Ua Fesili Mai Talavou . . .

E Faapefea Ona Ou Taofia le Fia Atoatoa Ona Lelei i Mea Uma Ou te Faia?

“Ua pulea atoa loʻu olaga e lenei uiga.”—Tali.

LELEI ATOATOA—ua matuā tumu mafaufau o le toʻatele o talavou i lenei uiga e faapea e ao ona lelei atoatoa mea uma latou te faia.

Ua faapea mai se tusi: “E telē lava le eseesega i se faanaunauga talafeagai o le manaʻo ia lelei ona fai o se mea, ma le uiga lē lelei lea o le fia maua o se tulaga e matuā faigatā ona ausia. O tagata e taumafai ia lelei tele mea latou te faia, atonu e iai so latou manaʻoga ia sologa lelei ma maopoopo, ma e maualuga foʻi mea o loo latou faatalitalia mai iā i latou lava, ae e latou te iloa e latou te sesē, ma e iai auala lelei e mafai ona latou taulima ai na faalētonu. . . . Ae o tagata e mananaʻo ia lelei atoatoa mea uma latou te faia, e ola popole i taimi uma ona e mananaʻo ia aua lava neʻi iai se mea e sasi ai. E matuā maualuluga naʻuā a latou tapulaa.”— Perfectionism—What’s Bad About Being Too Good?

Po o lou tulaga lenā? O le a faigofie ona taofia ai oe mai le faia o se mea, pe afai e maualuluga naʻuā au tapulaa. Atonu foʻi e te ʻalofia le faia o se mea e te leʻi faia muamua, po o lou tolopō foʻi o le faia o mea tāua ona o lou musu ina neʻi e lē taulau. Atonu e te faalēfiafia foʻi i se tagata e lē o mafai ona ausia au faatulagaga, ma oo ai ina leai ni au uō.

Pe afai o le tulaga lea o loo e iai, ia manatu i upu a le Tusi Paia i le Failauga 7:16: “Aua e te amiotonu naʻuā, aua foʻi e te faatele naʻuā lou poto; se ā le mea e oti ai oe iā te oe?” Ioe, o se tasi e manaʻo ia lelei atoatoa mea uma na te faia, e mafai ona ‘⁠oti o ia iā te ia,’ pe faapogaia e ia ona lava puapuaga! O le mea moni, o lea uiga, ua oo ina iai sona sootaga ma ni maʻi tugā e fesootaʻi atu i le auala e tausami ai (anorexia nervosa ma le bulimia). *

Atonu o le a e fesili: “E mafai faapefea ona ou tuu lenei uiga?” O le mea moni, e faigatā tele ona suia le manatu o se tasi e tusa ai o lea tulaga. Ae e mafai ona taulau e ala i le fesoasoani a le Atua. O lea la, seʻi o tatou vaai po o le ā le silafaga a le Atua e tusa ai o le fia lelei atoatoa i mea uma e faia e se tasi.

 Lelei Atoatoa—Pe o se Sini e Mafai Ona Ausia?

Muamua lava, pe e mafai ona ausia le lelei atoatoa i vala uma lava? O le tali i ai, o le leai, e tusa ai ma le Tusi Paia lea o loo faapea mai: “E leai sē amiotonu, e leai lava se tasi . . . Ua latou ō ese uma lava, ua leaga faatasi i latou.” (Roma 3:10-12) O nei upu, e ao ona tatou manatunatu loloto i ai auā ua taʻu mai ai e faapea, o le a lē taulau se tasi e taumafai ia lelei atoatoa.

Seʻi tagaʻi foʻi i le aposetolo o Paulo, o sē e mautinoa ua avea ma faataʻitaʻiga mataʻina i le tulaga faaleagaga. E na te leʻi mafai ona sao mai masei a o ia auauna atu i le Atua. Na ia faailoa mai: “Pe a ou loto atu i le lelei e fai, ua iā te aʻu le leaga. Auā ou te fiafia i le tulafono a le Atua i le tagata i totonu. A ua ou iloa le tulafono ese i oʻu tino, o loo tau le taua i le tulafono a loʻu mafaufau, ua fai foʻi aʻu ma tagata o taua i le tulafono a le agasala o loo i oʻu tino.” (Roma 7:21-23) O le fesoasoani mai le Atua, na mafai ai e Paulo ona tumau ma le faatuatua o se Kerisiano.

