Mea ua Folafolaina Mai e “le Atua Moni e To‘atasi”

NA TUU e Ieova le Atua le ulugalii muamua i se parataiso i le lalolagi, i le faato‘aga o Etena. Na ia faatonu i la‘ua ina ia fanafanau ma ‘ia faato‘ilalo i le laueleele,’ o lona uiga, ia faalautele le Parataiso lea ua avea ma mea e nonofo ai, pe a faasolo ina to‘atele la la‘ua fanau. (Kenese 1:26-28; 2:15) Pe faamata o le a faataunuuina le finagalo o le Atua, ia ola tagata i se parataiso i le lalolagi?

Ioe, e taunuu! E tusa ai ma valoaga a le Tusi Paia, “E faaumatia e ia le oti e faavavau; e soloiesea fo‘i e le Alii o Ieova o loimata i mata uma lava.” A taunuu loa lea tulaga, ona faapea ane ai lea o tagata: “Faauta, o lo tatou Atua lenei; sa tatou faatalitali iā te ia, ua ia faaolaina fo‘i i tatou; o Ieova lava lenei, sa tatou faatalitali iā te ia; tatou te fiafia ma olioli i lana faaolataga.”—Isaia 25:8, 9.

Ua faamatala mai i le Faaaliga ia tulaga o le a iai i le lalolagi pe a mavae lenei lalolagi, po le faiga o mea o loo pulea e Satani. I le Tusi Paia, ua faaalia ai le tulaga o le “lalolagi fou” lea o le a nonofo ai i latou e alolofa i le Atua. “Faauta, ua i ai le afioaga o le Atua faatasi ma tagata, e mau fo‘i o ia ma i latou; e fai fo‘i i latou mona nuu, e iā te i latou le Atua lava. E sōloiesea fo‘i e le Atua loimata uma i o latou mata; e leai fo‘i se toe oti, po o se faanoanoa, po o se auē, e leai fo‘i se toe puapuaga; auā ua mavae atu mea muamua.”—Faaaliga 21:1-4.

 Ma‘eu ni folafolaga a mananaia! Pe e mafai ona tatou talitonu i ai? Ia manatu i le maliu faataulagaina o Iesu faapea vavega na ia faia. O na mea ua avea ma faavae o lo tatou mautinoa o le a faatino e le Atua ana folafolaga uma.—2 Korinito 1:20.

Na Foa‘i e Iesu Lona Ola e Fai ma Togiola

Ina ua uuna‘ia e Satani Atamu ia lē usitai i le Atua, ma agasala ai, na faasolo atu lana agasala i lana fanau uma. Ua faapea mai le Tusi Paia: “Faapei ona oo mai o le agasala i le lalolagi i le tagata e to‘atasi, o le oti fo‘i ona o le agasala, ona oo mai ai lea o le oti i tagata uma lava, auā ua agasala uma lava.” Ae ua fai mai atili le mau, “e faapea fo‘i ona avea ma amiotonu o le to‘atele i le anaana o le to‘atasi [le tagata lelei atoatoa o Iesu].” (Roma 5:12, 19) E pei ona ta‘ua i le mataupu muamua o lenei mekasini, o Iesu le “Atamu mulimuli, . . . [e] mai le lagi” o ia, ma na ia foa‘i lona ola e fai ma “togiola e sui a‘i tagata e to‘atele.”—1 Korinito 15:45, 47; Mataio 20:28.

O i latou uma e faatuatua iā Iesu, e mafai ona ‘maua le togiola i lona toto’ ma e mafai ona latou maua le ola e faavavau. (Efeso 1:7; Ioane 3:36) E ao la ona tatou olioli ona o le alofa tele mai o Ieova le Atua i le lalolagi ua ia aumai ai lona Alo e avea ma o tatou Faaola! (Luka 2:10-12; Ioane 3:16) O le a tatou malamalama e tusa ai o le lumana‘i pe a tatou iloiloina mea na faia e Iesu mo tagata puapuagatia i le senituri muamua. E matuā ofoofogia mea na faia e Iesu!

Faaataga Mai o le Lalolagi Fou

Na mafai e Iesu ona faamālōlō ma‘i uma na avane iā te ia. E leai ma se ma‘i faapea e le‘i mafai e Iesu ona ia faamālōlōina, e tusa lava po o le ā le ituaiga o gasegase na maua ai. E lē gata i lenā, na ia faavavega ona fafaga i le afe ma afe o tagata, ae na o ni nai i‘a ma potoi areto na iai, ma e lē na o le tasi se taimi na ia faia ai faapea.—Mataio 14:14-22; 15:30-38.

Ina ua faaleleia e Iesu le vaai a se tagata na fanau mai o tauaso, sa talisapaia e ona tuaoi ma i latou na masani ai, ae sa le‘i fia talitonu ta‘ita‘i lotu Iutaia. Ona faapea atu lea o le tagata na toe faapupulaina e Iesu: “E le‘i faalogo lava talu mai le vavau, ona faapupulaina e se tasi o mata o lē na fanau mai o tauaso. Ana lē mai le Atua lenā tagata, na te lē mafaia se mea e tasi ona fai.”—Ioane 9:32, 33.

I le taimi o le tala‘iga a Iesu, na auina atu e lona tauusoga o Ioane le Papatiso, lea o loo i le falepuipui, nisi e faamaonia mai tala e uiga iā Iesu. Ua faapea mai le Tusi Paia: “O lea lava itu aso ua faamālōlō ai e ia tagata e to‘atele sa i ai ma‘i, ma ma‘i tigā, ma agaga leaga; ua foa‘i atu fo‘i ina ia vaai o ē tauaso e to‘atele.” Ona fai atu lea o Iesu i tagata na ō ane, ia “faailoa atu iā Ioane o mea ua oulua vaai i ai, ma faalogo i ai; ua pupula tauaso, ua savavali pipili, ua faamamāina lepela, ua logo tutuli, ua faatutūina ē na oti.”—Luka 7:18-22.

Se‘i manatu la i ai: Afai ua mafai ona faataunuuina se mea ofoofogia i le taimi ua tuana‘i, pe e lē faamalosia ai ea lou mautinoa, e mafai fo‘i ona toe tupu lea mea? I se fua itiiti, ua faaalia ai e Iesu e ala i ana vavega, le mea o le a ia faia i le lalolagi aoao pe a avea o ia ma Tupu o le Malo o le Atua. Na avea ana vavega ma faamaoniga o ia na auina moni mai lava e le Atua, ma o ia fo‘i o Lona Alo.

I le pulega o le Malo o le Atua, o le a faataunuuina moni valoaga e faatatau i mea matagofie. E pei ona valoia, o le a pupula mata o tauaso, o le a faalogo tutuli, o le a osooso pipili e pei o le ‘aila, ma e lē toe iai se tasi e ma‘i. O le a tumu le lalolagi i le filemu ma le saogalemu. O manu fe‘ai fo‘i o le a nonofo fifilemu faatasi ma tagata.—Isaia 9:6, 7; 11:6-9; 33:24; 35:5, 6; 65:17-25.

Pe faamata e te fia ola ai e faavavau, i tulaga faapea, i le pulega a le Malo o le Atua? I lana tatalo i lona Tamā, na ta‘ua ai e Iesu le mea e ao ona e fai: “O le ola faavavau fo‘i lenei, ia latou iloa oe le Atua moni e to‘atasi, atoa ma lē ua e auina mai, o Iesu Keriso lea.” (Ioane 17:3) Ia maumaua‘i e ave i fale le poto lea e maua ai le ola.

[Ata i le itulau 10]

O le mea lea o loo folafola mai e le Atua mo le lalolagi