Ua Fesili Mai Talavou . . .

Aiseā e Sesē ai Tagata Ou te Aumea i Ai?

“Na ou iloa e lē tatau ona ou faamasani i le tama lea ae sa ou faia lava. Na ou nenee ona o lona fia faamasani mai iā te a‘u.”—Nanisē. *

“Sa masani ona ou alu na o a‘u e tafao i le fale e fai ai faaseega i le aisa, ma e le‘i umi ae matou tafafao faatasi ma nisi na matou fetaui ai i inā. Na sosoo ai ma lo‘u faia o ni amioga e lē tatau.”—Tanu.

O NANISĒ ma Tanu, o nisi sa malolosi faaleagaga. O mātua o Nanisē o nisi e matata‘u i le Atua, ma na avea ai o ia ma tagata tala‘i i le iva o ona tausaga. Ae o Tanu, na amata paeonia o ia a o talavou lava. Peita‘i, na iai se taimi na lē sologa lelei ai le tulaga faaleagaga o i la‘ua uma. Aiseā? Ona o le leaga o ē na faauō i ai.

Po ua iai ea se taimi na e faauō ai i se tasi e te iloa lelei e lē lelei ona e faauō i ai? O lea tagata, atonu o se tasi e lua te a‘o‘oga faatasi, e tutusa mea e lua te fiafia i ai, po o se tasi o le isi itupā o loo e tosina i ai.

E lē taumatea na e iloaina lava le fautuaga mai le Tusi Paia: “O le feoa‘i ma e amio leaga e leaga ai amio lelei.” (1 Korinito 15:33) Ae po o lona uiga ea e leaga uma tagata e lē tapua‘i i le Atua? Ae faapefea pe afai e iai ni o latou uiga lelei o loo e fiafia i ai? Ae ā se tagata e tapua‘i i le Atua ae e lē lelei lana faata‘ita‘iga? A o le‘i taliina na fesili, se‘i tatou talanoa muamua i le māfuaaga e ala ai ona fiafia isi e faauō i ē e lē tatau ona faauō i ai, ma pe aiseā fo‘i.

O le ā le Pogai o le Tosina i Ai?

O tagata uma lava na faia i le faatusa o le Atua. O lea la, o i latou e lē iloa Ieova, e iai fo‘i ni o latou uiga lelei. O lona uiga, e iai nisi e amio lelei ma tausaafia, e ui ina e lē o ni tagata e tapua‘i i le Atua. Po o lona uiga la, e lē tatau ona talanoa i se tagata faapena talu ai na te lē iloa le upu moni o le Tusi Paia? E leai, e lē o lenā. O loo fautua mai le Tusi Paia ‘ia tatou agalelei i tagata uma lava,’ lea e aofia ai fo‘i ma i latou e lē iloaina le upu moni. (Kalatia 6:10) O lona uiga la, ia e faaeteete i le filifilia o au aumea, ae e lē faapea ai ua e maualuga a‘e ai i isi. (Faataoto 8:13; Kalatia 6:3) E upuleagaina ai lou tulaga o se Kerisiano pe afai e te faia faapea.

Peita‘i ane, o nisi talavou Kerisiano, o le tulaga ua iai, ua māfana lava a latou faauōga ma tagata e itiiti pe leai fo‘i so latou naunau i mea faaleagaga, e pei o Tanu lea na ta‘ua muamua. Na avea o ia o se tagata e lelei tele i le faasee i le aisa. Ae o tagata na masani ona latou  tafafao i le fale e faasee ai, e lē o ni Molimau a Ieova. O le tulaga na i‘u i ai, na faia ai e Tanu mea o loo fai e ana “uō,” o amioga leaga ma le faaaogāina o fualaau faasāina. Na lē toe tala‘i o ia pe auai i sauniga ona ua ia iloa e lē o toe ōgatusa lona olaga ma amioga faa-Kerisiano. Na mavae ni nai tausaga ona faato‘ā toe mafai lea ona maua e ia le malosi e faia ai suiga ina ia toe fo‘i i le tapua‘iga moni.

