O Ai “le Atua Moni e To‘atasi”?

E LĒ gata sa to‘aga Iesu e tatalo i le Atua, o lē na ia ta‘u o lona Tamā, ae na ia a‘oa‘o fo‘i isi ia latou faia faapea. (Mataio 6:9-11; Luka 11:1, 2) A o latou tatalo faatasi ma ona aposetolo, a o toe o ni nai itula ona maliu lea o ia, na talosaga ai Iesu: “Lo‘u Tamā e, ua oo mai le aso. Tuu mai ia le mamalu i lou Atalii, ina ia tuu atu fo‘i e lou Atalii le mamalu iā te oe. O le ola faavavau fo‘i lenei, ia latou iloa oe le Atua moni e to‘atasi, atoa ma lē ua e auina mai, o Iesu Keriso lea.”—Ioane 17:1, 3.

Mātau mai, o loo tatalo Iesu i Lē o loo ia ta‘ua o “le Atua moni e to‘atasi.” Ua ia faailoa mai le tulaga silisili o le Atua i lona faapea mai: “O lenei fo‘i, lo‘u Tamā e, ia e tuu mai iā te a‘u le mamalu faatasi ma oe, o le mamalu lava sa iā te i ta‘ua ma oe, a o le‘i faia le lalolagi.” (Ioane 17:5) Talu ai o loo talosaga Iesu i le Atua ina ia faatasi ma ia, e faapefea la ona toe avea fo‘i Iesu ma “Atua moni e to‘atasi”? Se‘i o tatou iloiloina la lenei mataupu.

Le Tulaga o Iesu i le Lagi

E le‘i umi talu ona faia lenā tatalo a Iesu, ae fasiotia loa o ia. Peita‘i, e le‘i umi se taimi na maliu ai o ia, e mai le aoauli o le Aso Faraile se‘ia oo i le taeao o le Aso Sa. (Mataio 27:57–28:6) Na tusia e le aposetolo o Peteru e faapea: “O Iesu lava lenā ua toe faatūina e le Atua; o molimau i matou uma i lenā mea.” (Galuega 2:31, 32) Pe na mafai e Iesu ona toe faatūina ia lava? E leai, ona e tusa ai ma le Tusi Paia, o ē ua oti, “latou te lē iloa se mea.” (Failauga 9:5) Na faatūina Iesu e lona Tamā o loo i le lagi, o Ia o “le Atua moni e to‘atasi.”—Galuega 2:32; 10:40.

I se taimi e le‘i leva mulimuli ane, na fasiotia ai Setefano le soo o Iesu e tagata lotu na tetee i lana tala‘iga. Na oo ane iā Setefano se faaaliga, a o lata ina fetogia o ia e tagata i maa. Na ia faapea mai: “Faauta, ua ou iloa le lagi ua avanoa, ma le Atalii o le tagata o loo tū i le itu taumatau o le Atua.” (Galuega 7:56) O lea, na iloa atu e Setefano Iesu, “le Atalii o le tagata,” o loo lagolagosua i le Atua i le lagi, o loo iai o ia “i le itu taumatau o le Atua,” e pei lava fo‘i ona sa iai muamua o ia ‘faatasi ma le Atua,’ a o le‘i afio mai i le lalolagi.—Ioane 17:5.

Ina ua mavae le fasiotiga o Setefano, na faavavega ona faailoa atu Iesu iā Saulo, lea ua lauiloa nei i lona igoa Roma, o Paulo. (Galuega 9:3-6) A o iai Paulo i Atenai i Eleni, na ia tala‘i e faatatau i le “Atua [o lē] na faia le lalolagi ma mea uma lava o i ai.” Na ia ta‘ua e faapea o lea Atua, o ia o “le Atua moni e to‘atasi,” ma o le a ia ‘faamasinoina le lalolagi ma le tonu, e ala i se tagata ua tofia e ia; o loo faamaoni mai ai e ia i tagata uma lava i lona toe faatū mai iā te ia i ē ua oti.’ (Galuega 17:24, 31) Ua ta‘u e Paulo Iesu o se “tagata,” o lona uiga, o sē e maulalo i le Atua, ma ua toe faafo‘isia o ia e le Atua i le lagi.

 Na faamatala mai fo‘i e Ioane e faapea, e maulalo Iesu i le Atua. Ua ia faapea mai, na tusia lana tusi ina ia talitonu ai i latou e faitau i ai, o “Iesu o le Keriso lava ia, o le Alo o le Atua” ae e lē o ia o le Atua. (Ioane 20:31) Na iloa fo‘i e Ioane se faaaliga mai le lagi, ma na ia vaaia ai le “Tama‘i mamoe,” lea o loo faailoa mai i lana tusi, o loo faatatau iā Iesu. (Ioane 1:29) O loo tutū faatasi le Tama‘i mamoe ma tagata e 144,000, o ē na ta‘ua e Ioane, o nisi “ua faatauina [pe ua faatutūina a‘e] nai le lalolagi.” Ua faapea mai atili Ioane, o le 144,000 ua tusia le “suafa” o le Tama‘i mamoe ma le “suafa o lona Tamā i o latou muaulu.”—Faaaliga 14:1, 3, NW.

