Le Manatu o le Tusi Paia

Aiseā e Ao ai Ona Saʻili i le Tusi Paia mo Taʻiala?

“O Tusi Paia uma lava e mai le Agaga o le Atua ia, e aogā foʻi ia e aʻoaʻo ai, e aʻoaʻi ai, e faatonu ai.”—2 Timoteo 3:16.

O FEA e te saʻili i ai mo taʻiala i lou olaga? I nei aso, e anoanoaʻi le mau fautuaga e faatatau i soo se mataupu. Ae ui i lea, e toʻatele tagata o loo saʻili atu pea i faamaumauga mai anamuā a le Tusi Paia mo taʻiala.

Peitaʻi, e manatu le toʻatele o tagata e itiiti se aogā o le Tusi Paia, aemaise lava i nei aso ua tele ai le poto faaonapōnei. Ua iai nisi faiaʻoga aloaʻia, faapea ma saienitisi, ua latou lagolagoina le manatu e lē o toe aogā le Tusi Paia. Pe tonu o latou manatu? Pe a fua i le tele o taʻiala ua iai i o tatou aso, o ā ni māfuaaga e ao ai i se tasi ona saʻili atu i le Tusi Paia?

Se Tusi o Loo Iai le Upu Moni

A o mālōlō Iesu Keriso i se tasi taimi i talaane o se vaieli, na la talanoa ai ma se fafine Samaria. Na ia fetalai atu iā te ia: “O le Atua o le agaga lava ia; o ē tapuaʻi iā te ia, e tatau ona tapuaʻi atu ai i le agaga ma le faamaoni [upu moni].” (Ioane 4:24) Ua taʻu mai i lenei faamatalaga, o loo iai se ituaiga tapuaʻiga e taliaina e le Atua. Ina ia tusa ma le upu moni la tatou tapuaʻiga, e ao ona ōgatasi ma mea ua faaalia mai e le Atua i le Tusi Paia e faatatau iā te ia, auā o le Afioga a le Atua, o le upu moni lea.—Ioane 17:17.

Peitaʻi, e tele tapuaʻiga e faapea mai e talitonu i le Tusi Paia, ae e eseese uma lava a latou aʻoaʻoga. O le iʻuga, ua tele le fenuminumiaʻi e uiga i aʻoaʻoga moni a le Tusi Paia. O se faaaʻoaʻoga: Po o Iesu o le Atua, po o ia o le Alo o le Atua? Pe e iai se olaga pe a mavae le oti? E iai moni se nofoaga e taʻu o Seoli e faapuapuagatia ai tagata pe a maliliu? Pe e iai moni sē e  igoa o Satani? O le ā e manaʻomia i le avea ai o se Kerisiano? Pe e tāua i le Atua o tatou manatunatuga ma gaoioiga? Po ua talafeagai ona fai feusuaʻiga pe afai ua iai le alofa moni, e ui e leʻi faaipoipo? Pe e leaga le taumafa o le ʻava malosi? * Ua faapea mai lotu eseese ua latou iloa lelei aʻoaʻoga moni e tusa o ia mataupu. Ae e tele ina feteenaʻi aʻoaʻoga a lotu eseese. E lē mafai la ona faapea atu e moni uma na aʻoaʻoga eseese.—Mataio 7:21-23.

E faapefea la ona e iloaina le mea moni e faatatau i le Atua ma le ituaiga tapuaʻiga e fiafia i ai? Seʻi faapea o loo e maua i se gasegase faigatā ma ua manaʻomia ona fai sou taotoga. Faamata o le ā o le a e fai? Pe afai e mafai, o le a e matuā saʻili ia maua se fomaʻi e sili ona lelei e faia le taotoga lea o loo e manaʻomia. E te manatu i ona agavaa ma ona tomai, ona e alu lea e vaai lua te talanoa. Afai loa ua e mautinoa mai au saʻiliʻiliga o le fomaʻi lea e sili ona lelei, o le a e faatuatuaina o ia, e na te faia lou taotoga. Atonu e ese ni manatu o le a faaali atu e nisi. Ae ua mautū lou mautinoa e tusa o le agavaa o lea fomaʻi.

