O se Luʻi le Togafitia

“E leai se maʻi suka e lelei. E faigatā uma.”—Anne Daly, Faalapotopotoga o Maʻi Suka i Amerika.

“UA MAUA mai i lou toto lea na ave e suʻe ni tulaga e matuā faalētonu lava. Ua manaʻomia ona faia loa ni ou togafitiga.” Na matuā faateʻia Tepora i ia upu a le fomaʻi. Ua faapea mai Tepora: “E alu lenā pō o oʻu mafaufau e faapea, atonu e sesē le falesuʻetoto. Na ou faapea ifo iā te aʻu lava, ou te lē maʻi.”

Sa manatu Tepora e pei foʻi o le toʻatele o tagata e faapea, o loo lelei lona soifua mālōlōina, ma na ia lē amanaʻia ai ni tulaga sa faalētonu pea i lana faalogona. Sa ia manatu, e ala ona ia fia inu soo ona o fualaau o loo ia inuina. Na ia manatu foʻi, ua māfua lona tulaʻi soo ona o le tele o lona inu vai. Ae ā lona lagona lē lavā? Ia, ua iai ea se tinā e fai galuega e na te lē lagona le lē lavā?

Ae o lona toto na ave e suʻe na maua mai ai le māfuaaga o ia faalogona, ona ua aafia o ia i le maʻi suka. Sa faigatā ona talia e Tepora lea faaiʻuga. Na faapea mai o ia: “Ou te leʻi taʻuina i se isi loʻu maʻi. A oo i le pō, pe a momoe uma loʻu aiga, ou te sioa i le pogisa ma le maligi o oʻu loimata.” O nisi tagata e pei o Tepora, ina ua latou iloa ane ua maua i le maʻi suka, e matuā oo iā i latou le mau faalogona eseese, e  aofia ai le mafatia faapea foʻi ma le ita. Ua faapea mai Karen: “Sa oo iā te aʻu se vaitaimi e na o le tagi lava ona o loʻu lē ioeina o lea manatu.”

O ni faalogona masani ia e oo ane i se tulaga e foliga mai sa lē tatau ona oo i ai. Peitaʻi ane, e mafai ona feagai ma le manuia tagata ma le maʻi suka pe a tuuina atu iā i latou le lagolagosua. Ua faapea mai Karen: “Na fesoasoani mai le tamaʻitaʻi tausimaʻi na vaaia aʻu i le feagai ai ma loʻu maʻi. Na ia faapea mai iā te aʻu e lē afāina pe a ou tagi. Na avea lea auala e faaali atu ai oʻu faalogona ma tulaga e fesoasoani ai ina ia ou taliaina loʻu tulaga.”

Le Pogai e Faigatā Ai

Ua taʻua le maʻi suka o se “faalētonu i le malosi na te faagaoioia le ola,” ma ua fetaui tonu lea faaupuga. Pe a oo ina lē mafai e le tino ona faaaogā le suka, ua oo foʻi ina faalētonu isi o galuega a le tino, ma e mafai ona aafia ai le ola. Ua faapea mai Dr. Harvey Katzeff: “E lē o le maʻi suka e feoti ai tagata, ae o ni faafitauli e māfua mai i le maʻi suka. O loo lelei ona matou faatautaia le puipuia mai i ia faafitauli, ae e lē o lelei lo matou togafitia o ia faafitauli pe a oo ina tutupu.” *

Pe e iai se faamoemoe mo i latou ua maua i le maʻi suka? Ioe, pe afai ua latou iloaina le faigatā o le maʻi ma amataina se polokalame e togafitia ai. *

Taumafa ma le Faamalositino

E ui e lē mafai ona taofia le maua o se tasi i le maʻi suka o le Ituaiga 1, ae o loo suʻesuʻeina e saienitisi vala tuufaasolo mai i mātua lea e lamatia ai se tasi, ma o loo taumafai e saʻilia ni auala e taofia ai le osofaʻia o sela o le atealii e sela e puipuia le tino. (Tagaʻi i le pusa “Le Vaega a le Glucose,” i le itulau e 8.) Ua taʻua i le tusi  Diabetes—Caring for Your Emotions as Well as Your Health: “E feoloolo le tulaga o le maʻi suka ituaiga 2. E toʻatele i latou e ono maua i lea maʻi e tuufaasolo mai i o latou mātua, ua latou ʻalofia lea tulaga e ala i le taumafa i taumafataga paleni ma le faia o faamalositino faifai pea, ma faatumauina lo latou soifua mālōlōina lelei, ma tausi ia talafeagai le mamafa o le tino.” *

