Le Manatu o le Tusi Paia

Pe e Faamanuiaina e le Atua i Tatou i ʻOa?

“O le faamanuia a Ieova, o lea e faatamaoaiga aʻi; na te lē faaopoopo i ai se tigā.”—FAATAOTO 10:22.

PO O le uiga ea o le mau lea o loo taʻua i luga, e faamanuiaina e le Atua ana auauna i ʻoa faaletino? O le manatu lenā o nisi tagata. Seʻi tagaʻi foʻi i le manatu o se tasi faifeʻau lotu Penetekoso i Ausetalia, ma o ia foʻi o se alii tusitala: “O le a ou faamatalaina atu i [laʻu] tusi le māfuaaga e te manaʻomia ai nisi tupe se tele, ma lona lua, o le a ou faamatalaina atu le auala e mafai ai ona e mauaina ni tupe se tele . . . Afai e mafai ona e suia le auala o loo e mafaufau ai ma maua se vaaiga saʻo e faatatau i tupe, ou te talitonu o le a e maua le faamanuiaga ma le tamaoaiga mai le Atua ma o le a lē toe iai lava sou faafitauli tau tupe.”

Peitaʻi ane, o na manatu, e foliga mai ai e lē fiafia le fingalo o le Atua i tagata matitiva. Po ua avea ea le iai o le tele o le tamaoaiga faaletino ma se faailoga moni e iloa ai, o loo faamanuia mai le Atua iā i tatou?

Na Faamanuiaina mo se Fuafuaga

O loo iai i le Tusi Paia ni faamatalaga o le faamanuiaina e le Atua o ana auauna faamaoni i le tulaga tau tamaoaiga. Seʻi tagaʻi i se faataʻitaʻiga. I le taimi na tuua ai e Iakopo lona aiga, e na o le tootoo lava lana meatotino na iai, ae na ia toe taliu atu i le 20 tausaga mulimuli ane ai ma le mau mamoe, povi, ma asini, ia e lua ni vaega tetelē na vaeluaina i ai. E tusa ai ma le Tusi Paia, o le tamaoaiga o Iakopo, o se meaalofa mai le Atua. (Kenese 32:10) O se isi faataʻitaʻiga, na leai uma meatotino a Iopu, ae mulimuli ane na faamanuia Ieova iā te ia i “mamoe e sefulu afe ma afe e fā, ma kamela e ono afe, ma povi e lua afe, ma asini fafine e tasi le afe.” (Iopu 42:12) Na avatuina e Ieova iā Solomona le tele o le ʻoa lea e oo mai i le taimi nei o loo lauiloa i tagata.—1 Tupu 3:13.

Ae o loo tele foʻi ni faamatalaga o loo i le Tusi  Paia e faatatau i ni auauna faamaoni ma le usiusitaʻi a le Atua, o ni tagata e matitiva. E mautinoa lava e lē faasalaina e le Atua isi ana auauna ina ia matitiva, ae faamanuiaina isi i le tele o meafaitino. O le ā la le fuafuaga a le Atua i le avatuina o ʻoa i isi?

E tofu lava le tulaga ma lona faamatalaga. O meafaitino a Iakopo na avea lea ma faavae mo le ati aʻe ai o se nuu, a o nofo sauni atu mo le afio mai o le Fanau folafolaina. (Kenese 22:17, 18) I le tulaga o Iopu, o lona tamaoaiga na faamanino mai ai po o ai na ala mai ai ona mala, ma faapaiaina ai le suafa o Ieova. (Iakopo 5:11) I le tulaga o Solomona, na ia faaaogāina le tele o ana ʻoa mai le Atua e fau ai se malumalu matagofie. (1 Tupu 7:47-51) O se mea e ao ona mātauina, na faaaogā e Ieova Solomona e tusi e tusa ai o mea na oo iā te ia, e tusa ai o le gata mai o le aogā o le ʻoa.—Failauga 2:3-11; 5:10; 7:12.

