Ua Fesili Mai Talavou . . .

E Faapefea Ona Pulea O‘u Faalogona?

“E oso lo‘u ita i o‘u mātua ma soonafai a‘u tala iā i la‘ua. Se‘iloga lava ua te‘a lo‘u ita ona faato‘ā matou toe talanoa fo‘i lea.”—O le tala lea a Kate, e 13 ona tausaga.

“O lo‘u faafitauli, o lo‘u lē mautonu lea i se mea. O nisi taimi e pei ai ua tau leai ni o‘u faalogona.”—O le tala lea a Ivan, e 19 ona tausaga.

O O TATOU faalogona, e malolosi tele. E aafia ai o tatou mafaufauga ma mea e tatou te fai. E mafai ona uuna‘ia ai i le lelei, po o le lē lelei fo‘i. I nisi taimi e pei ua sili atu ona malolosi faalogona i lo o mafaufauga. Ua fai mai Iakopo, o se alii e 20 ona tausaga: “E seāseā ona ou lagona lo‘u fiafia iā te a‘u lava. E tele lava ina lē mafai ona fai le mea sa ou faamoemoe e fai. O nisi taimi ou te tagi ai, ae o isi taimi e te‘i lava ua ou ita fua i isi. O le faigatā ia ona pulea o o‘u faalogona.”

O le puleaina o ou faalogona, o se tasi lea o vala a o faasolo ina avea ma tagata matua, o se tasi e faamoemoeina. Ua iai le talitonuga o nisi tagata atamamai e faapea, e sili atu ona tāua lou mafaia ona pulea o ou faalogona a o feagai ma tagata, na i lo le poto. Po o le ā lava le tulaga, ae ua faatāuaina e le Tusi Paia le puleaina o lagona o le tagata. O se faata‘ita‘iga, ua faapea mai le Faataoto 25:28: “O le aai ua sofa‘ia, ua leai se pa, o le tagata lea na te lē mataofia lona loto,” pe e lē puleaina lona ita. Aiseā ua faigatā tele ai ona pulea lagona?

O se Lu‘i mo Talavou

O loo tauivi tagata ina ia pulea o latou faalogona, e ui ina e eseese olaga ma e eseese fo‘i lo latou matutua o loo iai. Ae o le taimi e sili ona faigatā ai lea tauiviga, o le taimi a o talavou ua faasolo ina tagata matua. Ua ta‘ua e Ruth Bell i lana tusi e ta‘ua o le Changing Bodies, Changing Lives, e tusa ai o fesuia‘iga o le olaga e faapea: “O le tele lava o talavou e latou te lagonaina faalogona eseese e iai le fiafia ma le lē mautonu, e popole, ma fenuminumia‘i fo‘i. O le tele o tagata, e fetuleni ane lagona eseese i le taimi lava e tasi. . . . E fesuisuia‘i fo‘i lagona i taimi uma.”

Ona o oe o se talavou, e le‘i oo la ina e maua le poto ma le faautauta. (Faataoto 1:4) A o faasolo ina oo ni tulaga ma ni lu‘i fou iā te oe, o se  tulaga masani lou lagona o le lē mautonu ma le lofitūina i faalogona. Ae o le mea e lelei ai, ona o loo silafia lelei e le Atua faalogona o loo iā te oe. Ua ia silafia fo‘i ‘manatunatuga’ o loo e popole ai. (Salamo 139:23) Ua ia saunia mai i lana Afioga ni mataupu silisili e aogā mo oe.

O se Vala Tāua i le Puleaina o Faalogona

O se vala e aogā i le puleaina o ou faalogona, o le puleaina lea o ou mafaufauga. O mafaufauga lē ati a‘e, e mafai ona mou atu ai le malosi e faia le mea e ao ona fai. (Faataoto 24:10) E faapefea la ona e manatunatu i manatu e ati a‘e ma mafai ai ona pulea ou faalogona?

Ia tuu lou mafaufau pea i mea e te lagona ai le mafatia ma le lē mautonu. E mafai ona suia ou mafaufauga lē mautonu i ni mafaufauga lelei, e ala i le usitaia o fautuaga mai le Tusi Paia, ina ia mafaufau i mea ua “ta‘uleleia” ma “tonu.” (Filipi 4:8) E lē o se tulaga e faigofie ona fai, ae afai e fai sau taumafaiga, o le a e mafaia lava.