O le mea e lelei ai ona e lē o faatagisia, pe e lē o faatalitalia mai, e le Atua le tulaga lelei atoatoa mai iā i tatou. “Ua silafia lava e ia le mea na fai aʻi i tatou; ua manatu ia o le efuefu lava i tatou.” (Salamo 103:14) E faatoʻā oo lava tagata i le tulaga lelei atoatoa pe a oo i le lalolagi fou a le Atua.

Toe Faatulaga Mea E te Faatalitalia

O lea la, i le taimi nei, e lē talafeagai lou manatu e mafai ona e lelei atoatoa. O le mea moni e ao ona e faatalitalia o le a iai taimi o le a e sasi ai. (Roma 3:23) E iai foʻi taimi tatou te lē o iloa ai ua tatou sesē! Ua faapea mai le Salamo 19:12: “E leai se tasi e na te iloa ona masei.” (Today’s English Version) Ua faapea mai le faaupuga a se tasi talavou e igoa iā Mataio: “E te lē lelei atoatoa—e leai ma se tasi i le Lalolagi e lelei atoatoa. Afai o loo e fia lelei atoatoa, e lē mafai la ona e maua le fiafia. . . . E lē fetaui auā e lē o se mea e mafai ona fai.”

O lea la, ae ā pe a e taumafai e toe sui nisi o mea o loo e faatalitalia? O se faataʻitaʻiga, po ua oo iā te oe le fiu a o e taumafai ia e matuā lelei i le faia o se mea? Ua taʻu mai e le Tusi Paia e faapea, o na taumafaiga fitā e ono avea ma ‘⁠mea faatauvaa, ma le ʻai i le matagi.’ (Failauga 4:4) O le mea moni, e seāseā ona iai se isi e mafai ona silisili ona lelei i se mea, ma afai foʻi e na te ausia lea tulaga, e masani lava e lē umi ae iai se isi e sili atu.

Na fautua mai Paulo: “Ou te fai atu ai iā te outou uma, aua le faasili le manatu o se tasi i le mea ua tatau ona manatu ai, a ia māmā le manatu.” (Roma 12:3) O lea, ia faafetaui lou manatu ma le mea e tatau ona iai. Ia tagaʻi totoʻa i mea o loo e faatalitalia ina ia talafeagai ma ou tomai ma mea e gata mai ai lou mafai. Ia tauivi mo se tulaga  lelei, ae lē o le fia lelei atoatoa i au gaoioiga. Ia faatū se sini faapitoa e mafai ona ausia.

O se faaaʻoaʻoga, na faalaeiauina e Paulo ia Timoteo ina ia avea ma sē “faigaluega e leai se mea e mā ai, na te talaʻitonuina le upu moni.” (2 Timoteo 2:15) Ioe, na uunaʻia e Paulo le tauivi mo le tulaga lelei, ae lē o le lelei atoatoa. Ia faapena foʻi ona e faatutū ni sini e talafeagai ma oe. Afai e te lē o mautinoa po o ā “sini talafeagai,” ia talanoa i ou mātua po o se tagata matua e te faatuatuaina.

Ua iai nisi ua fautua mai e faapea, e te tago e fai se mea e te lē iloa fai, e pei o le taalo i se taaloga e te leʻi taalo ai muamua, po le aʻoina foʻi o se mea faimusika. O le mea moni, a o e taumafai e aʻoina se mea e fou, o le a tele ni mea e te sesē ai. Ae e lē faapea ai e leaga lea tulaga. Atonu o le a mafai ai ona e iloa o le faia o ni mea sesē, o le tulaga masani lea i le aʻoina o se mea fou.

Po o le ā lava o loo e taumafai e faataunuuina—po o le tusia o se faamatalaga i se mataupu i le aʻoga, po o le tāina foʻi o se pese faigatā i le piano—ia manatua se isi fautuaga mai le aposetolo o Paulo: “Aua le faavaivai i le filigā.” (Roma 12:11) Ioe, aua e te tolopōina le faia o se mea talu ai lou popole ina neʻi e lē taulau i le faatinoina.

O se tasi talavou, na fai ma ana masani le tolopō o le faia o ana meaaʻoga, sa ia faia se faamolemolega faapea o loo “tau faavasega ana mea.” O se mea e lelei le faamaopoopo o au mea e fai, ae faaeteete ina neʻi avea lea tulaga ma faamolemolega e tolopō ai le faia o mea e tatau ona fai. Na oo ina iloa e lenei teine e faapea, “e sili atu le iai o ni meaaʻoga e avatuina i le faiaʻoga, e ui ina e lē o matuā lelei atoatoa le faiga, na i lo le leai o se meaaʻoga e faia.”

