Ia Tausi i le Taimi!

UA TAʻUA mai e le mekasini USA Today e faapea: “O le lē tausi taimi, o se faafitauli masani i ē o loo pulea galuega.” Ua fai mai atili lea mekasini e tusa o se suʻesuʻega na faia i ni pule e 2,700: “E tusa ma le ono fono mai fono e sefulu ua latou tuai atu i ai.”

Pe a tuu atu i tagata faigaluega, o lea uiga, ua lē na o se lē faaaloalo ua faaalia mai ai. Ua faaalia mai i se suʻesuʻega na faia i ni tagata e 81,000 o loo suʻe galuega e faapea: “O le maumau o itula ona o le tuai ma le lē faigaluega ae e leʻi faanoi, ua avea lea ma vala autū o tupe maumau.” O le mea moni, e lē na o galuega o aafia ai ona o le lē tausi taimi. O se suʻesuʻega na faia i pule o aʻoga maualuluga na faaalia mai ai, “o le faafitauli autū ma faifai pea, o le lē tausi taimi lea o tamaiti aʻoga.”

E finagalo Lē na Faia i tatou ia tatou faatāuaina le taimi. Na ia tuu mai “malamalama tetele e lua,” o le la ma le masina, ina ia mafai ai ona tatou fua le taimi. (Kenese 1:14-16) I nei aso, ua iai uati e fua ai minute ma sekone. Ae e ui i lea, e toʻatele lava i tatou ua faigatā ona tausisi i le taimi, e lē gata i galuega, ma aʻoga, ae faapea foʻi i isi fuafuaga tāua.

Po o lona uiga la ua māfua lea faafitauli ona o le lē lava o le taimi? E moni, ua matuā tele naunau mea e fai i galuega ma le aiga. Ae ua faapea mai se tinā faigaluega e igoa iā Wanda Rosseland: “Na ou lē toe faitio ona o le lē lava o le taimi ina ua ou manatua, e tatou te maua uma lava le 24 itula i le aso. Sa ou manatunatu i lea tulaga ma ou iloa ai, i nei ona pō, e lē faapea ua lē lava le taimi, ae ona ua tele naʻuā mea e faalavelave mai.”

Seʻi tagaʻi foʻi iā Renee, * o se tinā Molimau a Ieova e toʻalima lana fanau. Ua ia toe manatunatu i tua ma fai mai: “A o laiti laʻu fanau, sa avea o se luʻitau iā te aʻu le saunia o i latou mo le aʻoga ma sauniga faa-Kerisiano. Ae sa mafai lava ona matou vave taunuu. Nei la ua matutua, ae o lea ua fai ma aʻu masani le faiaga.” Po o faapena lou masani ona tuai? Afai o lea, e mafai lava ona sui! O mea ia e mafai ona e faia.

● MANATUNATU I LONA TAUNUUGA. Atonu e lē o se mea tele le masani ona tuai. Ae tagaʻi foʻi i upu a le Tusi Paia: “O lago  mamate e elo ai ma masa ai le suāuu manogi a le fai mea manogi; o le valea itiiti foʻi e leaga ai lē ua taʻua o le poto ma le mamalu.” (Failauga 10:1) Ioe, o sina “valea itiiti,” e ala i le lē manatunatu i isi e mafai ona faaleagaina ai lou igoa lelei i se faiaʻoga po o se pule.

A o aʻoga o ia i se kolisi i le latou nuu, na mātauina ai e se fafine e igoa iā Marie le “faalēano i le taimi” o nisi o lana vasega, ua fai ma a latou masani le tuai atu. Ae na ia manatuaina e faapea, “e leʻi leva lava ae sui loa la latou amio, ona sa iai ni faiaʻoga polofesa se toʻalua e ese le tausi taimi. O lea la, e tusa lava pe na o ni nai minute e tuai atu ai se tagata o le vasega, na la faailogaina e tusa ua lē auai atu o ia i le vasega. O lea la, a tele aso e lē o auai le tagata i le vasega, ua faailoga foʻi e tusa ua lē pasi.”

E ono taʻuleagaina foʻi lou igoa e au uō ma ē tou te masani pe afai e te faiaga soo. Na faamatala e se tamāloa faamatuātagata e igoa iā Iosefa se isi Kerisiano sa ia iloaina i le tele o tausaga ua tuanaʻi. E ui sa faaaloalogia lenei uso ona o lona tomai o se faiaʻoga, ae e iai lava si ona vaivaiga na avea ma ila i lona igoa lelei. Fai mai Iosefa: “Sa fai ma ana masani le tuai mai. E tuai lava ia i mea uma! Ae e foliga mai e lē popole lava ia i ai. Sa avea lona faiaga ma mea e tausua ai tagata.” Pe o taʻu oe e tagata o se tasi e fai ma masani le tuai? Ia, o le a faigofie lava ona galo iā i latou ou uiga lelei.

