Ua Fesili Mai Talavou . . .

Aiseā e Leaga ai le Feusuaʻi a o Leʻi Faaipoipo?

“Ailoga e leaga moni le feusuaʻi ae leʻi faaipoipo aemaise ona e ese lava oʻu faalogona talu ai e ma te leʻi momoe lava ma se isi.”—Ioritana. *

“Ou te lagona le uunaʻiga ia lolo atu e faia feusuaʻiga. Ou te manatu e iā i tatou uma lava lea faanaunauga,” o le tala lea a Keli, ma ua ia fai mai atili, “Ua aafia mea uma i lea tulaga!”

PO O iā te oe le lagona e pei ona iai iā Ioritana ma Keli? O le mea moni, ua toe lava ina a mou atu aganuu ma tapulaa sa masani ai. (Eperu 13:4) O se suʻesuʻega na faia i se tasi atunuu i Asia na iloa ai o le toʻatele o alii e i le va o le 15 ma le 24 tausaga, na manatu e lē afāina le feusuaʻi a o leʻi faaipoipo, ma o se mea ua masani ai. E lētioa faia e le tele o talavou ae leʻi atoa lo latou 19 tausaga.

Ae o isi talavou e latou te lē faia faapena ae o loo faia ni amioga e ese mai feusuaʻiga e masani ai, e pei o le milimili o totoga sā o le tasi e le isi (seʻi tulou). O se faamatalaga e faapopoleina ai mai le pepa The New York Times ua faaalia ai le avea o “feusuaʻiga e faaaogā ai le fofoga (tulou) ma auala e faamasani ai i ia faiga, ma e manatu i ai le tele o talavou e lē o matuaʻi aafia tele pe afāina ai e pei o feusuaʻiga masani . . . [ma] e ʻalofia ai le maʻitō ma tausia ai foʻi lo latou tulaga taupou.”

Ae o le ā tonu le vaaiga e ao ona iai i se Kerisiano e tusa ai o feusuaʻiga a o leʻi faaipoipo? Ae faapefea faiga e ese mai feusuaʻiga masani? Pe e fiafia i ai le Atua? Pe e saogalemu? Po o tumau pea le tulaga mamā o se tasi pe a faia faapea?

Amioga e Aofia ai i le Faitaaga

Ua na o Ieova le Atua, o Lē na Faia i tatou, e maua mai ai se tali faamoemoeina. Ua fai mai lana Afioga ia ‘sosola ese i le faitaaga.’ (1 Korinito 6:18) O le ā tonu le uiga o lea faamatalaga? O le upu Eleni mo le “faitaaga,” e lē o faatatauina na o feusuaʻiga ae e aofia ai foʻi ma isi amioga lē mamā. Afai la ae faia e ni tagata e leʻi faaipoipo ni feusuaʻiga e faaaogā ai le fofoga (tulou) po o le milimili o totogasā o le isi (tulou), e tusa lava la, ua la faia le faitaaga.

Pe faamata o avea pea i laʻua ma taupou i le silafaga a le Atua? I le Tusi Paia ua faaaogāina le upu “taupou” o se faailoga o le tulaga mamā. (2 Korinito 11:2-6) Ae ua faatatau foʻi i se uiga faaletino. O loo taʻua e le Tusi Paia se teine talavou e igoa iā Repeka, o ia ‘o se taupou, e leʻi iloa e ia se tane.’ (Kenese 24:16) O le mea e ao ona mātauina, i le uluaʻi gagana Eperu, o le upu mo le feusuaʻi po o le “iloa” sa aofia ai isi amioga e ese mai le faiga masani o feusuaʻiga a se tane ma se fafine. (Kenese 19:5-8) O lea la, e  tusa ai ma le Tusi Paia, o so o se ituaiga o faitaaga e faia e se talavou, e lē mafai ona taʻua o ia o se taupou.

