Gaoioiga e Tetee Atu i le Suafa o le Atua

NA SOIFUA i le senituri lona lua T.A., se tagata Iutaia e atamai faapitoa e suafa iā Hananiah ben Teradion, ma na lausilafia o ia ona o lona faamaopoopoina o faatasitasiga a tagata lautele. O faatasitasiga ia sa ia aʻoaʻo atu ai mai i se tusi tāʻai, ua tusia ai uluaʻi tusi e lima o le Tusi Paia e taʻua o le Sefer Torah. Sa tele foʻi ona iloa o ia ona o lona faaaogāina o le suafa o le Atua faapea ma lona aʻoaʻoina atu o lea suafa i isi. Ae e lē mafai ona ia lē taʻua le suafa o Ieova pe a ia aʻoaʻo atu mai lea tusi tāʻai, ona e silia ma le 1,800 taimi o loo taʻua ai le suafa o le Atua i ia tusi muamua e lima o le Tusi Paia!

Sa avea le vaitaimi o Ben Teradion ma vaitaimi mataʻutia tele mo tagata Iutaia atamamai. E tusa ai ma talafaasolopito na tusia e tagata Iutaia, na faia e le emeperoa Roma se tulafono e faasala ai i le oti i latou e aʻoaʻo atu pe ola e tusa ai ma talitonuga faa-Iutaia. Na iʻu ina puʻeina faapagota Ben Teradion e le malo o Roma. Sa i lona lima se kopi o le tusi tāʻai i le taimi na puʻeina ai o ia. Ina ua ia tali atu iā i latou na molia o ia, na ia taʻu saʻo atu ai e faapea, e pau le mea o loo ia faia i lona aʻoaʻoina atu o le Tusi Paia, o lona anaana lea i le faatonuga mai le Atua. Ae e ui i lea, na faasalaina lava o ia i le oti.

I le aso o lona faasalaga oti, na tāʻai ai le tino o Ben Teradion i le tusi tāʻai o le Tusi Paia lea na ia uuina i le taimi na puʻeina ai o ia. Ona saisaia lea o ia i se pou ma susunuina. Ua taʻua e se tusi e faapea, “sa tuuina ni fasi vulu ua uma ona lolōina i vai i lona fatafata i le mea e iai lona fatu, ina ia aua ai neʻi vave oti ae faaumiumi ai ona tigā.” (Encyclopaedia Judaica) O se isi vaega o lona faasalaga, o le faasalaina lea o lana avā i le oti, ae faatauina atu lona afafine i se nofoaga o fafine talitane.

E ui o le malo o Roma na faia lea faasalaga ogaoga iā Ben Teradion, ae na taʻua e le tusi o le Talmud * e faapea, “na oo lea faasalaga iā te ia  ona o lona taʻua atoa o le Suafa (o le Atua).” Ioe, sa avea le taʻua o le suafa o le Atua ma agasala matuiā i tagata Iutaia.

O le Tulafono Lona Tolu

I le senituri muamua ma lona lua T.A., e foliga mai na faasolosolo ona tuputupu aʻe se manatu sesē i tagata Iutaia e tusa ai o le faaaogāina o le suafa o le Atua. Ua taʻua i le Mishnah (o se faaputuga o faamatalaga faarapi lea ua faavae aʻe ai le Talmud) e faapea, “o se tagata e taʻuina le suafa o le Atua e tusa ai ma lona sipelaga” e leai sona tofi i le Parataiso i le lalolagi i le lumanaʻi lea ua folafolaina mai e le Atua.

O fea na amata mai ai lea faasāsāaga? Ua manatu nisi e faapea na talitonu tagata Iutaia ua paia tele le suafa o le Atua ma e lē tatau i tagata lē lelei atoatoa ona latou taʻua. Sa oo lava foʻi ina latou faatalatū e tusia le suafa o le Atua. E tusa ai ma se tasi tusi, na māfua lenā tulaga ona o se popolega ina neʻi teʻi ua lafoaʻi le pepa na tusia ai le suafa o Ieova i se lapisi ma oo ai ina faaleagaina le suafa o le Atua.

Ua taʻua i le Encyclopaedia Judaica e faapea o le “ʻalofiaina o le taʻua o le suafa YHWH . . . na māfua mai i le lē malamalama i le Tulafono Lona Tolu.” O loo taʻua e le tulafono lona tolu o Tulafono e Sefulu na tuuina atu e le Atua iā Isaraelu e faapea: “Aua e te taʻu fua le suafa o Ieova lou Atua; auā e lē faasaoina e Ieova o lē taʻu fua i lona suafa.” (Esoto 20:7) O lea la, o le poloaʻiga a le Atua e tusa o le faaaogāsesēina o lona suafa, ua mimiloina e avea ma manatu faanuupō.

