Poleni—E Lamatia pe Ofoofogia?

TUSIA E LE TUSITALA O LE ALA MAI! I AUSETALIA

O LE mafatua, o le tagi ma le mageso o mata, faatasi ai ma le tafe mai o le isu, e taʻu mai ai i le faitau miliona o tagata, ua oo mai foʻi le tau e totogo ai mea. Ua māfua ona aafia o latou isu ma mata ona ua matuā tele lava poleni i le ʻea. Ua fuafuaina e le mekasini faafomaʻi o le BMJ e faapea, i atunuu tamaoaiga, pe a oo i le vaitaimi e sui ai le tau, e 1 mai le 6 tagata ua maua i lea tulaga ona o poleni mai i laau. E lē o se mea e ofo ai i lea fuainumera toʻatele ona o le tele naʻuā o poleni o loo faamatuu mai e laau i le ʻea.

O le fua faatatau a saienitisi e faapea, o vaomatua o loo i le tasi vaetolu o le vaega i saute o Suetena, lea e tele ai le laau o le paina, e tusa ma le 75,000 tone o poleni e faamatuu mai ai i tausaga taʻitasi. O se laau e taʻua o le ragweed, e miliona poleni e maua mai ai i le aso e tasi, ma ua avea lea ma fili o tagata i Amerika i Mātū e aafia ai i nei poleni. E avatu e le matagi poleni o lenei laau i le maualuga e tusa ma le 2 maila [3 kilomita] i luga aʻe o le laueleele, ma e 400 maila [600 kilomita] le mamao e oo atu ai i tai i le sami.

Ae o le ā le māfuaaga ua aafia ai isi tagata i poleni? Seʻi o tatou vaʻiliʻili totoʻa muamua poleni o laau ma vaavaai i le ofoofogia o le foafoaga o loo iai i nei fatu ninii ona tali ai lea o le fesili lenā.

O Fatu Ninii e Iai le Ola

Ua faapea mai le Encyclopædia Britannica: “O poleni, e maua mai lea i le vaega e taʻu o le anther, po o le totoga tane o le laau i laau e fai o latou fatu, ma e salalau atu i auala eseese (o le matagi, le vai, po o iniseti ma isi mea faapena) agaʻi i le pistil, po o le totoga fafine o le laau, ma feusuaʻi ai.”

I laau e fua mai fugālaau, e tolu vaega e faia aʻe ai le fatu poleni—o se vaega i totonu e faia aʻe i sela tane, ma vaega e lua e faia aʻe ai puipui po o le atigi o loo ufitia ai le fatu. E malō lava le atigi o le fatu ma e palagatā, e lē ila i ni vailaau malolosi po o se mea e vevela naʻuā. E ui i lea, o le tele lava o poleni e na o ni nai aso po o ni nai vaiaso foʻi e aogā ai. Ae o lona atigi malō, e faitau afe tausaga le umi e mafai ona lelei ai e aunoa ma le pala. O lea la, e tele fatu poleni o loo iai i le palapala. O le mea moni, e tele mea ua aʻoaʻoina e saienitisi e faatatau i le talaaga o laau i le lalolagi, e ala lea i le suʻesuʻeina o poleni ua eliina mai i le palapala.

O na faamatalaga e maufaatuatuaina, talu ai ona e mafai ona iloa le eseesega o ituaiga o fatu mai i foliga o o latou  atigi. E tofu lava le ituaiga o poleni ma lona atigi, e iai ituaiga lamolemole, o isi e maanuminumi, a o isi, e iai patu maai po o patu lamolemole. O lea la, e pei ona taʻua e Vaughn M. Bryant, Jr., o se polofesa i mataupu tau i le amataga o le tagata: “O lea la, ua pei lava poleni eseese o tositosi o le tamatamaʻilima o se tagata le maufaatuatuaina, ona e iloa mai ai ni mea.”

