Toe Faia le Olimipeka i le Mea na Amata Mai Ai

NA TOE fuafua le faia o taaloga o le Olimipeka i ona pō nei ona o galuega a le ‘ausu‘esu‘e i le palapala. O toēga na maua mai le palapala i le vaipanoa anamua o Olimepa i Eleni, na uuna‘ia ai se alii maualuga o Falani, o Pierre de Coubertin, ina ia toe faia ia taaloga. O lea, na toe amata ai taaloga o le Olimipeka i Atenai, i le 1896.

A o le‘i oo i le taimi o taaloga o le 2004, na faaaogāina masini eli palapala eseese e amata ai se galuega tele, auā sauniuniga o le toe faia o taaloga i le mea na amata mai ai. Na avea Atenai, le laumua o Eleni, e pei o se nofoaga telē mo faugāfale a o faia sauniuniga mo le Olimipeka.

O taaloga lona XXVIII o le Olimipeka, e pei ona faaigoaina ai taaloga o le 2004, na faia i Atenai iā Aokuso 13 i le 29. E tusa ma le 10,000 tagata taaalo na tauvā i taaloga e 28, mai atunuu e 201, o se fuainumera silia lea o atunuu ua auai. E 38 nofoaga eseese na faia ai taaloga, ma e silia ma le 300 taimi na faia ai sauniga o le faaulaina o pine. E tusa ma le 21,500 tagata faasalalau na auai, ae e sili atu le aofa‘i o leoleo faapitoa na auai, e tusa ma le 55,000.

Manumalo i Faafitauli

Ua loa ona taumafai Atenai ia toe faia Taaloga o le Olimipeka i le nofoaga na amata mai ai. Talu ai o le tausaga 1996 na atoa i ai le 100 tausaga talu ona faia ia taaloga, sa manatu ai e manaia pe a toe faia taaloga i le atunuu na amata mai ai.

Ae e le‘i manuia taumafaiga a Atenai e avatu Taaloga o le 1996 e fai i lo latou atunuu. E le‘i gafatia e le aai ona faatautaia tulaga sa mana‘omia auā le faia ai o taaloga mo le lua vaiaso.

Na matuā faate‘ia lava alii ofisa o Eleni ona o le lē taulau o a latou taumafaiga, ma na latou gaoioi loa. Sa latou folafola mai o le a faaleleia lo latou aai. O lea, ina ua uma ona faia ni fuafuaga maumaututū, sa toe taumafai loa Atenai i le 1997, ia avatu Taaloga o le Olimipeka 2004 e fai i lo latou atunuu. Na manuia la latou taumafaiga.

Na amata ona sauniuni Atenai auā le galuega tele o loo i luma. O lo latou faanaunauga ia talimālō i taaloga, na amata ai loa se galuega o faugāfale tetele ma isi galuega. Na faaaogā masini e eliina ai le palapala, auā le faaleleia ma le faia o auala ma nofoaga mo taaloga  i vaega eseese o le aai. E oo lava i aso mālōlō, i le taugāvevela o le taumāfanafana, ae na vaaia lava le pisi o masini ma le afuafu tetele o tagata o loo galulue i vaega eseese.

Iā Mati 2001, na tū laueleele ai le vaalele muamua i le malae vaalele fou i Atenai, o se malae e sili ona manaia auā femalagaa‘iga i le va o atunuu. E tusa ma le 75 maila [120 kilomita] o auala fou sa fuafuaina, faapea ma le toe faaleleia o nisi auala tuai, e tusa lea ma le 55 maila [90 kilomita]. E tusa ma le 40 auala tetele i luga o isi auala na fuafuaina, ina ia faafaigofie ai femalagaa‘iga a taavale. Na faia auala u‘amea fou mo nofoaafi e alu i lalo o le eleele, ma na faaopoopo se isi 15 maila [24 kilomita] o auala u‘amea e ō ai ni ituaiga pasi (trams). Na fausia se auala nofoaafi e 20 maila [32 kilomita] le umi faatasi ai ma ni nofoaga faatali nofoaafi mananaia, ina ia faaitiitia ai taavale feoa‘i ma le tele o le polusione i le ‘ea.