Pe e tutusa la le “Tama‘i mamoe” ma “lona Tamā”? E manino mai, e leai. I le Tusi Paia, e eseese i la‘ua, ma e eseese fo‘i o la suafa.

Le Suafa o le Tama‘i Mamoe ma le Suafa o le Tamā

E tusa ai ma la tatou talanoaga, o le suafa o le Alo o le Atua, po o le Tama‘i mamoe, o Iesu. (Luka 1:30-32) Ae o ai la le suafa o lona Tamā? I le Tusi Paia, e faitau afe taimi o loo ta‘ua ai. O se faata‘ita‘iga, i le Salamo 83:18 ua faapea mai: “O oe, e ou le suafa o Ieova, na o oe lava o le Silisili ese i le lalolagi uma.” O se tulaga e faanoanoa ai ona i le tele o faaliliuga o le Tusi Paia, ua aveese le suafa o Ieova le Atua ae tuu i ai faaupuga “ALII” ma le “ATUA,” ma ua masani ona sipela i mata‘itusi tetele. O lea auala ua faia ina ia iloa ai e ese Ieova mai isi atua ma alii. * Ae i le tele o isi faaliliuga o le Tusi Paia, ua toe tusia le suafa o le Atua i le tulaga e tatau ona iai.

O se faaliliuga ua mata‘ina lana taumafaiga e toe tusia le suafa o le Atua, o Ieova, i le Tusi Paia, o le faaliliuga faa-Peretania o le American Standard Version (1901). Ua ta‘ua i upu tomua o lea tusi: “Ina ua māe‘a se iloiloga a i latou na faia le American Standard Version, ua tasi ai so latou manatu e faapea, e lē tatau ona avea le talitonuga faauputuu a Iutaia, lea e talitonu e lē tatau ona ta‘ua le Suafa Paia, ma tulaga e aafia ai fua faaliliuga o le Feagaiga Tuai i le faa-Peretania, po o se isi lava faaliliuga, ona e lē o aafia ai le mau faaliliuga e tele ua faia e misionare i ona pō nei i lea talitonuga faauputuu.”

O Fea e Sau ai le A‘oa‘oga o le Tolutasi?

Ae faapefea le talitonuga e faapea o Ieova ma Iesu e tasi, e tusa ai ma le Tolutasi? I le mekasini The Living Pulpit, i le lomiga o Aperila-Iuni 1999, ua faamatala e tusa o le Tolutasi e faapea: “E tasi le Atua o le Tamā, tasi le Alii o Iesu Keriso, ma le Agaga Paia e to‘atasi, e to‘atolu i latou . . . e tutusa uma ae ua tino e tasi . . . , e tutusa i le avea ma Atua, e tutusa i tulaga, ae eseese i uiga, ma ua iloa ai i ia uiga eseese.” *

E faigatā ona malamalama i lea a‘oa‘oga, ae o fea na amata mai ai? I le tusi o le Christian Century i le lomiga o Me 20-27, 1998, ua ioeina ai e se faife‘au e faapea o le Tolutasi, o se “a‘oa‘oga a le lotu, ae e lē mai iā Iesu.” E ui ina e le‘i a‘oa‘oina e Iesu le Tolutasi, ae faamata e ōgatusa lea talitonuga ma ana a‘oa‘oga?

E Sili le Tamā i le Alo

Na a‘oa‘o e Iesu ona soo ina ia tatalo e faapea: “Lo matou Tamā e, o i le lagi, Ia paia lou suafa.” Ua faapea mai le Tusi Paia, o lo tatou Tamā o i le lagi, o lona suafa o Ieova, e sili o ia i le Alo. O se faata‘ita‘iga, o Ieova, e “mai le vavau e oo i le faavavau.” Ae ua fai mai le Tusi Paia e tusa o Iesu, o ia “o le ulumatua o mea uma lava ua faia.” O Iesu lava ia na ia a‘oa‘o mai lea upu moni e faatatau i le sili o Ieova iā te ia, ina ua ia faapea mai: “E sili lo‘u Tamā iā te a‘u.” (Mataio 6:9; Salamo 90:1, 2; Kolose 1:15; Ioane 14:28) Ae, e tusa ai ma le a‘oa‘oga o le Tolutasi, o le Tamā ma le Alo, e tutusa i le tulaga Atua.

Ua manino mai i tatalo a Iesu, e pei o lana tatalo a o toetoe oo i lona maliu e faapea, e sili le Tamā i le Alo, ma e eseese i la‘ua. Na ia tatalo e faapea: “Lo‘u Tamā e, a e finagalo i ai, ia e ave ese lenei ipu [o se maliu e faalumaina ai] iā te a‘u; a e aua le faia lo‘u loto, a o lou finagalo.” (Luka 22:42) Pe afai ua “tino e tasi” le Atua ma  Iesu e pei ona fai mai ai le Tolutasi, e faapefea la ona ese le loto o Iesu mai le finagalo o lona Tamā?—Eperu 5:7, 8; 9:24.

