Avatu se Molimau Lelei i le Aʻoga

Tusia e le tusitala o le Ala Mai! i Mekisikō

O TANIELU e 17 ona tausaga, ma ina ua aʻe le aʻoga i le amataga o le tausaga, na ia filifili ai e faailoa i tamaiti o lana vasega o ia o se Molimau a Ieova. Na maua le avanoa o Tanielu ina ua fai atu le faiaʻoga o le gagana Peretania, o la latou meaaʻoga, o le faatalanoa lea o se tagata e tautala i le gagana Peretania. Na tuu atu e latou te ō i nofoaga o loo iai turisi i le taulaga, puʻe le talanoaga ma se turisi, ona avatu lea i le vasega.

Na filifili Tanielu e faatalatalanoa se misionare o loo faigaluega i le lālā a Molimau a Ieova i Mekisikō, o lana gagana o le faa-Peretania, ma puʻe se vitiō i lea gagana a o fai se matamataga i le lālā. E lē gata i lea na ia saunia se faaaliga o polosiua eseese o gagana a tagata moni o Mekisikō, faapea ma le Olomatamata ma le Ala Mai! i isi gagana. Ona fesili loa lea o Tanielu i le faiaʻoga pe mafai ona faaali lana vitiō ma lomiga i le vasega.

Na matuā ofo le vasega ma le faiaʻoga ona o le galuega o loo faia e Molimau a Ieova i Mekisikō. Na sili ona mataʻina iā i latou le galuega o loo fai e Molimau, ina ia oo le talaʻiga i tagata moni o le atunuu e ese gagana e tautala ai.

E 25 minute le umi o lana faaaliga, lea na togi silia ai Tanielu i lana taumafaiga, ma ina ua uma, na ia ofo i le vasega lomiga o le Olomatamata ma le Ala Mai!, faapea foʻi ma tusi, Fesili ua Fesili Mai ai Talavou—Tali e Aogā. E toʻatele na talia lomiga, ma ua maua ai le avanoa e talanoa atili ai i le Tusi Paia. Fai mai Tanielu: “Ou te faafetai iā Ieova ona ua mafai ona ou faapaiaina lona suafa e ala i se tofiga faigofie na ou faia i le aʻoga.”