Ua faamamafaina mai e le mekasini o le Journal of the American Medical Association le tāua o le faamalositino i se lipoti e faatatau i se sailiiliga tele na faia e faatatau i fafine. Na maua i sailiiliga e faapea o le “faia o se faamalositino e tusa lava pe puupuu, e faateleina ai le suka e faaaogāina [e sela o le tino] mo le silia i le 24 itula, e ala i le fesoasoani a le insulin (o se ituaiga homone).” O le faaiʻuga e tusa ai ma lea lipoti e faapea, “o le savali ma le matuā faagaoioia o le tino, e iai ni sootaga mo le faaitiitia o le lamatiaga o le maua i le maʻi suka ituaiga 2.” Ua fautua mai e le ʻausuʻesuʻe le faia o se faamalositino a itiiti ifo pe ā ma le 30 minute i le tele o aso, pe afai e lē o aso uma o le vaiaso. E aofia ai se faamalositino faigofie e pei o le savali, lea e fai mai le American Diabetes Association Complete Guide to Diabetes, “atonu o le faamalositino lea e sili lona lelei, saogalemu, ma le taugofie.”

Peitaʻi ane, e ao ona faatonu ma siakiina e se fomaʻi, ia faamalositino a i latou e maua i le maʻi suka. O se tasi o māfuaaga ona e mafai ona faaleagaina e le maʻi suka alātoto ma neula, ma aafia atoa ai le faagasologa o le toto ma lagona o vaega o le tino. O lea, afai e maʻosia le vae (o le tagata maʻi suka), e faigofie lava ona aloua, ma oo ai ina papala, ma afai e lē vave ona togafitia, e mafai ona oo atu i se tulaga e tatau ai ona tipi motu le vae. *

Ae ui i lea, o le a aogā le faamalositino faifai pea i se tasi e faatautaia ai lona maʻi suka. Ua faapea mai le ADA Complete Guide: “O le suʻesuʻe atili o tagata i aogā o le faamalositino, ua faapena foʻi ona atili ai ona tele ni tala lelei e maua mai ai e tusa ma le aogā o le faamalositino.”

Togafitiga e Faaaogā ai le Insulin

O le toʻatele o i latou e maʻi suka, e ao ona faaopoopo i la latou polokalame o le taumafa tatau ma le faamalositino, ia le fuaina o le maualuga o lo latou suka i aso taʻitasi ma faia tui o le insulin. Ua mafai nei e nisi e maua i le maʻi suka Ituaiga 2, ona taofia le faaaogāina o le insulin mo sina taimi, talu ai ona ua feoloolo lo latou soifua mālōlōina ona o le vaai lelei o a latou meatausami faapea ma se faasologa lelei o le faamalositino. * Ua iloa e Karen, o lē e maua i le maʻi suka Ituaiga 1,  o le faamalositino e faateleina ai le aogā o le insulin lea o loo ia tuiina ai o ia. O lea la, ua mafai ona ia faaitiitia e tusa ma le 20 pasene le insulin e manaʻomia i aso taʻitasi.

Peitaʻi ane, afai e manaʻomia ona faaaogā le insulin, e lē tatau ona lotovaivai ai le tagata maʻi suka. Ua faapea mai Mary Ann, o se teine tausimaʻi pasi e tausia le toʻatele o tagata maʻi suka: “E lē faapea ua ala ona e manaʻomia le insulin ona ua lē taulau au taumafaiga. Po o le ā lava le ituaiga o maʻi suka e te maua ai, afai e te faatautaia ma le faaeteete le suka i lou toto, o le a e faaitiitia ai isi faafitauli tau i le soifua mālōlōina mulimuli ane.” O se saʻiliʻiliga talu ai nei o tagata e maua i le maʻi suka Ituaiga 1, na iloa ai e faapea, o i latou e matuā faaeteete i le maualuga o le suka i o latou toto “na matuā faaitiitia foʻi le āfaina i faamaʻi o mata, o fatugaʻo, ma neula.” O se faataʻitaʻiga, na faaitiitia e tusa ma le 76 pasene le ono maua e tagata se faamaʻi e aafia ai mata! E faapena foʻi aogā e oo i tagata e maua i le maʻi suka Ituaiga 2 pe afai latou te faaeteete i le tele o le suka i o latou toto.

