O Sela Mūmū Ofoofogia o le Toto

TUSIA E LE TUSITALA O LE ALA MAI! I AFERIKA I SAUTE

O le sela e sili ona taatele i lou toto, o le sela mūmū, lea e ala ai ona lanu mūmū le toto. E faitau selau miliona sela o loo iai i se matāua o le toto. A faaaogā se fāʻata e faatetelē ai mea ninii e tilotilo ai i lea sela, e lapotopoto toe mafolafola, ae omo le ogatotonu. I sela taʻitasi, e faitau selau miliona vaega ninii e taʻu o hemoglobin o loo iai. O nei hemoglobin e lapotopoto mananaia ma e faia aʻe i le tusa ma le 10,000 haitorosene, kaponi, naitorosene, okesene, ma le sulfur, faapea ma vaega ninii e fa o le uʻamea (iron), ia e fai si mafamafa, ma ua aogā i le toto auā le fegasoloaʻi o le okesene. E ala i le hemoglobin ua mafai ai ona mānava ese atu le kaponitaiokesaita (po o le ʻea e manava ese atu e le tagata) ae toe sui i le okesene mai le ʻea lea e te manavaina i totonu.

O se isi vaega tāua o sela mūmū o lou toto, o le paʻu po o lona ʻafuʻafu. E ala i lenei ʻafuʻafu ofoofogia ua mafai ai ona tafe le toto i alātoto ninii ma faaolaola ai vaega uma o lou tino.

O sela mūmū o lou toto, e faia aʻe i totonugalemu o ponaivi, i le vaega e taʻu o anoivi. E silia ma le 100,000 taimi o le a faataamilo ai se sela mūmū fou o lou toto, i lou fatu ma lou tino atoa. E ese le sela mūmū mai isi sela, ona e leai sona vaega i le ogatotonu. Ua mafai ai ona tele se okesene e feaveaʻi e nei sela ma e māmā foʻi, ma faigofie ai i le fatu ona pamu le faitau miliona ma miliona o sela mūmū o le toto i lou tino. Talu ai e leai se vaega ogatotonu o le sela mūmū, e lē mafai la ona toe faafou ona vaega i totonu. O lea la, pe ā ma le 120 aso ona faasolo vaivai lea o sela mūmū o le toto. O le a foloina nei sela mūmū ua vaivai e sela lapopoʻa papaʻe e taʻu o phagocytes, ae luai mai vaega ninii o le uʻamea. Ona mau lea o uʻamea i polotini ninii e momoliina i anoivi po o mea lololo o ou ivi, ma toe faaaogāina e faia ai sela mūmū fou o lou toto. I sekone taʻitasi, e lua i le tolu miliona sela mūmū fou o lou toto e faia e anoivi.

Afai ae faafuaseʻi ona lē toe gaoioi lenei miliona ma miliona o sela mūmū o lou toto, e lē umi ae oo le oti iā te oe. Maʻeu lo tatou matuā faafetaia o Ieova ona o lona faia o lenei vala matagofie o lana foafoaga, lea ua mafai ai ona tatou ola ma ʻaeʻae ai i lenei olaga! E mautinoa lava ua e ioe i upu a le faisalamo o lē na faapea mai: “Ieova e, ua e suʻesuʻe mai iā te aʻu, ua e silafia lava aʻu. Ou te vivii atu iā te oe, auā na faia aʻu e ala ai ona mātaʻutia ma ofo tele ai; o mea na e faia, o mea mamana ia; ua ou matuā iloa e aʻu nei mea.”—Salamo 139:1, 14.

[Siata i le itulau 20]

(Tagaʻi i le lomiga mo le ata atoa)

Sela mūmū o le toto

ʻAfuʻafu

Hemoglobin (ata ua faatelē)

Okesene