E Mafai Ona Faasaoina le Lalolagi!

O LOO faia ni taumafaiga lelei a ta‘ita‘i o malo e faaitiitia ai le polusione, le tāina o vaomatua, ma isi tulaga o loo faaleagaina ai le si‘osi‘omaga. Na amata ia taumafaiga mai le 1972, i se Fonotaga a Malo Aufaatasi e tusa o le Si‘osi‘omaga, ma e 163 malo ua fai  ma fono e lagolagoina ai lea fuafuaga. O le ā se tulaga ua oo i ai? Ua faapea mai David Hunter, o se faatonu i le Ofisa Autū o Tulafono Faavaomalo o le Si‘osi‘omaga: “O le mea e faanoanoa ai ona e lē o mafai e nei fonotaga ma maliega ua sainia ona taofia ai le faaleagaina o le si‘osi‘omaga. O le tulaga moni lava, ua sili atu ona faalētonu le tulaga o le si‘osi‘omaga ua iai nei na i lo le taimi na fai ai le Fonotaga a Malo Aufaatasi i le 1992.”

Ua silia i le 30 tausaga o taumafai lea faafitauli, ma aiseā la ua itiiti ai se mea ua mafaia? O se tasi o māfuaaga ona e mana‘omia ona aga‘iga‘i i luma tulaga tau tamaoaiga o atunuu, ma e faalagolago lea tulaga i fefaataua‘iga a tagata. O lona uiga e ao ona tele ni mea e gaosia, ma e mana‘omia ai alagā‘oa e fai ai. Ua aafia ai lava le si‘osi‘omaga ma ua atili ai lava ona faaleagaina. O le ā la se vaifofō?

E Lē Iloa Ona Faatonu Lona Ala

Ua faamanino mai i le Tusi Paia le māfuaaga ua lē taulau ai taumafaiga a le tagata e faafoe ana fuafuaga. Ua faapea mai le perofeta o Ieremia: “Ieova e, ua ou iloa e lē o i le tagata lona ala, e lē o i le tagata e savali ona faatonuina le mea e ui ai o ia.” (Ieremia 10:23) Ua moni lava ia upu!

Po ua e asiasi atu i se paka po o se togālaau matagofie? E ese le mananaia ma aulelei o laau ma fugālaau eseese, a ea? Ae e le‘i te‘i lava ua iai lea togālaau manaia. E tele se taimi e alu i le salaina o laau, o le moaina, vele le vao, ma le teuina o laau ia mananaia. E ma‘eu le tulaga o le a iai lo tatou lalolagi pe afai e faapea ona vaavaaia faalelei e tagata uma.

O le tulaga moni lava lenā na fuafuaina e Lē na Faia i tatou, ia iai lo tatou lalolagi. E tusa ai ma le faamatalaga i le Afioga a le Atua ina ua faia e le Atua le lalolagi, “Ua ave fo‘i le tagata, e Ieova le Atua, ma ua tuu iā te ia i le faato‘aga i Etena e galue ai ma leoleo ai.” (Kenese 2:15) Na tuu mai fo‘i i tagata le galuega ia tausi i le parataiso i Etena, ma ia faalautele ia tumu ai le lalolagi atoa.—Kenese 1:28.

Na avea le lē usitai o Atamu ma Eva ma tulaga na lē lelei atoatoa ai ma melea le avanoa e tausi ma faalautele ai lea Parataiso. (Kenese 3:1-6, 23) Ua tuufaasolo mai ai iā i tatou uma le agasala ma le lē lelei atoatoa ona o i tatou o la la‘ua fanau. (Roma 5:12) O se tasi la lea o faata‘ita‘iga o le lē mafai e le tagata ona faatonu o lona ala, o le lē lelei lea ona vaai o alagā‘oa o le laueleele. Ua manino mai e lē mafai e tagata ona fo‘ia o latou faafitauli. Ua mana‘omia ai se fesoasoani e sili atu.

Le Auala e Fo‘ia Ai

A o iai Iesu i le lalolagi, na ia a‘oa‘oina ona soo ia tatalo: “Ia oo mai lou malo. Ia faia lou finagalo i le lalolagi, e pei ona faia i le lagi.” (Mataio 6:10) Ua faailoa mai i le Tusi Paia, e ala i le Malo o le Atua o loo i le lagi, o le a avea le lalolagi ma parataiso. (Salamo 37:10, 11) O le a atoatoa ai ona fua mai laau eseese uma, i se si‘osi‘omaga mamā. (Salamo 72:16) E ala i le ta‘ita‘iga a le Atua, o le a faamamāina fo‘i le lalolagi e lē toe iai se polusione, ma o le a iloa e tagata ona ola e talafeagai ai ma le si‘osi‘omaga. E faapefea ona tatou mautinoa lea tulaga?

Ua ta‘ua i le Tusi Paia o le a “lē gaee e faavavau” le lalolagi. (Salamo 104:5) O le a oo mai le taimi a le Atua e maua ai e tagata uma faamanuiaga e faavavau, e iai le soifua mālōlōina lelei, le fau ma soloi o taumafa, ma fale lelei. Afai o e fia malamalama atili e tusa ai o le finagalo o le Atua, ia talanoa i se tasi o Molimau a Ieova. E latou te fia fesoasoani iā te oe e ala i le Tusi Paia ina ia e iloa le auala o le a faasaoina ai lenei lalolagi.

[Ata i le itulau 30]

E ala i le ta‘ita‘iga a le Atua, o le a ola tagata e talafeagai ai ma le si‘osi‘omaga

[Ē Ana le Ata]

O se teine ma se faifaato‘aga: © Jeremy Horner/ Panos Pictures