Pe E Mafai Ona Saʻoloto Mai le Fefe?

PE FAAMATA e mafai e se tasi o loo ola i lenei lalolagi mataʻutia ona saʻoloto mai le fefe? Ailoga. E oo foʻi i ē faatuatua i le Atua, e latou te lagona le popole ona o lamatiaga ua oo iā i latou. O se faataʻitaʻiga, i le uluaʻi senituri, na faimalaga ai Paulo i lana galuega, ma na ia taʻua le afātia o ia i folauga i le vasa, lona lamatia i vaitafe, o tagata faomea, ma lamatiaga i le aai. (2 Korinito 11:25-28) Ua faapena foʻi i le toʻatele o i tatou, ua tatou faafesagaʻi ma tulaga e lamatia ai.

Ae ua iai ni mea e mafai ona tatou faia, ina ia faaitiitia ai lo tatou popole. Ua fai mai le Tusi Paia: “O lē ua faautauta, na te iloa atu le leaga, ma lafi ai; a o ē ua faigofie, e ō atu pea i latou, ona faasalaina ai lea.” (Faataoto 22:3) O ā ni laasaga tāua e mafai ona fai?

Mea e Puipuia Ai

O se mea e lelei ona mātauina, o le Tusi Paia o se tusi mai anamuā, ae o loo iai le tele o taʻiala, o loo aogā pea ina ia ʻalofia ai tulaga lamatia. O se faataʻitaʻiga, ua faapea mai le Tusi Paia: “O le tagata poto, o i lona ulu ona mata, a o le valea, e savali o ia i le pōuliuli.” (Failauga 2:14) O se tulaga poto lou mātau pe faapeʻī tagata o i le mea o e iai, ma afai e mafai, aua e te ui i auala pogisa. Atonu e lelei pe a e ui i ala e tele ai molī, e tusa lava pe fai si mamao. Ua faapea mai foʻi le Tusi Paia: “E sili ona lelei o le toʻalua i le toʻatasi. . . . Afai foʻi e faamanumalo mai se tasi i so laʻua, e teteeina atu o ia e le toʻalua.” (Failauga 4:9, 12) Pe afai e leaga le vaipanoa e te nofo ai, ae ā pe a lua ō faatasi ma se isi?

Pe afai ae faafefe oe e se tasi ma fao au mea, ia manatua, e sili ona tāua lou ola na i lo mea totino. (Mataio 16:26) E lē gata i lea, ia faaeteete pe afai e toʻatele i latou e taufaafefe ane iā te oe, auā e faigofie lava ona tupu se faalavelave.—Esoto 23:2.

 Pe afai e faasoesa atu se tagata i ni faamatalaga leaga, tausuaga eleelea pe tau tago atu iā te oe, ia matuā tetee iā te ia. Atonu e manaʻomia ona e sola ese e pei ona faia e Iosefa ina ua aapa atu se fafine amioleaga iā te ia. Ua taʻua e faapea: “Ua sola [o ia], ua alu i fafo.” (Kenese 39:12) Afai e lē mafai ona e sola, fai i ai: “Soia!” po o le “Aua e te paʻi mai!” pe fai i ai, “Ou te lē fiafia i au tala na e fai mai.” Afai e mafai, ia e ʻaloʻalo mamao ma mea e tutupu ai faiga faapena.

Feagai ai ma le Fefe i Aiga

O le ā se mea e te faia pe afai ua e fefe ona o le sauā o lou toʻalua? E lelei ona e mafaufau i gaoioiga o le a e fai, pe a teʻi ua lamatia lou ola ma ola o lau fanau. * O loo taʻua i le Tusi Paia le muaʻi faia e Iakopo o se fuafuaga e sao ai pe afai e ita lona uso o Esau. Ona e leʻi ita Esau, o lea e leʻi faatinoina ai lea fuafuaga, ae o se fuafuaga poto lona nofo sauniuni. (Kenese 32:6-8) O se mea lelei le muaʻi fuafua po o ai e mafai ona e sola i ai pe a tupu se faalavelave, ona talanoa lea i ai e tusa o lou manaʻoga, a o leʻi tupu lenā tulaga. Vaai au pepa tāua e tuu i se mea e faigofie ona maua ai pe a manaʻomia.

Atonu foʻi e lelei le taʻu i leoleo ina ia maua se puipuiga mo oe. * E tusa ma aʻoaʻoga a le Tusi Paia e tatau i tagata uma ona tali atu e tusa ma a latou amioga. (Kalatia 6:7) Ua taʻu i le Tusi Paia ia malo: “O le auauna ia a le Atua iā te oe, ia lelei ai; a e afai e te amio leaga, ia e fefe ai.” (Roma 13:4) O le solitulafono le fasitagata i le aiga, e tutusa lava ma le fasitagata i fafo o le aiga. I le tele o atunuu, o le solitulafono foʻi le taulamalama o le tane i se avā pe afai ua sola le avā ona o le sauā o le tane.

