Le Manatu o le Tusi Paia

Po o se Vaivaiga le Agamalu?

“Auā e lē tatau ona faamisa o le auauna a le Alii, a ia agamalu i tagata uma.”—2 TIMOTEO 2:24.

A O TATOU le‘i fananau mai, na mafai ona lagona mea e o tatou tino. Mai lava i le taimi na tatou fananau mai ai, e tatou te naunau i le opo māfana a o tatou tinā. I le taimi o avea ma tamaiti, o lo tatou mā‘ata‘ata, o le tuputupu a‘e o faalogona, ma le naunau e talanoa i isi, e aafia uma lava i le auala na faaalia ai le alofa o mātua iā i tatou.

Ae na valoia i le Tusi Paia le tulaga o tagata i le taimi o le i‘uga, e faapea o le a iai “ē lē faalogo i mātua, o ē lē faafetai, o ē amio leaga, [ma] ē lē lotoaiga.” O le a aunoa i latou ma uiga lelei e pei o le agalelei ma le agaalofa, ona o le a avea tagata “ma ē alolofa i latou iā i latou,” e ‘faasauā, ma ‘ino‘ino i le amio lelei.’—2 Timoteo 3:1-3.

O le tele o tagata i nei aso, e  fia totoa ma lē amana‘ia faalogona o isi. Fai mai i latou o se vaivaiga le agamalu. Pe e moni lea tulaga?

Agamalu ae Malosi

O Ieova, o le “toa lava ia.” (Esoto 15:3) O ia o le Puna o le mana uma. (Salamo 62:11; Roma 1:20) Ae na ia faaalia le lagona ‘mutimuti vale ma le alofa naunau’ ina ua tauia Iopu, le tagata faamaoni. (Iakopo 5:11) I lona feagai ai ma Isaraelu, na faamatala ai e Ieova se faiā sili ona māfana i le faatusa o ona lagona i se tinā e alofa i “le tama a lona lava manava.”—Isaia 49:15.

E faapena fo‘i ona iai iā Iesu uiga o le malosi faapea ma le agamalu. Na ia matuā ta‘usalaina ta‘ita‘i lotu pepelo i ona aso. (Mataio 23:1-33) Na ia tutuliesea fo‘i tagata matape‘ape‘a mai le malumalu. (Mataio 21:12, 13) Ae pe na avea lona ‘ino‘ino i le matape‘ape‘a ma mea e faasauā ai? E leai! Na iloa uma o ia, o se tagata e agaalofa. Na ia faatusa ia lava i se matuāmoa o loo “ofaofata‘i i lana toloa‘i i lalo i ona apa‘au.”—Luka 13:34.

Malosi i Fafo po o le Malosi i Totonu?

Ua uuna‘ia Kerisiano ia faata‘ita‘i iā Keriso e ala i le oofu “i le tagata fou ua faia e foliga i le Atua.” (Efeso 4:20-24) Ua faatonuina i tatou ia ‘toeseina le tagata tuai atoa ma ana amio,’ e pei ona toese e le paa lona atigi tuai, a o tuputupu atili. (Kolose 3:9) Ae aua ne‘i o tatou pei o le pa‘u fou o le paa, lea e faasolo ina malō. Ua faatonuina i tatou ia oofu pea i le “alofa mutimuti vale, ma le agalelei, . . . ma le onosai.” (Kolose 3:12) Ia iloa i tatou i lo tatou agamalu.

E lē o se vaivaiga lo tatou faaalia o le agamalu, auā ina ia faia faapea, e mana‘omia ai ona ‘faamalosia i tatou i le mana e le agaga o Ieova i le tagata i totonu.’ (Efeso 3:16) O se faata‘ita‘iga, o se alii e suafa iā Li, na ia faapea mai: “O a‘u o se tagata na sauā ma amio leaga. E oo i o‘u foliga e faafefe tagata, ona o mama ma mea eseese na tui i lo‘u tino. Na ou fuafua ia tele ni a‘u tupe e maua, ma ou te le‘i poi e tautala i gagana masoā ma faia amioga sauā ina ia maua le mea ou te mana‘o ai. Ou te le‘i iloa alofa.” Peita‘i ane, na fai se su‘esu‘ega faale-Tusi Paia a Li ma se tagata e la te faigaluega, ma na ia iloa ai ma lagona le alofa iā Ieova le Atua. Ua ia tuu ese nei le tagata tuai ma ua iloa ona pulea o ia lava. Ua ia faaalia le alofa mo isi e ala i le faaavanoa o lona taimi e su‘esu‘e ai le Tusi Paia ma i latou.

O le aposetolo fo‘i o Paulo, o se tasi na “faatāutala” pe faasausili, ma e sauā fo‘i pe afai e mana‘o i se mea. (1 Timoteo 1:13; Galuega 9:1, 2) Ae ina ua ia iloa le alofa fua na faaalia e Ieova le Atua ma Iesu Keriso iā te ia, na ia taumafai loa e faata‘ita‘i i o la uiga. (1 Korinito 11:1) Na maumaua‘i Paulo mo mataupu silisili faa-Kerisiano, ae na ia agamalu fo‘i i le feagai ai ma isi. E le‘i faatalatū Paulo e alofa atu i ona uso.—Galuega 20:31, 36-38; Filemoni 12.

Le Auala e Mafai ai Ona Agamalu

E pei ona tatou vaai i ai i olaga o Li ma Paulo, e lē faapea o se vaivaiga lou feagai ma isi i se auala agamalu, ona e mana‘omia le malosi e faia ai faapea. E matuā mana‘omia lava le loto tele ma le faamalosi ina ia suia ai mafaufauga ma gaoioiga, e tetee atu ai i le lagona e fia “taui atu le leaga i le leaga.”—Roma 12:2, 17.

E mafai ona tatou maua le agaalofa pe a faitauina le Afioga a le Atua e lē aunoa, ma manatunatu i le alofa mutimutivale ua faaalia mai e Ieova le Atua ma lona Alo, o Iesu Keriso. O le a mafai ai ona tuu atu i le mana o le Afioga a le Atua e suia o tatou loto maaa. (2 Nofoaiga a Tupu 34:26, 27; Eperu 4:12) Po o le ā lava le olaga na tatou ō mai ai ma mea na tutupu iā i tatou, e mafai ona avea i tatou ma ē “agamalu i tagata uma.”—2 Timoteo 2:24.

[Ata i le itulau 16]

O se tamā lelei e agamalu i le feagai ai ma lana fanau