Tuu Ese Manatu Lē Aogā!

E moni, atonu e lē faigofie iā te oe le tau ina fai o se galuega ae e lē o matuaʻi lelei atoatoa e tusa ai ma le mea e te manaʻo ai. Atonu e fasia oe e ou lava mafaufauga, ma e faavaivai ai. O le ā e mafai ona e faia? O le mea moni, o lou mafaufau pea i na manatu lē ati aʻe e lē aogā, ma e faavaivaia ai oe. O lea ia matuā fai se taumafaiga e aveese mai lou mafaufau ni manatu lē ati aʻe e faatatau iā te oe lava. Ia e iloa ona e toe ʻata i au lava mea sesē. Auā foʻi, e iai “ona pō e ʻataʻata ai.” (Failauga 3:4) Ae ia manatua, e lē fiafia Ieova i gagana masoā—e tusa lava pe o lea o loo tatou faia iā i tatou lava.—Efeso 4:31.

O lea, na i lo lou ita pea iā te oe lava, ia faatatau upu o loo i le Faataoto 11:17: “O le tagata alofa ua agalelei o ia iā te ia lava; a o lē ua sauā, na te faatigāina lona lava tino.” O lea, ia manatunatu i le fesili lea, Ona o le matuā maualuluga naʻuā o mea e te faatalitalia, po o faigofie ai ea mo oe ona iai ni au uō? Atonu o le tali, o le leai. Atonu ua e teena foʻi nisi tagata ona, ia te oe, e lē lelei atoatoa. O lea la, o le ā se mea e mafai ona e fai?

Ia faaaogā le fautuaga mai le Tusi Paia: “Ia fefaapalepaleaʻi, ma ia fefaamagaloaʻi outou, pe afai ua agaleagaina se tasi e se tasi.” (Kolose 3:13) Ioe, e ala i lou lē tagisā i mea e te faatalitalia mai i isi, o le a sili atu ona faigofie ona maua ni au uō!

Atonu e te fia iloa, ‘pe aiseā o le a ʻalofia ai oe e tagata ona o lou uiga o le fia lelei atoatoa i mea uma e te faia?’ Ia seʻi manatu foʻi i faalogona e ono oo i isi pe afai e te faaalia le maualuluga o faatulagaga o loo e manaʻo ai mo oe lava. Ua taʻua e le tusi faa-Peretania E Lē lava le Lelei Atoatoa e faapea: “Afai e te faameo i taimi uma e lē lelei tele ai ou togi i se suʻega, e ono avea lea ma mea e lē fiafia ai au uō ia na matuā taumafai ia tau lava ina pasi.” O lea ia matuā taumafai e tuu ese manatu lē ati aʻe ma le manatu ifo tau lava o oe. O le a sili atu ai ona fiafia tagata iā te oe.

E manaia le auala na taaofaʻi ai e Tali le mataupu i lona faapea mai: “E tusa o lea ou te fai atu i loʻu uiga lea o le fia lelei atoatoa i mea uma ou te faia, ina ia sōsō atu i ʻō.” E mafai faapefea ona e faia lea tulaga? Ia manatunatu e tusa ai ma le silafaga a le Atua. Pe afai o loo faigatā pea iā te oe le pulea o ou manatu e tusa ai o lea tulaga, ia talanoa i ou mātua po o se Kerisiano taʻumatuaina i lau faapotopotoga. Tatalo iā Ieova ina ia fesoasoani mai e suia ou manatu. E mafai ona avea le tatalo ma fesoasoani malosi i le teena o lenei uiga.—Salamo 55:22; Filipi 4:6,7.

Ia manatua pea, e lē o faatalitalia mai e Ieova i tatou ia lelei atoatoa, ae o loo ia faatalitalia lo tatou faamaoni iā te ia. (1 Korinito 4:2) Pe afai o loo e tauivi ina ia faamaoni, e mafai moni lava ona e fiafia i le tulaga lenā o loo e iai, e tusa lava pe e te lē lelei atoatoa.

[Faaopoopoga i lalo]

[Ata i le itulau 23]

E ono mafai ona avea lou popole ina neʻi e lē taulau ma mea e taofia ai oe

[Ata i le itulau 24]

O lou taumafai e aʻoaʻoina ni mea fou, o le a fesoasoani lea iā te oe e feagai ai ma ou masei