O le Faamaoni e Viia ai le Atua

TUSIA E LE TUSITALA O LE ALA MAI! I UKRAINE

INA ua māeʻa le sauniga, na agaʻi ai i le fale se aiga Molimau a Ieova i Ukraine e igoa iā Chibisov, ma na latou mauaina se ato tupe e tele ni mea tāua o iai, e aofia ai se laisene avetaavale, o pepa o faletupe, ma le tupe e tusa ma le $500 Amerika i tālā Ukraine. O lenei aiga e toʻalima, e na o le tamā e faigaluega. E tusa ma le $70 Amerika lona totogi i le masina, o lea e foliga mai ai e latou te manaʻomia tele lea tupe. O le ā la le mea na latou faia?

O le faamatalaga a le tinā: “Na talanoa la ma fanau teine po o le ā se auala e ave ai le ato i lē e ana, auā o le laisene na iloa ai, o ia o se tamaʻitaʻi. Na ma fiafia ma loʻu toʻalua ona na faaalia e le fanau ni loto fuatiaifo ua lelei. I le aso na sosoo ai, na ou vili ai i le fafine e ona le ato. O Ola lona igoa ma na oo mai o ia ma loimata o le fiafia ma fai mai o ia ma lana tane, e iai ni o la faleoloa laiti i lo matou taulaga. O le tupe lea na i totonu o le ato, o totogi o tagata faigaluega. E lē gata i lea, o se tasi o pepa o loo iai, e tāua tele i faamaumauga o tupe o lana pisinisi.

“Na fesili mai Ola po o fea na maua ai le atotupe, ma na matou faamatala i ai na matou tau i ai ina ua matou foʻi mai la matou faatasiga faa-Kerisiano. Na fiafia o ia e ave ni lomiga o le Tusi Paia na matou ofoina i ai.

“Ina ua mavae ni nai vaiaso, na faamatala mai e se Molimau i la matou faapotopotoga e faapea a o ia ofoina mekasini i le auala, na fai atu ai se fafine iā te ia, o ia sa lē fia faalogo muamua i Molimau a Ieova. Ae i le taimi nei, e lē gata ua fia faalogo iā i latou, ae ua ia ave foʻi a latou lomiga. Fai mai o ia, ua māfua lea tulaga ona na toe faafoʻi atu e ni Molimau le ato tupe a lana tama.”

[Ata i le itulau 31]

Le aiga o Chibisov