Ua aofia ai i mea e masani ona faaaogā e tagata maʻi suka, ia tui ma peni e tui ai le insulin, ma o loo iai nila e sili ona ninii i ia tui ma peni ina ia faaitiitia ai le tigā o le tuiina o le insulin. Ua toe faamatala mai foʻi e Mary Anne faapea: “O le tulaga masani lava ia, o le tui muamua lava e sili ona tigā. O le toʻatele lava o maʻi e fai mai, e latou te lē lagonaina se mea i isi tui mulimuli ane.” O isi ituaiga o tui e aofia ai tui e otometi ona tui ai le paʻu e aunoa ma le lagonaina o se tigā, o jet injectors e fanaina le insulin e ala i le paʻu o le tino, ma infusers e faaaogā ai se faagaau e fafaga ai le insulin i le tino mo le lua po o le tolu aso. O le pamu insulin, e tutusa lona lapoʻa ma se tamaʻi telefoni feaveaʻi, ma ua fiafia i ai le toʻatele o tagata e faaaogā i lenei vaitaimi. E fafaga mālie atu e lenei pamu ua faapolokalameina, le insulin i le tino e ala i se faagaau e tusa ai ma le mea o loo manaʻomia e le tino i aso taʻitasi.

 Faaauau Ona Aʻoaʻoina

O lea la, e leai se togafitiga e tasi e aogā mo le maʻi suka. Pe a sailia se togafitiga, e ao i le tagata ona manatunatu i vala eseese ina ia faia ai se filifiliga e fetaui ma ia lava. Ua fai mai Mary Ann: “E tusa lava po o loo vaavaaia oe e fomaʻi, o oe lava e faatautaia lou togafitiga.” O le mea moni, e tusa ai ma le mekasini o le Diabetes Care: “A aunoa ma le aʻoaʻoina ma taumafaiga faifai pea a le tagata lava ia, e mafai ona manatu i se togafitiga faafomaʻi o le maʻi suka e faapea, o se tausiga e lē lelei ma e lē o tusa ai ma tulaga tatau.”

O le tele lava e malamalama ai le tagata maʻi suka i lona maʻi, o le tele foʻi lenā o lona lava saunia e faatautaia lona lava soifua mālōlōina ma faaleleia lona soifua faafualoaina ma le mālōlōina lelei. Peitaʻi ane, ina ia maua aʻoaʻoga e aogā, e manaʻomia ai le onosaʻi. Ua faamatala mai e le tusi Diabetes—Caring for Your Emotions as Well as Your Health e faapea: “Afai e te taumafai e aʻoaʻoina mea uma i le taimi e tasi, e tauau ina e fenuminumiaʻi ma lē mafai ai ona faaaogā lelei mea ua e aʻoaʻoina. E lē gata i lea, e lē o tusi ma ni pepa e mafai ona mauaina mai ai le tele o ni faamatalaga aogā. Ae e faalagolago i le . . . fesuisuiaʻi o le suka i lou toto i suiga o lou olaga. E mafai ona e iloa lea tulaga mai i mea e tutupu iā te oe i le faagasologa o taimi.”

O se faataʻitaʻiga, e ala i le siaki ma le faaeteete o lou toto, o le a e iloa ai le auala e tali atu ai lou tino i omiga, lea e māfua ai ona maualuga le suka i lou toto. Ua faamatala mai e Ken e faapea: “Ua 50 tausaga talu ona ou feagai ai ma loʻu maʻi suka, ma ua ou iloa le mea o loo taʻu mai e loʻu tino!” Ua aogā iā Ken le “amanaʻia” o le mea o loo taʻu atu e lona tino, auā o loo mafai pea ona faigaluega Ken e ui ua silia ma le 70 ona tausaga!

Le Tāua o le Lagolagosua a le Aiga

E taūa foʻi le lagolagosua a se aiga i le togafitiga o le maʻi suka. O le mea moni, e tusa ai ma se tasi faamaumauga, “atonu o se vala e tāua tele i le faatautaia o le maʻi suka o tamaiti ma talavou matutua, o le tulaga o le olaga o se aiga.”

