Po o Lava Lau Faamalositino?

“E leai se fualaau i le taimi nei po o le lumana‘i, e tutusa lona aogā ma le aogā o le to‘aga e faamalositino i le olaga atoa auā le soifua mālōlōina o le tagata.”

O UPU ia na tusia i le 1982 e Dr. Walter Bortz II, o se foma‘i faapitoa tau vailaau i se iunivesite. Ua tele tagata su‘esu‘e ma faalapotopotoga tau soifua mālōlōina ua latou ta‘ua ia upu i tusi, mekasini, ma faasalalauga i le komepiuta. E manino mai la, o loo aogā pea le fautuaga a Dr. Bortz, ma ua sa‘o ma talafeagai. O lea la, e lelei ona tatou fesili ifo, ‘Po o lava la‘u faamalositino?’

O loo manatu sesē nisi e faapea, e lē o mana‘omia se faamalositino ona e lē o ova lo latou mamafa. Ioe, e aogā tele le to‘aga e faamalositino mo i latou ua ova le mamafa. Ae e tusa lava po o fetaui lou mamafa, ae a faagaoioi lou tino, e lē gata e aogā lea i lou soifua mālōlōina, ae e ono puipuia ai fo‘i mai gasegase faigatā, e iai nisi ituaiga o kanesa. Ua iloa fo‘i mai sa‘ili‘iliga lata mai nei, e lē gata ina aogā le faamalositino ina ia faaitiitia ai le popole, ae e ono puipuia ai fo‘i mai lagona mafatia. O le mea moni, e tele tagata paeee o loo maua i gasegase o le mafaufau ma faalogona, faapea le ma‘i fatu, ma le ma‘i suka, ma isi gasegase, talu ai le lē lava o le faamalositino. O lea la, pe ova lou mamafa pe leai, afai e tele ina e saofa‘i, e aogā ona e taumafai ia faagaoioi lou tino.

O Lava Lau Gaoioi?

E faapefea ona e iloa o loo lava lau gaoioi? E tusa ai o lea tulaga, e eseese lava manatu. Ae o loo iai ni ta‘iala ua ioeina e le tele o tagata su‘esu‘e, e aogā mo le tele o tagata. O le faamatalaga a nisi faalapotopotoga tau soifua mālōlōina e faapea, e lē o lava lau gaoioi pe afai (1) e lē o faia sau faamalositino pe gaoioi malosi, ia faatolu i le vaiaso mo le ‘afa itula,  (2) e lē o faagaoioiina lou tino i taimi mālōlō ma tafaoga, (3) e seāseā sili atu i le 100 iata [tusa e 100 mita] le umi o lau savali i le aso, (4) e tele ina e saofa‘i i le aso atoa, ma (5) e itiiti se gaoioi i lau galuega.

Faamata la o lava lau gaoioi? Afai e leai, ia fai loa sau taumafaiga. Ae atonu o le a e faapea mai, ‘E matuā leai lava ma se taimi e mafai ai ona fai.’ E te ala a‘e i le taeao, ua e lagona le lē lavā. Ua pisi tele i le taeao auā le sauni mo galuega. E uma a‘e le aso, ua lagona fo‘i le vaivai ma ua lē lavā, ma e tele fo‘i isi mea e ao ona fai.

Ae atonu e pei oe o nisi na amata sa latou faamalositino, ae e le‘i umi ae tuu ona e faigatā, pe ua lagona le faama‘ima‘i pe a uma ona fai. O nisi, ua lē faia ni faamalositino ona e latou te manatu, ina ia lelei ona fai, e ao ona matuā fai lelei se siisii mea mamafa, ia tamo‘e mo se taimi umi, ma e ao fo‘i ona fālōlō lelei le tino.—Taga‘i i le pusa “Siisii ma Fālōlō.”

E lē gata i lea, e manatu nisi e taugatā, ma o le a fai ma faalavelave. E tau mana‘omia fo‘i ni ofu faapitoa ma ni seevae tamo‘e. A fia siisii, e mana‘omia ni mea siisii mamafa po o ni masini faapitoa. E taugatā fo‘i le alu i se kalapu faamalositino ma e alu ai fo‘i ma le taimi e malaga atu i ai. Peita‘i ane, e lē tau mana‘omia na mea e fai ai sau faamalositino ma maua ai ni aogā mo lou soifua mālōlōina.

