O Fea o Agaʻi i ai le Lalolagi?

O LE a faapeʻī le tulaga o le a iai le lalolagi i le 10, 20, po o le 30 tausaga o i luma? I lenei vaitaimi o faiga faatupu faalavelave, ua avea le mafaufau i le lumanaʻi ma tulaga e matuā lagona ai le popole. Ua faateleina ma saosaoa le poto i faiga faaonapōnei. O le tulaga i le lalolagi i le taimi nei, ua faateleina le fetufaaʻi ma le felagolagomaʻi o atunuu. Pe faamata o le a autasi taʻitaʻi ina ia maua se lumanaʻi fiafia o le lalolagi? O nisi ua tali mai i le ioe, ona ua faamoemoe ia oo atu i le 2015, o le a mafai e taʻitaʻi ona faamuta le mativa ma le lē lava o taumafa, ia taofia le sasao o le AIDS, ma ia faaitiitia ia ʻafa le tele o tagata e lē o maua ni vai taumafa ma nofoaga mamā.—Tagaʻi i le pusa “Ese Faamoemoega ma le Mea Moni.”

Ae ua masani lava ona sesē le vaaiga ma manatu o tagata e tusa o le lumanaʻi. O se faaaʻoaʻoga, pe ā ma le fāsefulu tausaga ua tuanaʻi, na folafola ai e se tasi tagata poto e faapea e oo ane i le 1984, o le a mafai e faifaatoʻaga ona faaaogā palau e faamalū ai le eleele i le ilititai o le sami, ae fai mai le isi e oo ane i le 1995, o le a faatonutonuina vaega uma o taavale e komepiuta ma taofia ai le fetoʻai o taavale, a o le isi na folafola mai e oo ane i le 2000, e tusa ma le 50,000 tagata o le a ola ma galulue i le vateatea. O le mea moni, atonu o le manatu o loo iai nei iā i latou na faia ia folafolaga e faapea, na sili pe a na lē faia ia folafolaga. Na tusi se alii tusitala e faapea: “Ua avea le mavae atu o taimi ma tulaga ua foliga mai ai, e ese le valelea o tagata atamamai o le lalolagi.”

Se “Faafanua” e Fai ma Taʻiala

O loo faaauau pea le tau matemate o tagata e tusa ma le lumanaʻi, ae i nisi taimi ua na o ni moomooga ae e lē moni. O fea e maua i ai se manatu mautū e tusa o le lumanaʻi?

Seʻi manatu mai foʻi i le faaaʻoaʻoga lenei. Faapea o lea o loo e malaga i se pasi i se atunuu ese. Ua e lagona le popole ona e te lē masani i le nuu. Ua oo ifo le manatu: ‘O fea ea le mea lea ua ou i ai? O saʻo le mea lea e agaʻi i ai le pasi? O le ā le mamao ona taunuu lea?’ Ae a iai sau faafanua lelei ma e mātauina faailoilo i le auala, o le a e iloa tonu le tali o au fesili.

Ua faapena le tulaga i le taimi nei i le tele o tagata o loo popole i le lumanaʻi. O loo latou fia iloa, ‘O fea lea e tatou te agaʻi i ai? Pe e moni o loo tatou agaʻi atu i se taimi e filemu ai le lalolagi aoao? Pe afai o lea, o afea e oo mai ai?’ Ua pei le Tusi Paia o se faafanua  e mafai ona maua mai ai tali. E ala i le suʻesuʻe lelei i ai, ma tagaʻi lelei i mea o loo tutupu i le lalolagi, o le a tele se malamalamaga e maua e tusa ai o le tulaga i le taimi nei faapea lo tatou lumanaʻi. Ae e ao ona tatou iloilo muamua pe na faapefea ona oo mai faafitauli.

O se Amataga Faanoanoa

Ua taʻu mai i le Tusi Paia na faia e le Atua le uluaʻi ulugalii, sa lelei atoatoa ma na ia tuu i laʻua i se parataiso. Na faia Atamu ma Eva ia ola e faavavau, ae lē mo na o le 70 pe 80 tausaga. Na fetalai atu le Atua iā i laʻua: “Ia fanafanau ia, ma ia uluola, ma ia tumu ai le lalolagi, ia faatoʻilalo i ai.” O le fuafuaga a le Atua mo Atamu ma Eva ma a la fanau, ia latou faalautele le Parataiso ia soo ai vaega uma o le lalolagi.—Kenese 1:28; 2:8, 15, 22.

