Ua Fesili Mai Talavou . . .

O le ā se Auala e Tetee Atu ai i Faiga Faaleituaiga i le Aʻoga?

“O aso uma, o loo talanoa ai tamaiti i faiga faaleituaiga. E oo i teine, e latou te ōle tama, ma faia ai lava feusuaʻiga i le aʻoga.”—Ailini, 16 tausaga.

“I laʻu aʻoga, e tusa lava pe e iloa atu e isi tamaiti, ae fai lava e tamaiti e tauatane amio matagā e aunoa ma se popole i ai.”—Mikaele, 15 tausaga. *

PO O masani ona talanoa tamaiti o lau vasega i faiga faaleituaiga? Po o iai nisi e lē gata ina talanoa, ae ua faatino? Afai o lea, atonu e tutusa ou lagona ma se tasi teine talavou o lē na fai mai, ua pei lou iai i le aʻoga o loo e “galue i mea e puʻe ai ata leaga.” O le mea moni, o loo feagai pea lava pea talavou ma le mau faaosoosoga ia talanoa i feusuaʻiga, po o le faia foʻi.

Atonu e te faalogo o taʻu e nisi talavou o lau vasega le ō e “eva,” ma ua avea le feusuaʻi e pei o se taaloga. O nisi talavou, ua feusuaʻi ma isi e leʻi leva ona latou masani. A o isi talavou, ua latou faia feusuaʻiga ma nisi ua latou feiloaʻi i ai i le Initineti i le komepiuta, e ui ina e latou te lē masani. O le uiga o le faia faapea, ia na ona feusuaʻi e aunoa ma le tau manaʻomia fua o le alofa. Fai mai Danielle, o se tamaʻitaʻi ua 19 ona tausaga: “E leai se uiga, ae ua faamalie ai le manaʻo o tagata e toʻalua, ona uma ai foʻi lea i inā.”

O lea, e lē o se mea e ofo ai ona i le tele o aʻoga, e fiafia tamaiti e talanoa i mea faapea. Ua faamatala mai e se teine e 17 tausaga i le nusipepa a lana aʻoga e faapea: “Pe a mavae le faaiʻuga o le vaiaso, e uiga ese le tele o tala e tusa o ai na eva ma mea na fai ai, ma e faamatalatala uma i uō.”

Afai o e taumafai e ola e tusa ma le Tusi Paia, atonu e te lagona lou ese mai ai, auā o lea ua siʻomia oe e tagata e fiafia e talanoa i faiga faaleituaiga. Afai e te lē fia auai, e latou te ula iā te oe. O se tulaga lea e faatalitalia, auā ua fai mai le Tusi Paia, a lē malamalama isi iā te oe, atonu o le a latou “faifai” iā te oe. (1 Peteru 4:3, 4) Ae e leai se tagata e fiafia e faifai mai isi iā te ia, a ea? O lea la, e mafai faapefea ona e teena faiga faaleituaiga i le aʻoga ma tumau lou fiafia, ona o lou maumaututū?  Muamua lava, e tāua ona e malamalama pe aiseā ua malolosi tele ai faaosoosoga faaleituaiga.

Ia Malamalama iā te Oe Lava

I le taimi o lou talavou, ua tele ni suiga e iai, i le tino faapea ma faalogona. O le a matuā malolosi lava ou lagona i faiga faaleituaiga i lea taimi. Ae aua e te popole, o le lagona lea e oo i tagata uma. O lea, afai e iai nisi o le isi itupā o lau aʻoga e te fiafia i ai, e lē faapea o oe e leaga, pe e lē mafai ona e ola mamā. E mafai ona e ola mamā pe afai e te manaʻo e faia faapea!

