O Talavou ua Talaʻi Atu ma le Lē Fefefe

Ua toʻatele talavou e lē fefefe e faailoa atu o latou talitonuga e lē gata i le aʻoga ae faapea foʻi i le galuega talaʻi, ma ua latou matuā taulau i le faia faapea. Seʻi tagaʻi foʻi i faataʻitaʻiga a nei talavou. *

Ua fai mai Kirisitina: “A o oʻu i le vasega tolu maulalo, na tufa mai ai api e le faiaʻoga i tamaiti uma o le vasega e tusi ai mea e latou te faia i aso taʻitasi. E na te faitauina a matou tala ona tusi lea o sana faamatalaga. Na ou filifili e faamatala laʻu lauga lea sa ou sauni e fai i le Aʻoga o le Faiva Faatiokarate. Na foliga mai na fiafia loʻu faiaʻoga i laʻu tala, o lea sa ou valaaulia ai o ia e oo atu i le Maota o le Malo e faalogologo i laʻu lauga. Na auai atu foʻi ma le faiaʻoga lea na faiaʻoga iā te aʻu i le vasega muamua. Na faamatala e le faiaʻoga i le vasega atoa lona fiafia tele i laʻu lauga ma na ou lagona ai lava le fiafia. Ae e leʻi pau ai i inā. Pe ā ma le tausaga talu mai lenā taimi, na faamatala ai laʻu tala i se fonotaga matagaluega a Molimau a Ieova, ma na auai ai foʻi loʻu faiaʻoga i le fono lea. Na ma ō ma laʻu uō paeonia e asi o ia ma ofo i ai le tusi Le Poto e Taʻitaʻia ai i le Ola e Faavavau. Ua oo mai foʻi o ia i se tasi o a matou tauaofiaga itumalo!”

O Sini, e ono tausaga lona matua, ma e poto tele e tautala atu ma le lototele i lana vasega e tusa o upu moni mai le Afioga a le Atua, e aofia ai le tulaga o ē ua oti ma le tulaga o Iesu e tusa ai ma lana faiā ma le Atua. Fai mai lona tinā: “E ese ma le maelega ma lē fefe e talaʻi atu i isi.” Na faaalia le faanoanoa o Sini ina ua iʻu lona tausaga muamua i lana aʻoga. Fai mai o ia: “Ou te alofa ona o tamaiti i laʻu vasega. O le a faafefea nei ona latou iloaina Ieova?” Na oo ane se manatu lelei iā Sini, auā i le aso mulimuli o le aʻoga, na ia ave ai i tamaiti uma se meaalofa o se tusi ua uma ona afīfī lelei, o Laʻu Tusi o Tala o Le Tusi Paia. E 26 tusi na faameaalofa e Sini i tamaiti, ma na ia fai i tamaiti, e ave a latou meaalofa i le fale i o latou mātua, e latou te tatalaina faatasi. O le manatu o loo iā Sini, ua avea lana vasega ma lana oganuu. Sa ia telefoni foʻi i tamaiti e talanoa e tusa o a latou tusi. Na fai mai se tasi teineitiiti e la te faitau i ai ma lona tinā i pō uma.

I le taimi o 15 tausaga o Elena, na ia ave ai ni kopi  o le Ala Mai! i lona faiaʻoga lea e aʻoaʻoina le mataupu i talafaasolopito. Ua fai mai Elena: “O le fiafia ia i ai o loʻu faiaʻoga ma ua lua nei tausaga talu ona ia faitauina mekasini o le Ala Mai!” Ua ia fai mai atili: “E leʻi leva talu ai nei ona ou ave i ai le tusi o Laʻu Tusi o Tala o Le Tusi Paia, ma na ia fai mai e fiafia lava i ai lana fanau teine e toʻalua. Ona ou ave lea i ai o le tusi Ia Faalogo i le Faiaʻoga Sili. Na ia tusi faafetai mai e faapea: ‘Faafetai tele mo tusi. Ua matou fiafia lava i ai ma laʻu fanau teine. O se mea e faafiafiaina ai le iloaina o se talavou e mafaufau lelei ma maelega e pei o oe. E leai se meaalofa e tusa ma lea ua iā te oe, o lou faatuatua malosi. Ua sili mea ua e aʻoaʻo mai na i lo ni mea na ou aʻoaʻoina ai oe!’ Ua ou iloa mai lenei mea na tupu, e ese le talisapaia e tagata o le upu moni o le Tusi Paia pe a fai se taumafaiga e faailoaina atu iā i latou.”

