Penina Uliuli—Oloa Tāua Mai Vasa i Saute

TUSIA E LE TUSITALA O LE ALA MAI! I NIU SILA

I le pepa “Cook Islands News,” na tusia ai se faasalalauga e faapea, “o loo mana‘omia ni tagata faigaluega i se nofoaga e faafailele ai penina i Manihiki.” Atonu e oo ifo iā te oe le manatu, ‘E faapefea ona faafailele penina? Ae o fea e iai Manihiki?’

O MANIHIKI, o se motu o atumotu e 15 o le Atu Kuki, e tū mamao ese, ma e 1,600 maila [2,600 kilomita] lona mamao i mātū i sasa‘e o Niu Sila. E tusa ai ma faamatalaga, o inā na amata ai le faafaileleina o penina uliuli i le amataga o tausaga mai le 1970. I aso nei, e tele ma tele nofoaga faapea o loo iai i le aloalo o Manihiki, o loo taulau i le faia o lea pisinisi.

O le faafaileleina o penina uli, o se galuega e mamafa, ma e mana‘omia ai fo‘i le tomai. E muamua lava ona sa‘ili ni ituaiga o tifa (black lipped oysters) e lelei. O tifa e lelei, e ūnaūna mālie ia matala, ona tipi lea ma le faaeteete o le aano o le tifa i se naifi e tuaiti ma maai. Ona tuu lea i ai o se tama‘i mea malō lapotopoto faapea ma se fasi mea itiiti mai se tifa o loo ola. Ona toe tuu lea o le tifa i le sami, ae fai ma siaki, auā le faamamā ma aveese o ni limulimu po o ni mea e piipii ai.

O le a i‘u ina ta‘ai ma saga ta‘ai ia le tama‘i mea malō lapotopoto lea i le mea iila e ta‘ua o le nacre, ona o gaoioiga o le isi fasi mea lea na tuu i ai. E tuu mo le tasi ma le ‘afa tausaga i le lua tausaga, ona maua mai ai lea o se penina, pe afai e lē teena e le tifa le tama‘i mea malo lea na tuu i ai. Ua ta‘ua lea faiga o se “galuega felagolagoma‘i a le tagata ma le natura.”

 Le Tau o Penina Uli

O penina uli o le Pasefika i Saute, o nisi ia o penina e sili ona taugatā, ona e lē faigofie ona maua. O le mea moni, e tele lanu mananaia o le penina uliuli, o nisi e lanu siliva pa‘epa‘e, ma e faasolosolo ona lanu pā‘auli e oo i le lanu e matuā uliuli pato‘i. E iai penina e mūmū pā‘auli, o isi e lanu auro, ma apamemea, ma lanu e pei o le kopa, o nisi e lanumeamata malosi iila, po o le lanumoana, lanu violē, ma penina e eseese lanu efuefu iila e maua ai. E maua fo‘i penina lanu piniki, lanumeamata auro, lanumeamata uliuli, lanumoana uliuli, ma le lanu violē uliuli.

E leai se lanu e sili atu sona taugatā i lo isi pe a fua le tau o se penina. O le vala e iloa ai le taugatā o le penina, o lona lapotopoto lelei ma lona lamolemole, ma ia tutusa atoa lona lanu. O isi vala e iloa ai le tāua o se penina, o lona telē, lona foliga mai, le lamolemole, ma lona iila.

A ta‘u le telē o se penina, o lona uiga e fua i lona lautele. O le fua masani lava o le tetelē o penina, o le va o le 8 i le 12 milimita, ma e seāseā ona maua ni penina e oo atu le lautele i le 18 milimita pe sili atu. E lē o lona telē e sili ona tāua, ae o le tulaga masani lava, e talafeagai lava lona tau i lona mamafa ma lona telē.

E eseese foliga o penina, e pei fo‘i ona eseese o o latou lanu. O le tulaga masani lava ia, e sili ona taugatā penina lapotopoto. Ae o penina e foliga e pei o ni matāua, e faaaogā e fai ai asoa ma tautaliga mananaia. O isi penina e faataamilo ai se omo po o se mama, ma afai ua e faalogo o ta‘u se penina e pei o se faamau, o lona uiga, e mafolafola le isi itu. E iai fo‘i ma penina e lē lapotopoto ae eseese o latou foliga.

E seāseā ona maua ni penina e lelei atoatoa, ma e taugatā fo‘i. O le tele o penina, e iai ni omo ma ni patu, o ni numi, pe e maosia fo‘i ma iai ma ni ila, o mea lava ia ua masani ai. Afai e na o se pito e tasi o le penina e faalētonu, e faaū i tua le pito lea pe a faaaogā i tautaliga ma mea faapena.

O le iila o le penina, o le mea lea o le a e mātauina, e māfua ona o le māfiafia o le nacre lea o loo ufitia ai. O se isi vala e tāua, o le atagia o le penina pe a taia i le lā po o se molī, ma e aulelei tele i le vaai. Ua talitonu isi, o le māfuaaga tonu lea o le mata‘ina o le penina, ona o lona iila, ae lē o lona lanu, telē, foliga, ma lona lamolemole.

Ia Vaai Faalelei

O penina, e lē malō e pei o isi maatāua e iai le taimane ma le salikea (ruby). E ma‘osi‘osia pe a tuu faatasi ma isi maa tāua po o mea malō. Afai e iai sau penina, ia vaai faalelei i le taimi e faaaogā ai, ma le auala e teu ai.

E mafai ona leaga i vai malolosi faapea le afu o lou pa‘u. E aafia fo‘i i vailaau faamamā, o fagu faamanogi, ma vali mata. E tusa ai ma le auala e fufulu ai penina, o le fautuaga lea mai se kamupani e faatauina maa tāua i le Atu Kuki: “Ia tuu sina matāua o se vailaau fuluipu e lē malosi tele i se pesini vai la‘itiiti. Sa‘eu i se pulumu fulunifo e vaivai ona nifo, ona fulufulu mālie lea o le penina ma le faaeteete, faapea ma le auro, po o le siliva, o loo si‘omia ai le penina. Vaimamā i sina vai, ma solo mago i se fasi ie vaivai.”

O Penina i Talafaasolopito

O penina, o nisi ia o mea tāua na faaaogā e tagata mai lava i le amataga, ma o loo viiviia i tusitusiga anamua. Sa sili ona tāua penina i tagata i Atunuu i Sasa‘e ma Asia, ma na latou manatu o se faailoga lea o le mamā ma le amio lelei.

I Roma anamua, sa matuā faasilisilia lava e tagata ia penina, ma e na o tagata maualuluga na iai ni a latou penina. O se alii i le ulua‘i senituri e igoa iā Pliny, o ia o se faifilosofia ma e su‘esu‘e fo‘i i le si‘osi‘omaga, na ia viiviia penina e faapea, “o ni oloa e sili ona matagofie i le lalolagi aoao.” I le faamatalaga a Iesu e faatatau i le tāua o le Malo o le lagi, na ia faatusaina lea i se “penina tau tele,” na maua e se tagata faatau‘oa e sa‘ili‘ili i penina lelei, ma o lona tāua tele ‘na alu ai o ia, ua faatau atu ana mea uma, ae faatau a‘i mai,’ le penina.—Mataio 13:45, 46.

Ua ta‘u mai i le faamatalaga a Iesu le aulelei ma le tāua tele o penina. Ia tatou matuā faafetaia Ieova Lē na faia nei maa tāua, e aofia ai ma penina o le vasa i Saute!

[Ata i le itulau 24]

O penina uli (ua faatelē le ata ina ia manino i le vaai)