Ua Fesili Mai Talavou . . .

E Faapefea Ona Ou Puipuia Lo‘u Tulaga Mamā?

“I le 19 o o‘u tausaga na ma feusua‘i ai ma se tama ma te a‘o‘oga faatasi. Na ou lagona ai lava le māsiasi ma le mafatia, e pei ua leai so‘u aogā.”—Lasi. *

UA FAATONUINA e le Tusi Paia: “Inā sosola ese ia outou i le faitaaga.” (1 Korinito 6:18) Ae e foliga mai e lē to‘atele ni talavou e fia mulimuli i lenā faatonuga mai le Tusi Paia ina ia faatali se‘ia oo ina faaipoipo. O nisi ua pei o Lasi, ua lolo atu i o latou tu‘inanauga ma ua oo ai i le mafatia ma se loto fuatiaifo lē mamā.

O le mea moni, e lē faigofie le pulea o faalogona faaleituaiga. E pei ona ta‘ua i le tusi Adolescent Development, o suiga i le tino pe a faasolo ina talavou, “e faapena fo‘i ona oo mai ai ma lagona malolosi faaleituaiga.” Ua ioeina e Paulo lenā manatu i lona faapea mai: “E iai taimi e te‘i ai lava ua oo mai ni lagona mo faiga faaleituaiga.”

Ae ua mātauina e se polofesa o mataupu i tamaiti, o Howard Kulin e faapea: “E lē na o suiga o le tino e māfua ai faafitauli o talavou.” O loo aafia fo‘i i latou i aumea ma mea e tafafao ai. O le mea moni, e malosi tele le aafiaga mai i le tulaga o le vafealoa‘i, aemaise lava mai tagata o la latou tupulaga.

Na tusia e Patricia Hersch i lana tusi A Tribe Apart e faapea, “e pei ua ese lava le lalolagi o le ‘autalavou. . . . E foliga mai ua ese i latou [mai i tagata matutua] i mea e latou te faatāuaina, i amioga, ma tulafono.” Ae o “amioga” ma “tulafono” o loo faia e le to‘atele o talavou i nei aso, ua uuna‘ia ai le faia o mea latou te loto e fai e tusa o lagona faaleituaiga, ae lē o le puleaina o ia lagona. O lea la e to‘atele talavou ua uuna‘ia ai e faia feusua‘iga a o le‘i faaipoipo.

E ui i lea, ua filifili ma le poto talavou Kerisiano ia ‘alofia faiga lē mamā uma, auā ua latou iloa o se tasi lea o “galuega a le tino e inosia e le Atua.” * (Kalatia 5:19) Ae e faapefea ona e tumau pe a oo mai faaosoosoga faapea?

Sa‘ili ni Aumea Lelei

O le mea e ao ona mātauina, e iai ni aafiaga leaga mai i isi tagata, ae a lelei au aumea, o le a lelei se aafiaga iā te oe. E pei ona fai mai le Tusi Paia: “O lē latou te feoa‘i ma tagata popoto, e poto lava ia.” (Faataoto 13:20; 1 Korinito 15:33)  Ua ta‘ua e se lipoti mai le Faalapotopotoga o le Soifua Mālōlōina a le Lalolagi e faapea, “o talavou e lelei faiā ma o latou mātua, faapea ma isi tagata, ma a latou tupulaga,” ma ua “iai ni ta‘iala ma ni tapulaa . . . o le a tau lē aafia i latou i amioga lē mamā.”

Ua sili ona aogā le iai o se faiā lelei ma ou mātua. Ua manatua e Iosefa e faapea, “E mautinoa lava le telē o le fesoasoani a o‘u mātua ina ia ou lē lolo atu i faiga faaleituaiga.” Ioe, e mafai e mātua o ē matata‘u i le Atua ona avatu ni ta‘iala ma ni tapulaa mai le Afioga a le Atua. (Efeso 6:2, 3) E la te fesoasoani i au taumafaiga ina ia e tumau i le amio mamā.

