Ua Fesili Mai Talavou . . .

E Faapefea Ona Ou ʻAlofia le Faauō i Tagata Lē Lelei?

“Na ou faamasani i se teine i le aʻoga. . . . E lē fiafia o ia i fualaau faasāina, po o patī, pe alu solo i tama. E lē palauvale foʻi, ma e lelei tele ona togi i le aʻoga. Ae o le mea moni, e lē o ia se uō lelei mo aʻu.”—Tiperia. *

AISEĀ na fai mai ai Tiperia o lea teine e lē o se uō lelei mo ia? Ona ua ia iloa nei, o le teine lea na māfua ai ona ia faia ni mea e lē lelei. Ua faamatala mai Tiperia e faapea: “A o faaauau la ma faauōga, na amata ona ou faitau i tusi i faiga faataulāitu, ma na tusi foʻi saʻu tala i mea faapena.”

E faapena foʻi se talavou e igoa iā Melani, na ia faia ni amioga lē tatau ona o se tagata na faapea mai o ia o se Kerisiano! E faapefea ona e iloa pe e tatau ona e faauō i se tasi? Po o se mea leaga le lelei o se faiga uō ma ē e tou te lē talitonu faatasi? Pe e lelei le faauō i so o se uso po o se tuafafine Kerisiano?

Ae faapefea faiga uō ma i latou o le isi itupā? Afai o e fia iloa pe tatau ona e faamasani atu i se tasi o e manatu e ono avea ma au paaga faaipoipo, e faapefea ona e iloa o le a sologa lelei la lua faiā? Seʻi o tatou tilofaʻia ni taʻiala e aogā i le taliina o nei fesili.

O Ai e Mafai Ona Avea ma Uō Lelei?

Sa tatau ona toe mafaufau Tiperia pe e ao ona faauō i se teine i le aʻoga, o lē e lē tapuaʻi i le Atua moni. O le mea moni, e lē manatu Kerisiano moni faapea, a lē talitonu se tagata o lona uiga e lē lelei ma amio lē mamā. Ae afai o le a oo ina iai se sootaga māfana ma  se tasi, e ao lava ona e faaeteete. Na lapataʻi le aposetolo o Paulo i le faapotopotoga Kerisiano i le uluaʻi senituri e faapea: “O le feoaʻi ma ē amio leaga e leaga ai amio lelei.” (1 Korinito 15:33) O le ā le uiga o lana faamatalaga?

Atonu o nisi i le faapotopotoga Kerisiano i Korinito na faatasitasi ma ni tagata e mulimuli i aʻoaʻoga a le faifilosofia Eleni e igoa iā Epikuro. E moni sa aʻoaʻo e Epikuro ona soo ia latou ola ma le faautauta, lototele, pulea, faamaoni, ma na ia lapataʻia foʻi i latou ia ʻaloese mai le fai mea nanā. Aiseā la na lapataʻi ai Paulo i Kerisiano ia vaai i le ʻau Epikuro, faapea foʻi ma nisi i le faapotopotoga o loo iai ia manatu, e tusa o ni “aumea leaga”?

Na lē tapuaʻi le ʻau Epikuro i le Atua moni. Sa lē talitonu foʻi i le toe tutū o ē ua maliliu, ma ua taulaʻi atu o latou olaga ia faamalie o latou manaʻoga a o iai i lenei olaga. (Galuega 17:18, 19, 32) O lea, na faavaivaia le faatuatua o nisi i le faapotopotoga i Korinito e faatatau i le toe tū, talu ai lo latou faauō atu iā i latou. I le mataupu e 15 o le Korinito muamua, o loo iai lapataʻiga a Paulo e faatatau i aumea leaga, ma ua tumu lea mataupu i faamatalaga e faatalitonu ai Kerisiano anamua e tusa o le moni o le faamoemoe o le toe tū.

