Se Lalolagi e Aunoa ma Sē e Matelāina

SEʻI manatu foʻi i faalogona o se tamā alofa pe a vaai atu o loo mafatia lana fanau ona o le matelāina. E momomo lona loto i le alofa. Afai la o le lagona lenā e iai i se matua, seʻi manatu ane la i lagona o lo tatou Tamā agaalofa o loo i le lagi. Ua ia silafia lelei puapuaga o loo iai le faitau miliona o tagata ua matelāina.

E ui i taumafaiga aogā a le lalolagi auā le fafagaina o i latou o loo matelāina, ae e oo mai i le amataga o le senituri lona 21, ua faateleina i latou e lē o lava taumafa. Ae e mafai e lo tatou Tamā o i le lagi, o Ieova, ona tafiesea le matelāina, ma o le a ia tafiesea e faavavau. E faapefea ona tatou iloa lea mea?

Ua faapea mai le Tusi Paia, ina ua tuu e le Atua Atamu ma Eva i le faatoʻaga i Etena, na ia avatu iā i laʻua mea uma e la te manaʻomia ina ia mautū, fiafia, ma ia lava a la taumafa. Na fetalai atu le Atua iā i laʻua: “Faauta, ua ou foaʻi atu iā te oulua o laau afu uma e tutupu ma o latou fua o i le fogāeleele uma lava.” O le fuafuaga a le Atua mo le fanau a Atamu ma Eva, ia latou ‘faatumu le lalolagi’ ma ia lava ma totoe mea taumafa lelei mo tagata uma.—Kenese 1:28, 29.

E ui na tetee le uluaʻi tagata i Lē na faia i laʻua ma lē maua ai lana faamanuiaga, ae e leʻi suia ai le fuafuaga a le Atua mai le amataga mo le tagata. E taʻua i le Tusi Paia Ieova, o Lē “avatua le mea e ʻai i ē o fia aai,” ma e tele le mau valoaga o loo iai e faaalia ai, o le a ia tafiesea faafitauli uma ua ala ai ona faigatā ona lava taumafa.—Salamo 146:7.

Ina ua fai atu soo o Iesu e na te taʻu mai se faailoga po o se faamaoniga e iloa ai le taimi e faavaeina ai lona Malo ma faalaa mai ai i mataupu fai a le lalolagi, na faamatalaina e Iesu tulaga o le a vaaia a o lumanaʻi lona faalaa mai, ma o se tasi o ia mea, o “oge.” Tatou te mautinoa ua toe o se aga ona muta lea o puapuaga o tagata, pe a tatou iloiloina lelei faamatalaga a Iesu. *—Mataio, mataupu 24.

Ua faapea mai le valoaga i le Salamo 72:16 e faatatau i le Parataiso lea o le a faavaeina e le Atua: “E taumafa o saito i le nuu i tumutumu lava o mauga; e gasē ona fua e pei o Lepanona.” I Isaraelu anamua, sa tele lava ina totō saito i vanu. Ae i tulaga faamanuiaina lea o loo taʻua i le valoaga, e oo i fanua lafulafuā ma toafa, o ni fanua e lē masani ona maua mai ai ni taumafa, o le a fua tele mai. Na faamatalaina e se tasi tagata e poto i le Tusi Paia e faapea: “I le vaitaimi o le Mesia, o le a pei ua soo le laufanua i le tutupu lauolaola o saito, e oo lava i tumutumu o mauga. E totōina foʻi saito i mea maupuʻepuʻe, ma ufitia ai le laueleele i saito e mananaia i le vaai, ma ua matua mo le seleselega.”

E telē lava se eseesega o le lumanaʻi lea o loo taʻua i le Tusi Paia ma le tulaga o loo iai le faitau miliona o tagata i aso nei! Ioe, i le lumanaʻi lea o loo folafola mai e le Atua, o le a “fua mai e le laueleele ona lava fua; o le Atua, o lo matou Atua lava na te faamanuia mai i matou.”—Salamo 67:6.

Pe afai e tou te fia malamalama atili ma lou aiga pe faapefea ona maua nei faamanuiaga faapea ma isi mau faamanuiaga o loo iai i valoaga a le Tusi Paia, aua le faatalatū e talanoa i se Molimau a Ieova i lo outou vaipanoa, pe tusi i le tuatusi mo le tou vaipanoa o loo i le itulau e 5 o lenei mekasini.

[Faaopoopoga i lalo]