Le Auala e Manaia ai Lau ‘Ata‘ata
Le Auala e Manaia ai Lau ʻAtaʻata
TUSIA E LE TUSITALA O LE ALA MAI! I KANATA
PE A e vaai i se faata, o lē fea vaega o lou tino o loo e siakiina? O lou lauulu, po o se isi vaega? Ae ā lau ʻataʻata? O e mātauina ea e faalagolago le manaia o lau ʻataʻata i ou oloa, po o ou nifo? Afai la e te manaʻo ia manaia lau ʻataʻata, ia vaai faalelei ou nifo. Na faia ou nifo ina ia tumau le aogā i lou olaga atoa. O le mea lea, ia vaai faalelei. Auā e lē gata ina aogā e faamalū ai au taumafa ma e lelei ai lau tautala, ae ua aulelei ai foʻi ma ou foliga, ma atili manaia ai lava lau ʻataʻata. Ioe, e ese le tāua o ou nifo!
Mea e Fai e Puipuia ai Ou Nifo
O le mālōlōina lelei o ou nifo, e amata mai i au taumafa. O taumafa tatau e maua mai ai le calcium, ma le vaitamini A, C, ma le D, e aogā tele lea i le tuputupu aʻe o nifo, mai i le taimi a o e iai i le manava o lou tinā seʻia oo ina atoa lelei le tutupu o ou nifo. * O le taumafa i taumafa tatau, e aogā tele i le sologa lelei o ou nifo, a ia faaeteete lava i mea suamalie! E oo ai ina pala ou nifo. E ui ua tele lapataʻiga e faatatau i le aafia o nifo i mea suamalie, ae e tusa ma le 100 i le 130 pauna [50-60 kilo] le tele o le suka ua iai i mea e taumafaina a le tele o tagata i Amerika i Mātū, i tausaga taʻitasi! Aiseā ua leaga ai le suka i nifo?
E lua ituaiga siama e māfua ai le pala o nifo, o le “mutans streptococci,” ma le “lactobacilli,” lea e iai i le plaque, o se ʻafuʻafu paʻepaʻe o siama ma toēga o meaʻai o loo piipii i nifo. O siama o loo i le plaque, e faaliliuina le suka mai taumafa e avea ma aseti (acids), ia e ʻatiina nifo ma pala ai. E iai suka e faigofie ona faaliu aseti, pe e pipiigofie i nifo, ma tele ai le taimi e ʻati ai nifo e le plaque. * Afai ae lē faamamāeseina le plaque, o le a oo ina malō i le va o nifo ma tainifo.
E tāua tele le taumafai ia faaitiitia le plaque, aemaise lava le siama mutans streptococci ina ia aua neʻi oo le pala i nifo. Afai la e te manaʻo e manaia lau ʻataʻata, toʻaga e fufulu ou nifo i aso uma. O se faamatalaga mai se iunivesite i Amerika e faapitoa i nifo (Columbia University School of Dental and Oral Surgery) e faapea: “O le mea sili ona tāua e fai auā le sologa lelei o ou nifo ma ou tainifo, o lou toʻaga lea e faamamā lelei.” O loo faaalia i ata i le itulau lenei ma le isi lea o loo sosoo ai le auala lelei e fai ai faapea. Atonu e taʻu atu e le fomaʻi nifo nisi mea ma auala e aogā i le faamamāina lelei o ou nifo, ma atili manaia ai lau ʻataʻata.
Afai ae osofaʻi soo ou nifo e siama e māfua ai le pala, o le a faasolo ina vaivai le lei, po o le vaega malō lea e ufi ai le nifo. Ae o se mea e lelei ona o loo mafai ona toe faaleleia lea vaega i aso taʻitasi. E faapefea? O minerale e taʻu o fluorides, ua iloa e aogā tele i le puipuia o nifo, e toe maua ai e nifo minerale o loo manaʻomia. O lea, e ui e mafai ona sosolo le pala i nifo, ae e mafai foʻi ona toe faaleleia pe afai ae faaaogā fluorides i nifo. Ioe, e mafai e nifo ona toe faaleleia i latou lava!
Pe a Alu e Vaai le Fomaʻi Nifo
Na fesiligia ni tagata po o ā mea e atugalu i ai, ma na faaalia e sili ona popole tagata i le tautala i luma o isi, ae lona lua ai le alu i le fomaʻi nifo. Ae faamata e ao ona e popole i lea itu? I atunuu tamaoaiga, ua iai masini ma vai faagase eseese e aogā auā le faaitiitia o le tigā o nifo a o faatino galuega a fomaʻi nifo. Ae o le a faaitiitia lou popole, pe a e malamalama i togafitiga.
Atonu o le a e oo atu i le falefaʻinifo e faamamā ou nifo e se tasi ua tomai faapitoa i lea galuega. O le a faamamā ese le plaque lea ua malō i ou nifo i vaega e faigatā ona oo i ai lau pulumu. Ona sosoo lea ma le polesi o ou nifo ia faigatā ona toe tupu le plaque, ma faamamā ni mea o i ou nifo e lē manaia ai lau ʻataʻata.
Ua faaaogāina ni faiga eseese e nini ai nifo o tamaiti i le fluoride ona e aogā tele auā le faaitiitia o le pala o nifo. O le tele lava o atunuu ua iai le fluoride i le vai taumafa, ma ua iai foʻi i le tele o mea fulunifo, e puipui ai nifo mai le pala.
