Le Manatu o le Tusi Paia

Pe e Alofa Faapito le Atua i Nisi Atunuu i lo Isi?

E TOʻATELE ua manatu e sili i le Atua lo latou atunuu na i lo isi. Ae a fai i ai e aumai se faamaoniga, o le ā sa latou tala? O nisi e faamatala mai mea ua faatino i le talafaasolopito o le atunuu, e pei o manumalo i taua ma lelei tau tamaoaiga. Atonu foʻi e latou te faaali mai le taulau o a latou polokalame auā le fafagaina o ē matelāina, le puipuia o ē vaivai, ma le faaauilumaina o faiga tonu ma saʻo. Ae o nisi ua latou faamatala mai le matagofie ma le manaia o lo latou atunuu.

I so o se atunuu lava, e mitamita tagata i lo latou lava atunuu. Ae pe faamata o lagolagoina e le Tusi Paia le manatu faapea e alofa faapito le Atua i se atunuu?

O se Uiga Tāua o le Atua

E manino lava le tali, pe a tatou malamalama i se uiga tāua o le Atua Silisili ese, ma o lea uiga o loo iloga ona faamatala mai i le Tusi Paia. O le Atua, e lē faailoga tagata. Ua manino upu mai le Galuega 10:34 e faapea: “E lē faailogaina tagata e le Atua.” Ua fai mai foʻi le Tusi Paia, o Ieova le Atua e “na te lē faailogaina tagata” ma “e leai se amiolētonu iā Ieova lo tatou Atua, po o se faailogaina o tagata.” (Teuteronome 10:17; 2 Nofoaiga a Tupu 19:7) E ʻinoʻino le Atua i le faailoga tagata, ma ua tutusa lea iā te ia ma le leai o se amiotonu.

Ae atonu e oo ifo iā te oe le manatu: ‘Ae ā le taimi lea na faaalia ai e le Atua e sili Isaraelu i isi nuu uma? Pe e lē o se faailoga tagata lenā mea?’ E moni na filifili faapitoa e le Atua le nuu o Isaraelu i le taimi o le Tusi Paia, ma na iai ni fetauaʻiga na faia i lo latou va ma isi nuu lea na ia puipuia ai i latou. E lē gata i lea, ua faapea mai le Tusi Paia e faatatau i le Atua: “Na te faaalia ana afioga iā Iakopo; o ana tulafono ma faamasinoga iā Isaraelu. E leʻi faapea ona faia e ia i se tasi lava nuu.” (Salamo 147:19, 20) Po o lona uiga ea ua faailoga tagata le Atua ona o na feutagaʻiga ma Isaraelu? E leai. Seʻi manatu mai foʻi i māfuaaga nei e tolu.

Muamua lava, na filifilia e le Atua Isaraelu ina ia faamanuia ai nuu uma. Na ia osia se feagaiga ma Aperaamo, le augātamā o le nuu o Isaraelu, ina ua ia fetalai atu iā te ia: “O lau fanau foʻi e manuia ai atu nuu uma lava o le lalolagi.” (Kenese 22:17, 18) Ioe, i feutagaʻiga a le Atua ma Isaraelu, o lana fuafuaga, ia maua se “fanau” o le a ala mai ai ni faamanuiaga matagofie, e lē mo na o se nuu e tasi, ae mo “nuu uma lava o le lalolagi.”

Lona lua, e leʻi faatapulaa faamanuiaga a le Atua mo na o tagata Isaraelu. I lona lē faaalia o le faailoga tagata, na ia tatala le avanoa ina ia mafai ai e tagata mai isi atunuu ona auai ma ona tagata filifilia, e tapuaʻi atu iā te ia. (2 Nofoaiga a Tupu 6:32, 33) E toʻatele i latou na talia le valaau ma na faamanuiaina ai. Ua iloa e le toʻatele le fafine Moapi o Ruta, o ia o se tasi na oo i lenā tulaga.—Ruta 1:3, 16.

