E Mafai Ona E Teena le Lē Mautinoa

O LE ā lau vaaiga i ni faigatā e oo iā te oe? E toʻatele tagata atamamai e talitonu faapea o lau tali i lenā fesili, e telē se mea e taʻu mai ai e uiga iā te oe, po o oe o se tagata e mautinoa, pe lē mautinoa foʻi. E oo uma lava iā i tatou faigatā o le olaga, ma e tele atu faigatā e oo i nisi na i lo isi. Ae aiseā ua mafai ai ona toe taumafai nisi, ae o isi e fiugofie e ui lava e itiiti ni faigatā e oo i ai?

O se faataʻitaʻiga, faapea la o lea o loo suʻe sau galuega. Ua e alu atu nei e fai se talanoaga ma le pule, ae ua e lē maua le galuega. O le ā se lagona e oo ane iā te oe e tusa ai ma lea tulaga? Atonu o le a e tuuaʻia oe lava ma manatu ai o lea tulaga o se faafitauli e tumau, ma e faapea ane ai iā te oe lava, ʻE leai se isi e na te fia faafaigaluegaina aʻu. Ailoga a maua saʻu galuega.’ Ia, po o lou avea foʻi o lea tulaga ma mea e aafia ai vala uma o lou olaga, i lou manatu faapea, ʻMatuā ou lē mafaia lava se mea. E leai ma soʻu aogā i se isi.’ Ae o na manatu, o ni manatu lē mautinoa.

Teena o le Lē Mautinoa

E faapefea ona e tetee atu i mafaufauga lē mautinoa? O se laasaga tāua, o le iloaina lea o ni manatu lē mautinoa. O le laasaga e sosoo ai, o lou teena lea o ia manatu. Toe manatunatu i nisi māfuaaga e sili atu ona talafeagai. O se faataʻitaʻiga, pe e moni e leʻi maua le galuega ona e lē o fia faafaigaluegaina oe e se isi? Po o se isi māfuaaga talafeagai ona o loo manaʻo lē e ana le galuega i se tagata e ese ni ona tomai?

A e manatunatu saʻo lava i ai, o le a mafai ai ona e iloa ni ou manatu lē mautinoa, lea ua oo ane ai ni lagona mafatia iā te oe. Pe e moni ua e matuā lē mafaia lava se mea ona e te leʻi maua lea galuega, ae faapefea isi vala o lou olaga e pei o au gaoioiga faaleagaga, o au faiā i lou aiga, ma au uō, atonu o ni tulaga ia o loo e taulau manuia ai? Ia aua le soona popole i mea leaga e ono tutupu mai. Auā foʻi, pe mafai ona e iloa moni o le a lē taitai ona maua sau galuega? E iai foʻi ma isi mea e mafai ona e faia ina ia teena ai manatu lē mautinoa.

Mafaufauga e Mautinoa ma Taulaʻi Atu i Sini

I tausaga e leʻi leva atu nei, na aumaia ai e tagata suʻesuʻe se faamatalaga mataʻina, ae e lē atoatoa, i le uiga o le faamoemoe. Ua latou faapea mai o le faamoemoe, e aofia ai ma le talitonuga o le a e ausia ou sini. E iai ni vala e  aogā ai lea faamatalaga, ae o le a talanoaina atili i le mataupu o sosoo mai le tele o mea e aofia ai. O le taulaʻi atu i lea vala o le faamoemoe, o le a fesoasoani lea iā i tatou ina ia ati aʻe ai se mafaufau e mautinoa, ma uaʻi atu i sini.

Ina ia tatou talitonu e mafai ona ausia o tatou sini i le lumanaʻi, e manaʻomia ona ati aʻe se masaniga o le faia o ni sini, ma ia ausia. Afai e te lagona e lē o lau masani lenā, atonu la e aogā le manatunatu loloto i sini ua e faatutū mo oe lava. Muamua lava, o iai ni ou sini? E faigofie lava ona tatou pisi i le olaga e aunoa ma se manatu po o le ā tonu o loo tatou mananaʻo ai i le olaga, ma po o le ā foʻi e tāua moni iā i tatou. E tusa ai ma le mataupu silisili aogā e faatatau i le faatulaga saʻo o mea e ao ona faamuamua, e manaia lava le faaupuga lea ua leva ona taʻu mai i le Tusi Paia: “Ia masino iā te outou mea uiga eseese.”—Filipi 1:10.

