ken i le falemaʻi ona faatoʻā toe foʻi lea o le suka i lona toto i se tulaga lelei.

Ua silia nei ma le 50 tausaga talu ona tupu lenā mea, ma ua faaleleia atili togafitiga a o faagasolo ia tausaga. Peitaʻi, o loo maua pea Ken i le maʻi suka, ma e lē na o ia o loo aafia i lea gasegase. I le lalolagi aoao, pe ā ma le 140 miliona tagata ua aafia i lea gasegase, ma e tusa ai ma le Faalapotopotoga o le Soifua Mālōlōina i le Lalolagi, e oo atu i le 2025, ua ono faaluaina lea fuainumera. Ua talafeagai ai la ona popole i latou e suʻesuʻe faapitoa i lea gasegase. Ua faapea mai le faatonu lagolago o se nofoaga autū o togafitiga mo lea gasegase i le Iunaite Setete, o Dr. Robin S. Goland: “A fua atu i le aofaʻi o tagata ua maua ai, atonu o le amataga lea o se faamaʻi tele.”

 Seʻi tagaʻi ane i ni lipoti pupuu o loo taʻua i lalo mai le lalolagi aoao.

AUSETALIA: E tusa ai ma le Matagaluega Faavaomalo o Maʻi Suka i Ausetalia, “ua avea le maʻi suka ma faafitauli tau i le soifua mālōlōina e aumaia ai se luʻi e sili ona tugā o le senituri lona 21.”

IUNAITE SETETE: E tusa ma le 16 miliona tagata ua mamaʻi ai, ma pe tusa ma le 800,000 maʻi fou i tausaga taʻitasi. E faitau miliona i latou ua maua ai ae e leʻi iloa.

INITIA: A itiiti ifo, e pe ā ma le 30 miliona tagata ua maua i le maʻi suka. Ua faapea mai se tasi fomaʻi: “I le 15 tausaga ua tuanaʻi, e seāseā iai nisi e i lalo ifo o le 40 tausaga lo latou matutua e maua i le maʻi suka. Ae i aso nei, o le ʻafa o ē aafia ai ua iai i tausaga na.”

SIGAPOA: E toetoe o le tasi vaetolu o i latou e i le va o le 30 ma le 69 tausaga ua maua i le maʻi suka. O le toʻatele o tamaiti, o nisi e sefulu tausaga le laiti, ae ua maua ai.

Ua sili atu ona faafaigatā le togafitia o lea gasegase ona e mafai ona umi se taimi o maʻi ai se tagata ae faatoʻā iloa mulimuli ane e maua ai. Ua taʻua e le mekasini o le Asiaweek: “E masani lava ona lē iloa ua maua se tasi i le maʻi suka talu ai e leai se aafiaga tele i le taimi faatoʻā amata ai ona maʻi.” O le māfuaaga lenā ua taʻu ai le maʻi suka o le maʻi e oti ai e iloagatā.

Pe a fua atu i le taatele ma le tugā o lea gasegase, o le a talanoaina i mataupu o loo sosoo mai ia fesili nei:

● O le ā le māfuaaga o le maʻi suka?

● E mafai faapefea ona feagai i latou ua maua i lea gasegase ma lo latou tulaga?

[Pusa/Ata i le itulau 4]

Le Māfuaaga o le Igoa

O le upu “diabetes mellitus,” lea e taʻu faa-Samoa o le maʻi suka, e sau mai le upu Eleni o lona uiga “mimitiina” ma le upu Latina e uiga i le “suamalie pei o le meli.” Ua fetaui nei upu e faamatala ai lea maʻi, ona a inuina se vai e se tagata e maua i lea gasegase, e televave le malaga atu a le vai mai i lona fofoga, ma agaʻi atu i lalo, ma toe foʻi ese atu mai le tino, e peiseaʻī o loo mitiia ese atu mai le tino. E lē gata i lenā, e tele se suka o loo iai i le feʻaulata a le tagata e maua ai i lea gasegase. O le mea moni, a o leʻi maua ni faiga e suʻe ai po ua aafia se tasi i le suka, o se auala sa iloa ai, o le sasaaina lea o le feʻaulata a se tasi, i autafa o se faamoega o loi. Afai e lolofi atu i ai loi, o lona uiga la o loo iai le suka.