Le Manatu o le Tusi Paia

Pe E Tatau Ona Tatala le Faaipoipoga?

I PERETANIA, ua faafeiloa‘i atu se faife‘au i ē o auai i se sauniga faapitoa. O loo tutū i ona luma se ulugalii ma ni a lā uō māfana faapea ma fanau. Ae o le sauniga lea o le a fai, e lē o se faaipoipoga, ae o le sauniga ina ia aloa‘ia ai le faamutaina o le faaipoipoga a lea ulugalii! Ua taatele lava le tatalaina o faaipoipoga, ma o nisi lotu, ua latou faia ni sauniga faapitoa mo lea tulaga.

Po o e mafaufau e tatala lau faaipoipoga? Pe faamata o le a sili atu ona e fiafia pe a e faia faapea? Po o iai ni gaoioiga atamai e mafai ona e fai ina ia oulua maua ai ma lau paaga le fiafia?

‘Avea i La‘ua ma Tino e Tasi’

Ina ua faaipoipoina le ulua‘i ulugalii, na fetalai le Atua e ao i le tane ona “faatasi ma lana avā; ona avea ai lea o i la‘ua ma tino e tasi.” (Kenese 2:24) O lea, na fuafuaina le faaipoipoga ina ia tumau. O le māfuaaga lenā na fetalai mai ai Iesu mulimuli ane, e pau le māfuaaga e faatagaina ai i le Tusi Paia se talagā faaipoipoga, ma mafai ai ona toe faaipoipo, o le “mulilua.”—Mataio 19:3-9. *

 Ua faamamafa mai ai le tāua o le taumafai e faamaoni i le faaipoipoga. Ae ā pe afai e fai lava si faigatā o faafitauli i la oulua aiga?

Pe e Fo‘ia pe a Tatala le Faaipoipoga?

Na tuu mai e Iesu se mataupu silisili e fua i ai le aogā o mea tatou te fai i lona faapea mai: “A e ta‘uamiotonuina le poto i ana galuega.” (Mataio 11:19) O le ā ua tatou iloa mai le mau faaipoipoga ua tatalaina e aunoa ma ni māfuaaga tāua?

Ua fai mai le polofesa o Linda Waite mai le Iunivesite o Chicago, o lē na faauluulu i ai se vaega na su‘esu‘e i tagata e lē o fiafia i a latou faaipoipoga: “Ua soona faamamafa na‘uā le lelei o le tatalaina o se faaipoipoga.” E faapena fo‘i se faamatalaga a se polofesa i Oxford, o Michael Argyle, ina ua mavae le 11 tausaga o ia su‘esu‘eina manatu o le faitau afe o tagata. Na ia faapea mai, “o i latou e sili ona faanoanoa i tagata uma na su‘esu‘eina, o tagata ia ua tatala a latou faaipoipoga, po ua tete‘a ma a latou paaga.” Aiseā?

E ui lava e mafai i se talaga faaipoipoga ona fo‘ia nisi faafitauli, ae e mafai fo‘i ona māfua ai ni tulaga faigatā e lē mafai ona puleaina. Ioe, ua iloa mai su‘esu‘ega, e lē avea le tatalaina o se faaipoipoga ma tulaga e faaitiitia ai le lagona mafatia, pe faateleina ai le fiafia o le tagata iā te ia lava.

E tusa pe lē “atoatoa lau faaipoipoga,” ae e iai aogā o le tumau ai i le faaipoipoga. E to‘atele i latou na filifili e faia lea tulaga, ua oo ina maua le fiafia. Ua fai mai le polofesa o Waite: “E sau le taimi e faaleleia ai le tele o faafitauli, ma o le a oo ai loa ina fiafia i latou o loo faaipoipoina.” Na faaalia mai se su‘esu‘ega e faapea, e tusa o le 8 mai le 10 tagata na “matuā lē fiafia lava” i a latou lava faaipoipoga, ae e le‘i manana‘o e tatala, ma e tusa ma le lima tausaga mulimuli ane na i‘u ina maua le “fiafia i a latou faaipoipoga.” E lelei pe a lē vavevave le ulugalii e tatala le faaipoipoga, e tusa lava pe faigatā tulaga o loo iai.

Ni Gaoioiga Atamai

O i latou o loo mafaufau e tatala a latou faaipoipoga, e ao ona fesili ifo po o talafeagai o latou moomooga e tusa ai o a latou faaipoipoga. Ua uuna‘ia e faiga o faasalalauga se faigāuō fealofani, ia faia se faaipoipoga manaia, ma i‘u ai i se taunuuga e fiafia tele. A o faagasolo le taimi, afai ua lē taunuu ni moomooga sa iai, ona oo loa lea i se tulaga ua tula‘i mai ai ni feeseesea‘iga. A o tuputupu a‘e le lē fiafia, o le a oo ai ina tumu i lagona tigā. Ua mou atu le alofa, ae suia i le ita ma le ‘ino‘ino. I se tulaga faapea, ua manatu ai nisi e pau lava le mea e fai, o le tatala loa o le faaipoipoga.—Faataoto 13:12.

Na i lo le tuu i ou faalogona lē fiafia, ia faauō atu iā i latou e matuā faamaoni i a latou faaipoipoga. Ua fautuaina Kerisiano ina ia “feapoapoa‘i ai, ma ia fefaamāfanafanaa‘i.” (1 Tesalonia 5:11) O le mea moni, e tāua tele le faalaeiau atu o le ‘auuso iā i latou o loo maluelue a latou faaipoipoga.

Le Tāua o Uiga Faale-Atua

Ua tima‘i mai le aposetolo o Paulo: “Ia oofu outou i le alofa mutimuti vale, ma le agalelei, ma le loto maulalo, ma le agamalu, ma le onosai.” (Kolose 3:12) O le a fesoasoani uiga faale-Atua i le autasi ai o se faaipoipoga i taimi faigatā.

O se faaa‘oa‘oga, na tusi Paulo e faapea: “Ia fefaapalepalea‘i, ma ia fefaamagaloa‘i outou, pe afai ua agaleagaina se tasi e se tasi.” (Kolose 3:13) Ua fai mai Christopher Peterson, o sē tasi e su‘esu‘e i amioga: “O le uiga e sili ona fesoota‘i ma le fiafia, o le loto faamagalo.”

O le agalelei, le alofa mutimutivale, ma le loto faamagalo, e maua ai le alofa, “o le fusi lea e atoatoa ona lelei ai.” (Kolose 3:14) E lē taumatea sa iai se taimi na lua fealofani ai lava. Pe e mafai ona toe faaolaola le alofa sa iai muamua? E tusa po o le ā le faigatā o le tulaga o loo lua iai, ia faamalosi. E iai se taunuuga lelei. O le galulue faatasi e faatatauina mataupu silisili o le Tusi Paia o le a i‘u ai i se fiafiaga e sili atu na i lo le mea na e manatu i ai. O le a matuā faafiafiaina ai lava Ieova le Atua, o Lē na Faia le faaipoipoga, i au taumafaiga e tusa o lea itu.—Faataoto 15:20.

[Faaopoopoga i lalo]