E Iai le Suafa o le Atua!

O ai le suafa o le Atua? Ua tofu le tagata ma lona igoa. O le toʻatele foʻi o tagata, ua latou faaigoaina a latou fagafao! Pe e lē talafeagai ea la ona iai se suafa o le Atua? E mautinoa lava, o le iai o le igoa o se tagata, faapea ma le faaaogāina o lenā igoa e tāua tele lea i faiā ma feutagaʻiga a tagata. Pe e ao ona suia lea tulaga pe a tuu atu i la tatou faiā ma le Atua? O se mea e ofo ai ona e lē o faaaogāina le suafa o le Atua e le faitau miliona o tagata o loo faapea mai e faatuatua i le Atua. Ae ua loa ona iloa e tagata le suafa o le Atua. A o e faitauina la nei mataupu, o le a e iloa ai taimi na faaaogāina ai lona suafa e le toʻatele o tagata. Ae e sili atu ona tāua, o le a e iloa ai faamatalaga i le Tusi Paia e faatatau i le iloaina o le Atua i lona suafa.

E OO ane i le senituri lona 17, ua iai se aofaʻiga o nuu i Europa ua latou lomia le suafa o le Atua i a latou tupe siliva. O se tupe Siamani na faia i le tausaga 1634 na faamatilatila ai le suafa o Ieova. Sa taʻua e le toʻatele na tupe siliva o tupe a Ieova, ma e tele tausaga na faaaogāina ai.

O Ieova, * o le faaliliuga lenā o le suafa o le Atua ua lauiloa ai mo le tele o senituri. I le gagana Eperu lea e faitauina mai le taumatau agaʻi i le tauagavale, o loo tusiaina ai lea suafa i konesane e fā, e faapea יהוה. Ua taʻua nei konesane e fā o le Tetakalamatone, ma a faaliliuina i le faa-Peretania o le YHWH, ae o le tele o tausaga, na lomia ai le suafa o le Atua i konesane e fā faa-Eperu i tupe siliva a Europa.

O loo tusia foʻi le suafa o le Atua i fale, o maa faamanatu, galuega taulima faapea foʻi ma le tele o pese lotu. E tusa ai ma se lomifefiloi Siamani e taʻua o le Brockhaus, sa iai se vaitaimi na masani ai ona faia pine po o faailoga i ofu o taʻitaʻi o malo o ē lotu Porotesano, lea e lolomi ai le ata o le lā, faatasi ma le Tetakalamatone. Sa taʻua le faailoga o le tagāvai a Ieova ma le Lā, ma na lolomiina foʻi i fuʻa ma tupe siliva. E manino mai la, o tagata maelega faalelotu i Europa i senituri lona 17 ma le 18, sa latou iloaina e iai le suafa o le Atua e Ou le Malosi Uma Lava. Ae o le mea e sili atu ona tāua, o lo latou fiafia e faaaogā lenā suafa.

Na iloa foʻi le suafa o le Atua e i latou na mau i Amerika i le vaitaimi a o puleaina e Egelani. Seʻi tagaʻi foʻi i se fitafita e suafa iā Ethan Allen, o se tasi na auai i le taua e faasaʻoloto ai kolone Amerika mai le puleaga a Egelani. E tusa ai ma ana faamaumauga e faatatau i lona lava olaga, i le tausaga e 1775, na ia faatonuina ai ona fili ina ia latou siilima atu “i le suafa o Ieova o lē ua Sili.” E oo foʻi i se vaitaimi mulimuli ane a o faagasolo le pulega a le peresitene o Abraham Lincoln, na iai ni ana faufautua na masani ona latou faaaogāina le suafa o Ieova i a latou tusi iā Lincoln. O loo mafai ona maimoaina e le lautele isi tusitusiga faatalafaasolopito a Amerika o loo iai le suafa o le Atua, i le tele o faletusi. E tele le mau faataʻitaʻiga, ae ua na o ni nai faataʻitaʻiga na o le auala ua faaalia matilatila mai ai le suafa o le Atua mo le tele o senituri.