Le Vaega a le Fomaʻi Nifo
Ua tele lava ina aʻoaʻoina fomaʻi nifo ia faia auala e puipui ai nifo, ma faaitiitia ai le leaga e māfua mai le pala. A vave ona togafiti le faalētonu o nifo a o laʻitiiti, o le tele o taimi o le a toe faaleleia le pala. O le mea lea, o le a lē avea lou oo atu i le fomaʻi nifo ma tulaga e te atugalu ai, pe afai e vave ona e alu e siaki ma e lē faigatā ai foʻi ona togafitia.
Ae o le a oo le pala i ou nifo pe a lē faamamāesea le plaque ma ʻatia ai nifo. Afai ae lē faaleleia le pala, o le a iai le pu i le nifo, ma ua tatau loa ona fai i ai se togafiti. E mafai ona toe faaleleia le nifo pe a e alu e fai a o leʻi oo le pala i le aano o le nifo, i le vaega o loo iai neula.
E faaaogā e le fomaʻi se auvili eletise e faamamā ai le pu ina ia mafai ona tuu i ai le faatumu. Ona fai lea o le faatumu o le nifo. O faatumu e faaaogā ai le amalgam, e vave lava ona malō, ae o ituaiga e faia i resin eseese, e faaaogā se molī lanumoana e faamalō ai. Afai e lē togafitia le pu ma ua oo le pala i le aano o le nifo, o le a faia se togafitiga ia sao ai le nifo, pe seʻi ese foʻi. A togafiti le aa o le nifo, e mafai ona sefe le nifo ia lē seʻiesea, ona e faatumu ma ufi le vaega i totonu o le nifo. E iai le togafitiga e ufi ai nifo ua leaga tele (crowns), ae e faaaogā nifo faapipii eseese (bridges), e sui ai nifo ua lē toe iai. *
E Aogā Au Taumafaiga
Atonu o loo iai pea iā te oe le popole e tusa o lou oo atu i se fomaʻi nifo. Afai o lenā le tulaga, talanoa i le fomaʻi e tusa o lou popolega. A o leʻi amata le togafitiga, talanoa pe faapefea ona e faailoa atu ua e lagona le tigā, (e pei o le tuu i luga lou lima). Fai i ai e faamatala atu le faiga o le togafitiga. E mafai foʻi ona e fesoasoani i le vaaia lelei o nifo o lau fanau e ala i le faamatala i ai o aogā o le fomaʻi nifo, ae aua le avea le fomaʻi nifo ma mea e faafefe ai le tamaitiiti i taimi e faalogogatā ai.
O se polofesa i le Matagaluega e Vaaia Nifo i le Iunivesite o Montreal, o Dr. Daniel Kandelman, ua ia fai mai: “O le sini aogā lea ua mafai nei ona faatino auā le sologa lelei o nifo: o le puipuia lea o ou nifo na e fanau mai ma oe, ma aulelei ai ma manaia lau ʻataʻata i lou olaga atoa.” Ioe, e matuā aogā lava lau taumafaiga!
[Faaopoopoga i lalo]
^ pala. 5 E amata feosofi aʻe nifo mai tainifo, ma e taʻu mai i nifo o le tagata le lelei, po o le faalētonu, o le taumafa a lona tinā a o tauaveina o ia, faapea ma le taimi a o pepe. O le 17 agaʻi i le pe tusa o le 23 tausaga o le tagata e muta ai le tutupu o ona nifo.
^ pala. 6 Ua iloa e fomaʻi nifo, o se suka e taʻu o le xylitol, e aogā lea e faaitiitia ai le pala o nifo mai siama o le plaque, ma e iai pululole e aogā auā o loo iai le xylitol.
^ pala. 16 Tagaʻi i le mataupu “Do You Need Dentures?” (O manaʻomia ona fai ni ou nifo faapipii?) o loo i le Awake! o Fepuari 22, 1993, itulau 18-20.
[Ata i le itulau 29]
Fufuluina o Ou Nifo!
E tele auala e fufulu ai nifo, ae o se lapataʻiga, ia faalaʻitiiti le kulimi fulu nifo e faaaogā. E fai si malosi o le kulimi fulu nifo ma “e sili atu ona malosi na i lo nifo.”
1 Uʻu faasipa le pulumu agaʻi i tainifo. Fufulu lemū faasolo mai tainifo agaʻi i tumutumu. Vaai ia fufulu mamā totonu ma fafo o nifo.
2 Ia fufulu mamā luga o nifo.
A fufulu totonu o nifo i luma, uʻu faasaʻo le pulumu i luga ma lalo. Amata fufulu mai tainifo agaʻi i le tumutumu o nifo.
4 Pulumu lou laulaufaiva ma le vaega i luga o lou fofoga, faaaogā le pulumu e salo aʻi.
[Ē Ana le Ata]
Sitepu 1-4: mai le www.OralB.com
[Ata i le itulau 30]
Faaaogāina o le Filo Fulu Nifo
1 Ua fautua mai e fomaʻi nifo le faaaogā o se filo fulu nifo e faamamā ai le va o nifo pe a māeʻa ʻaiga i aso taʻitasi.
2 Tago e uʻu pito o se fasi filo, ona faaaogā lea o le vaega o le filo o loo i le va o ou lima e faamamā ai va o nifo.
3 Faamalō le fasi filo. Toso lemū i le va o nifo.
4 Toso agaʻi i le nifo ma faamamā autafa o nifo. Toso lemū agaʻi i tainifo, ae aua le faaaogāina i aano o tainifo.
[Ē Ana le Ata]
Source: The Columbia University School of Dental and Oral Surgery’s Guide to Family Dental Care
Sitepu 1-3: www.OralB.com