Atonu i le taimi muamua, e fai si faigatā ona talanoa iā i la‘ua i mataupu faapea. Ae o le a e ofo i lo la malamalama lelei i faalogona na o loo iā te oe. Auā sa iai se taimi na talavou ai fo‘i i la‘ua. O lea ua fautua mai se talavou e igoa iā Sonia, “Talanoa i ou mātua, ma aua e te mā pe meia e talanoa i ai e tusa o faiga faaleituaiga.”

Ae faapefea pe afai e lē faatāuaina e ou mātua ta‘iala a le Tusi Paia? Ia tumau ona e āva pea i ou mātua, ae e ono mana‘omia ona e sa‘ili atu i se isi mo se fesoasoani. Fai mai Paulo lea na ta‘ua muamua, “E tele se fesoasoani ua ou maua mai Kerisiano ta‘umatuaina ua faaipoipo.” Ua faaopoopo mai se teine talavou e igoa iā Tenisi, o lona tinā e lē talitonu, “Ou te talanoa i tagata matutua e faalaeiau mai faaleagaga, i taimi ou te mana‘omia ai se fesoasoani.” Ae ua ia fai mai fo‘i, “Ou te ‘alofia i latou e lē malolosi faaleagaga, e tusa lava pe tutusa o matou talitonuga faaletapua‘iga.”

E iai taimi e ao ai fo‘i ona e faaeteete po o ai au aumea i le faapotopotoga Kerisiano. Ua faamanatu mai e le Tusi Paia e faapea i so o se faapotopotoga o tagata, o le a iai nisi e ono lē amio lelei. (2 Timoteo 2:20) O le ā e ao ona e fai pe afai e te iloaina, o nisi talavou i lau faapotopotoga, o ni “tagata pepelo,” pe e natia o latou uiga moni? (Salamo 26:4) Aua e te faatasitasi iā i latou na, a ia faatasi atu i ni uō e lagolagoina lau filifiliga ia amio mamā.

Teena Faasalalauga e Faaleagaina Ai

E ao fo‘i ona e taumafai ina ia puipui oe mai le mau faasalalauga eseese e faauigalua ma faatosinaga tau feusua‘iga o loo ala mai i tusi, mekasini, o musika ma taaloga vitiō, o tifaga, ma le Initineti. Ua faafoliga mai ai e faapea o le feusua‘i a o le‘i faaipoipoina o se mea e manaia, ma e maua ai le fiafia e aunoa ma ni tigā. Ae o le ā lona i‘uga? Na ta‘ua e Tenisi e faapea: “Na ou matamata i ni ata na faaalia ai e pei o se mea noa amioga lē mamā ma le tauatane, ma na māfua ai ona galo iā te a‘u le mata‘utia o ia amioga i le silafaga a Ieova.”

O le mea moni, ua avea faafiafiaga ma auala e iloagatā ai i‘uga leaga o le feusua‘i a o le‘i faaipoipoina, e pei o ma‘itaga e le‘i mana‘omia, o faaipoipoga e faia faamalosi, ma faama‘i pipisi mai feusua‘iga. O lea, aua ne‘i seetia oe i “ē fai mai, ua lelei le mea leaga, a e leaga le mea lelei.”—Isaia 5:20.

Ia manatua upu mai le Faataoto 14:15: “O lē ua faigofie, e talia e ia upu uma; a o lē ua mafaufau, ua faautauta o ia i lona ala.” Afai e iai ni faiga po o ni ata e faatatau i feusua‘iga e oso ane a o faitau sau tusi, po o e matamata i le Initineti po o le TV, ia tuu loa! Tapuni lau tusi, tapē le komepiuta, pe sui le ata! Ona sui loa lea o le  mea o loo e mafaufau i ai i se mea e aogā. (Filipi 4:8) O le a mafai ai ona e taofia mana‘ona‘oga sesē a o le‘i tutupu a‘e.—Iakopo 1:14, 15.

Ia Mataala i Tulaga Mata‘utia

Po o fai sau uō? O lona uiga la e ao ona e faaeteete. Ua lapata‘i mai le Tusi Paia: “E sili le faa‘ole‘ole o le loto i mea uma, ma ua matuā leaga lava.” (Ieremia 17:9) E faigofie lava ona avea faaaliga o le alofa ma tulaga e oo ai i amioga lē mamā. Ia gaoioi ma le poto, e ala i le ō ma se tasi e matua, pe ō faatasi ma nisi, pe a lua tafafao. Ia ‘alofia le ō na o oulua lava.

