Aogā o le Faitau i Fanau

TUSIA E LE TUSITALA O LE ALA MAI! I POLANI

Ua faia i tausaga ta‘itasi i Polani se taumafaiga faapitoa ua faaigoaina “O Polani Atoa, Ia Faitau i Fanau,” ma ua faapea mai i latou e faamaopoopoina lea taumafaiga: “E tāua tele le faitau, ina ia poto ai ma iloa mafaufau. . . E tusa ua matala ai le faitoto‘a o manatunatuga ma le malamalama o le tagata.” Afai e moni lea manatu, aiseā ua manatu ai le to‘atele o tagata ma tamaiti e faapea o le faitau, o se mea e tau ina fai?

Ua fai mai i latou na amataina lea taumafaiga: “E ao ona totō i tamaiti le naunau e faitau ma fiafia i tusi, a o laiti.” Ua latou fai atu i mātua: “Afai e te mana‘o ia popoto ma taulau lau fanau i le a‘oga ma le olaga, ia faitau iā i latou i aso uma, mo le 20 minute.”

Ua faalaeiauina fo‘i mātua ia aua le faatuutuu i le faitau iā latou fanau, ae “ia vave ona amata a o laiti.” O le ā le matua e amata mai ai? Ua fautuaina mātua: “Ia tatou faitau atu i se pepe meamea, a o opoina o ia, ma vaai atu ma le alofa iā te ia, ma ati a‘e lona naunau e ala i le faalogo mai i o tatou leo. O le a faapea ona ati a‘e ai iā te ia le manatua o le sootaga i le va o le faitau ma se lagona o le saogalemu, fiafia, ma le māfana. O le a faaolaola ai fo‘i ma lona mafaufau.”

Ua faamamafa mai e i latou o loo faamaopoopoina lea taumafaiga faapitoa e faapea “ua sili atu ona tāua le faitau i tamaiti i le taimi nei,” ma e iai fo‘i nisi aogā ua latou faailoa mai. O le faitau i tamaiti, e a‘oa‘oina ai e mafaufau, “ia malamalama i isi tagata, i le lalolagi, ma i latou lava, . . . e faatupu ai le naunau, e ati a‘e ai mafaufauga, le tuputupu o faalogona, e ati a‘e ai le alofa mo isi, ia magafagafa, e a‘oa‘oina ai amioga tatau, . . . ma ati a‘e ai se lagona fiafia iā te i latou lava.” O la latou faai‘uga e faapea e mautinoa o le a aogā lenei gaoioiga e “puipuia ai mai aafiaga leaga . . . lea e lamatia ai mafaufau ma loto o tamaiti.”

Ina ia tele se aogā i tamaiti, ia faitau tusi e faalaeiau ai tamaiti e faalatalata atu i Lē na Faia Mea Uma o loo soifua i le lagi. O le Tusi Paia le tusi sili ua fesoasoani mai ina ia tatou faalatalata atu i le Atua. Ua ta‘u mai i le Tusi Paia e faapea na a‘oa‘oina Timoteo i “tusi paia” talu mai lava ‘ina o tama itiiti.’ (2 Timoteo 3:15) A o faagasolo le polokalame o le faitau atu i tamaiti, e mafai e mātua ona faitau tusi o loo faavae mai le Tusi Paia e iai La‘u Tusi o Tala o Le Tusi Paia ma Faalogo i le Faia‘oga Sili, o ni tusi ua tusia faapitoa mo tamaiti, ma ua lomia e Molimau a Ieova.