Saʻoloto Mai le Inu Tele i le ʻAva Malosi

“O loʻu tamā o se tagata na ola i le ʻava, ma o le tulaga foʻi lenā na oo iā te aʻu. E atoa ane loʻu 12 ua ou masani i le inu ʻava. E oo i le taimi na ou faaipoipo ai, ua fai ma aʻu masani le onā i aso uma. Sa fai ma ō mai leoleo e fesoasoani i loʻu aiga ona o loʻu sauā. Na faalētonu ai loʻu soifua mālōlōina. Na aafia ai loʻu manava, ona ua piliki loʻu puta, ma na toetoe lava aʻu oti ai. Na iʻu ina ou maua i le maʻi ate ma le toto vaivai. Na ou alu i faatasitasiga a tagata o ē taumafai e tuu le ʻava, ae e leʻi aogā iā te aʻu. Na pei ua saisaitia aʻu i ni filifili, ma ua lē mafai ona ou saʻoloto mai ai.”—VITO, * ANITENITINA.

O FAAMATALAGA faapea, ua masani ona faamatalaina e tagata ua pulea e le ʻava. Ua iā i latou le lagona lea sa ia Vito, ua pei e saisaia e le ʻava. Pe e mafai ona manumalo, ma ʻalofia faafitauli e māfua mai ona o le ʻava? Afai e mafai, e faapefea?

O le Iloaina o Loo Iai se Faafitauli

Muamua lava, e tāua tele ona iloa e le tagata lea o loo pulea e le ʻava malosi, ma lona aiga faapea, o loo iai se faafitauli. O le puleaina e le ʻava malosi, ua na o se vaega itiiti o le faafitauli. O se faafitauli na umi se taimi o tuputupu aʻe, e amata mai lava i le taimi na fai ai ma masani le inu, e ui atonu e leʻi leaga tele. O le mea e ofo ai, o le tele o faalavelave tutupu, faapea le faasauā, ma faafitauli i le va ma isi, e lē mai ē ua puleaina e le ʻava. Ia mātau mai le faamatalaga a le Faalapotopotoga a le Soifua Mālōlōina a le Lalolagi (WHO) e faapea: “O le auala sili e faaitiitia ai faafitauli e māfua mai le ʻava, o le taumafai lea ia pulea le inu a tagata e lē inu tele ae lē o i latou ua inu tele.” Po ua ova lau inu na i lo le mea ua fautuaina mai e le soifua mālōlōina? Po o e inu i taimi ua tatau ai ona e uaʻi totoʻa ma ia vave lau gaoioi? Po ua iai ni faafitauli i lou aiga ma le galuega ona o lau inu? O le “auala sili” e aogā i le ʻalofiaina o ni faafitauli tugā, o lou iloaina lea, ua oo lau inu i se tulaga mataʻutia, ma ua tatau loa ona faaitiitia. Auā o le a sili atu ona faigatā ona fai se suiga, pe afai ua e ola faalagolago i le ʻava.

O le mea masani i ē inu tele i le ava malosi, e latou te lē talitonu, ua avea le inu o se faafitauli. Ua latou faapea mai: “E leai lava se eseesega o aʻu ma isi,” pe fai mai foʻi, “E faigofie lava ona tuu.” Ae o le faamatalaga a se alii e igoa iā Konesetatino mai Rusia, e faapea: “Na toetoe a ou oti ona o le ʻava, ae na augapiu ma soʻu  manatu o lea e pulea aʻu e le ʻava, ma o le mea lenā e leʻi faia ai saʻu taumafaiga e tuu.” Na faapea mai Mareko mai Polani: “Ua tele taimi o oʻu taumafai e tuu, ae ou te leʻi manatu o aʻu ua pulea e le ʻava. Sa ou lē manatu mamafa i faafitauli na oo mai ona o le ʻava.”

E faapefea ona fesoasoani i se tasi ia ona iloa ua iai sona faafitauli e tusa o le ʻava, ma ia taumafai e faalelei? E ao ona ia iloa muamua, ua tutupu ona faafitauli ona o le ʻava, ma o le a faaleleia lona olaga pe a tuu. Ua taʻua i le La Revue du Praticien—Médecine Générale e ao ona aveese le manatu, “Ua ala ona ou inu ona ua sola laʻu avā ma ua tuli aʻu mai le galuega,” ae ia faapea, “Ua sola laʻu avā ma ua tuli aʻu mai le galuega ona o loʻu inu.”