Ailoga lava e iai se tasi i nei aso e mafai ona faapea mai e finagalo le Atua e susunuina i le afi se tasi e taʻuina lona suafa! Peitaʻi ane, o loo iai pea manatu faanuupō faa-Iutaia e tusa ai ma le suafa o le Atua. O loo taʻua le Tetakalamatone e le toʻatele o le “Suafa e Lē Mafai ona Taʻua.” I nisi vaega o tagata, ua latou taʻu faasesē lo latou taʻuina o le Atua ina ia lē solia ai lea tū faa-Iutaia. O se faataʻitaʻiga, o le taʻu faapuupuu o le suafa o le Atua, o Ioa, (Jah po o Yah i le faa-Peretania) ua latou taʻu o Koa (Kah i le faa-Peretania). A taʻu le upu Aleluia ua latou faaaogā le upu Alelukia, ae o nisi ua latou ʻalofia le tusia o le upu “Atua” ae tuu i ai se vase e sui aʻi se mataʻitusi e tasi pe sili atu. O se faataʻitaʻiga, a latou fia tusia le upu faa-Peretania o le Atua, o “God,” e latou te tusia faapea o le “G-d.”

Faia Isi Gaoioiga Ina ia Lilo ai le Suafa

E lē na o le Lotu Iutaia o loo ʻalofia le faaaogāina o le suafa o le Atua. Seʻi tagaʻi foʻi i se patele Katoliko e suafa iā Ierome ma o se failautusi foʻi a le pope o Damasus I. I le tausaga e 405 T.A., na faaumaina ai e Ierome lana faaliliuga o le Tusi Paia atoa i le gagana Latina, lea ua taʻua o le Vulgate faa-Latina. Sa leʻi faaaogāina e Ierome le suafa o le Atua i lana faaliliuga. Ae na ia faia e tusa ai ma le masani i lenā vaitaimi, o le suia lea o le suafa o le Atua i le taʻu o le “Alii” ma le “Atua.” Na avea lea lomiga ma faaliliuga muamua o le Tusi Paia Katoliko ua aloaʻia, ma na avea foʻi ma faavae mo le tele o isi faaliliuga i isi gagana.

O se faataʻitaʻiga, o le faaliliuga Katoliko e taʻu  o le Douay Version lea na māeʻa i le tausaga 1610, e tusa lava o le Vulgate faa-Latina lenā ua faaliliuina i le faa-Peretania. E lē o se mea la e ofo ai le lē maua ai o le suafa o le Atua i lea Tusi Paia. Peitaʻi ane, na avea le faaliliuga o le Douay Version ma faaliliuga tāua, ona e oo ane i le tusa ma le 1940-1949, sa na o lenā le Tusi Paia na faataga e faaaogā e tagata Katoliko o la latou gagana o le faa-Peretania. O lona uiga la, e faitau selau tausaga na lilo ai le suafa o le Atua mai le miliona ma miliona o tagata Katoliko loto faamaoni.

Seʻi tagaʻi foʻi i le faaliliuga o le Tusi Paia lea e taʻua o le King James Version. I le 1604, na faatonuina ai e le tupu o Egelani, o James I, ni tagata e iai tomai faapitoa e faia se faaliliuga faa-Peretania o le Tusi Paia. I le fitu tausaga mulimuli ane ai, na māeʻa ai lea galuega, ma na taʻua o le King James Version, po o le Authorized Version.

Sa filifili foʻi le ʻaufaaliliu ia lē faaaogāina le suafa o le Atua i lea faaliliuga, vaganā ai ni nai mau na faaaogāina ai. Sa tele lava ina suia le suafa o le Atua e le taʻu “ALII” po o le “ATUA” e faailoa mai ai le Tetakalamatone. Na avea lea faaliliuga ma Tusi Paia e faaaogāina e le miliona ma miliona o tagata. Ua taʻua e le World Book Encyclopedia e faapea “ina ua mavae le lomia o le faaliliuga o le King James Version, e leai se isi faaliliuga tāua o le Tusi Paia i le faa-Peretania na toe faia mo le silia ma le 200 tausaga. I lea lava vaitaimi, sa avea lea faaliliuga ma Tusi Paia sa faaaogāina e le toʻatele o tagata e tautatala i le gagana Peretania.”

