Malosi e Pei o se Talavou e Faavavau!

E LĒ o toe umi, ona oo lea o le oti i le tagata sa tautau i autafa o Iesu. Na ia ʻaiʻoi ane iā Iesu: “Iesu e, ia e manatua mai aʻu, pe a e afio mai i lou malo.” Na tali atu Iesu: “E moni, ou te fai atu iā te oe i le asō, ta te faatasi ma oe i parataiso.” (Luka 23:42, 43, NW) E lē o taʻua mai lona igoa, ae o lea tagata, e lē o se tagata maʻi ua afu lona soifua, ae o ia o se pagota ua faasalaina i le oti. E ui i lea, e telē se faamāfanafanaga mo i latou ua afu le soifua, mai le tulaga pagatia o lenei tagata.

E mataʻina tele le uiga ese o le mautinoa na iai i lea tagata! E ui o loo faasolosolo mālie le oo ane o le maliu iā Iesu a o tautau o ia i tafatafa o le pagota, ae na mautinoa e le pagota, o le a avea Iesu ma Tupu i le Malo o le Atua. E lē gata i lea, na ia manatunatu, atonu o le a manatuaina o ia e Iesu i se aso. Seʻi mafaufau la i le taimi o le nofoaiga a Iesu, e iai se aso e toe ala mai ai lea pagota mai le oti, ma ola ai i se parataiso matagofie!

E tutusa le tulaga o loo iai tagata, ma le pagota e pei ona taʻua i inei. E faapefea? Po o le ā lava le matua ua tatou iai, ua tatou agasala uma, ma ua manaʻomia ai le faaolataga. (Roma 5:12) I le pei o le pagota, e mafai ona tatou liliu atu iā Iesu mo le faamoemoe, faapea le faamoemoe mo se mapusaga mai faafitauli tigā e oo mai ona o le olaga matua. O le mea moni, ua ofo mai e Iesu le faamoemoe o le ola e faavavau, i le parataiso i le lalolagi, e atoatoa lelei ai le tino ma le mafaufau.—Ioane 3:16, 36.

Fou Mea Uma mo Ē Matutua ma Talavou

O i latou e mau ai i le lalolagi pe a pule le Malo o Keriso, o le a “faafiafia i latou iā te i latou ona o le manuia e tele.” (Salamo 37:11) E leai se tasi o le a faapea mai: “Ou te maʻi.” (Isaia 33:24) So o se faalētonu o loo tatou feagai, o le a faaleleia, auā e ‘osooso ai le pipili e pei o le ʻaila, e pese ai foʻi le laulaufaiva o le gūgū.’ (Isaia 35:6) O le a toe malolosi ē ua matutua e pei o talavou, ma o le a ‘ola lelei e sili i le tama itiiti.’—Iopu 33:25.

 Po o se tulaga tatau le teu o lea faamoemoe i o tatou loto? Ia, e lelei ona mafaufau i Lē na faia le folafolaga o le Parataiso i le pagota a o lata lona oti. I le tele o taimi, na aumai ai e tagata iā Iesu i latou e pipili, mumutu, tauaso, ma tutuli. Na naunau o ia e faamālōlō “i maʻi uma, ma maʻi tigā uma.” (Mataio 9:35, 36; 15:30, 31; Mareko 1:40-42) Na ia faatinoina le mea o le a faia e lona Malo. Na toe faatutūina foʻi e Iesu ni tagata ua maliliu. (Luka 7:11-17; Ioane 11:38-44) O lona faia faapea, ua ia faamautinoa ai lana folafolaga e faapea, “e faalogo ai i lona leo o i latou uma ua i tuugamau, ma latou ō mai ai.”—Ioane 5:28, 29; Galuega 24:15.

Seʻi manatu ane la i le toetū mai i le Parataiso ae ua fou le tino, lelei le vaai, lagona le tausagi o manu, ma leo fiafia, ua lē toe tigā lima ma vae, faapea ma se mafaufau ua lelei atoatoa. O le a lē toe iai ni “aso leaga” e māfua mai le olaga matua. (Failauga 12:1-7; Isaia 35:5, 6) E oo foʻi i le oti, o le a “faaumatia” e faavavau.”—1 Korinito 15:26, 54.

Pe a fua mea o loo tutupu i le lalolagi ma valoaga o le Tusi Paia, ua iloa ai ua lalata ona lē toe iai se ola matua e pei ona iai nei. (Mataio 24:7, 12, 14; Luka 21:11; 2 Timoteo 3:1-5) Ua lata mai le taimi o le a toe malolosi ai e pei o talavou ē ua afu le soifua, o loo faatuatua i le Atua ma auauna iā te ia, ma o le a malolosi e faavavau!

[Pusa/Ata i le itulau 25]

Faamaʻai Lou Faiʻai!

E malolosi maso o le tino, pe a fai faamalositino, e faapena foʻi le faiʻai, e maai pe a faagaoioi. Ina ia ola le faiʻai, e manaʻomia ona tatou faia ni mea e fou. O nisi nei o mea e faamalosia ma faaleleia ai sela o le faiʻai.

▪ Ati aʻe le naunau i mea fou, e pei o le aʻoaʻo e uiga i ata ma mamanu eseese, o paso eseese e faaaogā ai upu ma ata, ma aʻo se gagana fou.

▪ Ia faamasani ma talanoa i tagata eseese, e iloa ai foʻi nisi mea fou ma atili maʻai ai le faiʻai.

▪ Ia faaleleia lou tulaga faaleagaga. “Aua neʻi popole outou i se mea e tasi, a ia faailoa atu o outou manaʻo i mea uma lava i le Atua, i le tatalo, ma le faatoga, atoa ma le faafetai. O le manuia foʻi mai le Atua, o loo silisili lava i mea uma e manatu i ai, e leoleoina ai o outou loto atoa ma o outou mafaufau iā Keriso Iesu.”—Filipi 4:6, 7.

▪ Faitau i tusi lelei ma ati aʻe, ma faamatala i isi mea ua e iloa mai ai.

▪ Toe faasolo i lou mafaufau tala fou o le leitiō ma le TV e olaola ai lou toe manatua o mea, o mea lata mai ma mea ua leva.

▪ Afai e te taumatau, faaaogā lou agavale e oomi ai ki o le mea e faatonu ai le TV, ma fai ai le telefoni, ma fufulu ai ou nifo.

▪ Ia faaaogā ou faalogona eseese (vaai, faalogo, tofo, sogisogi, ma le paʻi) i le tele e mafai ai a o faagasolo le aso.

▪ Ia e aʻoaʻo ma asiasi i nofoaga e mataʻina i le vaai, o nofoaga lata mai ma nofoaga mamao.

[Ata i le itulau 24, 25]

O le folafolaga a Iesu, ua toeitiiti ona mou lea o tigā ona o le ola matua, ae o le a malosi e pei o se talavou e faavavau