Ua timaʻi mai le Tusi Paia i Kerisiano ina ia sosola ese mai le faitaaga ma isi amio lē mamā e ono oo ai i lea tulaga. * (Kolose 3:5) Atonu o le a amusia oe e isi ona o lou faamaoni. Fai mai se talavou Kerisiano e igoa iā Keli: “O le tala lava lea e fai mai e isi a o oʻu aʻoga, ‘Talofa e, ua e misia la e oe sia mea manaia!’” Ae o le feusuaʻi a o leʻi faaipoipo, ua na o se fiafiaga o “le agasala e vave mavae.” (Eperu 11:25) E mafai ona afāina ai le tino, faalogona, ma le faaleagaga, mo se taimi umi.

O ni Lamatiaga e Oo i Ai

Ua faamatalaina i le Tusi Paia se taimi na mātauina ai e le tupu o Solomona se tama o loo faatosina i ai se fafine e faia feusuaʻiga. Sa faatusaina o ia e Solomona i se “povi ua alu a fasia.” O se povi o le a fasia, e lē iloa le mea o le a tupu. E faapena foʻi talavou e feusuaʻi a o leʻi faaipoipo. Ua itiiti, pe ua leai foʻi, so latou iloa o faigatā e oo i ai ona o mea latou te fai. Na fai mai Solomona e faatatau i lea tauleʻaleʻa: “Na te lē iloa ua saunia lea e mate ai o ia.” (Faataoto 7:22, 23) Ioe, o loo aafia ai lou ola.

O se faataʻitaʻiga, i tausaga taʻitasi, e faitau miliona talavou ua maua i se faamaʻi e ala mai feusuaʻiga. Fai mai Litia: “Ina ua ou maua i le maʻi e aafia ai totogasā (herpes), sa ou fia sola ese,” ma na ia faapea mai ma le faanoanoa, “O se maʻi e tigā ma e lē toe teʻa ese.” E 6,000 tagata i le aso ua maua i le siama o le HIV i le lalolagi aoao, ma e sili atu ma le ʻafa o i latou, e i le va o le 15 ma le 24 tausaga.

E sili atu ona faigofie le aafia o tamaʻitaʻi i faafitauli ona o feusuaʻiga a o leʻi faaipoipo. O le mea moni, e sili atu ona mauagofie ai teine na i lo tama i ia faamaʻi (faapea ma le siama e maua ai le AIDS). Pe a maʻitaga se teine talavou, ua iai o ia ma lana pepe e leʻi fanau i se tulaga faigatā. Aiseā? Talu ai atonu e leʻi lava saunia lona tino mo le fanauina o se pepe.

E tusa lava foʻi pe e lē oo ni faafitauli tugā tau soifua mālōlōina iā te ia, ae o le a paʻū iā te ia ni avega tauave mamafa i le avea ma matua. Ua iloa e le tele o teine e ese le faigatā o le tausia o ia lava, faapea ma se pepe fou.

Ua iai foʻi ma ni āuga e mulimuli mai, i le  faaleagaga, ma faalogona. Na avea le agasala a le tupu o Tavita ma tulaga na ōia ai le la faiā ma le Atua, ma na toetoe lava faalētonu ai lona tulaga faaleagaga. (Salamo 51) E ui la ina na toe sologa lelei lona faaleagaga, ae na ia selesele i āuga o lana agasala i lona olaga atoa.

E faapena foʻi talavou i aso nei. O se faataʻitaʻiga o Sieli. I le 17 o ona tausaga na ia faia ai ni feusuaʻiga ma se tama. Na manatu o ia e alofa le tama iā te ia. Ae ua mavae le tele o tausaga, a o loo ia lagona pea le tigā i mea na ia faia. Ua ia fai mai ma le faanoanoa: “Sa ou lē manatu mamafa i le upu moni o le Tusi Paia, ma na oo mai ai faigatā iā te aʻu. Sa ou lē maua le finagalo malie o Ieova, ma o se tulaga lea na ou lagona ai le faanoanoa tele.” Ua faapena foʻi le faamatalaga a se talavou e igoa iā Terisa: “O se mea e sesē tele lea ua ou faia, o le feusuaʻi a o leʻi faaipoipo. Maʻimau pe ana mafai ona toe avea aʻu ma teine muli.” Ioe, e umi se taimi o iai pea lagona tigā, faatasi ai ma omiga ma faanoanoaga.