Afai o e fia fesoasoani i se tagata ua pulea e le ʻava ia sui lona manatu, o ni fautuaga nei e aogā ona e faia: Faalogologo lelei, fesili i ni fesili e saʻoloto ai le tagata e faaali mai ona lagona ma manatu, ia faaalia le alofa ma o le a ia lagona ai e te malamalama, faalaeiau iā te ia e tusa lava pe itiiti se suiga ua ia mafai, aua e te faitio pe faaalia se isi uiga e ono taofia ai lona talanoa lelei mai ma lē manaʻo ai i se fesoasoani. Atonu o le a aogā ona fai i ai e tusi sana lisi e tali ai fesili nei e lua: O le ā e iʻu ai pe a faaauau laʻu inu? ae, O le ā e iʻu i ai pe a tuu?

Saʻili se Fesoasoani

E lē faapea a inu tele le tagata i le ʻava malosi ona faapea lea ua leaga po ua lē aogā. Ua iai nisi ua mafai lava e i latou ia ona tuu. Ae, o tagata ua pulea e le ʻava, ua manaʻomia se fesoasoani mai tagata e tomai faapitoa ina ia mafai ai ona tuu. * E iai isi e aogā le tausāvali i le falemaʻi e fai togafitiga, ae afai e faigatā ni āuga ua oo i ai ona o le taumafai e tuu, e manaʻomia ona taofia i le falemaʻi. I le taimi muamua ina ua faatoʻā taumafai e tuu le ʻava, e tusa o le lua i le lima aso e matuā lagona ai ia faigatā ma tigā, ae a uma lea, ona aumai loa lea o fualaau e taofi ai le manaʻo i le ʻava, ma ia aua ai neʻi toe tagofia le ʻava.

O togafitiga e taumafai ai e pulea le manaʻo i le ʻava malosi, e lē o mautinoa sona taulau atoatoa. E mo na o sina taimi e aogā ai le inumia o fualaau, ae e lē o se vaifofō. Na faia se togafitiga faapea iā Aleni, o se alii mai Falani. Fai mai o ia: “O taimi na ou teʻa ai ma le falemaʻi, na amata ai foʻi ona ou toe tago i le ʻava ona ua ou toe foʻi i le vaega lea na matou feinu faatasi. E leʻi iai iā te aʻu se manaʻo e tuu.”

Ia Iai se Mea e Aogā e Pisi Ai

Ua lē taulau taumafaiga a le toʻatele e tuu le ʻava ona ua latou lagona ua pei e gaogao o latou olaga, e tai pei ua leai se uō sa māfana i ai. Na faapea mai Vasili, o se alii mai Rusia: “E lē mafai ona teʻa le ʻava mai loʻu mafaufau. E lē aogā le aso pe afai e lē inuina se ʻava malosi.” O tagata ua pulea e le ʻava, e pau le mea e tāua iā i latou, ia faamalie le manaʻoga i le ʻava. Fai mai Iese mai Polani: “Pau le mea na tāua i loʻu olaga o le maua lea o se tupe e faatau ai laʻu ʻava.” O lea la, e tāua i se tagata o loo manaʻo e tuu le ʻava ona iai se mea e faatāua i lona olaga.

O se lomiga na lomia e le WHO, o loo iai ni fautuaga mo i latou o loo taumafai e faia ni suiga, ma o loo taʻua ai le tāua o le iai o ni mea aogā e fai ina ia lē toe foʻi ai i le ʻava. O se faataʻitaʻiga, o se tasi o manatu i lea lomiga, o le faapisi lea i galuega faalelotu.

O le pisi i galuega faaleagaga o le a aogā lea i le tagata ina ia lē pulea ai o ia e le ʻava. O se faataʻitaʻiga, ina ua mavae le faafalepuipuiina faatolu o Aleni talu ai lava le ʻava, ona amata lea o sana suʻesuʻega ma Molimau a Ieova. Ua ia fai mai: “O le suʻesuʻe o le Tusi Paia na ou iloa ai o loo iai soʻu lumanaʻi  fiafia ma ua mafai ai ona ou teena le ʻava. O le uunaʻiga lea ua iā te aʻu e lē gata ia aua neʻi inu, a ia faafiafia iā Ieova.”

