O Talavou o Loo Faailoa Atu o Latou Talitonuga

E TO‘ATELE talavou o loo iai i le faalapotopotoga a Molimau a Ieova. E latou te alolofa i le Atua ma taumafai e ola e tusa ma ana tapulaa o loo i le Tusi Paia. E faatāuaina e nei talavou o latou talitonuga ma e latou te faailoa atu i isi i le a‘oga. O le a tatou talanoa i nisi o faaa‘oa‘oga.

▪ A o iai Holi i le vasega ono, o le tofiga na tuu atu i lana vasega, o le tusi lea o se tali i le fesili, “E faapefea ona e fo‘ia le faafitauli e tusa ai o tagata faatupu faalavelave, e aunoa ma le faamasaaina o le toto?” Na tusi loa e Holi se faamatalaga e uiga i lona faamoemoe mai le Tusi Paia e tusa ai o le lumana‘i. Na ia faamatala e faapea i le talafaasolopito o le tagata ua “pule ai le tasi tagata i le tasi, e leaga ai o ia lava.” (Failauga 8:9) Ona ia faamatala loa lea o le faamoemoe moni o tagata, o le Malo o le Atua. Na ia tusia e faapea: “Talu ai o Iesu le Tupu ua tofia o lea Malo, o le a ia faamamā ese faafitauli uma, e iai le faatupu faalavelave.” Na faamatala atili e Holi mea o le a faia e Iesu, lea e lē mafaia e se tasi ta‘ita‘i ona faia. Sa ia tusi e faapea: “Sa faaali mai e Iesu a o iai i le lalolagi, uiga o le a ia faaalia pe a fai ma tupu. Na alofa o ia ma manatu i tagata. Na ia faaali fo‘i lona mana e ala i le faamālōlōina o ma‘i ma le faatutūina o ē ua oti. E leai se malo faaletagata e mafai ona faatutūina i latou ua maliliu. Ae e mafaia lenā mea e le Malo o le Atua.” Na faai‘u le tala a Holi i le faaupuga e faapea “O le vaifofō, e lē mai tagata, ae mai le Atua.”

O le faaupuga na tusia e le faia‘oga i le tala a Holi: “Malo lava i lau taumafaiga Holi! Manaia tele au tapenapenaga.” Sa faafiafiaina fo‘i le faia‘oga i mau na tusi ai e Holi. Na maua ai i inā le avanoa o Holi e faamatala ai i lona faia‘oga le A‘oga Faatiokarate, o se polokalame e faia i vaiaso ta‘itasi e faalelei ai le tautala ma le a‘oa‘o atu a Molimau a Ieova. Na fiafia le faia‘oga ina ua ave i ai sana kopi o le tusi o loo faaaogāina i lea A‘oga.

 ▪ Ua mafai fo‘i e Jessica ona faamatala ona talitonuga ina ua tusi ni tala i le a‘oga. Ua ia faapea mai: “E tolu ni tala na ou tusia e faatatau i o‘u talitonuga. O se tasi tala e faatatau i Molimau a Ieova ma aiā faaletapua‘iga. Na faaali e le faia‘oga la‘u tala i le potu tusi ina ia faitau i ai i latou e fia faitau ai. E le‘i leva talu ai nei ona tusi sa‘u tala e faatatau i lo‘u papatisoga ma le tāua o lea aso iā te a‘u. E masani i tamaiti ona fetufaa‘i kopi o a latou tala i isi, ma na latou maua ai le avanoa e faitau ai i la‘u tala. Fai mai se tasi teine a‘oga: ‘Manaia tele. E lelei ua ou iloa ai avega tauave e faia e Molimau a Ieova. Faamālō mo lou papatisoga!’ Na faapea mai se isi teine a‘oga: ‘E uiga ese le manaia o lau tala! O se mea e mata‘ina iā te a‘u le malosi o lou faatuatua!’ Ae o le faaupuga na tusi e se tasi tama a‘oga e faapea: ‘E lelei tele lou mafaufau. Faamālō atu!’”

▪ I le 11 o tausaga o Melissa, na ia maua ai se avanoa lelei e faamatala atu ai ona talitonuga. “Na alu atu le teine tausima‘i i la‘u vasega lea e fai ai mataupu faasaienisi, e faamatala atu le faiga tau puipuiga o le tino. Sa lāgā ai le mataupu e tusa o le tuiina o le toto. Ina ua uma le mataupu na ou faamatala i lo‘u faia‘oga o le saienisi e uiga i la tatou vitiō e faatatau i le toto. Na ou aveina le vitiō lea i le a‘oga i le aso na sosoo ai, ma na aveina e le faia‘oga i le fale e matamata ai ma lona aiga. I le aso na sosoo ai, na ia toe avatu le vitiō i le a‘oga ma faaali i la matou vasega, ma le isi vasega. Ona fai loa lea o sana faamatalaga e ta‘uleleia ai Molimau a Ieova, i lona faamatala atu i le vasega e faapea ana leai i tatou, semanū e lē faigofie ona maua ni togafitiga e sui ai le tuiina o le toto. Ina ua ia toe faafo‘i mai le vitiō na ia fesili mai, ‘E faapefea ona maua se vitiō faapea mo le potu tusi a le a‘oga?’ Na ou avatu se vitiō iā te ia, ma e lē gata ina fiafia ai o ia, ae faapena fo‘i a‘u!”

O Holi, ma Jessica, ma Melissa, o nisi ia o ni talavou Molimau a Ieova o loo mulimuli i le fautuaga a le Tusi Paia ia manatua Lē na Faia i latou. (Failauga 12:1) Po o e faia fo‘i faapea? Afai o lenā le tulaga, ia e mautinoa o loo e faafiafiaina Ieova.—Faataoto 27:11; Eperu 6:10.

Talavou e, afai e tou te faailoa atu lo outou talitonuga i tamaiti o le a‘oga ma faia‘oga, o se molimau tele lea e uiga iā Ieova le Atua ma ana fuafuaga. O le a faamalosia ai fo‘i lou faatuatua, ma atia‘e ai iā te oe se mitamitaga ona o le faaeaga o le avea ma se tasi o auauna a le Atua. (Ieremia 9:24) Ua avea fo‘i le molimau atu i le a‘oga ma puipuiga. E tusa ai ma le faamatalaga a Jessica: “O se tasi o aogā o lo‘u faailoa atu o o‘u talitonuga, e lē uuna‘ia ai a‘u e tamaiti e fai mea e lē o talafeagai ma le mea o loo fai mai ai le Tusi Paia.”

[Ata i le itulau 22]

Holi

[Ata i le itulau 22, 23]

Jessica

[Ata i le itulau 23]

Melissa