Le Manatu o le Tusi Paia

Pe e Leaga Moni le Soona Inu?

MO LE tele o tausaga, ua avea le faataʻitaʻi o aga a se tagata onā ma mea e toē ai i faleaitu ma ata tifaga. Atonu ua na o se mea e toē ai, ae ua faaalia mai ai le femoumouaʻi o lagona o tagata e tusa ai o le soona inu i le ʻava, ua latou manatu i ai o se vaivaiga, ae e lē afāina.

O le mea moni lava, e lē o se mea mālie. Ua taʻua e le Faalapotopotoga o le Soifua Mālōlōina a le Lalolagi le soona inu e faapea, i le lalolagi aoao, o se tasi lea o lamatiaga autū tau i le soifua mālōlōina. Ua taʻua e faapea e ese ai mai le pulea e le tapaa, ua sili atu ona tele oti ma maʻi ua māfua mai le soona inu na i lo le faaaogāina o isi mea faapena, ma ua maumau ai le $184 piliona Amerika i tausaga taʻitasi.

Ae, e ui i lea, o loo faaauau pea ona lē manatu mamafa le toʻatele i le leaga o le soona inu. Ua latou ioe e leaga le amioaʻi pe faia mo le tele o tausaga, ae e lē afāina iā i latou le soona inu i nisi o taimi. I nisi vaega o le lalolagi, ua manatu talavou o le inu ia tau i le ua, ua iloa ai o ia ua avea ma tagata matua. E ui lava la ina lapataʻi mai faalapotopotoga tau soifua mālōlōina e tusa ai o le leaga o le inu ia tau i le ua, po o le tasoo o ni pia po ni mea malolosi e lima pe sili atu, ae ua matuā faateleina i latou o loo faia faapea mai ē matutua ma talavou. Ua talafeagai ai la le fia malamalama o tagata pe faamata e leaga moni le inu tele. O le ā o loo fai mai ai le Tusi Paia?

 O le Uaina ma le ʻAva Malosi —O Meaalofa Mai le Atua

E tele ni mau o loo i le Tusi Paia e faatatau i le uaina ma le ʻava malosi. Na tusi mai le tupu o Solomona: “Ina alu ia, ina ʻai i lau mea e ʻai ma le olioli, ina inu foʻi ia i lau uaina ma le loto fiafia; auā o loo fiafia nei le Atua i au galuega.” (Failauga 9:7) Na ioe le faisalamo e faapea, o Ieova le Atua, o ia Lē na Foaʻi maia “le uaina e faafiafia ai loto o tagata.” (Salamo 104:14, 15) O lea la, o le uaina, o se tasi lea o meaalofa ua iai i faamanuiaga a Ieova mo tagata.

Ua manino mai foʻi e leʻi inosia e Iesu le taumafaina o le uaina. Auā foʻi o lana vavega muamua lava, o le suia lea o le vai e avea ma uaina e sili ona lelei i le ʻaiga o se faaipoipoga. (Ioane 2:3-10) Na ia faaaogā foʻi le uaina e fai ma faatusa ua talafeagai o lona toto ina ua ia amataina le faailogaina o le Talisuaga Afiafi a le Alii. (Mataio 26:27-29) O loo taʻua foʻi i le Tusi Paia le avea o le uaina ma vailaau aogā, auā na faalaeiau le aposetolo o Paulo iā Timoteo ina ia “inu sina uaina itiiti, ona o [lona] manava.”—1 Timoteo 5:23; Luka 10:34.

E Tāua le Pulea

Ia mātau o loo fautua atu Paulo ia inu na o “sina uaina itiiti.” Ua manino mai, ua inosia e le Tusi Paia le soona inu i le ʻava malosi. Sa mafai e ositaulaga Iutaia ona inu sina uaina pe a uma o latou tiute. Ae sa faasā lo latou tagofia o se ʻava malosi i le taimi o loo galulue ai i o latou tiute faaositaulaga. (Levitiko 10:8-11) Ina ua mavae le tele o tausaga mulimuli ane, na lapataʻia Kerisiano i le uluaʻi senituri e faapea, o ē onanā “e lē fai mo latou tofi le malo o le Atua.”—1 Korinito 6:9, 10.

E lē gata i lea, na faatonu e Paulo Timoteo e faapea, o i latou e taʻimua i le faapotopotoga, o ni tane e ʻlē ni ē inu tele i uaina’ po o ē ʻe lē fia inu uaina e tele.’ * (1 Timoteo 3:3, 8) O le mea moni, ua faatonuina e le Tusi Paia le faateʻaina mai le faapotopotoga Kerisiano, o i latou e onanā e lē faaalia le salamō. (1 Korinito 5:11-13) Ua taʻu manino mai e le Tusi Paia, “o le uaina, o le faatauemu lea.” (Faataoto 20:1) O le soona inu, e faaitiitia ai le pulea o le tagata o ia lava, ma aveesea ai lona mafaufau lelei.

Le Māfuaaga e Inosia ai e le Afioga a le Atua le Soona Inu

Ua silafia e Ieova, o Lē ʻo loo aʻoaʻo iā te i tatou i mea e aogā’ e faapea, afai tatou te faaaogāsesē se mea, e iʻu ina tatou leaga ai ma leaga ai foʻi ma isi. (Isaia 48:17, 18) Ua moni lea tulaga pe a tuu atu i le ʻava malosi. Ua fesili mai le Afioga a le Atua: “E iā te ai ea le auē? e iā te ai ea mala? e iā te ai misa? e iā te ai le atuatuvale? e o ai ea manunuʻa fua? e iā te ai ea mata mūmū?” O le tali: “O ē ua faatuai i le uaina; o ē ō atu e saʻili i le uaina filogia.”—Faataoto 23:29, 30.

Ua tele ni mea valea ma mataʻutia ua faia e tagata pe a soona inu: o le ave taavale a ua ova le inu ma lamatia ai o latou ola ma ola o isi, o le fia paʻipaʻi atu fua i le paaga a le isi tagata ma faaleagaina ai faiā, o le tautala ma gaoioi faavalevalea, ma matagā. (Faataoto 23:33) Ua talafeagai ai le taʻu o le soona inu i le ʻava o se maʻi o loo iai i aso nei, e sili ona leaga ai le tagata. E lētioa a apoapoaʻi mai le Atua: “Aua neʻi fai oe ma so latou o ē inu tele i uaina”!—Faataoto 23:20.

I le Kalatia 5:19-21, o loo lisi mai ai e Paulo i “galuega a le tino” le onā ma le poula, ia o loo tetee atu i fua o le agaga o le Atua. O le soona inu i le ʻava malosi, o le a faaleagaina ai le faiā a le tagata ma le Atua. Ua manino mai la, e tatau i Kerisiano ona ʻalofia le soona inu i le ʻava malosi.

[Faaopoopoga i lalo]