Le Auala e Feusuaʻi ai Laau

E paʻi loa se fatu poleni i se stigma o se fugālaau, o se vaega lea o le pistil (totoga fafine) i laau, ona tupu loa lea o se suiga i le fatu poleni ma oso mai ai se tātupu e pei o se faagaʻau, lea e tupu atu agaʻi i lalo i le ovule. E ō atu sela tane mai le fatu poleni e ala atu i le faagaʻau agaʻi i le ovule, ma maua mai ai se fatu ua uma ona faafeusuaʻi. Pe a oo ina matua le fatu lea, o le a mafai ona ola pe a paʻū i se eleele lelei.

E ui o isi laau e iai fatu e ola mai o ni laau tane po o laau fafine, o le tele lava o laau e fai fatu, e maua mai ai poleni ma e iai foʻi ma o latou ovule. E iai foʻi laau e faafeusuaʻi lava e ona poleni lona ovule; ae o isi laau, e faafeusuaʻi e laau e tutusa ma lona ituaiga, po o se ituaiga e talitutusa ma lona ituaiga. E tusa ai ma le faamatalaga a le Britannica e faatatau i se laau e faafeusuaʻi e ona poleni isi laau, “e masani ona ʻalofia le faafeusuaʻi i ona lava fatu e ala i le faasalalauina o ona poleni a o leʻi oo i le taimi e mafai ai e lona stigma ona taliaina, pe ina ua mavae foʻi le taimi e mafai ona taliaina ai.” O isi laau, e iai ni auala e iloa ai le eseesega o o latou poleni ma poleni mai i isi laau e tutusa o latou ituaiga. Pe afai e toe foʻi mai lona poleni iā te ia lava, e na te faalēaogāina, e ala lea i le taofia o le tupu mai o se tātupu o le poleni.

I se vaipanoa e tele ai ni laau eseese, o le a matuā lilofia le ʻea i poleni mai ia laau. E mafai faapefea e laau ona filifili le ituaiga o poleni lea e na te manaʻomia? O loo faaaogāina e isi laau malosiaga e pei o le matagi. Seʻi fai le laau o le paina ma faataʻitaʻiga.

Faaaogāina o le Matagi

O fua tane o le paina, e tutupu o ni taufuifui, ma pe a oo ina matutua, ona faasalalau mai lea o le tele ma tele o poleni i le matagi. Ua iloa e saienitisi e faapea, e galulue faatasi fua fafine o le paina ma lau o loo siʻosiʻoina e faatautaia le ʻea, ina ia mafai ai ona toe toʻulu ifo poleni o le paina o loo i le ʻea agaʻi i vaega e faafeusuaʻi ai fua o le paina. E mātalatala uga o le fua o le paina fafine ua matua, ma mafai ai e poleni ona sao atu i totonu.

O se tagata e suʻesuʻe e faatatau i ia mataupu e suafa  iā Karl J. Niklas, e tele ana saʻiliʻiliga na faia e tusa ai o le mataʻina o le faaaogāina o le matagi e fua o le paina. I le mekasini o le Scientific American na ia tusi mai ai e faapea: “Ua iloa mai i a matou suʻesuʻega le uiga ese o le fausaga o le fua o le paina i paina eseese, lea e eseese ai foʻi le auala e latou te faaaogāina ai le matagi . . . E faapena foʻi ona eseese o poleni i lo latou lapopoʻa, o o latou foliga mai, ma le mafiafia po o le manifinifi foʻi, ma mafai ai ona fegaoioiaʻi le poleni i le matagi i lana lava auala faapitoa.” O le ā se tele o le aogā o ia faiga? Ua faapea mai Niklas: “O le tele lava o fua o paina na matou suʻesuʻe i ai, e latou te filifilia o ‘latou’ poleni mai le ʻea, ae tuu poleni o isi ituaiga o laau.”