Na fouvale Atamu ma Eva i le Atua, ma o le iʻuga, na la melea ai le Parataiso na tuuina atu e la te nonofo ai. E lē gata i lea, o le taimi foʻi lea na faasolo ai ina fāi ifo o la tino faapea o la mafaufau. I aso taʻitasi, ua faasolosolo pea ona la lalata atu i le oti. Aiseā? Talu ai ona ua la fouvale, ma ua la agasala ai i Lē na faia i laʻua, ma “o le oti, o le totogi lea o le agasala.”—Roma 6:23.

A o leʻi oo ina la feoti, na la fanaua se fanau, o tama ma teine. Pe faamata e mafai e le la fanau ona faataunuu le fuafuaga a le Atua i le amataga? E leai, auā ua faasolo mai iā i latou uma le lē lelei atoatoa o o latou mātua, mai lea tupulaga i lea tupulaga, ua oo i fanau uma a Atamu le agasala ma le oti. Ua faapena foʻi i tatou. Ua fai mai le Tusi Paia: “Faapei ona oo mai o le agasala i le lalolagi i le tagata e toʻatasi,  o le oti foʻi ona o le agasala, ona oo mai ai lea o le oti i tagata uma lava, auā ua agasala uma lava.”—Roma 3:23; 5:12.

Iloa le Mea o Loo Tatou Iai

O le fouvale a Atamu ma Eva, o le amataga lea o se olaga umi ma faigatā mo tagata, ma ua faasolo mai ai i o tatou aso. Ua faapea mai se tasi tusitala o le Tusi Paia, o loo “faatoʻilaloina mea uma na faia i le iʻu vale.” (Roma 8:20) Ua moni lava le mau e tusa ai o le tulaga o tagata. Auā foʻi, ua tupuga mai iā Atamu ni tagata e atamamai i le faasaienisi, i togafitiga ma vai faafomaʻi, faapea le poto faaonapōnei. Ae ua leai ma se tasi ua mafai ona aumaia le filemu i le lalolagi aoao, po o le soifua lelei lea na fuafuaina e le Atua mo le tagata.

Ua oo iā i tatou uma faigatā ona o le fouvale o Atamu ma Eva. O se faataʻitaʻiga, pe e iai ea se tasi e na te leʻi lagonaina le tigā o le leai o se faamasinotonu, le fefe ona o le solitulafono, le faigatā o se maʻi faaumiumi, po o le lotomomomo ona o le maliu o sē e pele? Po o le ā lava se sologa lelei o iai i o tatou olaga, e vave lava ona muta i faalavelave e oo mai. E ui i taimi tatou te fiafia ai, ae ua moni ai le faamatalaga a Iopu e tusa o o tatou olaga: “O le tagata . . . ua saasaa ona aso, mona ua tumu i le atuatuvale.”—Iopu 14:1.

Pe a fua atu i le amataga ma le tulaga faanoanoa  lea ua tatou iai nei, e ono foliga faalētonu la le lumanaʻi. Peitaʻi, ua folafola mai i le Tusi Paia, o le a lē tuu ai faapea e le Atua. O le a taunuu lava lana fuafuaga na fuafuaina mo tagata i le amataga. (Isaia 55:10, 11) E faapefea ona tatou mautinoa ua toeitiiti ona taunuu lea?

E tusa ai ma le Tusi Paia, ua tatou iai nei i se vaitaimi faigatā e taʻu o “aso e gata ai.” (2 Timoteo 3:1) E lē o le uiga faapea o le a soloiesea uma le paneta ma ola uma o loo iai. Ae o loo faasino i le “gataaga” o mea o loo fai e lenei lalolagi, o lona uiga, o le mutaaga foʻi lea o mea o loo māfua ai o tatou faanoanoaga. (Mataio 24:3) O loo faamatalaina i le Tusi Paia mea e tutupu faapea ma uiga o tagata o le a faateleina i aso o le iʻuga. I le pusa i le itulau e 8, mātau mai nisi o ia mea, ma faatusatusa i le tulaga o loo iai le lalolagi. Ua aogā le Tusi Paia auā e pei o se faafanua e tatou te iloa ai le mea lea ua tatou iai, ua lalata i le mutaaga o lenei faiga o mea. Ae o le ā le mea e sosoo mai ai?