Fai ni Sini Talafeagai

Afai o fia fai sau faamalositino, fuafua lelei ni ou sini. Amatamata lemū ma faasolosolo ona faaopoopo isi gaoioiga. Ua ioe saienitisi, e iai le aogā o sina faamalositino māmā, ma e latou te fautuaina i latou e masani i le saofa‘i ina ia amatamata lemū. O se faata‘ita‘iga, o se pepa e lomia e le Iunivesite o Kalifonia (UC Berkeley Wellness Letter) e tusa o taumafa tatau, le malosi, ma le fesaga‘ia o omiga, ua iai se fautuaga e faapea: “Amata ona faatele lau gaoioi i ni nai minute i le aso, ma taumafai ia atoa le 30 minute i le  tele o aso o le vaiaso, ae e sili ona lelei pe a faia i aso uma.” Ua fai mai atili le pepa e “pau lau mea e fai, o le fai o mea masani e iai le savali, ia faaaogā fasitepu ae tuu le lifi, ma ia fai soo, ma faaumiumi, ma ia vave atu nai lo lau gaoioi masani.”

O tagata faato‘ā amata, e lē o le tele po o le mamafa o le faamalositino e tāua, a ia faamasani muamua i le faifai pea. A o faasolo ina e malosi, ona taumafai loa lea ia malosi atu lau faamalositino. E mafai ona faia faapea e ala i le faaopoopo o le umi ma le malosi o lau faamalositino, e ala i le savali topetope, moemoe, savali i faasitepu, po o le vili o se uila vilivae. A oo i se taimi, fai sina au siisii mea mamafa ma fālōlō lou tino, ina ia paleni lau faamalositino. E lē o fautuaina e le tele o tagata su‘esu‘e le soona fai o faamalositino. A ia fua e tusa o lou malosi, ia puipuia ai ina ne‘i e lavea, pe oo ai fo‘i ina fiu ma musu ai loa e fai.

Ia Faifai Pea

O i latou e leai se taimi e fai ai ni faamalositino, o le a aogā iā i latou se fautuaga mai le pepa Wellness Letter. O loo faamatala ai “le aogā o le faia o ni nai faamalositino pupuu, a o faagasolo le aso. O lona uiga, afai e faatolu ona fai sau faamalositino i le aso, ma e ta‘i 10 minute le umi, e tai tutusa lava le aogā o lea tulaga ma le faamalositino mo le 30 minute.” O lea la, e lē se‘i iloga e faaumiumi o fai sau faamalositino ona maua lea o ni aogā i lou soifua mālōlōina. Ua ta‘ua i le mekasini faafoma‘i The Journal of the American Medical Association e faapea, ua iloa e le ‘au su‘esu‘e, “pe māmā, feoloolo, pe malosi lau gaoioi, e iai le sootaga o le faagaoioi o le  tino, ma le faaitiitia o le tupu o le ma‘i fatu.”

Ae e mana‘omia lava ona faifai pea. O lea la, e aogā lou taga‘i i lau kalena ma fuafua ni aso ma taimi e fai ai sau faamalositino. A mavae ni vaiaso o faifai pea lau faamalositino, o le a avea loa o se vaega masani o lou olaga. A oo fo‘i ina e lagona le aogā o le faamalositino i lou soifua mālōlōina, o le a faapea ona e naunau fiafia e fai.

E Sili Atu se Olaga Gaoioi

E moni e iai aogā o le faamalositino i lou soifua mālōlōina, e tusa pe a faia mo na o le 30 minute i aso ta‘itasi. Ae e tusa ai ma le malamalama faafoma‘i ua iai nei, a umi atu na i lo lenā, e sili atu fo‘i ona aogā. Ua fautuaina mai e ao ona atoa le 60 minute e faagaoioi ai lou tino i aso ta‘itasi ina ia tumau le malosi o lou fatu i le tulaga e sili ona lelei. E mafai ona faia lea tulaga e ala i le faagaoioi o le tino mai lea taimi i lea taimi, a o faagasolo le aso. Ua faamatala mai e se mekasini faafoma‘i o le Canadian Family Physician e faapea, “o le fautuaga lea ua iai, ia uma ifo le aso ua atoa se 60 minute na faagaoioi ai lou tino. Ina ia maua nisi aogā tau soifua mālōlōina, e foliga mai e lē afāina po o le ā le auala o loo faagaoioi ai lou tino.” Ua fai mai atili lea mekasini: “Ua faaalia i nisi su‘esu‘ega, e iai le sootaga o le matuā faagaoioi o le tino ma le puipui mai le vave ona oti, ae i le taimi nei, o loo faatāua mai ia fuafua tatau.”

O le manatu autū e tusa ai o nei faamatalaga uma, na faia i tatou ina ia gaoioi. Afai e tele ina e saofa‘i, e lē aogā lea i lou soifua mālōlōina, ma e leai se vaitamini, vailaau, taumafa, po o se taotoga, e tutusa lona aogā ma le faagaoioi o lou tino. E ao fo‘i ona tatou ioe i le mea moni e faapea, ina ia lava le faamalositino, pe māmā pe mamafa, pe puupuu pe umi, e mana‘omia se taimi e fai ai. E pei lava ona e fai se taimi e taumafa ma tofā ai, e tāua fo‘i le fai o se taimi e te faamalositino ai. E mana‘omia ai la lou pulea lelei o oe lava, faapea ma lou taimi.

