Pe Avea le Nonofo Faapouliuli ma Faavae Lelei o se Faaipoipoga?

E TUSA ai ma se mekasini e faatatau i faaipoipoga: “Ua taatele i atunuu mau‘oa le nonofo faapouliuli o tagata. E tusa ma le ‘afa o i latou o faia lea tulaga ua manatu i ai o se faiga e iloa ai pe fetaui ona faaipoipo mulimuli ane.” (Journal of Marriage and Family) O lona uiga la, e tusa ai o lea tusi, e ao ona “lē toe iai ni faaipoipoga e lē manuia, ma o i latou e faaipoipo mulimuli ane e ao ona sologa lelei.”

Ae ua ta‘ua atili i le mekasini: “E tusa ai ma tulaga o loo iai, e lē o le mea lenā o loo tupu. O tagata na nonofo muamua ae faaipoipo mulimuli, e tele ina lē fiafia, e lē faifaimea faatasi, e tele le femisa‘i ma lē felagolagoma‘i, e tele faafitauli i le faaipoipoga, ma e lē o mafai ona fo‘ia . . . E lē gata i lea, ua tele ina tatala faaipoipoga a i latou na nonofo muamua ae faaipoipo mulimuli na i lo i latou na faaipoipo ae lē nonofo faapouliuli.”

Ua faaalia mai ai, o le mea ua lelei i le manatu o tagata, e lē faapea ai o se gaoioiga poto. Ua faamaonia ai le moni o upu o loo i le Ieremia 10:23, e faapea, e lē mafai e “le tagata . . . ona faatonuina le mea e ui ai o ia.” Ma‘eu le atamai o le faalagolago i fautuaga poto mai le Afioga a le Atua, e tusa o faaipoipoga! (2 Timoteo 3:16) O se faata‘ita‘iga, ua faapea mai le Tusi Paia e tusa o ē faaipoipo: “O le mea lea e tuua ai e le tane lona tamā ma lona tinā, a e faatasi ma lana avā; ona avea ai lea o i la‘ua ma tino e tasi.”—Kenese 2:24; Mataio 19:5.

Ua sili ona maua se faaipoipoga fiafia ma tumau pe a mulimuli i lea faatonuga mai le Atua, ae tuu manatu sesē ma fesuisuia‘i o tagata.—Faataoto 3:5, 6.