“Ia E Manatua Lē na Faia Oe”

“O lenei, ia e manatua lē na faia oe i ona pō o lou tauleʻaleʻa, a o leʻi oo mai aso leaga, a o leʻi oo mai foʻi tausaga e te faapea ai, E leai soʻu fiafia i ai.”—Failauga 12:1.

E TELE ni manatu ua oso aʻe ona o upu o lea mau. E faatasi lava ona avea oe ma talavou. E sau se taimi o le a e toe tepa i tua i lou talavou ma e lagona ai le lotomalie po o le loto faanoanoa foʻi. Faamata o lē fea le tulaga o le a e iai? E mafai faapefea ona e faatautaia le tulaga e te oo i ai?

Ua taʻua i luga le faalaeiau mai o le Tusi Paia: “Ia e manatua lē na faia oe.” E faapefea ona e faia lea tulaga? E ala lea i le usitaia o tulafono ma mataupu silisili a le Atua o loo i lana Afioga, le Tusi Paia. E lē faapea ai o le a e ola e aunoa ma ni fiafiaga, ae o le a sili ona e fiafia pe afai e te manatua Lē na Faia oe. Aiseā ua faapea ai?

O se faataʻitaʻiga, faapea o lea ua avatu sau taavale ma ua iai ma sou laisene avetaavale. O lea ua iā te oe se saʻolotoga e uiga ese le manaia, ma e mafai ona e maua ai le fiafia tele. Oka se manaia o mea e mafai ona e alu i ai! Ae pau ā lea, e iai se avega tauave e ō faatasi ma lou saʻolotoga lea ua maua. E ao ona e mulimuli i tulafono o le auala ma usitaia faailoilo, ma faatonuga, e tusa ai o le saosaoa o lau ʻave, faapea ma isi lapataʻiga o le auala. Po o lona uiga o le a e lē fiafia ona o na faasāsāaga? E leai! O le mea moni, ua avea ia faailoilo ma puipuiga. E matuaʻi leai lava se mālie pe a lavea lau taavale, a ea?

E faapena foʻi le saʻolotoga lea ua tuuina atu iā te oe e Lē na Faia i tatou, o Ieova le Atua. A o faasolo ina e matua, e na te tuu atu e te filifili po o le a faapefea ona faaaogā lou olaga. (Teuteronome 30:19; Faataoto 27:11) O se faaeaga tele lea tulaga! Ae e iai foʻi ma se avega tauave mamafa. Ua tolaulauina mai e Ieova i lana Afioga ni ‘tulafono o le auala,’ o faatulagaga o loo ia finagalo e te ola ai. Pe ua  taofiofia e nei faatulagaga lou mauaina ai o le fiafia? E leai! Ae ua puipuia ai oe mai tigā ma faigatā ua oo i le tele o talavou i nei aso.

Ua 30 ma ona tupu nei tausaga o Federico, ma ua ia iloa lelei le moni o lea tulaga. A o talavou o ia, sa ia vaai ai i tamaiti latou te aʻoʻoga o faia ni mea sa ia iloa e ao ona ia ʻalofia. Fai mai ā ia: “Sa pei o loo fiafia lava o latou olaga, ae ou te leʻi manatu sa latou maua le fiafia moni.” A toe mafaufau nei la i ai, ua fiafia lava Federico ona o faatulagaga a le Tusi Paia sa fai ma taʻiala i le taimi o lona talavou. “Ioe, sa iai ni oʻu faafitauli, e pei lava foʻi o isi talavou. Ae na puipuia aʻu e aʻoaʻoga a le Tusi Paia, ma sa mafai lava ona ou talanoa atu i se uso Kerisiano e mafai ona fesoasoani mai iā te aʻu. Ua sili ona fiafia loʻu olaga ona o le mulimuli i mataupu silisili o le Tusi Paia!”

O le finagalo o le Atua, ia e fiafia moni lava. E lē o se fiafia e faafoliga fiafia ae o loo natia ou lagona mafatia. Ua faapea mai le Tusi Paia: “Inā olioli ia i lou tama itiiti, ia fiafia foʻi lou loto i aso o lou tauleʻaleʻa.” Ae ua lapataʻi mai foʻi lea lava fuaiupu o le Tusi Paia. “A ia e iloa e faamasinoina oe e le Atua ona o na mea uma.”—Failauga 11:9.

Ia e manatua Lē na Faia oe e ala i lou faaaogā ma le atamai o le saʻolotoga ua ia avatu iā te oe. A e faia faapea, e te mautinoa o le a manatua oe e Lē na Faia i tatou, ma o le a ia foaʻi atu le fiafia sili e mafai ona e maua. Ua fai mai le Tusi Paia: “O le faamanuia a Ieova, o lea e faatamaoaiga aʻi; na te lē faaopoopo i ai se tigā.”—Faataoto 10:22.

Ua lomia e Molimau a Ieova se tusi e 320 ona itulau e taʻu o le Fesili ua Fesili Mai ai Talavou . . . Tali e Aogā, e fesoasoani i talavou i le feagai ai ma tofotofoga o le olaga talavou. E toeitiiti atoa le 34 miliona kopi o lenei tusi ua lomia i gagana e 77. Faafesootaʻi Molimau a Ieova i lou vaipanoa pe a fia maua sau kopi.

[Ata i le itulau 24, 25]

Ina ia e Taulau i le Avea ma Talavou

Ia maua se taimi e faitau ai le Afioga a le Atua

Ia matuā galue i le galuega talaʻi

ʻAlofia aumea leaga

Ia māfana pea a outou talanoaga ma ou mātua

[Ē Ana le Ata]

Faavaa o le polosiua: Pictorial Archive (Near Eastern History) Est.