Fesootaʻiga e Maua ai le Ola

I FOAFOAGA uma i le lalolagi, e na o tagata o loo naunau e fia fesootaʻi atu i se isi e ese mai tagata. E tusa lava po o le ā lona atunuu, lona tulaga i le olaga, lona ituaiga (tane po o le fafine), po o lona tulaga tauaʻoaʻoga, ua faaalia e tagata lo latou faanaunauga loloto e fia fesootaʻi atu i lē e silisili ese, po o le Atua.

Po o lea ea uiga ua na o se faiga faanuupō? E leai! E pei ona taʻua i le mataupu ua mavae atu, na faia e le Atua le tagata i lona faatusa. Na ia faia i tatou ma se faanaunauga mo mea faaleagaga. E aofia ai i lea tulaga le faanaunauga e fesootaʻi atu i lo tatou Tamā faalelagi. (Kenese 1:27; Mataio 5:3) O le mea moni, i le silafaga a le Atua, e tāua tele le fesootaʻi atu iā te ia ma ua taʻua ai o ia o “Le faafofoga tatalo.”—Salamo 65:2.

Maʻeu sea faaeaga uiga ese o le tatalo atu i le Silisili Ese! E manatu le toʻatele o tagata e faapea o se faaeaga lo la talanoa na o i laʻua ma se tagata tāua, e pei o se peresitene po o se palemia foʻi. Ae o Ieova le Atua, o ia lē e silisili i le aoao o mea! E lē tau faatonuina faapitoa foʻi se taimi e talanoa atu ai iā te ia. E mafai ona tatou tatalo atu i so o se taimi, ma i so o se nofoaga o loo tatou iai. E mafai foʻi ona tatou talanoa mai o tatou loto ma le lē leoa, i le Atua. (1 Samuelu 1:12-15) Peitaʻi ane, o loo manaʻomia mai e Ieova lo tatou loto faamaoni ma ia tatou faalogo atu ma le usiusitai iā te ia. (Mika 6:8; Mataio 6:5-13) E moni lava o fesootaʻiga, o se mea e manaʻomia ona fetufaaʻi ai manatu.

Pe E te Faalogo Atu i le Atua?

E faapefea ona faalogologo se tasi i le Atua? O le auala autū lava, e ala lea i le faitauina ma faatatauina o mea o loo iai i lana Afioga, le Tusi Paia. (2 Timoteo 3:16; 2 Peteru 1:20, 21) Na fetalai mai Iesu: ‘E ola le tagata i afioga uma e tulei mai i le fofoga o le Atua.’ (Mataio 4:4) Pe e te faalogologo i le Atua e ala i le faitauina ma le faatatauina o lana Afioga tusia?

O i latou e fesootaʻi e lē aunoa ma Ieova e latou te maua lona finagalo malie, faapea ma ‘le manuia mai le Atua, o loo silisili lava i mea uma e manatu i ai.’ (Filipi 4:6, 7; Faataoto 1:33) Ua latou maua foʻi le faamoemoe o le ola e faavavau i le lalolagi parataiso, lea o le a leai ai se popole po o se puapuaga e pei ona tatou maua i aso nei. (Salamo 37:29; Ioane 17:3) Maʻeu ni taui matagofie mo le faaaogāina o lenei tomai ofoofogia o fesootaʻiga i le auala sili e mafai ai!

[Ata i le itulau 10]

O le fesootaʻi ma le Atua e aofia ai le faitau i le Tusi Paia ma le tatalo