Le Mea e Oo Mai i le Lumanaʻi

I le taimi na fouvale ai Atamu ma Eva, na faailoa mai ai e le Atua lana fuafuaga ia faavaeina se Malo, “e lē faaumatia e faavavau.” (Tanielu 2:44) E ala i le tatalo a le Alii, e toʻatele tagata ua aʻoaʻoina ia tatalo ia oo mai lea Malo, auā o le a ala mai ai le mau faamanuiaga i tagata.—Mataio 6:9, 10.

O le Malo o le Atua e lē o se mealilo e i totonu o le loto o le tagata. Ae o se pulega moni o loo i le lagi o le a iloga ona pulea mai le lalolagi. Seʻi manatu foʻi i mea ua folafola e le Atua o le a ia faia mo tagata e ala i lona Malo. Ua taʻua i le Tusi Paia o le a muamua ona ‘faafanoina [e le Atua] i latou o ē fano ai le lalolagi.’ (Faaaliga 11:18) O le ā o le a ia faia mo i latou e faaalia lo latou usitai iā te ia? Ua faamatalaina i lana Afioga e faapea o le a “sōloiesea foʻi e le Atua loimata uma i o latou mata; e leai foʻi se toe oti, po o se faanoanoa, po o se auē, e leai foʻi se toe puapuaga.” (Faaaliga 21:4) Pe e iai se tagata e mafai ona faia na mea? Ua na o le Atua e mafai ona ia faaoo i tatou i le tulaga lea na ia fuafuaina i le amataga.

E faapefea ona e maua aogā o faamanuiaga ia o le a aumaia e le Malo o le Atua? Ua faapea mai le Ioane 17:3: “O le ola faavavau foʻi lenei, ia latou iloa oe le Atua moni e toʻatasi, atoa ma lē ua e auina mai, o Iesu Keriso lea.” O loo faia e Molimau a Ieova se galuega tauaʻoaʻoga i le lalolagi aoao e fesoasoani ai i tagata ia faia faapea. E tusa ma le 230 atunuu o loo faia ai la latou auaunaga, ma ua lomia a latou lomiga i le silia ma le 400 gagana. Afai e te fia iloa atili, faafesootaʻi Molimau a Ieova i lou vaipanoa pe tusi i le tuatusi o lou vaipanoa i le lisi o loo i le itulau e 5.

[Faamatalaga faaopoopo i le itulau 6]

“Faauta mai ia, outou o ē fai ane, ‘O le asō po o taeao tatou te ō atu ai i lea aai, po o le tasi aai, ma nonofo ai i le tausaga e tasi, ma faatau, ma maua ai oloa;’ a e lē iloa e outou se mea e tupu a taeao.”—Iakopo 4:13, 14

[Faamatalaga faaopoopo i le itulau 6]

O loo faamatalaina i le Tusi Paia lo tatou amataga, mai lava i le uluaʻi tane ma le fafine. Ua faailoa mai ai le mea na tatou tupuga mai ai. Ua faailoa mai ai foʻi le mea o loo tatou agaʻi i ai. Ae ina ia malamalama atili, e ao ona suʻesuʻe lelei i ai, e pei ona tatou tilotilo lelei i se faafanua

[Faamatalaga faaopoopo i le itulau 7]

O le faaupuga “agasala” e faasino i se gaoioiga sesē po o se tulaga o le faananau atu i le leaga. Ua tatou fananau mai i se tulaga agasala, lea e aafia ai mea e tatou te fai. “E leai lava se tagata amiotonu i le lalolagi, o lē na te faia amio lelei, ma le lē agasala.”—Failauga 7:20

[Faamatalaga faaopoopo i le itulau 8]

Pe a e tago e kopi i se masini e fai ai kopi se pepa o loo iai se maka uliuli, e aliali mai le maka lea i kopi uma e fai. E faapena foʻi i tatou na fananau mai iā Atamu, ia po o ona kopi, ua iā i tatou uma le maka, po o le ila, o le agasala. O le ila lava lea na iai iā Atamu, lē na tatou tupuga mai ai

[Faamatalaga faaopoopo i le itulau 8]

Ua faapea mai le Tusi Paia: “E lē o i le tagata e savali ona faatonuina le mea e ui ai o ia.” (Ieremia 10:23) Ua tatou iloa mai le mau lenei le māfuaaga ua lē taulau ai taumafaiga a tagata mo se lalolagi filemu. E leʻi faia le tagata e “faatonuina le mea e ui ai,” e aunoa ma le Atua

[Faamatalaga faaopoopo i le itulau 9]