E lē gata o loo e tauivi ma faalogona o se talavou e pei ona masani ai, ae e iai foʻi se isi mea e ao ona e iloaina. Talu ai lo tatou lē lelei atoatoa, o tagata uma lava, e māfuli atu i le leaga. E oo foʻi i le aposetolo o Paulo, na ia taʻutino mai: “Ua ou iloa le tulafono ese i oʻu tino, o loo tau le taua i le tulafono a loʻu mafaufau, ua fai foʻi aʻu ma tagata o taua i le tulafono a le agasala o loo i oʻu tino.” Na fai mai Paulo na ia lagona o ia o se tagata “malaia,” ona o lona lē lelei atoatoa. (Roma 7:23, 24) Ae na manumalo o ia, ma e faapena foʻi oe!

Ia Malamalama i Tamaiti o Lau Vasega

E pei ona taʻua muamua, atonu o loo talanoa talavou o lau vasega i faiga faaleituaiga i taimi uma, po o gugutu foʻi i a latou evaevaga. Ia faaeteete ina neʻi e aafia ai. (1 Korinito 15:33) Ae e lē faapea ai e te manatu iā i latou o ou fili. Aiseā?

E tutusa lava lagona o loo iā i latou ma ou lagona. O loo iai foʻi iā i latou le lagona e māfuli atu lava e fai le leaga. Ae o le eseesega ma oe, o nisi o i latou, o loo ‘mananaʻo i mea faafiafia a e leai se manaʻo i le Atua.’ A lē o lenā, e ō mai i aiga e leai se “lotoaiga,” po o se fealofani o ona tagata. (2 Timoteo 3:1-4) Atonu o nisi o lau vasega, e lē o aʻoaʻia ma le alofa e o latou mātua i amioga lelei.—Efeso 6:4.

E lē o iloaina e talavou o lau vasega le tulaga leaga e oo i ai pe a lē pulea o latou faalogona, auā ua latou lē maua le poto sili lea e faigofie ona e maua mai le Afioga a le Atua. (Roma 1:26, 27) Ua pei ua avatu e o latou mātua se taavale saosaoa iā i latou, ma tuu e ō i ala o loo pisi ai taavale, ae e leʻi aʻoina muamua ia iloa ave le taavale. E na o sina taimi e lagona ai le fiafia i lana taavale, ae e mautinoa lava e tupu ai se faalavelave. O lea la, o le ā e mafai ona e fai pe afai e talanoa lau vasega i faiga faaleituaiga a o e iai, ma latou tauanau oe e auai i a latou amioga lē mamā?

Teena Talanoaga Lē Mamā

Pe a amata ona talanoa lau vasega i faiga lē mamā, atonu e oso ane lou fia faalogo i ai ma faaopoopo atu i ai, ina ia e lē ese mai iā i latou. Ae o le ā le manatu o le a oo ane iā i latou? Pe e faaalia i lea tulaga le tagata moni e iai oe, po o lea e te manaʻo ia iloa ai oe?

O le ā la e ao ona e fai pe a e iloa ane o lea ua e aafia i se talanoaga e tusa o faiga lē mama? Ia e tuumuli ese loa i le taimi lea! (Efeso 5:3, 4) Ua faapea mai le Tusi Paia: “O lē ua faautauta, na te iloa atu le leaga, ma lafi ai.” (Faataoto 22:3) Afai e te alu ese mai le talanoaga, e lē faapea ai ua e lē āva, ae ua iloa ai lou faautauta.

O le mea moni, e leai se mea o le a e matamuli ai fua pe a e alu ese mai se talanoaga e lē mamā. Auā o le mea moni, e iai talanoaga e te alu ese ai e aunoa ma se lagona māsiasi, aemaise lava pe afai e te faalēnaunau, ma lē fia auai i le mataupu o loo talanoaina. O se faataʻitaʻiga, faapea o lea e talanoa nisi o lau vasega e ō e gāoi, ma faaaogā  ai fana. Faamata e te nofonofo ai lava i inā ma faalogologo i le talanoaga? Afai o lea, ua avea la oe o se tasi o loo auai. O se mea poto la lou filifili e tuumuli ese. Ia faapena foʻi ona fai pe a oo ina talanoaina faiga lē mamā. E masani lava ona mafai ona e tuumuli ese e aunoa ma le foliga atu e te faafiaamiotonu ma iʻu ai ina ulagia oe.

