Ua Fesili Mai Talavou . . .

O le ā se Mea o le a Fai i Loʻu Olaga?

“Ou te leʻi popole muamua i le lumanaʻi. Ae ina ua lata o le a iʻu aʻu aʻoga, na ou iloa ai o lea o le a ou alu e faigaluega, ma amata ona ou togi pili.”—Aleki, 17.

A O E laʻitiiti, pe sa e manatu i se galuega e te fia faia pe a e matua? O le ā sou lagona o loo iai e tusa i na moomooga? Po o e lagona le lē mautonu po o le a faapefea ona e tausi oe auā o lea ua e matua? Ia e lē na o oe o iai na lagona. E tusa ai ma le tusi i le filifilia o galuega o le Career Coaching Your Kids, e tāua tele i talavou le filifilia o se galuega.

Ae i le isi itu, atonu o loo mamao lea manatu mai iā te oe. Atonu o loo e pupū ia faafiafia lou olaga. E leai se leaga o le faafiafia, auā ua fai mai le Tusi Paia “ia fiafia foʻi lou loto i aso o lou tauleʻaleʻa.” (Failauga 11:9) Peitaʻi ane, o le taimi lava lenei e ao ai ona e manatu po o le ā o le a fai i lou olaga. Ua fai mai le Faataoto 14:15: “O lē ua mafaufau, ua faautauta o ia i lona ala.” E faapefea ona e mafaufau i ou ala?

“Ia Iai ni Ou Sini”

Seʻi faapea la o lea o le a e malaga mamao ese atu mai lou aiga. Atonu e te siaki muamua se faafanua, po o lē fea le auala e lelei mo oe. E tai faapena le fuafuaina o lou lumanaʻi. “E tele mea e mafai ona e fai,” o le tala lea a Mikaele, o se talavou e galue i se tasi o lālā a Molimau a Ieova. E faapefea ona e filifili? Fai mai Mikaele: “E fuafua lava i ou sini.”

Ia manatu i lou sini e tusa o le taunuuga lea o lau malaga. Atonu e te lē taunuu pe a fai e te fealualuaʻi solo. E leai se eseesega ma lou siaki i le faafanua, po o fea tonu o loo e agaʻi i ai. O le a e faia ai e pei ona fautua mai le Faataoto 4:26: “Ia mafaufau i le ala o ou vae.”

I le faagasologa o tausaga, e tele filifiliga tāua o le a e faia e tusa ai o le tapuaʻiga, galuega, faaipoipoga, aiga, ma isi mataupu tāua. O le a faigofie ona faia ni filifiliga poto, pe  afai ua e mautinoa ou sini. O lea, a o fuafua lou olaga, o loo iai se isi vala e lē mafai lava ona faagaloina.

“Manatua Lē na Faia Oe”

Ina ia e fiafia moni, ia e teuloto upu a le tupu poto o Solomona: “Ia e manatua lē na faia oe i ona pō o lou tauleʻaleʻa.” (Failauga 12:1) Ia faia au filifiliga ia tusa ma lou faanaunauga e faafiafia le Atua.

Aiseā e tāua ai lea tulaga? Ua fai mai le Tusi Paia i le Faaaliga 4:11:“Lo matou Alii e, ma lo matou Atua, e tatau lava oe ina ia tuuina atu iā te oe le viiga, ma le faaneeneega, ma le mana; auā na e faia mea uma lava, ona o lou finagalo foʻi e i ai i latou ma ua faia.” Ioe, e ao i meafaiola uma i le lagi ma le lalolagi ona vivii i Lē na faia i latou. Pe e te lē faafetai ea ona ua ia foaʻi mo oe “le ola, ma le mānava, ma mea uma lava i le vao mea atoa”? (Galuega 17:25) Pe e lē uunaʻia ai ea oe e foaʻi atu iā Ieova le Atua, ona o lou talisapaia o mea uma ua ia foaʻi mo oe?

O lo latou manatuaina pea o Lē na faia i latou, ua filifili ai le tele o talavou Molimau a Ieova ia auauna faataimi atoa. Auā o lea faiva, o se sini tāua, ma e tele faamanuiaga e maua ai. (Malaki 3:10) Ae e ao ona muaʻi fuafua lelei. Ia e fesili ifo iā te oe lava: ‘O ā mea e mafai ona ou fai, e tausi ai aʻu a o faia laʻu faiva faataimi atoa?’

O Keli, ua 27 ona tausaga, na amata lana fuafuaga mai lava a o itiiti. Na manino lona sini, o le faiva faataimi atoa. A o faasolo ona tausaga mai le 17-19, na amata ona fuafua sana  galuega e fai. Fai mai o ia: “Na ou manaʻo i se galuega e mafai ona tausi ai aʻu a o oʻu paeonia.”

Na aʻoaʻoina Keli i se polokalame i le aʻoga maualuga, e fesoasoani ai i fomaʻi nifo. Na ia maua se faailoga maualuga i le setete atoa. Ae leʻi avea lea ma mea e galo ai lona sini autū. Na fai mai o ia, “O le mea na sili iā te aʻu, o le faiva faataimi atoa. O isi mea uma e tulaga lua.” O loo fai pea lana auaunaga faataimi atoa. Fai mai o ia: “Ou te lagona, o le filifiliga sili lea ua ou faia.”