E aogā i tagata o le aiga ona malamalama i le maʻi suka, ma auauaʻi e ō ma le tagata maʻi i taimi e alu atu ai e vaai le fomaʻi. O le a fesoasoani le iai o lenā malamalama ina ia latou lagolagosua atu ai, ma iloa āuga leaga o le maʻi ma le mea e ao ona fai i ai. O le avā a Ted, o Barbara, na maʻi suka talu mai le fa o ona tausaga, ma ua faapea mai Ted: “Ou te iloa lelei lava ua maulalo tele le suka o Barbara. E faalētautala a o fai se talanoaga. E tafe lona afu ma e teʻi lava ua ita e aunoa ma se māfuaaga. E tuai foʻi lana gaoioi.”

E faapena foʻi le mea e fai e Katerina, le avā a Ken. Pe a ia iloa atu ua pei e sesega mai foliga o Ken ma afu, ma ua vaaia foʻi se suiga i ona uiga, ona ia tofoina lea o ia i se faaopoopo faamatematika faigofie. E iloa e Katerina i le fenuminumiaʻi o le tali a Ken ua tatau loa ona lē toe faalagolago atu iā te ia i se filifiliga ae e ao loa ona gaoioi agaʻi i le tulaga lea ua tulaʻi mai. Ua matuā talisapaia uma e Ken ma Barbara ia ā la paaga faaipoipo e malamalama ma e la te alolofa ma faamoemoe iā i laʻua. *

O se aiga e alolofa, e ao ona taumafai e avatu le lagolagosua, ia agaalofa ma onosaʻi, o uiga ia e fesoasoani i le tagata maʻi e feagai ai ma luʻi o le olaga ma sologa lelei ai lo latou gasegase. Na faailoa atu e le tane a Karen iā te ia lona alofa, o se mea lea na aogā tele. Ua faapea mai Karen: “Na faapea mai Nigel, ‘E manaʻomia e tagata ona aai ma feinu ina ia ola, e faapena foʻi oe, ae faaopoopo atu la i ai ma si au insulin.’ O na upu māfana ma aogā, sa faalaeiauina ai aʻu.”

E ao foʻi ona malamalama le aiga ma uō e faapea, e mafai ona aafia uiga o le tagata i le fesuisuiaʻi o le maualuga o le suka. Ua faapea mai se tasi fafine: “A oo ina paʻū loʻu suka, ou te lē fia tautala, e lagona le fesouaʻiina o oʻu faalogona, e oo mai le itagofie ma le fiu. O lea, ona o oʻu uiga faatamaitiiti ua ou toe faanoanoa ai lava. Ae e ese le aogā o loʻu iloa o loo malamalama isi i le māfuaaga e faapea ai oʻu faalogona, ma o loo oʻu taumafai ia pulea.”

E mafai ona taulau i le feagai ai ma le maʻi suka, aemaise lava pe afai e galulue faatasi tagata maʻi suka ma ona aiga ma ana uō. E aogā foʻi mataupu silisili mai le Tusi Paia. E faapefea?

[Faaopoopoga i lalo]

[Pusa/Ata i le itulau 6]

Pe e Maua ai Tamaiti?

“Ua avea le maʻi suka ma maʻi o ē lāiti,” o le faamatalaga lenā a Dr. Arthur Rubenstein, o se fomaʻi faapitoa (endocrinologist), ma o le pule foʻi o le Aʻoga Faafomaʻi o le Mauga o Siona i Niu Ioka. O le mea moni ua faasolosolo ina lāiti tausaga o ē ua maua i le maʻi suka. O le faamatalaga lenei a Dr. Robin S. Goland o se fomaʻi faapitoa, e faatatau i le maʻi suka o le Ituaiga 2: “I le sefulu tausaga ua tuanaʻi, na matou fai atu ai i ē aʻoʻoga faafomaʻi e faapea, e latou te lē vaaia se isi e i lalo ifo o le 40 tausaga ua maua i lenei maʻi. Ae i le taimi nei ua vaaia tamaiti e laiti ifo i le 10 tausaga ua maua ai.”