O se talavou e igoa iā Melani, na fiafia o ia i se tuafafine e faalēmalosi tele faaleagaga. Fai mai o ia: “Na ou faamasani atu iā te ia ona sa ta‘ua e faapea e tatau ona faalaeiau atu iā te ia.” Ioe, e moni o loo fautuaina Kerisiano i le Tusi Paia ina “ia fesoasoani i ē o vaivai.” (1 Tesalonia 5:14) Ae na amata tafafao Melani ma lana uō fou i pa pia ma faauō atili atu ai i nisi na ia masani ai i inā, lea na i‘u ai ina faia e ia ni amioga lē lelei.

Le Vaega a Lou Aiga

E avea fo‘i le tulaga na e ola a‘e ai ma vala e faapogaia ai lou fia faauō atu i tagata faapea. O se faata‘ita‘iga, o Masele, sa ia taumafaufau i le māfuaaga e fiafia ai o ia i tama e foliga faalēalolofa ma faalēano i nisi. O le mea na ia iloaina, ona o tama faapea, e tai pei lava o lona tamā. E lē māfana sa la faiā ma lona tamā, ma e le‘i naunau alofa mai fo‘i iā te ia. O lona manatu ua tosina o ia i tama faapea ona o loo ia taumafai ia fiafia mai tama iā te ia, e pei fo‘i ona sa ia taumafai ia fiafia ma alofa mai lona tamā iā te ia.

I le isi itu, o se talavou na ola a‘e i se aiga Kerisiano, atonu o loo fia iloa pe faape‘ī olaga o isi tagata, talu ai ua ia lagona ua faasāsā na‘uā lona olaga e ona mātua. Pe iai ia lagona iā te oe, pe leai fo‘i, pe faamata e fo‘ia lea tulaga pe a e ‘faauō atu i le lalolagi’? (Iakopo 4:4) Se‘i taga‘i fo‘i i le mea na tupu iā Pili.

Na a‘oa‘oina Pili e lona tinā i le Tusi Paia mai lava o la‘itiiti. Ae e le‘i mana‘o Pili e tuuina atu lona ola iā Ieova ona na manatu o ia, e faasāsā ai lona olaga. Na fia iloa e ia pe faape‘ī se olaga e ese mai le olaga o se Kerisiano moni, ma na faauō o ia i se kegi ma oo ai i se olaga o le faamisa, solitulafono, ma le faaaogāina o fualaau faasāina. Na i‘u ina lavea o ia ona o se tuliga taavale ma leoleo, ma e umi se taimi o faataotolia e aunoa ma se mea e na te  iloa. O le manatu o foma‘i, ailoga a ola o ia. O le mea e lelei ai ona na toe malosi o ia, ae ua tauaso ma ua faigatā fo‘i ona gaoioi. Na a‘oa‘oina o ia e ala i mea faigatā na oo iā te ia, ma ua avea nei o ia ma Kerisiano tuuina atu. Ae ua ia iloa ai fo‘i, e mafai ona aafia le olaga atoa o se tagata, ona o mea leaga na ia faia.

Nisi Aafiaga

O nisi taimi, ua avea faasalalauga tau i faafiafiaga, ma tulaga e aafia ai manatu o se talavou e tusa ai o se uō e lelei. O se faata‘ita‘iga, ua masani ona avea le tama autū i tusi, ata, ma vitiō o se tagata e faafoliga e sauā ma lē migao, ae e iloa ane mulimuli o sē e loto alofa. O le manatu o loo tau faaataata mai, o tagata e foliga mai e manatu faapito ma lē kea, o le mea moni lava e alolofa ma manatunatu i isi. E lē gata i lea, atonu fo‘i o se isi manatu o loo tau faaata mai e faapea, o le a alia‘e uiga lelei i lea tagata pe afai e iai sana uō lelei, ma o le tulaga masani lava, o lea uō o se tasi o le isi itupā. O manatu faapea, e aogā auā e taulia ai tusi ma fiafia ai tagata i tifaga. Ae po ua e iloa ea ua moni lea tulaga i le olaga? O le tulaga e faanoanoa ai ona ua faasesē ai nisi talavou i ia manatu, ma ua latou faauō ma faaipoipo i se tagata e manatu faapito ma sauā, ma ua fiu e tatali sona “suiga,” ia agaalofa ma manatunatu i isi.

