O Lē Fea Aulelei e Sili Ona Tāua?

E TOSINA tagata iā i latou e aulelei. Ae faapefea moni lava ona avea oe o se tagata aulelei? Auā e lē tele ni mea e mafai ona e fai e sui ai ou foliga vaaia. O le lalelei fo‘i i le tino, e mavae atu ia, auā e leai se isi e sao mai āuga o le matua ma le ma‘i. O lē fea aulelei e sili ona tāua, e tumau, ma e mafai ona e ausia?

E Tāua Tele le Tagata i Totonu

Ua ta‘utino mai e le Tusi Paia e faapea e tāua tele iā Ieova, o Lē na Faia i tatou, o tatou tagata lilo i totonu. Se‘i tatou talanoa i ni faata‘ita‘iga.

Ina ua faatonu e Ieova le perofeta o Samuelu e sa‘ili se tupu o Isaraelu mai atalii o Iese, na fiafia Samuelu iā Eliapo, o se alii aulelei tele. Na manatu o ia: “E moni lava, o loo i luma o Ieova lē a faauuina e ia.” Ae na fetalai Ieova ia Samuelu: “Aua e te vaai i lona tino, po o le maualuga o lona tino, auā ua ou tetee iā te ia; auā e lē vaai Ieova pei o le vaai o tagata, auā e vaai tagata i le tino, a e vaai Ieova i le loto.”—1 Samuelu 16:6, 7.

O lē na filifilia e avea ma tupu, o le uii lea, o Tavita. E ui ina ta‘ua e ‘manaia ona mata, ma ua aulelei lava,’ ae atonu e lē aulelei o ia e pei o ona uso matutua. Ae na ‘osofia Tavita e le Agaga o Ieova, e afua mai i lea lava aso.’ O ia o se tagata e lē lelei atoatoa ma na ia fai ni agasala matuiā, ae na iloa o ia ona o lona loto ina lelei ma o se auauna faamaoni a le Atua se‘ia oo ina maliu. (1 Samuelu 16:12, 13) E mautinoa lava lona tausaafia iā Ieova, ona o ona uiga lelei.

Ae e le‘i faapena Apisaloma, o se tasi o atalii o Tavita. O ia o se tagata e le‘i tausaafia i isi e ui o se tagata e aulelei tele. Ua fai mai le Tusi Paia: “Sa leai se tagata i Isaraelu uma e pei o Apisaloma ona aulelei; sa matuā viia ai lava o ia; e afua mai i ona alofivae e oo i lona tumua‘i, e leai se pona iā te ia.” (2 Samuelu 14:25) Ae na foua e Apisaloma le nofoaiga a lona tamā ona o lona faanaunauga faasausili. Na oo fo‘i ina alu o ia i palake a lona tamā. Na to‘asā Ieova iā te ia ma i‘u ai ina oti i se auala tugā.—2 Samuelu 15:10-14; 16:13-22; 17:14; 18:9, 15.

Pe e te fiafia la iā Apisaloma? O le mea moni, e leai. A fua atu i ai, e lē o ia o se tagata lelei. E le‘i aogā lona  aulelei ona o lona faasausili ma lona lē faamaoni, ma e le‘i taofia ai fo‘i lona i‘uga leaga. Ae e tele ni faata‘ita‘iga o loo i le Tusi Paia o ni tagata e popoto ma e tausaafia o latou uiga, ae e lē o ta‘ua o latou foliga pe faape‘ī. E manino la, o le mea e sili ona tāua, o o latou uiga tausaafia.

E Fiafia Isi i Amio Tausaafia

Pe e tosina atu tagata i amioga tausaafia? Ua faamatala mai e Iosina, o se tama‘ita‘i ua toeitiiti atoa le sefulu tausaga talu ona faaipoipo e faapea: “A o faagasolo tausaga, ua sili ona ou māfana i la‘u tane ona o lona faamaoni iā te a‘u. O le mea e sili ona tāua iā te ia, o le faafiafia lea o le Atua. Ona o lea faanaunauga ua avea ai o ia o se tagata e manatunatu ma alofa. A fai ana filifiliga, e manatu mai iā te a‘u ma ou te lagona ai lona talisapaia o a‘u. Ou te iloa lava lona alofa tele iā te a‘u.”

Ua fai mai Tanielu, o se alii ua faaipoipo talu mai le 1987 e faapea: “E lalelei la‘u avā iā te a‘u. E lē gata ina ou tosina i ona foliga, ae e sili ona ou alofa iā te ia ona o ona uiga. E manatunatu o ia i isi ma naunau mo lo latou lelei. E iā te ia ni uiga lelei i le avea ai o se Kerisiano. Ua manaia ai lava la ma mafutaga.”

I lenei lalolagi o loo faatāuaina le foliga mai o mea, ia aua ne‘i gata la tatou vaai i foliga i fafo. Ia tatou iloa, e lē mafai ona aulelei pea se tasi e pei o tagata i tifaga, ma e itiiti fo‘i se aogā o lea tulaga. Ae o le aulelei moni e sau mai uiga lelei o o tatou tagata lilo, ma e mafai ona tatou atiina a‘e. Ua faapea mai le Tusi Paia: “O le matagofie e pepelo lea, o le mea faatauvaa le lalelei; a o le fafine ua mata‘u iā Ieova, e viia lava o ia.” Ae ua lapata‘i mai le Tusi Paia: “O le mama auro i le isu o le puaa, o le fafine lalelei lea ua te‘a ma le mafaufau.”—Faataoto 11:22; 31:30.

Ua fesoasoani mai le Afioga a le Atua ina ia tatou faasilisili “le tagata lilo o le loto, ia teua lea i le mea e lē pala, o le loto agamalu ma le filemu, o le mea tau tele lava lea i luma o le Atua.” (1 Peteru 3:4) O le mea moni, e sili atu ona tautele le aulelei o le tagata i totonu na i lo le aulelei i fafo. O se mea fo‘i e mafai ona ausia e tagata uma.

[Ata i le itulau 28, 29]

O le a sili ona e aulelei ona o lau amio tausaafia na i lo ni mea e faaaulelei ai oe i fafo