O le mea moni, e lē o laau uma e feusuaʻi e ala i le faaaogāina o le matagi—o se tulaga lea e fiafia ai i latou e aafia tele i poleni! O le tele lava o laau e faaaogā meaola e faasalalau ai o latou poleni.

Tosina i le Sua Suamalie

O laau e faafeusuaʻi e ala i manufelelei, o manu lāiti, ma iniseti, e masani ona latou faaaogāina mea e pei o ni mātau, ni vaega matuitui, po o ni mea piipii e faapipii ai poleni i tino o meaola o loo ʻaina o latou fua. O se faataʻitaʻiga, o se pī taufulufulua e taʻu o le bumblebee, e mafai ona pipii atu i ai ni fatu poleni pe ā ma le 15,000 pe a paʻi atu i se fugālaau!

O le mea moni, ua avea pī ma auala autū o loo faafeusuaʻi ai laau e iai fugālaau, ma ua tauia e laau ia pī e ala i le mauaina ai e pī o se sua suamalie ma poleni e aai ai. E mauaina e le pī le polotini, vaitamini, minerale, ma le gaʻo mai poleni. O se tulaga e matuā uiga ese le galulue soosootauʻau o pī ma fugālaau, ma e mafai ona  silia ma le 100 fugālaau e asiasi atu i ai se pī i sana malaga e tasi. E na te aoina mai poleni, po o le sua suamalie, po o mea uma ia e lua, mai i se ituaiga o fugālaau e tasi, seʻia oo ina lava po ua uma poleni ma sua mai i lea ituaiga o fugālaau. Ua maua ai se tulaga lelei i faiga tau feusuaʻiga a laau ona o lea amio mataʻina a le pī.

Faasee e Fugālaau

O nisi laau, e leai ni o latou fua suamalie, ae e latou te faia se faiga taufaasesē ina ia faafeusuaʻi ai i latou e iniseti. Seʻi fai ma faataʻitaʻiga le oketi samala (hammer orchid) lea e tupu i Ausetalia i Sisifo. O le lau e i le ogatotonu o le fugālaau o le oketi, e tai pei lava o se pī fafine o se tasi ituaiga o pī. O lea pī e lapoʻa ma e leai ni ona apaʻau. E iai foʻi i le oketi lea se vailaau e pei lava o le vailaau lea o loo iai i pī fafine o le ituaiga lea, e faatosina ai pī tane! O luga tonu lava o le lau lea o le fugālaau, o loo iai se ʻau ma ni tamaʻi taga ua tumu i poleni.

Pe a tosina aʻe se pī tane i le sasala atu o le manogi o le vailaau faatosina, e taumafai o ia e seʻi mai le lau o le fugālaau ma lele ese atu ma “ia.” Ae talu ai o loo mau le lau i le fugālaau, o le a fuli atu ai le pī ma le lau i tua, ma paʻūʻū atu ai loa i tamaʻi taga o loo tumu i poleni o le fugālaau. Ina ua iloa e le pī tane e lē o se pī fafine, o le a ia tuua le lau e tautau ai pea i le fugālaau, ma lele ese atu ma toe faapena foʻi ona toe faasesēina e se isi oketi samala. * Ae o le taimi la lea o le a ia faafeusuaʻi ai le oketi lea i le poleni o le fugālaau lea na ia asia muamua.

Ae afai o iai ni pī fafine o lea ituaiga o loo iai, e masani lava ona lele atu i ai le pī tane, ae tuu le oketi. O lea la, a o leʻi oo i le taimi e ō aʻe ai pī fafine mai le palapala i le mea sa iai, e amata ona fua le oketi samala mo ni nai vaiaso, ma maua ai se taimi e faafeusuaʻi ai e le pī tane.

Aiseā ua Aafia ai i Poleni?