O faamalositino uma, e mana‘omia ai ni taumafaiga. Ae o tigā ma fitā e oo i ai ona o le fia faamalositino, o le a pei o se mea noa pe a faatusa i lamatiaga e te ono oo i ai pe a lē faagaoioia lou tino. Fai ma au masani le faagaoioi o lou tino, ia fai ma fai sau faaafu, faagaoioi ou maso, e ono faafualoaina ai lou soifua!

 [Pusa/Ata i le itulau 27]

Faatele Lau Faamalositino

E iai aogā i le soifua mālōlōina o le faagaoioi atili o le tino i aso ta‘itasi, ae ua ta‘ua e le ‘au su‘esu‘e, o le a sili atu ona tele aogā pe a malosi lau faamalositino. O loo ta‘ua i lalo ni mea e mafai ona e fai.

Ua fautua mai tagata popoto tau soifua mālōlōina ina ia talanoa muamua ma se foma‘i a o le‘i amataina sau taumafaiga tau faamalositino.

● Savali topetope: O se auala faigofie lea e fai ai se faamalositino. Pau le mea e te mana‘omia o ni seevae e lelei i le savali, ma le auala. Faa‘u‘umi au laa ma savali televave. Ia tolu i le lima maila [4 i le 9 kilomita] i le itula le vave e oo i ai lau savali.

● Mo‘emo‘e: Ua ta‘ua e faapea o le auala lea e sili ona aogā e malosi ai lou fatu ma alātoto. Ae e ono aafia ai ou maso ma gaugāvae ona e mamafa le mo‘emo‘e i vaega ia o le tino. O lea la, e faamanatu atu i ē e faia faapea ina ia lelei seevae tamo‘e, ia fālōlō le tino, ma ia fuafua tatau.

● Ti‘eti‘e i le uila vilivae: Afai e iai sau uila, o le a matuā aogā iā te oe le faamalositino i le auala lea. E aogā tele e faapa‘ū ai pauna. O faamalositino uma e pei ona ta‘ua, e ao lava ona e mataala ina ia puipui mai faalavelave i le aualatele o loo e alu ai.

● ‘A‘au: E aogā le ‘a‘au e faagaoioi ai maso eseese o le tino. E aogā fo‘i e faagaoioi ai gaugātino, ma e tai tutusa lava le aogā i lou fatu ma le aogā o le moemoe. Talu ai e māmā i le tino, ua masani ona fautuaina tagata e mama‘i sooga o ivi, pe faalētonu tua, pe mamafa tele, pe ma‘itaga, ina ia ‘a‘au. Ia ō ma se isi pe a e alu e te ‘a‘au.

● Osooso: Faaaogā se mea osooso la‘itiiti lea e iai ona sipulini. Ua fai e tagata e fiafia i le faamalositino lea mea, ona e aogā e gasolo lelei ai le toto ma le suāvai i le tino, e faalelei ai le gaoioi o le fatu ma māmā, faamalolosi ai maso, ma faalelei ai le gaoioi ma le paleni o le tino.

[Pusa/Ata i le itulau 28]

Siisii ma Fālōlō

Ua malamalama nei saienitisi, e lelei ona fai sina siisii mea mamafa, ina ia paleni lau toleniga. A lelei ona fai, e aogā le siisii mea mamafa e faamalolosi ai maso ma ponaivi, ma faaitiitia ai le ga‘o i le tino.

O le tele o tagata su‘esu‘e i le soifua mālōlōina ua fautua mai ia fālōlō le tino, auā e aogā e faavaivai ai maso, ma mo le gasologa lelei o le toto. E faigofie ai fo‘i le gaoioi o ou gaugātino.

Ae, e ao ona fai faalelei le siisii mea mamafa ma le fālōlō o lou tino, ia puipui ina ne‘i e lavea. E lelei lou su‘esu‘e muamua i le auala sa‘o e fai ai faamalositino, pe talanoa fo‘i i lau foma‘i.