E faapena foʻi ona atiina aʻe lou faatuatua i le Atua ma lana Afioga Paia, pe afai e te suʻesuʻe māeʻaeʻa i faamaoniga o loo iai. (Faataoto 2:1-4) A o e saʻilia tali i fesili e uiga i le ituaiga tapuaʻiga e talia e le Atua, e fai e oe le filifiliga. A lē o aʻoaʻoga ma manatu feteenaʻi o tagata, ia o le iloilo o manatu o le Tusi Paia.

E Saʻo ma Aogā

O le suʻesuʻe lelei o le Tusi Paia o le a e maua ai le mau faamaoniga e faapea, ‘o Tusi Paia uma lava e mai le Agaga o le Atua ia, ma e aogā.’ * (2 Timoteo 3:16, 17) O se faataʻitaʻiga, ua tumu le Tusi Paia i faamatalaga auʻiliʻili i valoaga eseese. Ua faamaonia e talafaasolopito lo latou faataunuuina. (Isaia 13:19, 20; Tanielu 8:3-8, 20-22; Mika 5:2) E saʻo faamatalaga a le Tusi Paia i mea faasaienisi e ui e lē o se tusi faasaienisi. O loo iai mea moni e tusa o le natura ma le soifua mālōlōina na tusia i le afe ma afe o tausaga, a o leʻi taitai ona iloa e saienitisi ia mea.—Levitiko 11:27, 28, 32, 33; Isaia 40:22.

Ua fesoasoani mai foʻi le Tusi Paia ina ia tatou faia filifiliga poto. E anoanoaʻi fautuaga aogā o loo iai mo aiga, le sologa lelei i le tino ma faalogona, i pisinisi, ma isi mataupu o le olaga i aso taʻitasi. Ua faapea mai le Faataoto 2:6, 7: “Auā o Ieova na te foaʻi mai le poto; mai lona fofoga le poto ma le faautauta; na te teua le poto mo ē amio saʻo.” E ala la i le avea o le Tusi Paia ma ou taʻiala, o le a e faamasani ai ia “e iloa ai le lelei ma le leaga.”—Eperu 5:14.

Ua fesoasoani mai foʻi le Afioga a le Atua ia tatou malamalama i le fuafuaga o le olaga. (Ioane 17:3; Galuega 17:26, 27) Ua faamatala mai ai le uiga o mea o loo tutupu i le lalolagi. (Mataio 24:3, 7, 8, 14; 2 Timoteo 3:1-5) Ua faaalia mai ai foʻi e le Atua le auala o le a ia aveesea ai le amioleaga mai le lalolagi ma maua ai e tagata le ola mālōlōina atoatoa ma le faafualoaina.—Isaia 33:24; Tanielu 2:44; Faaaliga 21:3, 4.

E faitau miliona i latou ua iloa lelei le faatuatuaina ma le aogā o le poto, mai le Tusi Paia. Ua valaaulia oe e i latou o loo lomia le Ala Mai! ina ia e iloiloina mataupu ia e faaulutala “Le Manatu o le Tusi Paia,” o loo iai i lomiga uma o lenei mekasini. E ala i lou faia faapea, o le a e maua ai nisi faamaoniga e faapea o le Tusi Paia o le taʻiala sili lea mo lou olaga.

[Faaopoopoga i lalo]

PO O E TAUMĀNATU EA I NISI TAIMI?

▪ Po o lē fea tapuaʻiga e talia e le Atua?—Ioane 4:24.

▪ O le ā le mea e ao ona e fai ina ia maua ai aogā o le poto mai le Atua?—Faataoto 2:1-4.

▪ Ua faapefea ona avea le Tusi Paia ma puna o taʻiala aogā?—Eperu 5:14.