O le ā le manatu tāua o lea mataupu? E iai uiga lelei o tagata e lē talitonu i le Atua. Ae afai e te fia faauō iā i latou, o le a aafia ai ou manatu, ou talitonuga, ma lau amio. O le ala lea na fai mai ai Paulo i lana tusi e lua i Korinito: “Aua tou te amo faalēgatasi ma ē lē faatuatua.”—2 Korinito 6:14-18.

Na iloaina e Fereti, ua 16 ona tausaga, le moni o ia upu a Paulo. Na malie o ia e alu i se malaga a lana aʻoga i se nuu tau atiaʻe, e fesoasoani ai i le aʻoaʻoina o tamaiti. Ae a o fai a latou sauniuniga ma tamaiti o lana aʻoga, na toe sui lona manatu. Fai mai o ia: “Na oo mai le manatu, o le tele o loʻu taimi o le a ou faatasi ai ma i latou, e lē aogā lea i loʻu itu faaleagaga.” O le māfuaaga lea o le lē auai o Fereti i le malaga, ae ua ia fesoasoani atu i ē lē tagolima i se isi auala.

Faiga Uō ma Ē Talitonu Faatasi

Ae faapefea faiga uō ma i latou o loo i le faapotopotoga Kerisiano? Ina o tusi atu Paulo i le alii talavou o Timoteo, na ia lapataʻi e faapea: “Ua lē na o ipu auro ma le ario ua i le fale tele, a o ipu laau ma omea; o isi ua taʻuleleia, a o isi ua taʻuleagaina. O lenei, ai se tasi e faamamā iā te ia ai nei mea ua taʻuleagaina, e fai o ia ma ipu e taʻuleleia, e faasāina, e aogā foʻi mo le alii, ua saunia mo galuega lelei uma.” (2 Timoteo 2:20, 21) E lē o matamuli Paulo e taʻu mai le mea moni e faapea e oo lava i Kerisiano, o loo iai nisi e lē o amio e tusa ai, ma ua ia fana saʻo le malama i lona timaʻi mai iā Timoteo ia faamamā pe ʻaloʻalo mamao ma tagata faapea.

Po o lona uiga o lea mea, e ao ona e masalosalo i ou uso Kerisiano? E leai, ma e lē tatau foʻi ona e faatalitalia au uō ia lelei  atoatoa. (Failauga 7:16-18) Ae ia lē avea le auai o se talavou i sauniga, pe maelega ona mātua i le faapotopotoga, ma tulaga e te manatu ai o se tasi e lelei ona uō māfana i ai.

Ua faapea mai le Faataoto 20:11: “E mafai ona iloa o le tama i lana amio; pe sao ona lelei ma le tonu o lana mea e fai.” O lea la, e atamai ona e iloilo: Pe e avea le faiā a lea tagata ma Ieova ma mea e sili ona tāua i lona olaga? Po o aliali mai i ona manatu ma uiga “le agaga o lenei lalolagi”? (1 Korinito 2:12; Efeso 2:2) Po o avea lou faauō iā te ia ma mea e tupu ai lou faanaunauga ia tapuaʻi iā Ieova?

Afai e te fia uō i tagata e alolofa moni iā Ieova ma fiafia i mea faaleagaga, e lē gata o le a e ʻalofia faafitauli ae o le a sili ai ona e malosi e auauna i le Atua. Na fai atu Paulo iā Timoteo: “Ia e tausisi i le amiotonu, ma le faatuatua, ma le alofa, atoa ma le filemu, faatasi ma i latou o ē valaau i le Alii ai le loto mamā.”—2 Timoteo 2:22.

Faiga Uō ma le Isi Itupā

Pe afai ua e matua ma ua fia fai sou toʻalua, po o e mafaufau lelei e tusa ai o nei taʻiala? Auā e aogā foʻi i le filifilia o sou toʻalua. E tele ni vala e te tosina ai i se tagata, ae e sili ona tāua le tulaga faaleagaga o le tagata.