E tusa ua taumafai Atenai ia avea o se aai fou i sina taimi puupuu, e ala i le totōina o laau i le tele o nofoaga, faamamā le si‘omaga, faapea ma le faafou o auala o femalagaa‘iga. Fai mai Jacques Rogge, le peresitene o le Komiti Faavaomalo o le Olimipeka: “O tagata na vaai muamua iā Atenai, o le a matuā sui lava i la latou vaai.”

 Se Sauniuniga Fitā

A o lalata le oo ane o le taimi mo le sauniga amata o le Olimipeka, na faapena fo‘i ona nanati le faaumaina o galuega. Na faatusaina e le peresitene nei sauniuniga eseese e pei o se siva faa-Eleni e ta‘u o le syrtaki. O lana tala ula e faapea: “Ou te faatusaina sauniuniga mo taaloga e pei o se musika, e iai le syrtaki. E amatamata lemū, ona faatopetope lea, ae oo ane i le i‘uga, ua lē mafai ona e siva ona o le vave.”

O le mea tonu lava lenā na tupu, ona na vave lava le fausaga o le Nofoaga e api ai le ‘autaaalo, e tusa o le vaega autū lea o sauniuniga mo taaloga, i se vaega i matū o Atenai. Ua avea lea galuega o se faugāfale e sili ona telē ua faia i Eleni. E tusa ma le 16,000 tagata taaalo, ma tagata e vaavaaia i latou, na mau ai. I le māe‘a o taaloga, ua avea lea nofoaga ma mea e mau ai nisi o le aai, e tusa ma le 10,000 o i latou.

E lē o galo iā i latou na faamaopoopoina taaloga, le sootaga o tala faasolopito anamua ma ia taaloga. O lea, o nisi taualumaga o taaloga, na faia lea i le vaipanoa ua lauiloa mai anamua, o Olimepa. Na faamatilatila mai ai fo‘i nisi nofoaga tāua mai aso anamua i le taimi na faagasolo ai taaloga. Na fausia se nofoaga fou mo tuuga vaa e lata i le mea na tau ai le taua lauiloa o Malafoni, ma na faia le malafoni i le auala na faia ai anamua. Na filifili i latou na faamaopoopoina taaloga ina ia faia le tuuga mai Malafoni  se‘ia oo i Atenai, i le auala lea na tamo‘e ai e tusa ma uputuu le fitafita Atenai i le 490 T.L.M., e faalauiloa atu le to‘ilalo o Peresia. E 26 maila [42 kilomita] le umi.

O Lē ua Manumalo i le Pine Auro o . . .

Ina ua amata faafiafiaga o le sauniga amata o taaloga, na avea ai le fale telē e faia ai taaloga, le Olympic Stadium, ma mataaga autū. E 75,000 le aofa‘i e mafai ona ofi ai. I le to‘atele, ua avea lea fale na toe faafouina ma fausaga sili ona mata‘ina o fausaga uma ua faia mo taaloga o le Olimipeka i Atenai. O le tulaga e mata‘ina ai tele lenei fale, o lona taualuga, lea na fuafuaina e se tusiata lauiloa mai Sepania, o Santiago Calatrava.

O se fausaga e uiga ese ona o lona taualuga e fai i tioata e 16,000 tone lona mamafa, ma e 108,000 futu faatafafā [10,000 mita faatafafā] lona telē. E lua ni pou lolo‘u e uiga ese le tetelē ma le malolosi o loo apoina lea fausaga, e ta‘i 997 futu [304 mita] le lautele, ae 262 futu [80 mita] le maualuga. O paipa u‘amea o loo faia ai pou e i le va o le 9,000 ma le 10,000 tone le mamafa, ma ua faapea mai se tagata e tomai faapitoa i faugāfale, “e mafai ona ofi ai se pasi.” O le mamafa atoa o le taualuga e tusa e faaluaina le fale e sili ona maualuga i Falani, o le Eiffel Tower.