O faataʻitaʻiga ua taʻua, ua na o ni nai faataʻitaʻiga na e tolu mai le tele o faaliliuga o le Tusi Paia na lomia i senituri ua mavae, ia ua aveesea pe ua lē faatāuaina ai le suafa o le Atua. E lē o se mea la e ofo ai ona o le toʻatele o tagata i aso nei ua faapea mai o Kerisiano, ae e faalēnaunau e faaaogā le suafa o le Atua po ua lē iloa lava lea suafa. E moni a o faagasolo tausaga na iai nisi tagata faaliliu na latou faaaogāina le suafa o le Atua i a latou faaliliuga o le Tusi Paia. Ae o le tele o nei faaliliuga, e leʻi leva tele talu ona iai ma e lē o tele so latou aafiaga i manatu o loo iai i tagata e tusa ai o le suafa o le Atua.

O se Faiga e Feteenaʻi ma le Finagalo o le Atua

Ua māfua le taatele o le lē taʻua o le suafa o le Atua ona o uputuu maumauaʻi faaletagata ae e lē mai i ni aʻoaʻoga a le Tusi Paia. O Tracey R. Rich, o se tagata Iutaia suʻesuʻe ma e na te faatulaga faamatalaga i le vaega o le Initineti lea e taʻua o le Judaism 101, e tusa o uputuu ma le tapuaʻiga faa-Iutaia. Ua ia faapea mai: “E leai ma se faamatalaga i le Torah e faasāina ai se tasi mai le taʻua o le Suafa o le Atua. E manino mai tusitusiga paia, sa fai ma masani a tagata le taʻua o le Suafa o le Atua.” Ioe, i vaitaimi o le Tusi Paia, sa faaaogāina le suafa o le Atua e ona tagata tapuaʻi.

Pe a tatou iloa le suafa o le Atua ma faaaogā, o le a sili atu ona tatou ōgatusa ma le auala e talia e le Atua e tapuaʻi atu ai iā te ia, le auala lea na tapuaʻia ai o ia i taimi o le Tusi Paia. O le laasaga muamua lea i lo tatou atiina aʻe o se faiā ma ia, lea e sili atu na i lo le na o le iloaina o lona suafa. O Ieova lava ia ua na valaaulia i tatou ina ia faia se faiā ma ia. Na ia tulei mai ma le māfana: “Ia outou faalatalata atu i le Atua, ona faalatalata mai lea o ia iā te outou.” (Iakopo 4:8) Atonu o le a e fesili ifo faapea, ‘E faapefea e se tagata faatauvaa ona ati aʻe se faiā māfana ma le Atua e Ou le Malosi Uma Lava?’ O le a talanoaina i le mataupu o sosoo ai le auala e te ati aʻe ai se faiā ma Ieova.

[Faaopoopoga i lalo]

[Pusa i le itulau 6]

Aleluia

O le ā se manatu e oo ifo iā te oe pe a e faalogo i le upu “Aleluia”? Atonu e te manatuaina ai le musika matagofie na fatuina e le fatupese e igoa iā Handel e taʻua o le “Mesia,” lea na fatuina i le 1742, ma e uiga ese le matagofie o lona tali e taʻua o le Aleluia. E mautinoa lava ua e faalogo i lenā upu “Aleluia.” Atonu lava foʻi o loo e faaaogāina mai lea taimi i lea taimi. Ae pe e te iloaina lona uiga?

Aleluia—O le faa-Samoa lenā mo le upu faa-Peretania Hallelujah lea e maua mai le upu Eperu ha·lelu-Yahʹ, ma o lona uiga o le “vivii iā Ioa.”

Ioa—O le taʻu faapuupuu lea o le suafa o le Atua, o Ieova. E sili atu ma le 50 taimi o loo taʻua ai i le Tusi Paia faa-Peretania le upu Jah (Ioa) ma o le tele lava o taimi o se vaega lea o le upu Hallelujah.

[Pusa i le itulau 7]

Po o Iai le Suafa o le Atua i Lou Igoa?

E tele lava igoa mai le Tusi Paia o loo fiafia i ai le toʻatele o tagata i nei aso. O le uiga faa-Eperu o nisi igoa o loo taʻua ai le suafa o le Atua. O ni nai faataʻitaʻiga ia o ia igoa ma o latou uiga. Atonu o loo iai foʻi ma lou suafa.