Lona tolu, o le faiā faapitoa lea sa iai i le va o le Atua ma Isaraelu faaletino, e mo na o sina taimi. I le 29 T.A., na ala mai iā Isaraelu se “fanau,” po o le tama folafolaina, o le Mesia lea, o Iesu Keriso. (Kalatia 3:16) Ae e leʻi talia o ia e tagata o lona nuu e avea ma Mesia. O le ala lea na ia fetalai atu ai iā i latou: “Faauta, ua tuua lo outou fale, e faatafunaina.” (Mataio 23:38) Talu mai lenā taimi, ua lē o toe faatasi mai le Atua i se nuu faapitoa ma ni ona faafitauli. Ae ua ia faaavanoa faamanuiaga mo tagata  uma e aunoa ma sona faailogaina o se isi. Seʻi o tatou iloiloina ni faaaʻoaʻoga.

Meaalofa mo Tagata Uma

O le meaalofa sili a le Atua i tagata, o le taulaga togiola lea a Iesu Keriso. (Roma 6:23) Ua tatou saʻoloto ai mai le agasala ma le oti, ma ua tatou maua ai le avanoa i le ola e faavavau. O lenei meaalofa, e mo tagata uma “mai ituaiga uma, ma gagana eseese, ma nuu, atoa ma atunuu.” (Faaaliga 5:9) Ioe, e finagalo le Atua ia maua e tagata uma e “faatuatua iā” Iesu Keriso le “ola e faavavau.”—Ioane 3:16.

E fau ma soloi le mau faamanuiaga e maua e i latou e faalogo i le tala lelei o le Malo o le Atua. (Faaaliga 14:6, 7) Ua ala mai ai le faamoemoe mo le lumanaʻi faapea ma fautuaga aogā e maua ai se olaga fiafia i le taimi nei. E aunoa ma sona faailoga tagata, ua fuafuaina ai e le Atua le ‘talaʻiina atu o lenei tala lelei o le malo i le atu laulau uma, e fai ma molimau i nuu uma.’ (Mataio 24:14; 28:19, 20; Galuega 16:10) O lea tala lelei, o loo iai i le Tusi Paia, lea ua mafai nei ona maua sona vaega, pe afai e lē maua le Tusi Paia atoa, i le sili atu ma le 2,300 gagana. O Ieova o se Tamā alofa ma ua ia faaavanoaina atu e toetoe lava o tagata uma i le lalolagi ia latou maua “upu o le ola e faavavau.”—Ioane 6:68; Iosua 1:8.

O nei faamanuiaga, faapea ma isi meaalofa mai le Atua, ua avanoa mo tagata uma, mai so o se nuu, ituaiga, ma gagana. E lē faalagolago la le mauaina o le alofa ma faamanuiaga mai le Atua, i le nuu na fanau ai po o le ituaiga e tatou te iai.

O Ai e Alofagia e le Atua?

O le ā la e ao ona tatou fai ina ia alofagia ai i tatou e le Atua? Ua tali mai le aposetolo o Peteru e faapea: “O lē mataʻu iā te ia i nuu uma lava, ma fai le amiotonu, ua talia i latou e ia.” (Galuega 10:34, 35) O lona uiga, e lē lava le tau ina iloa le Atua. E ao ona ati aʻe le alofa moni mo ia, i lo tatou matataʻu lea ia ‘aua neʻi faia se mea e lē fiafia ai o ia. E ao foʻi ona tatou “fai le amiotonu,” pe ia matuā faatino le faia o le mea e lelei i le silafaga a le Atua.

O se faataʻitaʻiga: I le tele o atunuu, o loo iai le avanoa e aʻoʻoga uma ai tamaiti, ae na o i latou e ō atu i le aʻoga ma sogasogā e aʻoaʻo o le a maua aogā. E faapena foʻi ona iai le alofa o le Atua mo tagata uma, ae e manaʻomia se taumafaiga mai iā i tatou. O lea taumafaiga e manaʻomia ai le faitauina o le Tusi Paia, le faatuatua i le taulaga togiola a Keriso, ma ia ola e tusa ai o mataupu silisili o le Tusi Paia. Pe afai e tatou te matuā “saʻiliʻili . . . iā Ieova,” o le a tatou uia le ala e fiafia mai ai o ia iā i tatou.—Salamo 105:3, 4; Faataoto 2:2-9

[Ata i le itulau 25]

Ua foaʻi mai e le Atua “upu o le ola e faavavau” mo tagata o nuu uma