Ia Pulea Oe Lava

Ua lāgā e se talavou e igoa iā Shanda se fesili e tāua tele, “Pe aiseā ua tuu mai ai e le Atua i talavou ia faanaunauga mo feusuaʻiga, ae ua ia silafia, e faatoʻā talafeagai le faia o ia tulaga pe a uma ona faaipoipo?” E moni, e sili ona malosi faanaunauga faaleituaiga i le taimi o le talavou ina ua oo ina ‘matua o ia.’ (1 Korinito 7:36) O le mea moni, e faafuaseʻi le oso aʻe o ia lagona i se talavou. Ae e lē faapea ua leaga lea tulaga. O se vaega masani lenā o le faasolo ina matua o le tino. *

Na faia foʻi e Ieova feusuaʻiga ia avea o se mea e fiafia ai. Ua talafeagai lea ma lana fuafuaga i le amataga ina ia faatumu le lalolagi e tagata. (Kenese 1:28) Ae e lē o se fuafuaga a Ieova lo tatou faaaogāsesē o lana meaalofa e maua ai ni fanau. “Ia taʻitasi outou ma iloa ona fai o lona lava tino ma le faapaiaina ma le taʻuleleia.” (1 Tesalonia 4:4) E leai lava se eseesega o lou faia o ni feusuaʻiga i taimi uma e te lagona ai ia faalogona, ma le tuʻiina o se tasi i taimi uma e te ita ai, o se tulaga e valea tele.

O faiga faaleituaiga, o se meaalofa mai le Atua, e maua ai le fiafia i lona taimi tatau, pe a oo ina faaipoipo. Pe faamata o le ā le lagona o le Atua pe afai tatou te faia ia tulaga a o leʻi faaipoipo? Ia faapea la o lea sa e faatauina se meaalofa mo sau uō. Ae ua ia gaoia le meaalofa ae e te leʻi foaʻiina i ai. O le a e lē fiafia lava, a ea? Seʻi manatu la i le faalogona o le Atua pe a faia e se tasi ni feusuaʻiga ae leʻi faaipoipo, ma ia soonafaia ai le meaalofa a le Atua.

O le ā e mafai ona e faia e tusa ai o ou faalogona faaleituaiga? O le tali faigofie, o lou pulea lea o ou faalogona. Ia e manatua, “e lē taofia e [Ieova] se mea lelei i ē ua sao lo latou savavali.” (Salamo 84:11) Ua fai mai se talavou e igoa iā Gordon: “Pe a ou manatu ifo e faapea e lē afāina feusuaʻiga a o leʻi faaipoipo, ou te manatunatu i leaga e oo mai ai i loʻu itu faaleagaga ma ou lagona ai loa e lē aogā lea mea pe afai e aafia ai le ma faiā ma Ieova.” Atonu e lē faigofie le puleaina o ou faalogona, ae e pei ona faamanatu mai e se talavou e igoa iā Eteri, “O le faia faapea e tumau ai le mamā o lou loto fuatiaifo ma se faiā lelei ma Ieova, ma e te avanoa ai e uaʻi atu i mea tāua, e aunoa ma le lagona nofosala ona o se mea na e faia.”—Salamo 16:11.

E tele ni māfuaaga e ao ai ona e ‘faamamao mai le faitaaga’ i ona vala eseese. (1 Tesalonia 4:3) O le mea moni, e lē faigofie lea tulaga. O le a talanoaina i se mataupu i le lumanaʻi ni auala e mafai ai ona “sao lau amio.”—1 Timoteo 5:22.

[Faaopoopoga i lalo]

[Faamatalaga faaopoopo i le itulau 15]

Pe afai e faia e se talavou so o se ituaiga patino lava o le faitaaga, pe faamata o taupou pea o ia i le silafaga a le Atua?

[Ata i le itulau 15]

E faaleagaina le loto fuatiaifo o se talavou e mataʻu i le Atua pe a faia feusuaʻiga a o leʻi faaipoipo

[Ata i le itulau 16]

O i latou e feusuaʻi a o leʻi faaipoipo e ono maua i se faamaʻi e pipisi mai feusuaʻiga