Atonu o lea ua e faamau ma e te lagona e lē afāina le faailoa atu o le alofa i lau uō. E tusa o lea tulaga, se‘i taga‘i fo‘i i se lapata‘iga mai le lipoti a le Faalapotopotoga o le Soifua Mālōlōina: “E foliga mai, ua faia feusua‘iga e le to‘atele o tama‘ita‘i a o le‘i faaipoipoina, pe a oo ina iloa o le a faaipoipo, ma e tupu fo‘i lea tulaga i atunuu e faasāina ai ia mea.” * O lea, ia iai se tapulaa o faaaliga o lo oulua alofa, ma puipui ai mai tigā.

O se mea e foliga e faate‘ia ai ona o le to‘atele o talavou, aemaise lava teine, ua faamalosia e faia feusua‘iga. E tusa ai ma se tasi su‘esu‘ega, o le “60 pasene o le aofa‘i o teine talavou i le Iunaite Setete ua faia feusua‘iga a o le‘i atoa lo latou 15 tausaga, ae e le‘i loto i ai.” Ua masani ona faaaogā e tamāloloa lo latou malosi e faamalosia ai latou. (Failauga 4:1) O se faata‘ita‘iga, o loo ta‘ua i le Tusi Paia le “mana‘o” o Amanono, le atalii o le tupu o Tavita, i lona tuafafine o Tamara, o lē e la te tamā faatasi, ma na ia faatogafiti ona faamalosi iā te ia.—2 Samuelu 13:1, 10-16.

E lē faapea ai ua matuā lē mafai lava ona e puipui oe mai se tulaga e faamalosia ai. E tele lava mea e mafai ona e fai ina ia puipui ai oe lava, e ala i lou ‘alofia o ni tulaga e mafai ona faamalosia ai oe, ma ia vave lau gaoioi pe afai ua iai se lamatiaga. *

Ia “Tasi” Lou Loto

Talosia ia aogā fautuaga ua talanoaina i lenei mataupu i lau tauiviga ia soifua a‘e i se olaga mamā. Ae o lau amio, e uuna‘ia lea e le mea o loo i lou loto. Ua fetalai mai Iesu, “e alu a‘e mai le loto . . . o le faitaaga.” (Mataio 15:19) O lea ia e teena le uiga o le “loto fetoa‘i” (faaleogalua) po o le “faalotolotolua,” e tusa ai o lenei mataupu tāua.—Salamo 12:2; 119:113.

Afai e te lagona ua tau vaivai lou maumaututū, pe e te lagona le faalotolotolua, ia tatalo e pei ona fai e Tavita ina ua ia ‘ai‘oi atu: “Ia e faia ina ia tasi lo‘u loto e mata‘u i lou suafa.” (Salamo 86:11) Ona e galue loa lea e tusa ma lau talosaga e ala i le su‘esu‘e i le Tusi Paia ma lomiga faale-Tusi Paia ma faatatauina. (Iakopo 1:22) Ua fai mai Litia, “E faamalosia a‘u ia ou teena faaosoosoga faaleituaiga, e ala i lo‘u manatuaina pea, ‘o sē faitaaga, po o sē fai amio leaga, e lē maua sona tofi i le malo o le Atua.’”—Efeso 5:5.

E lē faigofie le teena o faiga faaleituaiga a o le‘i faaipoipoina. Ae e ala i le fesoasoani mai iā Ieova, o le a e tumau i le mamā, ma ‘alofia le tele o tigā ma puapuaga e oo iā te oe faapea ma isi.—Faataoto 5:8-12.

[Faaopoopoga i lalo]

[Ata i le itulau 19]

O le talanoa i ou mātua e tusa o ou faalogona e fesoasoani lea i lou tumau i se tulaga mamā

[Ata i le itulau 20]

E mafai ona avea le ō faatasi ma isi o se puipuiga