Ae faapefea lenei vaitaimi? Po ua faagaloina le suafa o le Atua? E mautinoa lava, e leai. E  tele faaliliuga o le Tusi Paia ua faaaogāina ai le suafa o le Atua i le tele o ona mau. A e alu i se faletusi, po o lou faia foʻi o sina saʻiliʻiliga i lau lava lomifefiloi, o le a e iloaina ai, o loo taatele ona faaaogāina le suafa Jehovah, po o Ieova i le faa-Samoa e tutusa ma le faaliliuga o le Tetakalamatone. O se faataʻitaʻiga, ua faamatalaina manino mai e se tusi e taʻu o le Encyclopedia International e faapea, o le suafa o Ieova o le “taʻu lea faaonapōnei o le suafa paia faa-Eperu o le Atua.” O se lomiga fou o le tusi The New Encyclopædia Britannica ua faamatalaina mai ai e faapea o Ieova, o le “suafa faa-Iutaia ma faa-Kerisiano lea o le Atua.”

Atonu e te faapea mai, ‘Ae faamata e fiafia tagata i aso nei i le suafa o le Atua?’ Ia, o loo iai pea le suafa o le Atua i le tele o nofoaga lautele. O se faataʻitaʻiga, o loo tusia le suafa o Ieova i le faavae o se fale i le aai o Niu Ioka, ma o loo iai foʻi i lenā lava aai lea lava suafa i le gagana Eperu, i se ata telē felanulanuaʻi o loo i se nofoaga pisi e faatali ai nofoaafi. Ae, e mafai ona faapea atu, mai le faitau afe o tagata o loo fepasiaʻi i nei nofoaga, e toʻaitiiti i latou o loo manatu e iai se tāua o le suafa lea o loo iai i ia nofoaga.

Po o tāua le suafa o le Atua i tagata o lou vaipanoa? Pe o loo taʻu lava e le toʻatele Lē na Faia i tatou o le “Atua,” e peiseaʻī o lona suafa moni lea? Atonu o loo e mātauina e faapea, o le toʻatele lava o tagata e lē o iai ma se manatu pe faamata e iai se suafa o le Atua. Ae faapefea oe? Pe e faigofie iā te oe lou talanoa atu i le Atua ma taʻu lona suafa o Ieova?

[Faaopoopoga i lalo]

[Pusa/Ata i le itulau 4]

O se Tupu na Faalauiloa le Suafa o Ieova

I le 1852, na malaga ai ni misionare mai Hawaii agaʻi i motu o Maikoronesia. Na latou ō atu ma se tusi ua faamaufaailogaina e le tupu o Kamehameha III, o lē sa avea ma tupu i le vaitaimi lenā i Hawaii. Na tusia muamua lenei tusi i le gagana Hawaii ma sa tusi atu iā i latou na pulea motu eseese o le Pasefika. Ua taʻua i se vaega o lea tusi e faapea: “O le a folau atu ni faiaʻoga a le Atua Silisili Ese, o Ieova, i o outou motu, e faalauiloa atu iā te outou Lana Afioga mo lo outou faaolataga e faavavau. . . . Ou te faamoemoe o le a outou faaaloalogia ma alolofa ane iā i latou, ma ou te ʻaiʻoi atu ina ia outou faalogo i a latou aʻoaʻoga. . . . O laʻu fautuaga iā te outou, ia lafoaʻia o outou tupua, ma ia avea le Alii o Ieova ma o outou Atua, ia tapuaʻi ma alolofa iā te Ia, ma o le a Ia faamanuia ma laveaʻi iā te outou.”

[Ata i le itulau 4]

O le tupu o Kamehameha III

[Ē Ana le Ata]

Hawaii State Archives

[Ata i le itulau 3]

O le Tetakalamatone, o “mataʻitusi ia e fā,” e sipelaina ai le suafa o Ieova i le gagana Eperu