[Pusa/Ata i le itulau 28]

Le Aogā o le Faamalositino i le Mafaufau

Ua iloa e saienitisi e faapea, e iai le aogā o le matuā faagaoioi o o tatou tino i ni vailaau o loo iai i o tatou fai‘ai, (dopamine, norepinephrine, serotonin), ma o ia vailaau o loo aafia ai o tatou faalogona. Atonu o le māfuaaga lea e ala ai ona fai mai tagata, e latou te lagona le ma‘ai o le mafaufau pe a uma sina faamalositino. Ua iai fo‘i ni sa‘ili‘iliga ua iloa ai, o tagata e faifai pea le faamalositino, e itiiti le ono oo iā i latou o le lotomafatia na i lo i latou e mātele i le saofa‘i. E lē o matuā iloga le faai‘uga e tusa o ia su‘esu‘ega, ae ua tele foma‘i ua latou fautuaina le faamalositino ina ia faaitiitia ai le lotomafatia ma le popole.

[Pusa/Ata i le itulau 29]

Mea e Fai i Aso Faisoo e Faaleleia ai Lou Soifua Lelei

E tusa ai ma sa‘ili‘iliga talu ai nei, o i latou e lē o lava le gaoioi, atonu e aogā ona faateleina mea o loo faagaoioi ai le tino i aso ta‘itasi. O le a aogā ona e taumafai e fai mea o loo ta‘ua i lalo.

● Faaaogā le faasitepu ae tuu le lifi. Ae afai e te alu i le lifi, nofo i le fogāfale e i lalo o le fogāfale e te alu i ai, ona faaaogā lea o le faasitepu e te alu ai.

● Afai e te malaga i se pasi, ia faatū ae e te le‘i oo i le mea e te fia alu i ai, ma savali i ai.

● Afai e te alu i lau taavale, faamasani ona paka ia faamamao teisi mai le mea o loo e fia alu i ai, ona e savali lea. Afai e tele fogāfale i le mea e paka ai taavale, ia paka i se fogāfale e i lalo o le fogāfale e te alu i ai ma faaaogā faasitepu.

● Ia faaauau pea ona savavali a o tou talanoa ma isi. Afai e mafai ona faagaoioi le tino a o talanoa faasamasamanoa ma uō ma aiga, o se mea lelei le faia faapea.

● Afai e tele ina e saofa‘i i lau galuega, faaaogā avanoa e galue ai a o tū, ma faagaoioi lou tino pe a mafai.

[Pusa/Ata i le itulau 29]

Po o Lava Lau Taumafa Vai?

E ono iai se faalētonu pe a lē lava le vai e taumafa a o fai le faamalositino. E ono tupu ai le vaivai, lē gaoioi lelei le tino, ma malō maso o le tino. O le a matuā sisina lava le afu i le taimi e fai ai sau faamalositino, ma o le a faaitiitia ai le tele o le vai i lou toto. Afai ae lē taumafaina se vai e sui ai le vai o loo alu ese ona o lou afu, o le a faigatā i le fatu ona pamu le toto e faataamilo i lou tino. O lea, ia taumafa se vai a o e sauni e faamalositino, ia taumafa a o fai faamalositino, ma pe a māe‘a fo‘i, ina ia lava ai le vai i lou tino.

[Pusa i le itulau 30]

Tausi Faalelei Lou Tino—O se Meaalofa Mai le Atua

Ua fautua mai le Tusi Paia, ia tāua o tatou tino iā i tatou, faapea ma le meaalofa o le ola. O upu a Tavita, le tupu anamua o Isaraelu, e faapea: “Auā na faia a‘u e ala ai ona mata‘utia ma ofo tele ai.” (Salamo 139:14) Ua pei Kerisiano moni o Tavita, ona latou te matuā talisapaia le meaalofa o le ola. Ua latou manatu o se matafaioi tāua le vaaia faalelei o o latou tino.

Na faagaeeina e le Atua le aposetolo o Paulo e tusa o le lua afe tausaga ua mavae e tusi faapea: “Auā e aogā fo‘i le faamasani i la le tino; a o le amio Atua e aogā lea i mea uma lava, o loo i ai le mea ua folafolaina mai i la le olaga nei atoa ma lē atalī.” (1 Timoteo 4:8) Ua faaalia i upu a Paulo, e ui ina iai aogā o le faamalositino, ae e lē tutusa ma aogā tumau o se faiā lelei ma le Atua. O lea, e taumafai Kerisiano moni ina ia paleni i le vaaia faalelei o lo latou soifua mālōlōina, ia aua lava ne‘i sili atu le tāua o le faamalositino nai lo le tapua‘iga i le Atua.

Ua iloa e Kerisiano, afai e lelei lo latou soifua mālōlōina, o le tele fo‘i lenā o mea e mafai ona latou fai e faaalia ai lo latou alofa i le Atua, faapea ma tagata. E tāua tele le faagaoioi o le tino, faatasi ai ma le taumafa tatau, ma le lava o le mālōlō, auā le soifua mālōlōina lelei. E taumafai Kerisiano moni ia sologa lelei ia vala ona e tāua iā i latou o latou tino, o se meaalofa lea mai le Atua.