Ioana—“Ua Agalelei Mai Ieova”

Ioelu—“O Ieova o le Atua”

Ioane—“Ua Faaali Mai le Finagalo Malie o Ieova”

Ionatana—“Ua Foaʻiina Mai e Ieova”

Iosefa—“Ia Faaopoopo Atu e Ioa” *

Iosua—“O Ieova le Faaolataga”

[Faaopoopoga i lalo]

 [Pusa i le itulau 8]

O Taʻu a le Tusi Paia i le Atua

E tele taʻu a tusi Eperu o le Tusi Paia mo le Atua, e pei o Lē Ou le Malosi Uma Lava, Lē na Foafoaina Mea, Tamā, ma le Alii. Ae, pe a tuufaatasi na taʻu, ua sili atu ona tele taimi ua taʻua ai o ia i lona suafa. E manino mai la, e finagalo le Atua ia tatou faaaogā lona suafa. Seʻi tagaʻi foʻi i le lisi lea o loo taʻua ai nei taʻu i le Tusi Paia Eperu. *

Ieova—6,973 taimi

Atua—2,605 taimi

Lē Ou le Malosi Uma Lava—48 taimi

Alii—40 taimi

Lē na Faia—25 taimi

Lē na Foafoaina Mea—7 taimi

Tamā—7 taimi

Lē ua Mai Anamuā Ona Aso—3 taimi

Aʻoaʻo Sili—2 taimi

[Faaopoopoga i lalo]

 [Pusa i le itulau 9]

O se Atua e Faagaoioia le Faatinoga o Mea

E lē o mafai ona ioe faatasi tagata atamamai e tusa ai ma le uiga o le suafa o le Atua, o Ieova. Peitaʻi ane, ina ua mavae ni saʻiliʻiliga se tele e tusa ai o lea mataupu, e toʻatele o loo talitonu e faapea o lea igoa e sau mai le veape Eperu o le ha·wahʹ, o lona uiga “E Gaoioi o Ia e Tusa ma Tulaga Manaʻomia.”

O lea la, i le Esoto 3:14, ina ua fesiligia e Mose le Atua e tusa ai ma lona suafa, ua faaliliuina faapenei e le New World Translation of the Holy Scriptures, * lenei mau: “Ona fetalai atu lea o le Atua iā Mose: ‘E avea aʻu ma mea ou te loto i ai.’ Ua ia fetalai atu foʻi: ‘E te fai atu i le fanauga a Isaraelu, ia faapea atu, “E avea aʻu ma mea ou te loto i ai, o ia na auina mai aʻu iā te outou.”’”

Ua talafeagai lenā faaliliuga, talu ai e mafai e le Atua ona faapogaia lona avea ma so o se mea e manaʻomia. E leai se mea e mafai ona taofia o ia mai le faatinoina o so o se tulaga o loo manaʻomia ina ia faataunuuina ai lona finagalo. E avea pea lava ana fuafuaga ma ana folafolaga ma mea moni. O le mea e uiga ese lona mataʻina, ona o le Atua o ia Lē na Foafoaina Mea, o Lē e lē gata mai lona malosi e faatinoina ai mea. Na ia faapogaia le iai o le lagi ma le lalolagi aoao. Na ia foafoaina foʻi le mano ni mano o meafaiola agaga i le lagi. O ia lava o se Atua e faagaoioia le faatinoga o mea!

[Faaopoopoga i lalo]

[Ata i le itulau 5]

O se ata o le faasalaga oti o Hananiah ben Teradion

[Ata i le itulau 8, 9]

Nofoaga ma Mea o Loo Matilatila ai le Suafa o le Atua

1. O se falesā na fausia i le senituri lona 17 i Lomborg i Tenemaka

2. O se faamalama tioata felanulanuaʻi o le malumalu i Bern i Suisilani

3. Tusi Tāʻai o le Sami Mate, i tusitusiga anamua faa-Eperu i Isaraelu, e tusa o le 30-50 T.A.

[Ē Ana le Ata]

Shrine of the Book, Israel Museum, Jerusalem

4. O se tupe Suetena, tausaga e 1600

[Ē Ana le Ata]

Kungl. Myntkabinettet, Sveriges Ekonomiska Museum

5. O se tusi tatalo Siamani, tausaga e 1770

[Ē Ana le Ata]

Mai le tusi Die Lust der Heiligen an Jehova. Oder: Gebaet-Buch, 1770

6. O tusitusiga i se papamaa i Bavaria i Siamani

7. O le Papamaa Moapi, i Pale i Falani, tausaga e 830 T.L.M.

[Ē Ana le Ata]

Musée du Louvre, Paris

8. O se ata i le taualuga o le falesā i Olten i Suisilani