Na faapea atu le faisalamo i le Atua: “O lau afioga o le sulu lea i oʻu vae, ma le malamalama i loʻu ala.” (Salamo 119:105) Ua pei le Tusi Paia o se sulu e fesoasoani ia tatou savavali ma le poto pe a fai filifiliga. I le avea o se ‘malamalama i o tatou ala,’ ua malama ai le ala o loo tatou savalia ina ia mafai ona tatou iloa atu po o le ā o i le lumanaʻi

[Pusa i le itulau 7]

ESE FAAMOEMOEGA MA LE MEA MONI

Iā Setema 2000, na autasi ai atunuu o Malo Aufaatasi e faatū ni sini ia oo atu i le 2015 ua faatinoina. O nisi o ia sini o loo taʻua i lalo:

▪ Ia faaitiitia i le ʻafa le aofaʻi o tagata o la latou tupe maua e itiiti ifo i le talā Amerika i le aso, faapea ma i latou o loo matelāina i le fia aai.

▪ Ia vaai ua iʻu aʻoga a tamaiti mai i le tulaga lua.

▪ Ia tau fai tutusa avanoa mo alii ma tamaʻitaʻi i tulaga uma tau aʻoaʻoga.

▪ Ia paʻū i le tasi vaetolu le aofaʻi o tamaiti e i lalo ifo o le lima tausaga e maliliu.

▪ Ia 75 pasene e faaitiitia ai le aofaʻi o tinā e maliliu.

▪ Ia taofia ma faaitiitia le salalau atu o le HIV/AIDS faapea ma isi faamaʻi ogaoga e iai le malalia.

▪ Ia faaitiitia, i le ʻafa le aofaʻi o tagata e lē o maua ni vai taumafa mamā.

Pe e mafai ona ausia ia sini? I le 2004, ina ua māeʻa se iloiloga a tagata o ē vaavaaia le soifua mālōlōina mai atunuu eseese, o la latou faaiʻuga e faapea, ua lē tutusa faamoemoega ma le tulaga moni o loo iai. Ua taʻua i upu tomua o le tusi e faatatau i le tulaga o le lalolagi (State of the World 2005) e faapea: “Ua avea le mativa ma tulaga ua faafaigatā ai ona agaʻi i luma le tele o vaipanoa. Ua tupu tele faamaʻi e iai le HIV/AIDS ma ua tulaʻi mai ai se tulaga e ono avea ma lamatiaga i le soifua mālōlōina o le tele o atunuu. I tausaga e lima ua tuanaʻi, e tusa ma le 20 miliona tamaiti ua maliliu i faamaʻi e ala mai i vai taumafa, ia sa ono mafai ona puipuia, ma e faitau selau miliona tagata o loo iai i se tulaga pagātia ma matitiva ona o le leai o ni vai taumafa ma nofoaga mamā.”

[Pusa/Ata i le itulau 8]

Nisi O Vala O “Aso E Gata Ai”

O taua e leʻi faapea ona iai muamua.—Mataio 24:7; Faaaliga 6:4.

O oge.—Mataio 24:7; Faaaliga 6:5, 6, 8.

Faamaʻi.—Luka 21:11; Faaaliga 6:8.

Faateteleina o le amioleaga.—Mataio 24:12.

Faafanoina o le lalolagi.—Faaaliga 11:18.

O mafuiʻe tetele.—Luka 21:11.

O aso faigatā.—2 Timoteo 3:1.

Manaʻo tele i tupe.—2 Timoteo 3:2.

Lē faalogo i mātua.—2 Timoteo 3:2.

Lē lotoaiga.—2 Timoteo 3:3.

Manaʻo i mea faafiafia ae leai se manaʻo i le Atua.—2 Timoteo 3:4.

Leai se pulea o manaʻo o le tino.—2 Timoteo 3:3.

ʻInoʻino i le amio lelei.—2 Timoteo 3:3.

Lē amanaʻia le tulaga lamatia o loo lalata mai.—Mataio 24:39.

Ua teena e i latou e tauemu faamaoniga o lea ua tatou iai i aso e gata ai.—2 Peteru 3:3, 4.

O loo talaʻia le Malo o le Atua i le lalolagi aoao.—Mataio 24:14.

[Ē Ana le Ata]

© G.M.B. Akash/Panos Pictures

© Paul Lowe/Panos Pictures

[Ata i le itulau 9]

Ua lauiloa Molimau a Ieova o ni tagata e talaʻia le tala lelei o le Malo o le Atua