A faatulaga loa mea e ao ona faamuamua, o le a faigofie foʻi la ona faatutū ni sini tāua i vala eseese o o tatou olaga, i o tatou olaga faaleagaga, i o tatou aiga, ma i galuega ma aʻoga. E tāua foʻi le lē tele naʻuā o ni sini e vave ona faatutū, ae fai ni sini e tatou te iloa e faigofie ona tatou ausia. Pe afai e faigatā ona ausia se sini, e ono oo mai ai le popole ma tatou faavaivai ai loa. O lea la, pe a fai ni sini tāua mo le lumanaʻi e lelei pe a vaevae i sini laiti e mafai ona ausia i se taimi puupuu.

“O le mea e iai le loto e iai le auala e fai aʻi.” O se faaupuga lea ua leva, ma e foliga mai e moni. Pe a tatou faatutū ni sini tāua, ona tatou manaʻomia foʻi lea o le uunaʻiga, po le faanaunauga ma le maumauaʻi, e tauivi ai e ausia na sini. E mafai ona tatou faamalosia lenā maumauaʻi e ala i le manatunatu i le aogā o o tatou sini, faapea ma mea lelei o le a tatou maua pe a tatou ausia. O le mea moni, o le a iai ni mea e faalavelave mai, ae e ao ona tatou vāai i ai o ni luʻi e mafai ona foʻia.

E ao foʻi ona tatou manatunatu i ala aogā e ausia ai o tatou sini. O le tusitala o C. R. Snyder, ua tele ni ana suʻesuʻega i le aogā o le faamoemoe, ua ia fai mai, ia manatunatu i ni auala e mafai ai ona ausia se sini. O lea la, a lē aogā se tasi auala, ona fai lea o se isi auala, po o le faatino foʻi o se isi auala pe a lē aogā foʻi lenā auala.

Ua fautua mai foʻi Snyder ina ia tatou iloa le taimi e ao ai ona sui le sini muamua i se isi sini. Pe afai ua faafaigatā lava iā i tatou ona ausia se sini, o le a tatou faavaivai pe afai e tatou te popole tele i ai. Ae afai e tatou te suia lenā sini i se sini e faigofie atu ona ausia, o le a maua ai se mea e tatou te faamoemoe i ai.

O loo iai i le Tusi Paia se faataʻitaʻiga aogā e tusa ai o lea tulaga. O le sini sa faanaunau lava i ai Tavita, o lona fausia lea o se malumalu mo lona Atua o Ieova. Ae na fetalai atu le Atua iā Tavita, o le a faatinoina lenā faaeaga e lona atalii o Solomona. E leʻi musuā Tavita pe na taumafai pea e faatino lona manaʻoga e ui ina ua lē talafeagai, ae sa suia loa ona sini. Sa galue punouaʻi o ia auā le aoaoina o tupe ma mea o le a manaʻomia e lona atalii, e faatino ai le galuega.—1 Tupu 8:17-19; 1 Nofoaiga a Tupu 29:3-7.

E tusa lava pe tatou te taulau i le atiina aʻe o lo tatou faamoemoe e ala i le teena o le lagona lē mautinoa, ma ati aʻe se mafaufauga e mautinoa ma faaautū atu i sini, ae e lē faapea ai ua lava le faamoemoe iā i tatou. I le ā le itu? Talu ai, o le tele lava o tulaga ua leai ai se faamoemoe lea ua tatou feagai ai i lenei lalolagi, o loo ala mai i vala e matuā lē mafai lava ona tatou puleaina. Pe a tatou manatunatu i faafitauli ogaoga o loo feagai ma tagata, e pei o le mativa, o taua, le leai o se faamasinotonu, le lamatia pea i maʻi ma le oti, e mafai faapefea ona faaauau la tatou vaaiga mautinoa?

[Ata i le itulau 7]

Afai e teena oe mai se galuega na e manaʻo ai, pe e ao ona e manatu o le a lē maua lava sau galuega?

[Ata i le itulau 8]

Na faaalia e le tupu o Tavita le uiga fetuutuunaʻi e tusa ai ma ona sini