O le Motu e Maua ai Tupe Lapopo‘a

Tusia e le tusitala o le Ala Mai! i Guam

O YAP, o se faasologa o motu o loo i le vasa laolao ma le telē ua ta‘ua o le Vasa Pasefika. E lē gata ina matagofie nei motu o le teropika, ae o le manaia fo‘i o le tau, ua avea ai ma nofoaga e mapu i ai tagata faimalaga o loo manana‘o i se nofoaga to‘afilemu. Ae o se mea ua masani ona faate‘ia ai i latou e asiasi i ai, ona o tupe a tagata o ia motu, e teu i le auala. O nei tupe e uiga ese le lapopo‘a!

I motu uma o Yap, o le a e mātauina ai ni papamaa lapotopoto toe mafolafola i luma o fale ma le aualatele. O ia maa, e ta‘u o rai i le gagana Yap, ma o tupe ia a le atunuu. O nisi tagata e tuu a latou tupe maa i le fale, ae o le to‘atele o tagata, e ese lava faletupe e teu ai a latou tupe. E leai ni leoleo po ni tagata e faigaluega i ia faletupe. E leai fo‘i se fale e tuu ai auā o nei tupe e lē teuina i se fale, ae tuu i fafo. E pū le ogatotonu o nei papamaa, ma e tuu e faalagolago i niu ma puipui o fale. E oo atu i le 12 futu [4 mita] le lautele o nei tupe maa, a o le mamafa e mafai ona sili atu i le lima tone.

Atonu e masani ona tuu au tupe i le taga o lou ofu, ae e lē mafai ona aveina nei tupe maa i lau taavale, auā e lē ofi ai. Talu mai le 1931, e lē o toe faia ni tupe faapea, ae o loo aogā pea i le motu. Na faapefea ona maua nei tupe maa uigaese?

 E Mauagatā

E tusa ai ma tala o le vavau, o ni tagata folau mai Yap na taunuu i le motu o Palau ma aumai ai ni maa matagofie. Na latou ave ia maa i Yap ma fai ai ni tupe. Na latou tāina faamāfolafola ma faalapotopoto, ia pei o le masina, ma faapu le ogatotonu o maa.

E na o maa e iai le aragonite ma le calcite, o ni ituaiga o minerale, na faaaogāina e tagata Yap e fai ai tupe. O le aragonite e maua mai le eleele, ma e iai fo‘i lea minerale i totonu o le penina, a o le calcite e maua i maa muro. A lelei ona tāina, e ese le mananaia o nei ituaiga o maa, ae e lē maua i Yap. O lea, na malaga atu ai tagata Yap i Palau e aumai ai. O Palau, o se motu e tusa ma le 250 maila i saute i sisifo o Yap, ma e lima aso e ō ai i paopao i le vasa loulouā ona faato‘ā taunuu lea.

Sa latou faanoi muamua i le alii sili o le nuu ona fai loa lea o le galuega o le tipi ma eli papamaa. E faaaogā ni meafaigaluega mai anamua e tipi ai papamaa mai ana, ona fai lea ia mafolafola. E tele ni masina ma ni tausaga na alu i le faia o se tupe maa e tasi!

Na faapu le ogatotonu o maa e tui ai se ogālaau ina ia mafai ona ave i le matafaga. Ona uta loa lea o nei tupe fou i paopao po o vaa laau. A telē se tupe, ona faatū lea i le sami ae fau faataamilo ai se vaa laau. Ona toso loa lea i Yap, ae e faalagolago i le matagi e uuna‘ia le vaa, faatasi ma le malolosi o i latou e aloina.

O nei galuega uma e le‘i faaaogāina ai se masini, ma o se tulaga fo‘i na lamatia ai ola. E to‘atele i latou na lavevea ma maliliu ai i le tipiina ma le utaina o nei maa. E iai fo‘i ni faigatā e oo ane i le malaga i Yap. A taga‘i i le alititai o Yap ma Palau, o le a e vaai ai i ni tupe maa o loo taatitia i le alititai, ma e ta‘u mai ai, e le‘i mafai ona oo uma tupe maa ma tagata ma le saogalemu i Yap. Ae o na tupe e i le alititai, e iai tagata i Yap e ana. O loo aogā pea e pei lava o tupe maa o loo i le nuu.