E lē gata i lea, pe afai e tutusa Ieova ma Iesu, e faapefea ona ese mea o silafiaina e Ieova mai mea o loo iloaina e Iesu? O se faata‘ita‘iga, na faapea mai Iesu e tusa ai o le aso e faamasinoina ai le lalolagi: “A o lea aso ma lea itu aso e lē iloa e se tasi, e lē iloa lava e agelu i le lagi, po o le Atalii; ua na o le Tamā lava.”—Mareko 13:32.

O le Tolutasi, o se A‘oa‘oga a le Lotu

O le Tolutasi, e lē o se a‘oa‘oga a Iesu po o Kerisiano anamua. Ae, e pei ona ta‘ua muamua, “o se a‘oa‘oga a le lotu.” Na faapea mai le mekasini The Living Pulpit i le lomiga o le 1999, e tusa ai o le Tolutasi: “O nisi taimi ua foliga mai o loo manatu uma tagata o le a‘oa‘oga o le tolutasi o se a‘oa‘oga masani faa-Kerisiano,” ae ua faaopoopo mai e faapea, e lē o se “a‘oa‘oga a le Tusi Paia.”

Ua au‘ili‘ili le faamatalaina o le Tolutasi i le New Catholic Encyclopedia (1967) ma ua faapea mai: “A fua atu i ai, o le a‘oa‘oga o le Tolutasi, o se a‘oa‘oga na amata mai i le faai‘uga o le senituri lona 4. . . . E oo ane i le taimi ua lata le faai‘uga o le senituri lona 4, e le‘i mautū lelei lenei a‘oa‘oga ‘e tasi le Atua ae To‘atolu i Latou,’ ma e le‘i matuā taliaina fo‘i i le olaga ma talitonuga faalelotu o Kerisiano o lea vaitaimi.”

Ua fai mai Martin Werner, o se polofesa i le Iunivesite o Bern i Suisilani: “So o se taimi e ta‘ua ai i le Feagaiga Fou le faiā a Iesu ma le Atua, le Tamā, pe e faatatau i lona afio mai i le lalolagi o se tagata, po o lona tulaga o se Mesia, ua malamalama i ai e aunoa ma se faalētonu, e maulalo o ia i le Atua.” Ua manino mai la, e eseese lava le mea na talitonu i ai Iesu ma Kerisiano anamua, ma le a‘oa‘oga o le Tolutasi o loo a‘oa‘oina e lotu i aso nei. O fea la na amata mai ai lea a‘oa‘oga?

Le Amatamataga mai o le Tolutasi

E tele atua eseese na tapua‘i i ai tagata, o loo ta‘ua i le Tusi Paia, e iai Asaira, Melekoma, Kimosa ma Moloka. (1 Tupu 11:1, 2, 5, 7) E to‘atele fo‘i tagata i le nuu o Isaraelu anamua na iai le talitonuga, o Paala le Atua moni. O lea na faapea atu ai le perofeta o Elia: “Afai o Ieova o le Atua ia, ia outou mulimuli atu iā te ia; a e afai o Paala, ia outou mulimuli atu iā te ia.”—1 Tupu 18:21.

A o le‘i fanau mai Iesu, o se tulaga masani i tagata ona latou tapua‘i i atua faapaupau, ma o ia atua, e to‘atolu ni atua e tuufaatasi. Ua fai mai se alii poto o Will Durant: “O Aikupito na amata mai ai le a‘oa‘oga o atua e ta‘ito‘atolu.” Na tusi mai James Hastings i le lomifefiloi Encyclopædia of Religion and Ethics e faapea: “O se faata‘ita‘iga, i lotu Initia, ua iai atua e to‘atolu o Brahmā, Siva, ma Vishnu; ae i tapua‘iga Aikupito, ua iai atua e to‘atolu o Osiris, Isis, ma Horus.”

Ioe, e tele ma tele le mau atua. Pe na ioe Kerisiano anamua, e moni e tele atua eseese? Pe na latou manatu, o Iesu, o Ia o le Atua e ona le malosi uma lava?

[Faaopoopoga i lalo]

[Ata i le itulau 7]

AIKUPITO

Tolutasi o Horus, Osiris, ma Isis, i le meleniuma lona lua, T.L.M.

PALAMIRA, SURIA

Tolutasi o le atua o le masina, le Alii o Lagi, ma le atua o le lā, e tusa o le senituri muamua, T.A.

INITIA

Atua tolutasi Hinitū, e tusa o le senituri lona fitu T.A.

NOUĒ

Tolutasi (Tamā, Alo, ma le Agaga Paia), e tusa ma le senituri lona 13 T.A.

[Ē Ana le Ata i le itulau 7]

Ata e lua o loo i luga: Musée du Louvre, Paris