Aiseā ua faatupulaʻia ai talavou e maʻi suka? O isi taimi, e faasolo mai i mātua. Ae e iai foʻi se vaega o le lapoʻa o le tino, ma le siʻosiʻomaga, e aafia ai. I le luasefulu tausaga faatoʻā mavae atu, ua faaluaina ai le aofaʻiga o tamaiti ua lapopoʻa tele. O le ā le māfuaaga o lea tulaga? Ua faamatala mai e Dr. William Dietz, mai le Nofoaga Autū mo le Puipuia mai Faamaʻi a Amerika, e faapea: “A o faagasolo le 20 tausaga lea ua faatoʻā mavae atu, ua iai ni suiga i le auala ua taumamafa ai, faapea ma gaoioiga e fai. E aofia ai le taumamafa i faleʻaiga; o le faateleina o i latou e lē aai i le taeao; le faateleina o le inu i mea suamalie ma aai i mea taumafa e maua vave (fast foods); ua faaitiitia le [taimi o taaloga] i aʻoga; ma le lē toe faia o ni mālōlōga i le aʻoga.”

O le maʻi suka, e lē mafai ona toe aveesea mai se tagata pe a maua ai. O lea la, e lelei ona mulimuli i le fautuaga a se talavou e maʻi suka, na faapea mai: “ʻAlo ese ma meaʻai e leai se aogā i le tino, ma tōʻaga e faagaoioi lou tino.”

 [Pusa/Ata i le itulau 8, 9]

Le Vaega a le Glucose

O le glucose e na te fafagaina le faitau tiliona o sela o le tino. Ae ina ia oo atu i totonu o sela, e manaʻomia ai se “auala” ma o lea auala o le insulin, o se vailaau e maua mai i le atealii o le tino. I le maʻi suka Ituaiga 1, e lē o gaosia e le tino le insulin e manaʻomia. Ae i le maʻi suka Ituaiga 2, o loo gaosia e le tino le insulin, ae e lē lava. * E lē gata i lea, i le Ituaiga 2, e lē faatagaina e sela o le tino le oo atu i totonu o le insulin. Ae e tutusa lava le taunuuga o na ituaiga o maʻi suka e lua: e lē o mafai ona fafagaina sela o le tino, ma ua oo ai ina matuā maualuga lava le suka i le toto.

I le maʻi suka Ituaiga 1, e osofaʻia ai e le faiga e puipuia le tino mai faamaʻi, ia sela o le atealii lea o loo maua mai ai le insulin. O nisi o vala e māfua ai ona osofaʻi atu le faiga lea e puipuia le tino mai faamaʻi, ona o vairusi, po o vailaau oona, ma nisi foʻi o vai ma fualaau. E iai foʻi se vaega e māfua mai ona o le tupuaga o le tagata, auā e masani ona tuufaasolo i se aiga le maʻi suka Ituaiga 1, ma taatele i tagata papaʻe.

Ae i le maʻi suka Ituaiga 2, e sili atu ona malosi  le sosolo i totonu o aiga, ma e toʻatele atu i latou e lē o ni tagata papaʻe e maua ai. O tagata Apoliki o Ausetalia faapea ma Initia Amerika, e tele ina aafia i lenei maʻi, ma i le lalolagi atoa, ua sili atu ona toʻatele Initia Amerika ua maua i le maʻi suka Ituaiga 2. O loo saʻiliʻilia e tagata suʻesuʻe le sootaga o le sosolo o lea maʻi i le aiga ma le lapoʻa tele, faapea ma le auala ua avea ai le tele naʻuā o le gaʻo i le tino ma mea o le a māfua ai ona teena e le tino le insulin i tagata e ono maua i le maʻi suka. * O le maʻi suka Ituaiga 2 e tele ina maua ai i latou ua silia ma le 40 tausaga, e ese ai mai le Ituaiga 1.

[Faaopoopoga i lalo]

[Ata]

Vaega ninii o le glucose

[Ē Ana le Ata]

Courtesy: Pacific Northwest National Laboratory

[Pusa i le itulau 9]

Le Vaega e Faia e le Atealii

O tua tonu lava o le puta o loo iai le atealii po o le atepili, ma e talitutusa lona telē ma se faʻi. E tusa ai ma le tusi The Unofficial Guide to Living With Diabetes, “e faia e le atealii e mālōlōina lelei se galuega faapaleni, ma o se galuega e faifai pea, i le faatautaia o le maualuga o le suka i le toto i se tulaga e sologa lelei, e ala lea i le fuafuaina o le insulin ua talafeagai ma le oso i luga o le suka, po o le paʻū foʻi, a o faagasolo le aso.” Ua iai ni sela faapitoa (beta cells) i le atealii ua maua mai ai lea homone o le insulin.