Taulau i Taumafaiga e Tuu pe a Toe Tagofia

Ua faailoa mai e i latou o loo fesoasoani i ē ua taumafai e tuu le ʻava e faapea, e tāua tele ona lagolagosua ma faalaeiau iā i latou. Ua toʻatele i latou ua aunoa ma ni aiga ma uō ona o le tulaga leaga ua iai. Talu ai ua lafoaʻiina, o lea la, e tauau ina oo iā i latou lagona mafatia ma atonu e pule ai i o latou ola. O loo taʻua i le lomiga mai le WHO ni fautuaga mo tagata o loo fesoasoani i ē o loo iai faafitauli e tusa o le ʻava: “Taumafai e aua le faitio, e tusa lava pe e te lē fiafia ma ua e fiu i ana amio. Ia manatua, e lē faigofie ona sui. O le aso ua lelei, a o isi foʻi aso e faalēlelei. E na te manaʻomia lau faalaeiauga, lou lagolago atu ia faaitiitia pe tuu le ʻava, ma ni manatu e aogā.”

Ua faapea mai Ilalio, o se alii na toeitiiti atoa le 30 tausaga o inu: “O le alofa ma le tausiga a uō i le faapotopotoga a Molimau a Ieova na aogā iā te aʻu. E tele taimi na ou lē taulau ai, ae na latou lē tuua aʻu ae sa faalaeiau mai pea ma aumai fautuaga e talafeagai mai le Tusi Paia.”

Afai o loo e taumafai e tuu le ʻava, ia manatua, atonu e iai taimi e te toe tago ai i ai, ae ia e iloa o se mea e ono mafai ona tupu a o e taumafai e malo i lenei faafitauli. Faamalosi! Vaai po o le ā le māfuaaga o lou toe tagofia o le ʻava, ma ia e iloa mea e ao ona e ʻaloese mai ai. Ia e iloa tonu po o ā taimi ia e tupu ai lou fia inu. Po o taimi e leai ai ni au mea e fai, ua lagona le mafatia ma le tuua toʻatasi, po o le popole, po o le auai atu i se mea po o se faatasiga o loo inuina ai le ʻava? Ia taumamao ma na tulaga! E lua tausaga o taumafai Iese e tuu le ʻava, ma na ia fai mai: “Na oo ina ou iloa ma malamalama i lagona ia e māfua ai loʻu fia inu. O lea ua ou ʻalofia tulaga e oso mai ai lea lagona. Ou te taumamao ma mea o loo inu ʻava ai tagata. Ou te lē ʻai i se taumafa o loo filogia i le ʻava, pe faaaogāina ni fagu manogi po o ni vailaau mai le falemaʻi o loo iai le ʻava malosi. Ou te lē matamata foʻi i ni faasalalauga e faatatau i le ʻava.” Ua iloa e le toʻatele, o le tatalo i le Atua ina ia ‘matuā tele le mana,’ e foaʻiina mai iā i latou, ua avea lea ma vala autū ua mafai ai ona latou puleaina lo latou manaʻoga ia inu.—2 Korinito 4:7; Filipi 4:6, 7.

Ua Saʻoloto!

E ui o le a avea o se luʻi tumau le aua neʻi toe pulea e le ʻava, ae e mafai ona saʻoloto mai ai. O tagata uma o loo taʻua i lenei mataupu, ua latou mafaia lea tulaga. Ua sili atu ona malolosi, ma ua maua aogā e lē gata i aiga ae faapea ma galuega. Fai mai Aleni, “O lea ua ou saʻoloto mai le pulea e le ʻava.” Ae ua fai mai Konesetatino, “Ua avea le iloa o Ieova ma mea ua puipuia ai loʻu aiga. O lea ua ou iloa ua tāua loʻu ola, ma e lē faalagolago loʻu fiafia i le iai o le ʻava.” Fai mai Vito: “Ua pei ua ou saʻoloto. Ua ou iloa nei le mea e ao ona fai i loʻu olaga.”

E tusa lava pe lamatia le ola o se tasi ona o le inu tele i le ʻava malosi, po o iai foʻi nisi faafitauli ona o le ʻava, pe ona ua puleaina e le ʻava, ae e mafai lava ona ia faia ni suiga. Afai ua tau aafia lou soifua mālōlōina ma lou ola fiafia ona o le ʻava malosi, aua e te faatalatū e fai se suiga. E lē gata ina o le a aogā lea iā te oe, ae faapea foʻi i lou aiga.

[Faaopoopoga i lalo]

[Ata i le itulau 28]

O le laasaga muamua, o lou iloaina o loo iai se faafitauli

[Ata i le itulau 29]

E manaʻomia e le toʻatele le fesoasoani mai ē e tomai faapitoa ina ia tuu

[Ata i le itulau 30]

E aogā le tatalo

[Ata i le itulau 30]

E mafai ona e tuua!