Le Manatu o le Tusi Paia

O le ā Tonu le Uiga o le Ulu o le Aiga?

E TUSA ai ma le Tusi Paia, “o le ulu o le avā o le tane lea.” (1 Korinito 11:3; Efeso 5:23) Ae o le toʻatele o tagata e talitonu i le Tusi Paia, ua latou manatu ua lē o toe aogā lea mataupu silisili ma e afāina ai foʻi faaipoipoga. Ua fai mai se tasi ulugalii: “Pe afai e ova le faatatauina o le talitonuga e faapea e ao i le fafine ona ‘gauaʻi’ [i le tane], e mafai ona oo atu ai i le faileagaina o fafine i le tino faapea ma faalogona.” O se mea e faanoanoa ai ona ua faauigasesē e le toʻatele o tagata lea mataupu silisili. Ua faapea mai se tasi tusitala: “O le fasi o avā, ua manatu i ai o se mea ua masani ai le tele o atunuu, ma o le aiā lea a le tane o loo viiviia i pesega, i fatuga, ma lauga o faaipoipoga.”

Ua manatu nisi ua māfua lea tulaga ona o le mataupu silisili o loo i le Tusi Paia e tusa o le tulaga ulu. Pe o uunaʻia e le Tusi Paia le manatu faatauvaa ma le sauā i fafine? O le ā tonu lava le uiga o le ulu i le aiga? *

O le Avea ma Ulu o Lona Uiga e Lē o le Pule Sauā

O le avea ma ulu e tusa ai ma le Tusi Paia, o se faatulagaga alofa ae lē o le pule sauā. O le lē amanaʻiaina o le tulafono a le Atua ua  māfua ai le pule sauā o tane i fafine. (Kenese 3:16) O lea la, mai lava i le taimi o Atamu ma Eva, ua masani tane e soona fai la latou pule i isi, e aofia ai ma fafine ma tamaiti.

Ae e lē o le fuafuaga lenā a le Atua. E inosia e Ieova i latou e pule sauā. Sa ia taʻusalaina tane Isaraelu o ē sa pule ma le “faaʻoleʻole” i a latou avā. (Malaki 2:13-16) Ua ia fetalai mai foʻi, ‘ua inosia e lona finagalo lē fiafia i le faasauā.’ (Salamo 11:5) O lea la, ua matuā lē mafai lava e tagata e sauā ma faileagaina a latou avā, ona faaaogā le Tusi Paia e fai ma faamolemolega o a latou faiga leaga.

O le ā e Aafia ai i le Pule Lelei?

O le tulaga ulu, o se faatulagaga na faia e le Atua auā le sologa lelei o mea uma. Seʻi vaganā ai le Atua, o tagata uma lava e ao ona gauaʻi i se isi. O tane e gauaʻi iā Keriso, o fanau e gauaʻi i o latou mātua, ma o Kerisiano uma e gauaʻi i faigāmalo. E oo lava iā Iesu, o loo gauaʻi i le Atua.—Roma 13:1; 1 Korinito 11:3; 15:28; Efeso 6:1.

O le gauaʻi atu i se pulega, e manaʻomia tele mo le sologa lelei o tagata. Ua faapena foʻi ona tāua le gauaʻi atu i le ulu o le aiga ina ia iai se aiga e mautū, fiafia, ma filemu. E tusa lava pe leai se tamā i le aiga, o le tulaga lava lea e tatau ona iai. O le tinā o le a avea ma ulu o le aiga. Pe afai ua taufai leai ni mātua, o le ulumatua, po o se isi tagata o le aiga, e mafai ona avea ma ulu. I tulaga faapea, o le a sologa lelei le aiga pe afai e latou te faaalia le faaaloalo i lē ua avea ma ulu.

O le vala tāua la, e lē o le teena o le mataupu silisili e tusa o le tulaga ulu, ae ia saʻo lona faatatauga, ma le vaaiga i ai. Ua timaʻi mai le aposetolo o Paulo i tane Kerisiano ina ia avea ma ulu e “pei o Keriso foʻi o le ulu ia o le ekalesia.” (Efeso 5:21-23) O loo faasino Paulo i le auala na feagai ai Keriso ma le faapotopotoga, o lea le auala sili o le avea ma ulu. O le ā le faataʻitaʻiga na tuu mai e Iesu?

Sa faaalia e Iesu le alofa, māfana, ma le agalelei, e ui o ia o le Mesia, o lē o le a avea ma tupu ua uma ona tuu i ai e le Atua le pule, ma e sili atu foʻi lona poto ma le masani i le olaga na i lo ona soo. Ae e lē taitai ona sauā pe faigatā o ia. E leʻi soona faia foʻi lana pule ma taʻu soo atu i isi lona tulaga o le Alo o le Atua. O ia o se tasi e loto maulalo ma agamalu. O lea, na ‘avegofie lana amo,’ ma ‘o lana avega foʻi e māmā ia.’ (Mataio 11:28-30) Sa faigofie i tagata ona talanoa atu iā te ia. Na taʻua e Paulo e faapea, o le alofa tele o Iesu i le faapotopotoga na ia ‘foaʻiina mai ai o ia e ia e fai mona sui.’—Efeso 5:25.

E Mafai Faapefea Ona Faataʻitaʻi i le Tulaga Ulu o Iesu?

E mafai faapefea e ulu o aiga ona faataʻitaʻi i uiga o Iesu? Afai e manatu mamafa le ulu o le aiga mo le lelei faaletino ma le faaleagaga o lona aiga, e na te faaavanoa lona taimi ma uaʻi atu i o latou manaʻoga. E na te faamuamua manaʻoga o lana avā ma lana fanau. * (1 Korinito 10:24; Filipi 2:4) O le a faaaloalogia ma lagolagoina o ia e lana avā ma le fanau pe afai e na te faatatauina mataupu silisili ma aʻoaʻoga a le Tusi Paia i lona olaga i aso taʻitasi. I lo latou gauaʻi atu i lana pulega alofa, o le a taulau ai a latou taumafaiga i le foʻia o faafitauli. O le faatinoina o lona tulaga ulu i ala a le Tusi Paia, ua ati aʻe ai e le tane se aiga fiafia, e latou te faamamalu ma viia ai le Atua.

O se tamā e atamai, e lotomaulalo foʻi. E ui ina faigatā ona taʻu atu o ia e sesē, ae e faatoese atu pe afai e manaʻomia. Ua taʻua i le Tusi Paia le iai o le saogalemu i ‘le toʻatele o faipule.’ (Faataoto 24:6) Ioe, o le lotomaulalo e uunaʻia ai le ulu o le aiga e saʻili ma faalogo atu i manatu o lana avā ma lana fanau pe a talafeagai. E ala i le faataʻitaʻi iā Iesu, o le a faamautinoa ai e se ulu Kerisiano o le a maua e lona aiga le fiafia ma le saogalemu, ma e faamamaluina ma viia ai foʻi Lē na amataina aiga, o Ieova le Atua.—Efeso 3:14, 15.

[Faaopoopoga i lalo]

[Ata i le itulau 22]

O se tane e fetuutuunaʻi e faalogo i manatu o lana avā ma lana fanau