Lega—E Aogā ae Toe Leaga Foʻi!

TUSIA E LE TUSITALA O LE ALA MAI! I SUETENA

E iai lega e aogā i lo tatou ola; a o isi lega e oti ai. O isi lega e aogā e manaia ai le tofo o sisi ma uaina, a o isi, e oo ai le ʻona i meaʻai. E iai lega e tutupu i ogālaau, a o isi e tutupu i fale tāʻele ma tusi. O le mea moni, ua iai lega i so o se mea, ma atonu foʻi o lenā o loo e mānavaina i totonu ni sela ninii o lega a o e faitauina lenei fuaiupu.

AFAI e te lē talitonu o loo iai lega i so o se mea, tago la e tuu se fasi falaoa mo ni nai aso, pe tuu foʻi i le pusaʻaisa. E lē umi ae e vaaia ni mea e pei e taufulufulua ua tutupu ai. Ia o le lega lenā ua tupu!

O le ā Lea Mea e Taʻu o le Lega?

E silia i le 100,000 ituaiga o lega eseese o loo iai, ma e ituaiga faatasi le lega ma mea e iai le lega o i laau, le taetaepalaloa i lavalava, ma pulou aitu. Pe ā ma le 100 ituaiga o lega ua manatu i ai e faapogaia ai maʻi i tagata ma manu. O le tele o isi lega e tāua tele i meaola, e pala ai mea ua mamate ma mafai ai ona toe faaaogā vaega e aogā mo le tutupu o laau. E iai lega e aogā i laau, ua mafai ai e laau ona maua aogā mai le palapala. Ae o nisi lega e ola faalagolago i meaola ma laau.

E amata tupu se lega mai sela e pei o ni fatu ninii mai isi lega, ia o loo feaveaʻi i le ʻea. Pe afai e pipii nei sela i se mea e mafai ona ola ai ma ua fetaui le vevela ma le vai e maua ai, o le a tutupu ni sela uumi. O le a vave ona faateleina le aofaʻi o sela e tutupu ma oo ai ina avea e pei o se mea taufulufulua, ma ua tino mai ai loa le lega. O nisi taimi, ua pei foliga o le lega o sina palapala, lea e pipii i fale taʻele.

E vave tele le tupu a le lega. O se faataʻitaʻiga, o le lega lea e tupu i le falaoa e taʻu o le Rhizopus stolonifer. O togitogi uli ninii o loo vaaia i le falaoa, o vaega na o loo tutupu mai ai sela ninii o le lega. E silia ma le 50,000 sela o loo iai i se togitogi e tasi, ma e faitau selau miliona ni sela e mafai ona tutupu mai ai pe a mavae ni nai aso! Afai e maua e le lega mea e manaʻomia e ola ai, e faigofie lava ona tutupu i seevae, po o puipui o fale, ma ogālaau i le vaomatua.

E faapefea ona “ʻai” le lega? E lē pei le lega o tagata ma manu i le taimi e aai ai. O tagata ma manu e ʻai muamua a latou meaʻai ona faatoʻā faamalū lea e le tino, ae o lega, e faamalū muamua ana meaʻai ona faatoʻā ʻai ai lea. Afai e lē mafai e le lega ona ʻai ana meaʻai ona e fai si lapopoʻa, ona faaaogā lea o sua mai o latou tino e faamalū muamua ai, ona faigofie ai lea ona mitiia. E lē gata i lea, e mau ai lava le lega i lana mea ‘e ai ona e lē mafai ona fealualuaʻi e saʻili ana mea e ʻai.

E iai lega e maua ai le ʻona, lea e mafai ona onanā ai tagata faapea ma manu. E ono aafia ai se tasi  pe a mānavaina, pe foloina, po o le paʻi foʻi i ai. Ae e lē o lega uma e leaga, e iai lega e aogā tele.

O ni Vala Aogā o le Lega

I le 1928 na mātauina ai e se alii saienitisi, o Alexander Fleming, le aogā o se lega e lanumeamata e mamate ai siama. Na faaigoa mulimuli ane le lega lea o le Penicillium notatum, ma na aogā tele e tapē ai siama, ae e leai sona afaina i tagata ma manu. O le lega lenei na maua mai ai le vailaau o le penisini, lea na taʻua e faapea ua “avea o se togafitiga ua sili ona aogā i soifua o tagata.” I le 1945, na avatu ai iā Fleming ma alii saienitisi na latou galulue faatasi, o Howard Florey ma Ernst Chain, le faailoga maualuga o le Nobel Prize, ona o la latou galuega. Talu mai lenā taimi, ua tele nisi vailaau aogā ua maua mai le lega, e iai le vailaau e aogā pe a poloka se alātoto, faapea le vai mo maʻi ulu tigā, ma le vai mo le gasegase e taʻu o le Parkinsonʻs disease.