O le ono tausaga o Tanielu na ia fai ai lana uluaʻi suʻesuʻega faale-Tusi Paia. Fai mai o ia: “E masani ona ma ō ma loʻu tinā i ana suʻesuʻega, ae na ou manaʻo e fai lava saʻu suʻesuʻega.” Na asia e Tanielu se tinā matua o lona faaiʻu o Ratcliff, ona sa ia tuu ni lomiga faale-Tusi Paia iā te ia. Na ia faapea atu: “Ou te fia faaali iā te oe le tusi e sili ona ou fiafia i ai, o Laʻu Tusi o Tala o Le Tusi Paia. Ou te fia iloa pe mafai ona ou sau i vaiaso taʻitasi e faitau atu iā te oe.” Na talia e le tinā matua lea tulaga. Ua fai mai Lora, le tinā o Tanielu: “I se taimi mulimuli ane o lenā lava aso, na amata ai la matou suʻesuʻega ma lenei tinā matua. Na auauaʻi Tanielu ma lenei tinā e faitau palakalafa, ona fai lea o Tanielu iā te ia e faitau nisi o mau o loo i le faaiʻuga o le tala. E ma te ō lava ma Tanielu, ae e foliga mai e na o Tanielu e fia talanoa i ai le loomatua!” Na faagasolo le suʻesuʻega a Tanielu ma le loomatua ma oo atu ai i le suʻesuʻeina o le tusi E Mafai ona E Ola e Faavavau i Parataiso i Le Lalolagi. E oo ane i le taimi lea ua lelei le faitau a le tuafafine laʻitiiti o Tanielu, e igoa iā Natalia, na ia auai ai foʻi i le suʻesuʻega. E tele fesili na fia malamalama i ai le tinā matua, ma o nisi o ia fesili e loloto. Ae na faaaogā e Tanielu ma Natalia le tamaʻi tusi Mataupu o le Tusi Paia mo Talanoaga ma le faasino mataupu i tua o le Tusi Paia faa-Peretania, e maua ai tali mai le Tusi Paia. O lenei tinā, o lana lotu i lona olaga atoa, o le Katoliko, ae na matuā faafiafiaina o ia i mea na ia aʻoaʻoina. O lana tala ina ua uma se tasi o a latou suʻesuʻega: “Maʻimau pe ana ou suʻesuʻe, i ia mau tausaga ua teʻa!” O le tulaga faanoanoa ona e leʻi leva talu ona maliu o ia, i le 91 o ona tausaga. Ae ua mafai ona ia iloa upu moni tāua mai le Tusi Paia ona o le suʻesuʻeina o le Tusi Paia, ma o se tasi o ia upu moni, o le faamoemoe lea o le toe tū i se lalolagi fou. Ua atoa nei le 10 tausaga o Tanielu ma e lua ana suʻesuʻega o loo fai. Ae o Natalia, ua atoa lona valu, ma o loo la suʻesuʻeina le Tusi Paia ma se teine e tutusa o la tausaga.

Ua faafiafia e talavou e pei o Kirisitina, Sini, Elena, Tanielu ma Natalia o latou mātua Kerisiano. Ae e sili atu, ua latou faafiafiaina le finagalo o Ieova, ma na te lē faagaloina lo latou maelega mo lona suafa.—Faataoto 27:11; Eperu 6:10.

[Faaopoopoga i lalo]

[Ata i le itulau 14]

Kirisitina (i luga) ma Sini

[Ata i le itulau 15]

Tanielu ma Natalia

[Ata i le itulau 15]

Elena