● MANATUNATU I ISI. O le faiaga, o se uiga e lē migao ma avea ma faalavelave i isi, ma e ono manatu ai nisi o oe e te fia sili. Na faamatala mai e se tasi pule le māfuaaga e lē tausi taimi ai le toʻatele o pule e faapea: “O le toʻatele o i matou e iai le uiga o le faasausili.” Ae e lē faapena Kerisiano, ua latou manatu e sili isi iā i latou. (Filipi 2:3) Ua latou faatino foʻi le tulafono sili o le alofa, ma faia i isi e pei ona latou mananaʻo ia faia mai e isi. (Mataio 7:12) Pe e te lē lagonaina le fiu pe afai o loo e faatalitali i se isi? Ia aua la e te faia lenā mea i isi.

● IA ILOA ONA FAAAOGĀ LE TAIMI. Po o fai ma au masani le fai mea tuu ona e toe fetamoʻeaʻi lea i le taimi mulimuli? Po ua ova le tele o mea e te fuafua e fai i se taimi puupuu? O le a aogā le mataupu silisili o loo i le Failauga 3:1 e faapea: “O le mea ma lona tausaga i mea uma.” Afai e fua le taimi ina ia fetaui ma mea e fia fai, o le a mafai ona e faia ia mea i se auala maopoopo.

Muamua lava, ia fai se lisi o mea e manaʻomia ona e fai. Ona fai loa lea e tusa ai ma le manatu o loo i le Filipi 1:10: “Ia masino iā te outou mea uiga eseese [po o mea tāua].” Ioe, ia faamuamua mea tāua. O lē fea le mea e sili ona tāua e tatau ona fai? O ā mea e mafai ona tuu seʻi fai mulimuli? A uma lenā, ona vaai loa lea po o le ā le tele o le taimi e manaʻomia e faatino ai na mea, ma le taimi e mafai ai ona fai. Ia e vaai totoʻa i lea tulaga ina neʻi  ova le tele o mea e te manaʻo e fai i se taimi itiiti.

Ua fai mai se tamaʻitaʻi e igoa iā Dorothy, o ona mātua na aʻoaʻoina o ia ina ia tausi i le taimi. Ua ia faamatala mai e faapea: “E amata ona saunia i matou e lo matou tinā e tusa o le itula ma le 45 minute a o leʻi oo i le taimi e fai ai le sauniga i le 7:30 i le afiafi. E fuafua ia lava le taimi e aai ai, fufulu ipu, fai lavalava, ma ō atu ai i le sauniga. Sa avea ma vaega masani o o matou olaga le vave taunuu a o leʻi faia le sauniga.” O nisi taimi, e lelei foʻi le fuafua auā mea tutupu faafuaseʻi. Ua manatuaina e Dorothy e faapea: “E lata mai nei na ou alu ai e piki nisi mo le sauniga. Sa pa laʻu paʻu ma na mafai ona toe fai ae o loo lava pea le taimi e piki ai i latou. Ua ou masani e fuafua auā se faalavelave e tupu i le taavale, po o le pisi foʻi o le auala.”

● FESILISILI I NI FAUTUAGA MAI ISI. Ua faapea mai le Tusi Paia i le Faataoto 27:17: “E maamaʻai le uʻamea i le uʻamea, e faapea foʻi ona faamāfanafana o le tagata i lana uō.” E tusa ai ma lenā mataupu silisili, talanoa i isi e tutusa o outou tulaga, ae ua mafai ona vave taunuu i mea e fai. E masani lava ona e maua mai ai ni manatu aogā.

O Renee lea na taʻua muamua, ua matuā filifili nei o ia ina ia sui lona tuai soo. Ua ia faapea mai: “Ua ou filifili nei ina ia faaleleia lea tulaga. E lē faigofie, ae ua iai lava se suiga.” E mafai foʻi ona e faia faapea. A tuu i ai lou mafaufau, faatasi ma au taumafaiga, o le a mafai foʻi ona e tausi i le taimi.

[Faaopoopoga i lalo]

[Ata i le itulau 30]

O lou masani i le faiaga e avea ma ou ila i le vaaiga a pule o galuega ma e faaalia ai le lē manatunatu i isi

[Ata i le itulau 31]

O lou fuafua lelei o le a fesoasoani lea ina ia e ʻalofia ai le faamaumau taimi