E iai foʻi aogā o lega i taumafa. O se faataʻitaʻiga, o sisi e iai le Brie, Camembert, Danish blue, Gorgonzola, Roquefort, ma le Stilton, ua eseese ma mananaia o latou tofo ona o lega eseese mai le ituaiga o le Penicillium. E faapena foʻi ona aogā le lega i le faia o salami, soi sosi, ma le pia.

E iai foʻi le aogā o lega i le faia o uaina. E iai ituaiga o vine, afai e fetaui le taimi e selesele ai, ma ua tutupu lega i fuifui vine (e pei o se pauta paʻepaʻe), e mafai ona faaaogā ina ia maua mai ai se uaina e ese le manaia. E aogā tele le lega e taʻu o le Botrytis cinere, e tupu tele ai le suka i vine, ma atili ai ona manaia i le tofo. Pe a māeʻa ona utufagu ma tuu e faatali le taimi e aogā ai i le inu, o le a faaleleia atili le tofo o le uaina e ala i le lega e taʻu o le Cladosporium cellare. E tusa ai ma se alaga upu a tagata tovine i Hagakeri: ‘A lelei le lega ua lelei le uaina.’

Aafiaga Leaga o Lega

Ua leva ona lauiloa āuga leaga e maua mai isi ituaiga o lega. I le senituri lona ono T.L.M., na faaaogā ai e tagata Asuria le lega e taʻu o le Claviceps purpurea e faaoona ai vaieli o o latou fili, o se taua na faaaogā ai vailaau oona i na ona pō. O nisi taimi, e maua ai le lega lea i fatu rye, (e pei o se saito), ma i tausaga mai le 500 T.A. seʻia oo mai i le 1500 T.A., e toʻatele tagata na aafia i le maʻi maliu, le lagona e pei e mū, o le papala o vaega o le tino, ma fasa, ona o le lega lea. Na taʻua lea faamaʻi o le afi a Sagato Atonio, ona o le tele o tagata na maua ai na faimalaga atu i le nofoaga paia o Sagato Atonio i Falani ona sa latou faamoemoe i se vavega e foʻia ai o latou maʻi.

O le ʻona e taʻu o le aflatoxin, e maua mai lega, ma o le ʻona lea e aupito sili ona mafai ona aafia ai se tasi i le kanesa. I se tasi nuu i Asia, ua avea lea ʻona ma māfuaaga o le maliliu o le tusa ma le 20,000 o tagata i tausaga  taʻitasi. Ua faaaogāina foʻi le ʻona lea e avea ma vailaau e faaaogā i auupega o taua i nei aso.

Ae i le olaga lava ia i aso fai soo, ua avea lega ma faalavelave i le olaga ae e lē o se mea e lamatia ai le soifua lelei. Ua taʻua i le UC Berkeley Wellness Letter e faapea: “O le tele lava o lega, e leai sona afāina, e tusa lava po o tau ai lau sosogi.” O tagata e ono afāina i lega, o tagata e iai se faalētonu o le māmā e pei o le maʻi sela, tagata e afāina i taumafa po o vai ma isi mea i le ʻea, po o mea tau vailaau, pe vaivai tino e tetee i faamaʻi, faapea foʻi ma tagata o loo galulue i faatoʻaga i mea o loo tele ai lega. E faigofie foʻi ona afāina ai tamaiti laiti faapea ma tagata ua afu le soifua.

Ua faamatala mai e le Matagaluega o Auaunaga Tau Soifua Mālōlōina a Kalifonia i Amerika e faapea o faafitauli nei e ono tutupu mai ona o lega: ‘O faafitauli i le mānava, e iai le sela po o le gaʻe, ma e tau lē mafai ona mānava, o le poloka o le isu ma le isu mamafa, o mata e tigā, suāvaia, ma mūmū, e taletale ae leai se fatu tale, e tigā le isu ma le faaʻī, pātapāta ma mūmū le paʻu.’