O le ā le māfuaaga o le faia o lea taualuga telē faapea? Talu ai, iā Aokuso, e mata‘utia le vevela o le lā i Atenai. O tioata i le taualuga, e faapitoa lava ina ia taofia le 60 pasene o le vevela o le la. O se isi fo‘i māfuaaga, ona sa iai se manatu ia faia se fausaga mata‘ina e fai ma faailoga o taaloga o le Olimipeka i Atenai. E tusa ai ma le faamatalaga a le minisita o le aganuu i Eleni, o Evangelos Venizelos, “o se fausaga sili ona mata‘ina lea, ma o se pine faamau o taaloga Olimipeka i Atenai.”

Ina ua māe‘a le sauniga faamavae, ua fai lea fale ma pine faamau e faamanatu ai le galuega fitā sa taumafai i ai. O le faamoemoe o tagata Atenai, o le a faaleleia ai o latou olaga ona o auala ma fale na fausia mo le Olimipeka. O le a latou faaauau fo‘i ona faatautaia o latou faafitauli ma lu‘i e oo ane e pei lava ona latou masani ona faia.

[Pusa i le itulau 13]

Na Lu‘ia Mea e Latou te Faatāuaina

Na fiafia tele i latou o loo faamaopoopoina taaloga e faamanatu mai uiga o loo faatāuaina e taaloga, e pei o “tauvaga faatamatane, o taaloga, o le filemu, o aganuu, ma a‘oa‘oga.” Ae i le isi itu, o loo iai fo‘i ma le faapolotiki, le lotonuu, faiga faapisinisi, ma faiga faapi‘opi‘o.

O le tulaga masani, ua avea le Olimipeka ma māfuaaga e matamata ai le to‘atele i le TV, ma e anoanoa‘i le tele o tupe e maua ai e ala i faasalalauga. O lea, ua fai mai Murray Phillips, o se tagata e su‘esu‘e i ia tulaga mai Ausetalia: “Ua matuā avea lava le Olimipeka ma pisinisi tele, ma o le tele lava o filifiliga e faavae i le seleni e maua mai ai.”

O nisi ua latou faitioina le malosi o le lotonuu na faaalia i taaloga. Na fai se taumafaiga e fai se maliega o le Olimipeka e faasā ai le feitaga‘i ma le feteena‘i i le taimi o taaloga. E ui o le uiga moni lenā o taaloga, ae o le a lē manuia na fuafuaga se‘i vaganā ua aveese le pogai o le feitaga‘i. Ua faapea mai se polofesa e suafa iā Brian Martin: “Ua avea le Olimipeka ma nofoaga e vātau ai faapolotiki.” Ua ia toe faapea mai fo‘i: “Ua avea tauvaga a le ‘autaaalo ma tauvaga a malo. E lē mafai ona auai se tagata taalo se‘i vaganā ua auai lona nuu. A manumalo se tagata po o se ‘au, o le manumalo fo‘i lenā o lo latou atunuu, e pei ona vaaia i fu‘a ma vii o fu‘a . . . Ua faaauau [i le Olimipeka] le fetaua‘i o tagata i tauvaga i taaloga, ma le fetaua‘i o malo mo le malosi ma le pule. . . . Ua lē mafai e i latou o loo faamaopoopoina le Olimipeka ona faatino le sini autū o taaloga ia faaauiluma le filemu.”

[Ata i le itulau 13]

Fale na faia ai taaloga o le Olimipeka i Atenai

Ata o le pine o le 2004

[Ē Ana le Ata]

Ata e pu‘e mai i luga: AP Photo/Thanassis Stavrakis; ata o le pine: © ATHOC

[Ata i le itulau 14]

Nofoaafi i Atenai

Malae vaalele i Atenai

[Ē Ana le Ata]

© ATHOC

[Ata i le itulau 15]

Fauina o le Nofoaga e api ai le ‘autaaalo

Nofoaga mo Tuuga Vaa i Agios Kosmas

[Ē Ana le Ata]

© ATHOC/Photo: K. Vergas

[Ata i le itulau 15, 16]

Fauina o le taualuga o le Olympic Stadium

 [Ata i le itulau 16]

O se ata o le taualuga

[Ē Ana le Ata]

© ATHOC

[Ē Ana le Ata i le itulau 12]

© ATHOC