O lea ua fautua mai pea le Tusi Paia e tusa ai o le faaipoipo ma se tasi e lē “i le Alii.” (1 Korinito 7:39; Teuteronome 7:3, 4; Neemia 13:25) Atonu o nisi tagata e tou te lē tapuaʻi faatasi, e iai foʻi uiga e pei o le maufaatuatuaina, e tamālii, ma agalelei. Ae e lē o iā i latou le uunaʻiga lea o loo iā i tatou ia atiaʻe pea ia uiga ma ia faatumauina le faaipoipoga a o faagasolo le taimi.

Ae o se tasi e tuuina atu iā Ieova ma faamaoni iā te ia, e taumafai e atiaʻe ma faatumauina uiga faa-Kerisiano, e ui i mea e tutupu. Ua ia iloa, i le Tusi Paia, e iai se fesootaʻiga o le alofa i le toʻalua ma se faiā lelei ma Ieova. (Efeso 5:28, 33; 1 Peteru 3:7) O lea, pe a alolofa uma i laʻua iā Ieova, ua iā i laʻua la se uunaʻiga malosi e faamaoni ai i le faaipoipoga.

Po o lona uiga la, e mautinoa lava le taulau manuia o ulugalii e tapuaʻi faatasi? E leai. O se faataʻitaʻiga, afai e te faaipoipo i se tagata e lē naunau tele i mea faaleagaga, faamata o le ā e mafai ona tupu? Talu ai e lē o iā te ia le malosi e teena ai luʻi mai lenei faiga o mea, e ono faifai mālie ona liliuese o ia mai le faapotopotoga Kerisiano. (Filipi 3:18; 1 Ioane 2:19) Manatu la i sou tigā ma le ōia o le a oo iā te oe pe a aafia lou toʻalua i “mea leaga a le lalolagi.”—2 Peteru 2:20.

A o leʻi faia se faauōga ma oo ai ina faaipoipo, ia mafaufau muamua: Po o faaalia e lenei tagata o ia o se tagata e faamuamua mea faaleagaga? Po o ia faia se faataʻitaʻiga lelei e tusa o le ola ai o se Kerisiano? Po o mauaa o ia i le upu moni o le Tusi Paia, po o ia manaʻomia pea ona tupu atili i le faaleagaga? Pe e te mautinoa o le uunaʻiga i lona olaga o le alofa lea mo Ieova? E aogā pe afai e te iloa e lelei le talaaga o lea tagata. Ae, o le mea tāua, e ao ona e mautinoa o le tagata lea e te fiafia i ai, e matuā naunau o ia iā Ieova ma o le a avea ai o ia o se toʻalua lelei.

Ia manatua foʻi, o nisi ua tosina i “tagata lē lelei” ona o ni “mea” lē lelei, e pei o faafiafiaga po o gaoioiga e lē tatau. O talavou e tulaga lelei i le faapotopotoga Kerisiano, e lē auai i mea faapea. O lea la, ia suʻesuʻe ifo i lou loto.

Afai e te iloa o loo manaʻomia ona aʻoaʻo lelei lou loto, aua e te faavaivai ai. E mafai ona aʻoaʻoina le loto. (Faataoto 23:12) O le mea e sili ona tāua: O le ā tonu lava le mea o loo e manaʻo ai? Po o e manaʻo ia e tosina i le mea e lelei, faapea ma i latou o loo fai le mea lelei? E mafai ona e maua se loto faapena e ala i le fesoasoani mai iā Ieova. (Salamo 97:10) O lea, o lou faamasani ia e iloa le eseesega o le lelei ma le leaga, o le a faigofie ai iā te oe ona e iloa i latou e mafai ona avea ma uō lelei e atiaʻe ai.—Eperu 5:14.

[Faaopoopoga i lalo]

[Ata i le itulau 26]

O uō lelei, e avea o ni taaʻiga lelei i le itu faaleagaga