 O le ā Sona Tau?

Pe a faaaogā le tupe maa i fefaataua‘iga, e tuu lava i le mea o loo iai. O le tele o tupe maa, o loo iai pea i le mea ua leva ona iai, ma e mamao ma le mea e nofo ai lē e ana. E lē gaoia e se isi.

A iai se isi e na te fia gaoia, e ao ona lava lona malosi, ma ia lē poi e faia lea tulaga, auā e fai si faigatā o le faia faapea. E iloa uma e tuaoi lē e ana le tupe maa, ma e latou te vaaia faalelei mea totino a isi.

O le ā le auala e te iloa ai le tau o se tupe maa? Mātau muamua le telē o le maa, lona manaia ma lona faiga, ona e sa‘ili lea po o le ā lona talaaga. Ua leva ona iai? Pe na faigatā ona maua? Na lavevea pe maliliu nisi ina ua uta mai i Yap? Ae o le ā le tulaga o tagata o loo faia le fefaataua‘iga i le tupe maa? Auā e maualuga le tau o se tupe maa e ana e se alii.

I le 1960, na malamalama ai tagata o isi nuu i le talaaga o se tasi tupe maa ina ua faatau e se faletupe o se isi atunuu se tupe maa, o lona telē e lima futu le lautele. E foliga mai na faaaogāina lea tupe maa talu mai tausaga o le 1880. Na faaaogāina e totogi ai le fausiaina o se fale. Na avatu fo‘i e se tasi nuu i se nuu e latou te tuaoi auā se siva faapitoa na latou faia. Mulimuli ane, na faaaogāina e faatau ai ni ‘apa faufale. O nei fefaataua‘iga uma na faia ae o loo tuu pea le maa i le mea o loo iai, ma e leai fo‘i ni faamaumauga na faia. Na iloa uma e tagata o Yap lē e ona le tupe ma lona talaaga.

Tetelē, ae Lē Tutusa Tau

I le faitau selau o tausaga ua tuana‘i ina ua faato‘ā maua tupe maa, e na o alii sili na iai, ona sa seāseā ona maua. Ae i le faai‘uga o le senituri lona 19, na mafai ona tele tupe maa e maua ina ua iai meafaigaluega u‘amea faapea ma vaa la‘u uta. Na maua ai fo‘i ma tupe maa lapopo‘a. E tetelē atu tupe fou i tupe tuai, ae e lē tutusa tau ona na sili atu ona faigatā ona maua tupe tuai.

I le 1929, na faitau ma iloa ai e 13,281 tupe maa o loo iai, e sili atu na i lo le faitau aofa‘i o tagata o le nuu. Ina ua tupu le Taua Lona Lua a le Lalolagi, na faaitiitia ai lava tupe maa na iai. Na ave e vaegaau le tele o tupe ma ta‘ei e fai ai malae vaalele ma pa. E na o le ‘afa o le aofa‘i o ia tupe maa na totoe ai. Ona ō atu fo‘i lea o tagata e fia fai suvania, ma isi tagata faapena, ma ave le tele o maa. I le vaitaimi nei, ua vaai le malo i nei tupe maa e tusa o ‘oa a le atunuu ma ua latou puipui e tusa ai ma le tulafono.

E leai ni tupe e tutupu i laau o Yap pe fola i ona alatetele, ae o loo tuu ‘oa a tagata i le auala ina ia maimoaina e le to‘atele!

[Faafanua i le itulau 24]

(Taga‘i i le lomiga mo le ata atoa)

Iapani

VASA PASEFIKA

Filipaina

Saipan

Guam

Yap

Palau

[Ē Ana le Ata]

Globe: Mountain High Maps® Copyright © 1997 Digital Wisdom, Inc.

[Ata i le itulau 25]

Le mea e teu ai tupe maa

[Ata i le itulau 26]

O nisi tupe maa i Yap e sili atu i le lima tone lo latou mamafa