Se‘i taga‘i fo‘i i se tama‘ita‘i talavou e igoa iā Jasmine. Na ia fai mai ma le faanoanoa: “Ua ou lagona le lofitūina ona o mea o loo o‘u fesaga‘ia i lo‘u olaga. O lea faato‘ā sui la‘u galuega, ma ua oo mai ai ma le mau avega tauave. Ua ou lagona ai lava le lē lavā. Ua faigatā lava ona maua se mālōlō o lo‘u mafaufau.” I nisi taimi, e lē o se tulaga uiga ese le iai o ia lagona i se talavou, ma e mafai ona ia popole ai. O loo ta‘ua i le Tusi Paia se alii talavou e igoa iā Timoteo. Na lava ma totoe tomai na iā te ia e faatino ai ona tiute. Ae e foliga mai na faafaigatā iā te ia ona lagona lē agavaa na iai.—1 Timoteo 4:11-16; 2 Timoteo 1:6, 7.

Atonu e te lagona le lē mautonu pe a fou iā te oe se galuega po o se mea e fai, ma ua e faapea ifo i lou loto: ‘E lē taitai o‘u mafaia.’ Ae e mafai ona e manumalo i na lagona e ala i lou aveese o lea manatu lē mautonu. Ia ua‘i atu ia e iloa ona fai faalelei le galuega. Ia fesili atu pe a e lē iloa se mea, ma fai e tusa o le mea ua faatonuina ai oe.—Faataoto 1:5, 7.

O le a mou atu ou lagona lē mautonu a o faagasolo ina e poto e fai le galuega. Soia le mafaufau pea i ou vaivaiga ma oo ina taofia ai oe mai lou aga‘iga‘i i luma. Sa iai se taimi na faitio ai nisi iā Paulo, ma o lana tali atu e faapea: “Afai fo‘i ou te valea i le upu, ou te lē valea i le iloa.” (2 Korinito 10:10; 11:6) E mafai fo‘i ona e faatupu lou mautinoa e ala i le talisapaia o mea e te lelei ai, ae faalagolago atu i le Atua e fesoasoani mai i ou vaivaiga. E mafai moni lava e le Atua ona fesoasoani iā te oe, e pei fo‘i ona ia fesoasoani i tagata anamua.—Esoto 4:10.

O se isi auala e aogā i le pulea o ou faalogona, o le fai lea o ni sini e talafeagai ma oe e mafai ona e ausia, i lou iloa lea o mea e te mafaia, ma mea e te lē mafaia. Aua e te faatusatusa i isi. O loo ta‘u mai i le Tusi Paia se fautuaga lelei i le Kalatia 6:4 e faapea: “A ia ta‘ito‘atasi ma faamasino i lana lava galuega, ona iā te ia lea o se mea e mitamita ai iā te ia lava, a e lē o se tasi.”

Faagesegese Ona Ita

E ono avea ma lu‘i faigatā le tau puleaina o le ita. I le pei o Kate lea na ta‘ua i le amataga, o le ita ua māfua ai ona faia e talavou ni tala e faatigā ai po o le faaleaga mea.

E moni, o se tulaga masani le lagonaina o le ita i nisi taimi. A ia aua ne‘i galo Kaino, le tagata muamua na fasiotia se tagata. Ina ua “ita tele” o ia, na lapata‘i atu le Atua, o lona ita tele, e oo ai i lona faia o le agasala. Na ia fesili iā Kaino: “E te pule fo‘i oe iā te ia [le agasala]?” (Kenese 4:5-7) E le‘i faalogo Kaino i le fautuaga mai le Atua. Ae o le a mafai ona e puleaina lou ita, ma e ‘alofia ai le agasala, ona o le fesoasoani mai o le Atua.

Ioe, e faalagolago lava i le puleaina o ou mafaufauga. I le Faataoto 19:11, ua faapea mai le Tusi Paia: “O le mafaufau o le tagata e faagesegese ai lona ita; o lona viiga fo‘i lea, ina ua lē manatua lona agaleagaina.” Pe a fai e se isi se mea e te ita ai, ia taumafai ia iloa pe aiseā ua  ia faia ai faapea. Po o ia mana‘o e faatigā iā te oe? Pe atonu o lona osovale, po o lona lē iloa fo‘i, ua māfua ai? O lou onosaia o masei o isi ua atagia atu ai le alofa faifua o le Atua, ma o le a aogā fo‘i, e faagesegese ai lou ita.

Ae faapefea pe afai e sa‘o lou ita? Ua fai mai le Tusi Paia: “A outou ita, aua le agasala ai.” (Efeso 4:26) Afai e tatau, talanoa i lē o loo e ita i ai. (Mataio 5:23, 24) A lē o lenā, e sili pe a tuu, a ia tuu ese le ita, ma ia faafilemu lou mafaufau.