Aiseā ua ala ai ona aafia tele nisi tagata i le poleni? Pe a ulu ni fatu poleni ninii i le isu, e mau i vaega susū o le isu o le tagata, ona oo atu ai lea i lona faaʻī, ma ia foloina pe toe tale mai i fafo. E masani lava ona lē afāina ai le tagata i lea tulaga. Ae i nisi taimi, e avea ia poleni ma mea e lagaʻia ai le faiga tau puipuiga o loo i le tino o le tagata.

Ua māfua lea tulaga ona o le polotini o loo iai i le poleni. Ua manatu le tino o le tagata e aafia i poleni e faapea, o le polotini o nisi poleni ua avea lea o se lamatiaga iā te ia. Ona o lea tulaga ua tali atu ai le tino e ala i le auina atu e nisi sela o le tino (mast cells), le tele lava o le vailaau e taʻua o le histamine. O le histamine lea e māfua ai ona matala ia faalapopoʻa alātoto ma mafai ai ona ofi atu i ai ni suāvai o le tino, lea e tele sela mo le puipuiga o le tino o loo maua ai. I le tulaga masani lava ia, o nei sela e puipuia le tino, e ō atu i le vaega o le tino o loo iai se lavea po o se maʻi ma fesoasoani i le tulieseina o siama. Ae i tagata e aafia i poleni, ua avatua e poleni i le tino se faailoilo sesē, ma ua faapena ai ona tafe le isu, fulafula nisi o vaega o le tino, ma tagi ai mata.

E iai le talitonuga o i latou e suʻesuʻe faapitoa i lea tulaga e faapea, o tagata e afāina i poleni, o se tulaga lea e tuufaasolo mai i mātua, e ui ina e lē faapitoa se ituaiga o poleni e aafia ai. Atonu o se isi vala e māfua ai ona aafiagofie se tagata, o le polusione lea o loo iai i le ʻea. O loo taʻua i le mekasini o le BMJ e faapea: “I Iapani, ua iloa ai e iai se sootaga i le aafiagofie o se tasi i le poleni ma le lalata o le vaipanoa o loo ia aumau ai i nofoaga o loo tumu ai le ʻea i le kasa mai taavale. Ua faaalia i meaola na faaaogā mo ia saʻiliʻiliga e faapea, o le mānavaina o lea kasa ua faateleina ai foʻi le aafia o se tasi ona o poleni.”

Ae o se tulaga e fiafia ai ona e iai fualaau ma vai e taʻu o antihistamines, e aogā i o latou mafatiaga. * O nei fualaau ma vai, e tetee atu i gaoioiga a histamines. E ui la i ni aafiaga leaga e oo i ai ona o poleni, ae e ao lava ona oo iā i tatou le lagona faagaeetia i le tomai o loo tatou vaaia, i le foafoaina ma le faasalalauina o nei mea ninii o loo iai le ola. Ana lē seanoa poleni, semanū ua avea lenei lalolagi ma nofoaga e pei o se toafa.

[Faaopoopoga i lalo]

[Siata i le itulau 24, 25]

(Tagaʻi i le lomiga mo le ata atoa)

Pistil

Ovule

Ovary

Tātupu o le Poleni

Stigma

O le fatu poleni

Stamen

Anther

Lau o le fugālaau

[Ē Ana le Ata]

NED SEIDLER/NGS Image Collection

[Ata i le itulau 25]

O ata ua faatetelē mai o ituaiga eseese o poleni

[Ē Ana le Ata]

Fatu poleni: © PSU Entomology/PHOTO RESEARCHERS, INC.

[Ata i le itulau 26]

O se vaega o le fugālaau o le oketi samala e pei o se pī fafine

[Ē Ana le Ata]

Ni ata o le oketi samala: © BERT & BABS WELLS/OSF

[Ē Ana le Ata i le itulau 24]

Fatu poleni: © PSU Entomology/PHOTO RESEARCHERS, INC.

[Ē Ana le Ata i le itulau 26]

Fatu poleni: © PSU Entomology/PHOTO RESEARCHERS, INC.