Atonu e lē o taimi uma e mafai ai ona e alu ese mai se tulaga faapea. O se faataʻitaʻiga, atonu o loo taumafai talavou o loo i ou autafa i le vasega, ia e aafia i a latou talanoaga i faiga faaleituaiga. I tulaga faapea, tautala i ai ma le mautinoa ma le faaaloalo, e soia le faalavelave iā te oe. Afai e lē faalogo atu, e mafai ona e fai e pei o Pelenara. Fai mai o ia: “E latou te leʻi iloaina loʻu fai i le faiaʻoga, ia sui le mea ou te nofo ai.”

Ia Iloa Ona Tali Atu

E iai se taimi o le a fia iloa ai e nisi o lau vasega pe aiseā e te lē auai i a latou talanoaga lē mamā. Ia e mafaufau lelei i lau tali pe a latou fesili atu i ou talitonuga. O le mea moni e iai nisi e fesili atu ona e ula iā te oe, ae e lē fia malamalama. Ae afai e fia malamalama moni, ia faailoa atu lou fiafia i ou talitonuga. Ua tele talavou ua faaaogāina le tusi Fesili ua Fesili Mai ai Talavou—Tali e Aogā e fesoasoani ai i tamaiti i a latou vasega ia malamalama i aogā o le ola e tusa ai ma tapulaa a le Tusi Paia. *

Ia Maumaututū

O le ā e te fai pe afai e faamalosi ona tago atu se isi, po o le taumafai foʻi e faakisi oe? Afai e te tuu e na te faia lea tulaga, atonu o le a atili ai ona ia faia lea amio valea iā te oe. O loo faamatalaina i le Tusi Paia se tama talavou na puʻe e se fafine e amio lē mamā ma faasogi iā te ia, ae e leʻi sola ese ai. Na ia tuu ai pea lea fafine, e talanoa faatosina atu iā te ia. O le ā le mea na oo i ai? “Ua mulimuli loa o ia iā te ia, e pei o le povi ua alu a fasia.”—Faataoto 7:13-23.

Ae e leʻi faapea ona faia e Iosefa ina ua faaosoosoina o ia e pei ona taʻua i luga. Na lē aunoa ona taumafai le avā a lona matai e faatosina iā te ia, ae na maumaututū lona teena o ia. Ina ua taumafai le fafine e puʻe iā te ia, e leʻi faatalatū o ia ae sola ese loa.—Kenese 39:7-12.

Atonu e manaʻomia ona e gaoioi maumaututū pei o Iosefa, pe a taumafai se isi i lau vasega, po se isi e te masani ai, e tago atu iā te oe i se auala e lē lelei. Ua fai mai Ailini: “Afai e tago mai se tama iā te aʻu, ou te fai i ai e aua. Afai e lē faalogo, ou te ʻeʻē i ai e aua le paʻi mai iā te aʻu.” Ua fai mai atili Ailini e tusa o tama i lana aʻoga: “E lē faalogo mai pe afai e lē matuā fai lava i ai.”

O le a faaaloalo atu foʻi lau vasega iā te oe pe afai e te lē fia faalogo i a latou talanoaga lē mamā, ae pe a talafeagai, ia faamatala lelei i ai ou talitonuga i amioga, ma ia e maumaututū ia teena uiga lē mamā e fai atu iā te oe. O se isi foʻi aogā, o le a e lagona ai lou fiafia iā te oe lava. Ae o le mea sili, o le a fiafia mai Ieova iā te oe!—Faataoto 27:11.

[Faaopoopoga i lalo]

MEA E MAFAUFAU I AI

▪ Po o le ā sau tala e faailoa atu ai e te lē fia auai i talanoaga lē mamā?

▪ O le ā lau tala e fai, ma le mea e te faia, pe a fai atu ni uiga lē mamā iā te oe?

[Ata i le itulau 19]

Pe a talanoaina faiga faaleituaiga, alu ese loa

[Ata i le itulau 20]

Ia maumaututū e teena faiga lē mamā e fai atu iā te oe