E Tāua Tele le Tausiga o Lau Tama

E AFĀINA le lumana‘i o le tagata i mea e na te a‘oa‘oina pe lē a‘oa‘oina fo‘i a o la‘itiiti. O ā la ni mea e mana‘omia e tamaiti mai o latou mātua ina ia avea i latou o ni tagata matutua e sologa lelei ma taulau? Se‘i taga‘i fo‘i i manatu o nisi tagata su‘esu‘e ona o ni sa‘ili‘iliga na faia i ni tausaga faato‘ā tuana‘i atu.

Le Aogā o Fesoota‘iga o Neula

O le poto ua maua e ala i sa‘ili‘iliga i le fai‘ai i nei ona pō, ua mafai ai e saienisi ona malamalama atili i le fai‘ai. Ua iloa mai i ia sa‘ili‘iliga, a o itiiti le tamaitiiti, o le taimi lea e ese le tāua auā le atina‘eina o tomai o lona mafaufau e tusa o faamatalaga eseese, le faaalia o faalogona, ma le iloaina o se gagana. Ua ta‘ua e le mekasini o le Nation: “E matuā vave lava ona tutupu fesoota‘iga o neula o le fai‘ai i tausaga amata o se tamaitiiti, a o aafia le fai‘ai i mea e tutupu i lea vaitaimi, e lē gata i tulaga na ola mai ma le tamaitiiti, ae faapea fo‘i i mea e tutupu iā te ia.”

E talitonu saienitisi, e tutupu le tele o fesoota‘iga i neula o le fai‘ai o le tamaitiiti, i tausaga amata o lona olaga. O le manatu o Dr. T. Berry Brazelton, o sē tasi e poto faapitoa i le tuputupu a‘e o tamaiti e faapea, o le taimi tonu lea “e faataatia ai le faavae mo le lumana‘i o le tamaitiiti e tusa o lona poto o le a iai, lona mafaia o mea, lona faamoemoeina o isi, ma lona uuna‘iga ina ia iloa mea.”

I tausaga amata o le tamaitiiti, e vave lava le tuputupu a‘e o lona fai‘ai e lē gata i lona telē, ae faapea fo‘i i le tele o neula, ma lona aogā. Afai e ola a‘e o ia i se si‘omaga e tele ni mea aogā o loo tutupu iā te ia, o le tele fo‘i lenā o  fesoota‘iga o neula o le a iai i lona fai‘ai. E ala i ia fesoota‘iga, o le a mafai ai ona ia mafaufau, a‘oa‘o, ma fuafua ai mea.

Atonu o le tele o mea aogā ma lelei e oo i le tamaitiiti, o le tele fo‘i lenā o le olaola o neula o lona fai‘ai, ma atili ai lava ona faateleina fesoota‘iga i lona fai‘ai. O se mea e ao ona mātauina, e lē na o vala faalemafaufau, o mea e pei o faamatalaga, numera, ma gagana e aogā iā te ia, ae ua iloa fo‘i e saienitisi e mana‘omia fo‘i vala tau i faalogona. Ua iloa mai i sa‘ili‘iliga e faapea o tamaiti e lē masani ona opoina ma le māfana pe faataalo, o le a itiiti ni fesoota‘iga o neula o le a iai i o latou fai‘ai.

Le Tausiga ma Lona Aafiaga

A o faasolo ina matutua tamaiti, e foliga mai o le a faalēaogāina e le tino ni fesoota‘iga e lē o toe mana‘omia. E tele se aafiaga i mea e mafai e le tamaitiiti ona fai ona o lea tulaga. Fai mai Max Cynader, o se alii e su‘esu‘e i fai‘ai: “A lē maua e le tamaitiiti le tausiga e aogā i le taimi tonu lea o lona matua, o le a lē sologa lelei fesoota‘iga i neula o lona fai‘ai.” E tusa ai ma le manatu o Dr. J. Fraser Mustard, na ia faapea mai, e vaivai le mafaufau o lea tamaitiiti, e faalēlelei i le tautala ma fuainumera, e iai faafitauli tau i le soifua mālōlōina pe a matua, ma faigatā lana amio.

O lea e foliga mai o mea e tutupu i se tagata a o tamameamea e mafai ona aafia ai lona olaga o se tagata matua. O mea e tutupu iā te ia a o la‘itiiti e aafia ai le mafai e se tagata ona fetuutuuna‘i, lona mafai ona manatunatu i mea loloto, ma pe faamata e iā te ia se tigā alofa mo isi. O lea la, e tāua tele le tausiga a mātua. Ua fai mai se tasi foma‘i o tamaiti: “O se vala e sili ona tāua o lea vaitaimi o le olaga, o le tausia lea o le tamaitiiti e se tagata e malamalama lelei i lenei mataupu.”

Atonu, e foliga faigofie. A lelei ona tausi ma a‘oa‘o lau fanau, o le a matuā taulau lava i latou. Ae ua iloa lelei e mātua, e lē faigofie ona iloa po o le ā tonu le auala e tausi lelei ai fanau. E lē otometi ona iloa pe faapefea ona avea ma matua lelei.

E tusa ai ma se tasi su‘esu‘ega na fai, e 25 pasene le aofa‘i o mātua e lē o iloaina o mea latou te faia i a latou fanau, a lē o le fesoasoani, o le faalavelavea ai o o latou tomai, lagona e mafaia ai se mea, ma le naunau ia a‘oa‘oina. Ua tula‘i mai ai la ni fesili e faapea: O le ā le auala sili e a‘oa‘oina ai lau fanau? O le ā e te faia ina ia saunia ai se tulaga e atiina a‘e lelei ai i latou? O le a tatou talanoa i ia vala.

[Ata i le itulau 6]

O tamaiti e lē amana‘iaina pe lē alofagia, e lē sologa lelei e pei o isi tamaiti