Ola ma le Fefe

UA FEFE Rosana, * e fai i lana tane e fia faigaluega faavaitaimi, ona na iai se taimi na ia fai ai i lana tane e aumai sona pasese seʻi alu e asi lona tinā, ae na liliu mai ma tuʻi o ia, ma ave ai o ia i le falemaʻi. Ua fefe o ia i taimi uma.

A mānava le avā a Rolani i le pō, e masani ona puʻe sona auala a lē o se pasi, po o se nofoaafi e alu ai i le fale, ae i le taimi nei ua alu Rolani i le taavale e piki mai. Ua popole Rolani ona o tala e tusa o le tupu tele o le amioleaga i lo latou vaipanoa.

E faigaluega Anita i se aai tele. A o agaʻi atu i lona aiga, na aafia o ia ona o le taimi tonu lava lenā o loo faia se solo tetee. O lea solo na iʻu i ni tulaga faamimisa. So o se taimi lava e na te lagona atu ai se solo tetee, e popole ai lava o ia. Fai mai o ia: “Ua ou fefe. Ua ou lē fia faigaluega i inei. Ae e leai se mea e mafai.”

Ua aafia uma Rosana, Rolani, ma Anita i le fefe, ma e lē seʻiloga o taimi e tutupu ai faalavelave, ae o se lagona o loo iā i latou i taimi uma. Ua lagona e tagata e pei ua leai so latou malosi ona o le ola ma le fefefe. Ua leai so latou fiafia ona ua avea lea mea ma tulaga ua lē mafai ai ona latou ola e tusa ma le tulaga o loo latou mananaʻo ai. Ua tumu o latou mafaufau i le fefe ma ua faafaigatā ai ona fai mea e ao ona fai.

O le ola ma le fefe o se tulaga e matuā faapopoleina ai. Ua masani ona tupu ai le loto mafatia ma e ono aafia ai foʻi le soifua mālōlōina. Fai mai le faamatalaga a se tasi mekasini tau i le soifua mālōlōina: “O le popole, e aafia ai le malosi o le tino e puipuia ai ia lava, ma ua māfua ai le tele o maʻi. A o faagasolo le taimi, o le a oo ina faalētonu le tino, aemaise lava i totoga o loo aafia ai. O le a oo ai ina maua i le toto maualuga, gasegase o le fatu ma fatugaʻo, faamaʻi o le manava, o le puta papala, ulu tigā, lē mafai ona moe, loto mafatia, ma le popole. Afai e faaumiumi lea tulaga e oo ai ina lagona le mou atu o le malosi.”

I aso nei, o se tulaga masani le ola ma le fefe. Pe faamata e iai se taimi o le a mafai ai e tagata ona ola e aunoa ma le fefefe?

[Faaopoopoga i lalo]