Le Auala ua Faamanuiaina ai i Tatou e le Atua

Na aʻoaʻoina e Iesu ona soo ina ia paleni la latou vaaiga e tusa ai o tupe ina ua ia faatonuina i latou e “aua le popole’’ i meafaitino. Na ia faamalamalama iā i latou e faapea e oo lava iā Solomona i lona matagofie e leʻi tusa lona aulelei ma lautalotalo o le vao. Ae na fetalai mai Iesu: “Afai e faapea ona faaofuina e le Atua le vao o le fanua, . . . e lē sili ea ona faaofuina o outou ē faatuatua itiiti?” O lea na taʻutino atu e Iesu i Kerisiano e faapea afai e muaʻi saʻili e ona soo le Malo o le Atua ma lana amiotonu, o le a latou maua mea e ʻai, o lavalava, ma mea e nonofo ai. (Mataio 6:25, 28-33) O faapefea ona faataunuuina lenā folafolaga?

Pe afai e usitaʻia fautuaga a le Tusi Paia, o le a matuā maua mai ai ni aogā faaleagaga. (Faataoto 10:22) Ae, e oo mai ai foʻi ma isi faamanuiaga. O se faataʻitaʻiga, ua faatonuina e le Afioga a le Atua Kerisiano: “O lē gaoi aua neʻi toe gaoi, a e lelei ina faamalosi o ia i galuega a ona lima i mea aogā.” (Efeso 4:28) Ua taʻua ai foʻi e faapea: “E mativa lē ua galue ma le lima vaivai; a o ē lima malosi e mauʻoa i latou.” (Faataoto 10:4) O Kerisiano e faamaoni ma faigaluega malosi e masani lava ona fiafia i ai ē e pule i galuega na i lo isi tagata faigaluega. E mafai ona avea lea tulaga ma faamanuiaga.

Ua aʻoaʻoina foʻi e le Tusi Paia Kerisiano ina ia ʻalofia le faiga matapeʻapeʻa o le pelē tupe, le masaniga leaga o le ulaula, ma le amioga e faaleagaina ai o le onā. (1 Korinito 6:9, 10; 2 Korinito 7:1; Efeso 5:5) O le a faaitiitia le tupe alu ma faaleleia ai foʻi le soifua mālōlōina o i latou e usitaʻia lea fautuaga.

E Sili Lona Tāua na i lo Ario po o Auro

E lē mafai lava ona avea le lelei o le tamaoaiga ma vala e iloa ai le fiafia mai o Ieova, pe faapea o loo ia faamanuiaina se tagata. O se faaaʻoaʻoga, na faaalialia e Iesu le tulaga mativa faaleagaga o nisi Kerisiano i Laotikaia ina ua ia fetalai atu iā i latou: “Ua e fai mai, Ou te se mauʻoa, ua faatamaoaigaina aʻu, ou te lē mativa foʻi i se mea e tasi; a ua e lē iloa o oe o le malaia, ma le pagatia, ma le mativa, ma le tauaso, ma le lē lavalavā.” (Faaaliga 3:17) I le isi itu, na faapea atu Iesu i Kerisiano i Semurana, o ē sa matitiva faaletino ae mauʻoa faaleagaga: “Ua ou iloa au galuega, ma lou puapuaga, ma lou mativa—a ua e tamaoaiga.” (Faaaliga 2:9) Atonu o nei Kerisiano na oo i ai ni tulaga faigatā tau tamaoaiga mai iā i latou na sauāina i latou ona o lo latou faamaoni, ae na iā i latou ni ʻoa e sili atu ona tāua na i lo ario po o auro.—Faataoto 22:1; Eperu 10:34.

E faamanuiaina e Ieova le Atua galuega a i latou o loo tauivi e fai lona finagalo. (Salamo 1:2, 3) E na te foaʻi iā i latou le malosi ma mea ina ia mafai ai ona feagai ma faigatā, ia tausia o latou aiga, ma ia latou muaʻi saʻili ai lona Malo. (Salamo 37:25; Mataio 6:31-33; Filipi 4:12, 13) O lea e taumafai ai Kerisiano moni ina ia “tamaoaiga i galuega lelei” na i lo le vaai i meafaitino o se auala autū lea o loo faamanuia mai ai le Atua. E ala i le ati aʻe o se faiā māfana ma Lē na Faia i tatou, ua ‘faapea ona teua ai e Kerisiano oloa mo i latou lava, o le faavae lelei mo aso atalī.’—1 Timoteo 6:17-19; Mareko 12:42-44.