O le faia e pei ona taʻua i luga, e aogā i se isi itu e faaitiitia ai le fefe. Ae ua lē pau na o ni aogā e maua mai le Tusi Paia. Ua iai valoaga maufaatuatuaina ua faaali mai ai le mea o loo faia e le Atua i le taimi nei faapea ma le lumanaʻi. O le ā se faamoemoe o loo folafola mai i le Tusi Paia mo tagata o loo ola ma le fefefe?

Tumu le Lalolagi i le Fefe—Aiseā?

O se mea e tāua ona na tusi le aposetolo o Paulo e faapea: “A e ia e iloa e oe lenei mea, o ona aso e gata ai e oo mai ai aso faigatā; auā e avea tagata ma ē alolofa i latou iā i latou, . . . o ē lē lotoaiga, o ē lē ma faaleleia, o ē faatuaupua, o ē lē taofi manaʻo o le tino, o ē faasauā, o ē ʻinoʻino i le amio lelei.” (2 Timoteo 3:1-3) Ioe, ua tatou ola i se vaitaimi ua tupu tele ai le fefe ma le mataʻu!

 Ina ua taʻua e Iesu “le gataaga o le lalolagi,” na ia faapea mai: “E sii le taua e le tasi nuu i le tasi nuu, ma le tasi malo i le tasi malo. E i ai mafuiʻe tetele i lea mea ma lea mea, o oge foʻi, ma faamaʻi; ma faaiteite ma faailoga tetele mai le lagi.” (Mataio 24:3, 7, 8; Luka 21:10, 11) O lea, e lē tatau ona faateʻia i tatou ona o “faaiteite” o loo tatou vaaia, lea ua atili ai ona tupu le fefefe o tagata. O le ā le uiga o nei mea?

Na fetalai Iesu: “Pe a iloa e outou ia mea ua faia, ia outou iloa ua latalata le malo o le Atua.” (Luka 21:31) Tatou te faatalitalia o le a pulea tagata e le malo o le Atua mai le lagi, i lo tatou vaitaimi. (Tanielu 2:44) Pe faapeʻī le olaga o le a iai i lenā taimi?

Saʻoloto Mai le Fefe!

O loo faamatala mai i le Tusi Paia se taimi o le filemu i le lumanaʻi, o le a lē toe iai ni taua, po o ni tagata amioleaga, ae o le a tumu le lalolagi i tagata e alolofa i le Atua. Na tusi Peteru o le aposetolo o Iesu e faatatau i le “aso e faamasino ai ma fano ai tagata faalēmataʻu.” O le a lē toe iai sē e faamataʻu mai auā o le a ‘mau le amiotonu’ i le lalolagi. (2 Peteru 3:7, 9, 13) Seʻi manatu la i le fiafia e oo i ai ona o le a feola faatasi ma tagata o ē amiotonu ma fealofani! Ua aogā tele lea faamoemoe e sui ai la tatou vaaiga e tusa o lamatiaga o loo iai nei, ua toe o se aga ona mou atu lea.—Salamo 37:9-11.

Mo le faalaeiauina o ē mafatia, na fetalai Ieova i le perofeta o Isaia: “Fai atu ia i ē ua loto vaivai, Ia outou faamalolosi, aua tou te fefefe; faauta, o lo outou Atua; o le a oo mai le taui ma sui, o le taui lava mai le Atua; e afio mai lava o ia ma faaola iā te outou.” (Isaia 35:4) O lea la, ua mafai e auauna moni a le Atua ona faatalitali ma le mautinoa i le lumanaʻi. (Filipi 4:6, 7) Ua maua e tagata o loo ola ma le fefefe, se faamāfanafanaga tele i le iloaina, o le a faataunuuina le finagalo o Ieova mo le lalolagi, ia faatumuina i tagata e iloa o ia ma faaalia ona uiga alofa.—Kenese 1:26-28; Isaia 11:9.

Ua tatou iloa, e leai se mea e mafai ona taofia Ieova mai le faataunuuina o lona finagalo alofa mo tagata. (Isaia 55:10, 11; Roma 8:35-39) A tatou malamalama i lenei mea, o le a matuā tāua lava upu a se tasi faisalamo lauiloa e faapea: “O Ieova, o loʻu leoleo mamoe o ia. . . . Na te faafoʻisia mai loʻu agaga; na te taʻitaʻi iā te aʻu i ala o le amiotonu ona o lona suafa. E ui lava ina ou savali i le vanu o le ata o le oti, ou te lē fefe lava i se mea leaga; auā o oe ta te faatasi ma aʻu.” (Salamo 23:1-4) E ui ina o le a faateleina le leaga o nei taimi faigatā, ae ua latalata mai se lalolagi o le a lē toe iai se fefe, ma e mautinoa foʻi lona oo mai.

[Faaopoopoga i lalo]

[Ata i le itulau 9]

Ua toeitiiti aumai e le Atua se lalolagi e lē toe iai se fefe