O se mea e ao ona mātauina, e aafia le auala o loo pulea ai lou ita i ē o loo e faauō i ai. Ua faapea mai le Tusi Paia: “Aua ne‘i fefaauoa‘i ma le tagata itagofie; aua fo‘i lua te ō ma le tagata lotoa; ina ne‘i ē faaa‘oa‘o i ona ala; ona maua ai lea o lou agaga i le mailei.”—Faataoto 22:24, 25.

O lou faauō i tagata e taumafai e pulea o latou loto, o le a aogā lea i lou ati a‘e o le pulea o oe lava. E to‘atele ni tagata faapea o loo iai i faapotopotoga Kerisiano o Molimau a Ieova, ma o le tele o i latou e matutua atu ma tele atu lo latou poto masani na i lo oe. Ia faamasani iā i latou. Ia mātau le ala o loo latou feagai ai ma faafitauli. E mafai fo‘i ona latou fesoasoani atu ina ia e “filifili lelei” i taimi o faafitauli. (Faataoto 24:6) Ua fai mai Iakopo lea na ta‘ua muamua: “E ese le tāua o se uō e ta‘umatuaina e na te faamanatu mai le Afioga a le Atua. Pe a ou manatuaina o loo alofa mai pea Ieova e ui i ni o‘u lē mautonu, ona ou lagona ai lea o le to‘a ma le filemu.”

Nisi Mea Aogā

O se tusi o loo fiafia i ai tagata e uiga i faamalositino, ua ta‘ua ai e faapea: “E tele su‘esu‘ega ua faamaonia mai e faapea, e aafia ou mafaufauga i le auala o loo faagaoioi ai lou tino. O le auala o loo e gaoioi ai, e faalagolago i ai le tele po o le itiiti o homone ma le okesene e maua e lou tino.” Ua mautinoa la, e aogā tele le faamalositino. Ua fai mai le Tusi Paia: “E aogā fo‘i le faamalositino.” (1 Timoteo 4:8, Today’s English Version) E manaia pe a e faamasani e fai sina faamalositino. E telē sona aogā i ou faalogona. E iai fo‘i aogā o lou taumafa i mea‘ai tatau.

Ia e vaai fo‘i po o ā musika ma faafiafiaga o loo e fiafia i ai. Na ta‘ua i se tasi mekasini e tusa o le soifua mālōlōina e faapea: “O le matamata i ata sauā . . . e oso a‘e ai le ita ma lagona sauā. . . . O tagata e matamata i ata sauā, e sili atu ona iai manatu sauā ma oso ai i luga ma le toto.” (The Harvard Mental Health Letter) O lea, ia e filifili lelei i mea e te faalogologo ma matamata ai.—Salamo 1:1-3; 1 Korinito 15:33.

O le ala sili e pulea ai ou faalogona, o le ati a‘e lea o se faiā māfana ma Lē na faia oe. Ua ia talosaga mai iā i tatou ta‘ito‘atasi ia talanoa atu e ala i le tatalo, ma ia faamatala tonu atu o tatou lagona. Ua faalaeiau mai le aposetolo o Paulo: “Aua ne‘i popole outou i se mea e tasi, a ia faailoa atu o outou mana‘o i mea uma lava i le Atua, . . . O le manuia fo‘i mai le Atua, o loo silisili lava i mea uma e manatu i ai, e leoleoina ai o outou loto atoa ma o outou mafaufau.” Ioe, e mafai ona e ati a‘e le malosi e fesaga‘i ai ma so o se tulaga i lou olaga. Ua fai mai atili Paulo: “Ou te mafaia mea uma lava ona o ia ua faamalosi mai iā te a‘u.”—Filipi 4:6, 7, 13.

Ua fai mai se tasi e igoa iā Malika: “Ua ou iloa le aogā o le tatalo, ma toe tatalo, ma saga tatalo atili. Ua avea lo‘u iloaina o loo manatu mai Ieova ma mea ou te to‘a ai ma mafai ai ona pulea o‘u faalogona.” E mafai fo‘i ona e pulea ou faalogona e ala i le fesoasoani mai le Atua.

[Faamatalaga faaopoopo i le itulau 15]

O se vala e pulea ai ou faalogona o le pulea lea o ou mafaufauga

[Ata i le itulau 16]

E aogā le faatasitasi ma tagata matutua e te iloa ai pulea ou faalogona