Talanoa i Isi mo Fautuaga

Afai o loo e malaga i se nuu e te lē masani ai, e iai le taimi e te fesili ai i isi e faasino atu le auala, e tusa lava po o iai sau faafanua. E faapena foʻi le fuafuaina o lou lumanaʻi. Ia talanoa i isi mo fautuaga. Ua fai mai le Faataoto 20:18: “E faatumauina mafaufauga i le filifiliga.” O le mea moni, e maua taʻiala tāua mai ou mātua. E lelei foʻi ona talanoa i Kerisiano ua matutua faaleagaga, o loo ola e tusa ai ma le finagalo o le Atua. Fai mai Ropeto: “Talanoa i tagata o loo fai ma faataʻitaʻiga lelei i lau faapotopotoga, po o isi faapotopotoga lata ane. O le a mafai ona latou faamatala atu ni mea e te leʻi mafaufauina.”

Ae ua sili Ieova i tagata uma, i lona fia fesoasoani atu ina ia e faia filifiliga e mauaina ai le fiafiaga sili. O lea, ōle atu iā te ia ina ia e ‘iloa lona finagalo’ e tusa ai o lou lumanaʻi. (Efeso 5:17) Afai e te faatuatua iā Ieova ma lou loto atoa, “ona faatonuina ai lea e ia lava ou ala.”—Faataoto 3:5, 6.

Ua iai nisi mataupu i le faa-Peretania o le faasologa “Ua Fesili Mai Talavou . . . ” e maua i le Initineti i le www.watchtower.org/ype

MEA E MAFAUFAU I AI

▪ O ā agavaa ma mea e mafai ona e fai?

▪ Pe e te iloa ni auala e faaaogāina ai ia agavaa auā le viiaina o Ieova?

▪ O lē fea ituaiga o auaunaga faataimi atoa o loo taʻua, e te fiafia i ai?

[Pusa i le itulau 18]

SE OLAGA E LEAI SE UIGA

Ua faapea mai le Tusi Paia: “O ē manaʻo i le fia mauʻoa, e maua i latou i le faaosoosoga, ma le mailei, ma tuʻinanau e tele e valea ai ma leaga ai, o mea ia e goto ai tagata i le fanoga ma le malaia.” O le ala i le fia mauʻoa e tumu i mailei e tele! Ae o se ala e oo atu ai i aitalafu, popolega, ma paʻū ai faaleagaga.—1 Timoteo 6:9, 10.

[Pusa/Ata i le itulau 19, 20]

PAEONIA

O se Kerisiano ua papatiso o loo avea ma faataʻitaʻiga lelei, ua fuafua ia lē itiiti ifo i le 70 itula i masina taʻitasi e talaʻi ai le tala lelei o le Malo o le Atua. E ala i aʻoaʻoga ma le poto masani, ua faaleleia ai o latou agavaa e aʻoaʻo atu ai le Tusi Paia.

AUAUNAGA I PETELI

O tagata i Peteli, ua galulue i lālā o Molimau a Ieova i le saunia, lomia, ma le avatuina o lomiga faale-Tusi Paia i faapotopotoga. O tofiga uma i Peteli, o se faaeaga o le auaunaga.

AUAUNAGA I LE MEA O TELE AI SE MANAʻOGA

O nisi paeonia ua mafai ona ō i vaipanoa o loo manaʻomia tele ai ni tagata talaʻi. O isi ua latou aʻoaʻoina se gagana fou ma galulue i se nuu po o se faapotopotoga e tautatala i lenā gagana.

O LE AUAUNAGA I ATUNUU ESEESE

O ē o loo auauna i atunuu eseese, e malaga atu i isi atunuu e fesoasoani i le fausia o Maota mo Sauniga ma ofisa o lālā o Molimau a Ieova. O se auaunaga paia e tai pei o lea na faia e i latou na fausia le malumalu i le taimi o Solomona.—1 Tupu 8:13-18.

AʻOGA MO TOLENIGA I LE FAIVA

O se aʻoga e faia mo le valu vaiaso, e aʻoaʻoina ai toeaina nofofua ma auauna o le faiva nofofua, o ē ua agavaa i mataupu tau i le faalapotopotoga, faapea lauga i le lautele. O nisi ua tofia e galulue i o latou lava atunuu, ae o isi ua auina atu i atunuu ese.

AUAUNAGA FAAMISIONARE

O paeonia ua agavaa ma e malolosi, ua aʻoaʻoina auā le auaunaga i atunuu ese. O olaga o misionare, o ni olaga e matuā fiafia ma aogā tele.

[Pusa/Ata i le itulau 19]

O LE A FAAPEFEA ONA FAAAOGĀ LOʻU OLAGA?

O lenei polokalame ua fai e Molimau a Ieova, o loo faatalanoa mai ai ni talavou mai le Iunaite Setete, Pasili, Peretania, ma Siamani. E lē o toe umi ona maua ai lea i isi gagana.

[Ata i le itulau 18]

“E fuafua lava i ou sini.”—Mikaele, o se tasi o le aiga Peteli

[Ata i le itulau 19]

“O le filifiliga sili lea ua ou faia.”—Keli, ua atoa le ono tausaga o paeonia

[Ata i le itulau 20]

“Talanoa iā i latou ua avea ma faaaʻoaʻoga lelei.”—Ropeto, o se tasi o le aiga Peteli