O se Tusi Mai Sē e Pele

Na faatusaina le tusi Faalatalata Atu iā Ieova i se tusi mai sē e pele, e se tasi na ia faitauina lea tusi e mau i le setete o Niu Ioka, ma sa ia faapea mai: “E faagaeeina le loto e mataupu taʻitasi ma faatumu ai oe i le alofa mo Ieova.” Na ia faaopoopo mai: “Talu ai o lea ua māeʻa ona ou faitauina, ua ou manaʻo e toe faitau e pei lava o lea e faitau se tusi mai i sē tasi e sili ona pele iā te oe.” Seʻi tagaʻi foʻi i faamatalaga mai isi tagata.

Na faapea mai se tagata e faitauina le tusi mai Kansas: “Ou te matuā lagonaina loʻu faalatalata atu i loʻu Tamā faalelagi. E faatumulia loʻu loto i le alofa . . . ma ou te naunau e faitau atili i ai i taeao taʻitasi, ma o le a ou toe faitauina pea.”

Na tusi mai se fafine mai Maine e faapea: “Ua tele se sao o le tusi i loʻu talisapaia ma le iloaina o Ieova! Maʻeu se faamāfanafanaga o loo maua mai le faamatalaga o loo i le itulau e 74 e faapea: ‘Mo ē ua maliliu, e mautinoa lava le manatuaina o i latou e le Atua.’” O le lagona foʻi lenā o se tasi na tusi mai Alaska e faapea: “Na maligi oʻu loimata ona sa matuā pāʻia ai oʻu faalogona.” Na ia faaopoopo mai e faapea: “E mautinoa lava loʻu toe faitau ma toe suʻe pea i ai.”

E matou te talitonu o le a oo foʻi se lagona faapena iā te oe pe a e faitauina lenei tusi. O loo sosoo mataupu e tolu o loo faatomua ai le tusi ma ni vaega e fā ua vaevaeina ai. O ia vaega ua faaulutalaina ‘E Tele le Mana,’ ‘E Fiafia i le Faamasinotonu,’ ‘E Atamai Lona Finagalo,’ ma “O le Atua, o le Alofa Lava Ia.” O loo faaiʻuina i le mataupu ‘Ia Faalatalata Atu i le Atua, Ona Ia Faalatalata Mai Lea.’

E mafai ona e talosaga atu mo sau kopi e 320 itulau e ala i le faatumu o le kuponi o loo i lalo ma lafo mai i le tuatusi o loo iai po o le tuatusi saʻo o loo maua i le itulau e 5 o lenei mekasini.

□ E fia maua saʻu tusi Faalatalata Atu iā Ieova.

□ Faamolemole faafesootaʻi mai aʻu mo se suʻesuʻega faale-Tusi Paia i le aiga e aunoa ma se totogi.