E iai fo‘i se isi vala ua ala ai ona fiafia nisi i tagata e lē tatau ona faauō i ai: Ua latou manatu e faalētaulia o latou tagata, ma ua latou faauō ai lava i so o se tasi e fiafia atu iā i latou, e pei la o Nanisē lea na ta‘ua muamua. Na ia iloa, o loo ta‘ua i le Tusi Paia e faapea, e ao ona faaipoipo “tau lava i lē ua i le Alii.” (1 Korinito 7:39) Ae sa iā te ia le manatu, o ia e lē aulelei. O lea la ina ua faamasani atu iā te ia se alii e la te faigaluega faatasi, sa ia lagona ai le nenee, ma amata ona la tafafao ma eva. Na toeitiiti lava i le oo ai i lona faia o ni amioga lē mamā.

E pei ona tatou vaaia i faata‘ita‘iga na ta‘ua, e tele ni māfuaaga e tosina ai se talavou i tagata e lē lelei ona faauō i ai, ma e tele fo‘i ni māfuaaga e latou te manatu ai, e lē afāina le avea o i latou o ni uō lelei. Ae o uō faapea e oo mai ai ma ni āuga mata‘utia. I le ā le itu?

E Malosi Taa‘iga a Uō

O le mea moni, o le a avea oe e pei lava o au uō. O le a matuā aafia lava o tatou uiga ona o ē e tatou te tafafao faatasi. Ua faaalia i le Faataoto 13:20 e faapea, e iai aafiaga aogā, faapea ma aafiaga lē aogā: “O lē latou te feoa‘i ma tagata popoto, e poto lava ia; a o le uō a ē valelea, e leaga ai lava ia.” Ua pei se faiga uō māfana a ni tagata o loo ti‘eti‘e faatasi i se taavale. E tutusa le mea o loo aga‘i i ai, ma e taunuu faatasi fo‘i i ai. O lea, ia fesili ifo iā te oe lava, ‘Pe ou te fia alu i le ala lea o loo alu ai la‘u uō? Pe e iai se aogā o lea tulaga auā le faatinoga o o‘u sini ma faamoemoega faaleagaga?’

Ioe, e lē faigofie ona e fesili faapea iā te oe lava. Atonu o loo matuā aafia ai lava ou faalogona. Ae pe e mafai ona e faalagolago i ou faalogona e avea ma ta‘iala mautū i le filifiliga o au uō? Atonu ua e faalogo i le fautuaga masani, “Ia fai le mea e te lagona e sa‘o.” Ae ua fai mai le Faataoto 28:26: “O lē ua faatuatua i lona lava loto, o le vale ia.” Aiseā? Ona “e sili le faa‘ole‘ole o le loto i mea uma, ma ua matuā leaga lava.” (Ieremia 17:9; Numera 15:39) E tutusa le faa‘ole‘ole ma le lē faamaoni. Pe e te faatuatuaina se tagata e te iloa e tau faa‘ole‘ole ma e lē faamaoni? Ioe, e mafai ona ooleina i tatou e o tatou loto. O lea la, e lē avea lou ‘lagona e lelei’ se tasi, ma tulaga e te manatu ai ua talafeagai ona faauō iā te ia.

Ua sili atu ona maufaatuatuaina le fautuaga mai le Afioga a le Atua. E lē mafai ona faatusaina lou loto lē lelei atoatoa i le Tusi Paia, auā e lē ‘olegiaina oe e ana fautuaga. E faapefea ona fesoasoani ta‘iala a le Tusi Paia ina ia iloa ai pe mafai ona avea se tasi ma uō lelei? Pe faapefea fo‘i ona e ‘alofia se filifiliga sesē a o sa‘ilia se uō e tumau, po o sē e te faaipoipo i ai? O le a talanoaina ia fesili i se mataupu i le lumana‘i.

[Faaopoopoga i lalo]

[Ata i le itulau 22]

E mafai ona aafia o tatou manatu e tusa ai o uō ona o faasalalauga