Lega i Fale

I nisi atunuu, o se mea masani le tapuni o aʻoga pe ō ese tagata mai o latou fale ma ofisa a o faamamā ese le lega o loo sosolo ai. E faapena se mea na tupu i le amataga o le 2002, ina ua tapunia se Fale Mataaga fou i Stockholm i Suetena ona ua aafia i le lega. E tusa ma le lima miliona tālā Amerika na faia ai le galuega! O le ā le māfuaaga ua tele ai ina tupu lea faafitauli i nei aso?

E lua ni vala ua ala ai ona faapea: o mea o loo faaaogā e fau ai fale, ma le auala o loo fau ai fale. I nei ona po, o mea fau fale o loo faaaogā, e faigofie ona ola ai le lega. O se faataʻitaʻiga, o pepa malō ia o loo faaaogā e fai ai puipui ma fāʻalo, ua na o ni pepa o loo faapipii faatasi. E lē o mātūtū lelei totonu o pepa. Afai ae umi se taimi o susū, e faigofie lava ona tutupu fatu lega ma ola ai i le pepa.

E lē gata i lea, ua sui foʻi le fausaga o fale. I taimi a o lumanaʻi vaitausaga o le 1970, o fale na fausia i Amerika ma isi atunuu, sa mafai lava ona fetaamiloaʻi ai le ʻea, e lē pei o fausaga ia ua iai nei. O suiga ia ua iai, na fai ina ia faaitiitia ai le sao ese atu o le ea mai le fale ma faaitiitia ai le maumau o le kesi ma le eletise). O lea la, afai e iai se vaega e susū i totonu o fale, e lē faigofie ona toe faamago, ma ua faigofie foʻi i lega ona tutupu ai. O le ā la se vaifofō o lea faafitauli?

O le puipuiga sili lava mai le lega, o le taumafai lea ia mātūtū ma mamā totonu o fale, ma ia itiiti se ʻea susū i totonu. Afai ae susū se vaega o le fale, ia vave ona faamātū le vaega lea ma faaleleia le māfuaaga o le faafitauli ia aua neʻi toe oo i ai se susū. O se faataʻitaʻiga, ia faamamā ma ia lelei alāvai i taualuga o fale. Vaai ia maualuga le vaega o le fanua lea o loo iai le fale ia aua neʻi iai se vai e toʻa i le faavae o le fale. Afai e faaaogā le ʻea mālūlū i le fale, ia faamamā talivai ma aua neʻi poloka paipa ma faagaʻau.

Na taʻua e se tagata e tomai i ia tulaga, “O le vala tāua e taofi ai le tutupu o lega, o le faaitiitia lea o le susū e iai i vaega o le fale.” E faigofie lava ni nai mea e fai ae o le a puipuia ai oe ma lou aiga mai ni aafiaga leaga o lega. E ono faatusa le lega i le afi. E mafai ona tupu mai ai se faalavelave, ae e ese foʻi le tele o ona aogā. E faalagolago lava i le auala o loo tatou faaaogā ma puipui mai ai. O le mea moni e tele ni mea e tatou te lē o iloa e tusa o lega. Ae a tatou malamalama i mea ofoofogia na faia e le Atua, e aogā tele iā i tatou.

[Pusa/Ata i le itulau 22]

PO O TAʻUA LE LEGA I LE TUSI PAIA?

O loo taʻua i le Tusi Paia le iai o se “ila lepela i se fale.” (Levitiko 14:34-48) O le isi taʻu o lea ila o le “lepela aati,” ma o lea ila o se ituaiga o lega, ae e lē o mautinoa tonu lea tulaga. E ui e lē o mautinoa, ae na faatonuina e le Tulafono a le Atua lē e ona le fale ia aveese mai le fale ni maa ua iai le ila, ma valusia atoa totonu o le fale, ma ia lafo uma ia mea i tua o le aai ‘i se mea e leaga.’ Afai e toe tupu le ila, ua leaga lea fale, ma e ao ona lepeti ma lafoina uma i tua o le aai. O nei faatonuga auʻiliʻili mai iā Ieova, ua faaalia ai lona alofa tele i ona tagata ina ia latou sologa lelei i la le tino.

[Ata i le itulau 21]

O vailaau mai lega ua mafai ai ona faasaoina le tele o ola

[Ata i le itulau 23]

E mafai ona oo le susū i lalo o pepa puipui ma faavaa o fale, ma e faigofie ona tutupu ai lega