Sa‘oloto, e Ui o se Pagota!

Tusia e le tusitala o le Ala Mai! i Mekisikō

I LE itu i sisifo o Mekisikō, e tusa ma le 60 maila [90 kilomita] mai lona talafatai, o loo iai motu e ta‘u o Islas Marías. * O se tasi o ia motu o le Pasefika, ua fai e le malo o Mekisikō ma nofoaga e ave i ai pagota, talu mai le 1905. Sa avea muamua ma nofoaga e matuā lē fia mana‘o lava se isi e faasala ai, ae i le taimi nei, a lelei le amio a se pagota, e mafai ona talosaga e alu i ai!

O se tasi o māfuaaga ona e mafai ona nonofo faatasi se pagota ma lona aiga i le motu. E leai ni sela e iai, ae e nonofo i ni tama‘i fale. O loo maua ai le tele o mea e mana‘omia e pei ona iai i se taulaga la‘itiiti. E mafai ona fesoota‘i pagota ma isi i fafo e ala i telefoni, uaealesi, televise, ma le meli. E a‘o‘oga a latou fanau i le a‘oga tulaga lua o loo iai, ae e ao ona toe fo‘i i Mekisikō pe a oo i a‘oga maualuluga. E iai faasāsāaga o le asiasi atu i le motu, ae o vaiaso uma lava e malaga atu ai le vaa a le malo e avatu mea e mana‘omia, faapea ma tagata asiasi.

Ae faapefea le lumana‘i o pagota? O le ta‘u a pagota iā i latou lava, o colonos, po o ni tagata aumau, ma o se āiāiga mo i latou, o lo latou galulue lea i se galuega mo ni nai itula i aso ta‘itasi. E lē gata o le a aogā lea tulaga i lo latou olaga pe a magalo, ae e fesoasoani ai fo‘i i lo latou tausiga. Ua iā i latou fo‘i le avanoa e faia ai mea e pei o togālaau, ma galuega taulima, e maua ai a latou tupe. Ae e lē faapea ai ua leai ni faasāsāaga i le avea ai ma pagota. O taeao uma lava e fai ai se tauvalaauga, ae o le 9:00 i le pō le taimi o le sā.

Ua Oo mai le Sa‘olotoga Faaleagaga i Nei Motu

I le 1985, na talosaga ai se pagota e Molimau a Ieova lona aiga, e fia maua se fesoasoani faaleagaga. Na amataina sana su‘esu‘ega e ala i le meli. A o faagasolo le taimi, na fai ai se vaega o tagata a‘oga e su‘esu‘e le Tusi Paia, ma na amata ona fai ni a latou sauniga. Na faatagaina e le malo Molimau e asiasi atu i le motu, ma sa fai loa ma a latou masani le faia faapea. E 13 itula le umi o le malaga mai Mazatlán i le motu. E  tusa ma le 40 pagota na su‘esu‘eina le upu moni o le Afioga a le Atua, ma ua papatisoina, ma ina ua māe‘a lo latou faasalaga, ua toe fo‘i atu i o latou aiga. I le taimi nei, e to‘a ono Molimau papatiso o loo iai i le motu, ma e tusa ma le 25 tagata e masani ona auai i sauniga.

E viiviia e alii ofisa o le malo Molimau a Ieova ona o a latou taumafaiga, ma o pagota ua avea ma Molimau, e faaaloalogia e tagata uma. I se taimi e le‘i leva talu ai nei, na fai atu ai se faatonu lagolago i se Molimau na asiasi atu: “O se tulaga lelei tele ona e taufai tutusa lo tatou naunau mo le lelei o pagota i le faaletino ma i amio. Matou te lagolagoina atoatoa la outou galuega.” Na ia ofo mai e na te faaleleia le fale ua faia ai sauniga a le ‘auuso.

Na fai mai se pagota ua atoa le sefulu tausaga i le motu, ma ua avea ma Molimau papatisoina: “A fesili mai uso o loo asiasi mai pe ou te fia alu ese mai le motu, ou te fai i ai ou te mana‘o e faaauau la‘u auaunaga i inei, ona ou te manatu i ai o la‘u oganuu lea auā o loo mana‘omia tele ai le galuega. Ae ou te fia auai lava i fonotaga ma fia faatasi atu i isi uso Kerisiano.” O se taimi o le tausaga nei e magalo ai o ia ona o lona amio lelei.

Ua ta‘ua le aogā i pagota o lea nofoaga o faasalaga i Islas Marías. Ae ua avea le fe‘au o le Malo ma auala e maua ai le sa‘olotoga moni faaleagaga faapea ma se lumana‘i sologa lelei. Ua auala mai ai le “sa‘olotoga” ma le “matuā tatalaina o ē ua fusifusia.”—Luka 4:18; Isaia 61:1.

[Faaopoopoga i lalo]

[Pusa/Ata i le itulau 29]

Ua Avea ma Toeaina

Na lokaina Guillermo i le falepuipui ona sa ia faatauina atu, ma faaaogā fualaau faasāina. Ina ua auina atu o ia i Islas Marías, sa faaauau pea lona faaaogā o fualaau faasāina. Ae na ia mātauina, o nisi pagota sa fai faalelei o latou la‘ei, e fiafia, ma e amio lelei, e ui e umi so latou faasalaga o loo tuli ona o soligatulafono e aofia ai le faatau atu o fualaau faasāina. Ina ua ia iloa o loo latou su‘esu‘eina le Tusi Paia ma Molimau a Ieova, na ia talia se valaaulia e auai i sauniga, ma mulimuli ane, na faia sana su‘esu‘ega o le Tusi Paia.

E tele ni suiga na faia e Guillermo i lona olaga ma e le‘i umi ae magalo loa o ia. Sa ia sa‘ili loa i Molimau a Ieova ina ia faaauau lana su‘esu‘ega. O le taimi nei, ua avea o ia o se toeaina i le faapotopotoga Kerisiano, ma e to‘a 17 nisi o lona ‘auaiga ua avea ma Molimau a Ieova. Ua ia faapea mai: “O se faaeaga tele le iloa o Ieova ma tuu ai amioga leaga. O le to‘atele lava o a‘u uō sa iai ua maliliu ona o fualaau faasāina. Na aafia lo‘u mafaufau i fualaau faasāina, ma na faigatā ai ona ou manatuaina mea. Ae o le auala o loo faia ai e Molimau su‘esu‘ega ua fesoasoani tele lea i le faaleleia o lo‘u mafaufau. Na matuā ofo foma‘i ona sa latou manatu e lē toe lelei lo‘u mafaufau. E uiga ese le aogā o le upu moni mai le Tusi Paia mo a‘u ma lo‘u aiga. Sa lē taitai ona matou fealofani, ae o lenei ua matou autasi.”

[Faafanua i le itulau 28]

(Taga‘i i le lomiga mo le ata atoa)

María Madre

Islas Marías

Mazatlán

[Ata i le itulau 28]

O loo auai atu ni pagota ma o latou aiga i sauniga i le Maota o le Malo i María Madre