Pe afai e lē lava le insulin o loo maua mai i ia sela, o le a maualuga le glucose i le toto. Ae a tele foʻi le insulin, ona maulalo lea o le glucose i le toto. E galulue faatasi le atealii ma le ate. E fesoasoani le ate i le faatautaia o le tele o le suka i le toto e ala lea i le teuina o le glucose, pe a tele, e avea ma glycogen (o se ituaiga o suka). Pe a manaʻomia e le atealii, ona toe liua lea o le glycogen e le ate e fai ma glucose ina ia mafai ona faaaogāina e le tino.

[Pusa/​Ata i le itulau 9]

Le Vaega a le Suka

O le manatu sesē e taatele e faapea, o le tele o le ʻai mea suamalie ua māfua ai ona maua i le maʻi suka. Ae ua faaalia mai i faamaoniga faafomaʻi e faapea, e tusa lava po o le ā le tele o le ʻai ma inu i mea suamalie, ae afai e puta se tagata, ua faapena foʻi ona faateleina le ono maua i le maʻi suka pe afai e tuufaasolo mai i le aiga. Ae o le tele o le suka e taumafa e se tasi, e lē lelei mo le soifua mālōlōina, ona e leai se aogā e maua mai ai ma e oo ai ina puta tele.

O le isi manatu sesē e faapea, o tagata maʻi suka e faananau i mea suamalie. O le mea moni, e leai lava se eseesega o i latou ma isi tagata. Afai e lē vaavaaia faalelei le suka o le tagata maʻi suka, e oo ai ina lagona le fia taumafa, ae lē faapea o le suka lea ua manaʻo i ai. E mafai e ē maʻi suka ona taumafa i mea suamalie, ae e ao ona fua ia ōgatasi ma la latou polokalame o taumafa tatau.

Ua faaalia mai i saʻiliʻiliga talu ai nei e faapea, ona o le fructose (suka) e maua mai i fualaau taumafa mata ma fualaau faisua, a tele la le taumafa i ai, ona oo lea ina teena e le tino le insulin, ma e mafai foʻi ona maua ai meaola i le maʻi suka, e tusa lava pe lapopoʻa pe leai.

[Siata/Ata i le itulau 8, 9]

Faamatalaga Faigofie o le Maʻi Suka

ATEALII

Tagata Malosi

Pe a māeʻa se taumafataga, o le a tele le insulin e tuuina mai e le atealii e faafetaui i le tele o le suka lea ua iai i le toto

E pipii atu vaega ninii o le insulin i mea ua taʻua o receptors i sela o maso ma isi sela. E amata ai ona faagaoioia portals po o faitotoʻa o sela ma mafai ai loa ona ulu atu vaega ninii o le glucose i sela o le maso

O sela o maso e mimitiina le glucose ma latou faaaogāina. Ua faapena ai ona toe sologa lelei le tulaga o le glucose i le toto

Maʻi Suka Ituaiga 1

Ua osofaʻia e le faiga e puipuia ai le tino mai faamaʻi ia le atealii lea e maua mai ai le insulin i ona sela. O le mea ua tupu, ua lē toe maua mai ai se insulin

A leai se insulin e lē mafai e vaega ninii o le glucose ona oo atu i sela o le tino

Maʻi Suka Ituaiga 2

I le tele o taimi, e lē o lava le insulin o loo maua mai i le atealii

Pe afai ae e lē talia maia e receptors le insulin, e lē mafai ona faagaoioia portals e mimitiina le glucose mai le toto

Ua faateleina le glucose i le toto ma faafaigatā ai ona faia gaoioiga tāua a le tino ma faaleagaina ai foʻi puipui o alātoto

[Siata]

(Tagaʻi i le lomiga mo le ata atoa)

Sela

Receptor

Portal

Insulin

Nucleus

Glucose

[Siata]

(Tagaʻi i le lomiga mo le ata atoa)

ALĀTOTO

Sela mūmū o le toto

Glucose

[Ē Ana le Ata]

Man: The Complete Encyclopedia of Illustration/J. G. Heck

[Ata i le itulau 7]

E tāua taumafa tatau mo i latou e maʻi suka

[Ata i le itulau 10]

E mafai e i latou e maʻi suka ona soifua e pei lava o isi tagata